(ուժը կորցրել է բացառությամբ որոշման 2-րդ կետի` 31.05.04 թիվ 436-Ն որոշում)
i
605.0214.010703
ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
«01» 07 2003 Թ.
ՊԵՏԱԿԱՆ ԳՐԱՆՑՄԱՆ ԹԻՎ 60503208
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔԱՂԱՔԱՑԻԱԿԱՆ ԾԱՌԱՅՈՒԹՅԱՆ ԽՈՐՀՈՒՐԴ
ՈՐՈՇՈՒՄ
17 հունիսի 2003 թվականի N 214-Ն
ԺԱՄԿԵՏԱՅԻՆ ԱՇԽԱՏԱՆՔԱՅԻՆ ՊԱՅՄԱՆԱԳՐԻ ԿՆՔՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ
i
Ղեկավարվելով «Քաղաքացիական ծառայության մասին» Հայաստանի Հանրապետության օրենքի 18-րդ հոդվածի 2-րդ մասի պահանջով` Հայաստանի Հանրապետության քաղաքացիական ծառայության խորհուրդը որոշում է.
1. Սահմանել ժամկետային աշխատանքային պայմանագրի կնքման կարգը (հավելված):
i
2. ՈՒժը կորցրած ճանաչել Հայաստանի Հանրապետության քաղաքացիական ծառայության խորհրդի 2002 թվականի օգոստոսի 21-ի «Քաղաքացիական ծառայողի հետ ժամկետային աշխատանքային պայմանագրի կնքման և քաղաքացիական ծառայողի պարտադիր գործուղման կարգը սահմանելու մասին» N 33-Ն որոշումը:
Հավելված
Հայաստանի Հանրապետության
քաղաքացիական ծառայության
խորհրդի
2003 թվականի հունիսի 17-ի
N 214-Ն որոշման
ԿԱՐԳ
ԺԱՄԿԵՏԱՅԻՆ ԱՇԽԱՏԱՆՔԱՅԻՆ ՊԱՅՄԱՆԱԳՐԻ ԿՆՔՄԱՆ
1. Սույն կարգով կարգավորվում են քաղաքացիական ծառայության ժամանակավոր թափուր պաշտոնը զբաղեցնելու նպատակով տվյալ պաշտոնի անձնագրով նախատեսված փոխարինողի նշանակման, քաղաքացիական ծառայության կադրերի կարճաժամկետ ռեզերվում (այսուհետ` կադրերի կարճաժամկետ ռեզերվ) գտնվող քաղաքացիական ծառայողի պարտադիր գործուղման, քաղաքացիական ծառայության կադրերի երկարաժամկետ ռեզերվում (այսուհետ` կադրերի երկարաժամկետ ռեզերվ) գտնվող, ինչպես նաև մեկ այլ անձի հետ ժամկետային աշխատանքային պայմանագրի (այսուհետ` Պայմանագիր) կնքման հետ կապված հարաբերությունները:
2. Քաղաքացիական ծառայության պաշտոնը համարվում է ժամանակավոր թափուր հետևյալ դեպքերում.
ա/ հղիության, ծննդաբերության և երեխայի խնամքի կապակցությամբ արձակուրդի.
բ/ պարտադիր զինվորական ծառայության զորակոչվելու.
գ/ մասնագիտական գիտելիքների և աշխատանքային ունակությունների կատարելագործման նպատակով սահմանված կարգով քաղաքացիական ծառայողի մինչև երեք տարի ժամկետով գործուղման.
դ/ քաղաքացիական ծառայության պաշտոն զբաղեցնելու համար անցկացվող մրցույթի արդյունքում այդ պաշտոնում նշանակվելու համար մասնակից չընտրվելու.
ե/ քաղաքացիական ծառայողի կողմից իր ծառայողական պարտականությունները կատարելու ժամանակավոր անհնարինության.
զ/ օրենքով նախատեսված այլ դեպքերում:
3. Քաղաքացիական ծառայության ժամանակավոր թափուր պաշտոն առաջանալու դեպքում (բացառությամբ սույն կարգի 2-րդ կետի «ա», «բ» ենթակետերով նախատեսված, ինչպես նաև երկու ամիսը գերազանցող ժամկետով նույն կետի «գ» ենթակետում նշված գործուղման դեպքերի) այդ պաշտոնը զբաղեցվում է տվյալ պաշտոնի անձնագրով նախատեսված փոխարինող քաղաքացիական ծառայողի կողմից մինչև երկու ամիս ժամկետով` տվյալ պաշտոնում նշանակելու իրավասություն ունեցող պաշտոնատար անձի հայեցողությամբ:
4. Քաղաքացիական ծառայության ժամանակավոր թափուր պաշտոն առաջանալուց հետո փոխարինումը ձևակերպվում է տվյալ պաշտոնում նշանակելու իրավասություն ունեցող պաշտոնատար անձի (բացառությամբ քաղաքացիական ծառայության պաշտոն համարվող աշխատակազմի ղեկավարի, որի փոխարինումը ձևակերպվում է «Քաղաքացիական ծառայության մասին» Հայաստանի Հանրապետության օրենքի (այսուհետ` Օրենք) 15-րդ հոդվածի 2-րդ մասում նշված համապատասխան պաշտոնատար անձի) հրամանով (որոշմամբ)` մեկշաբաթյա ժամկետում:
Օրենքի 4-րդ հոդվածի 1-ին մասով նախատեսված մարմնի (այսուհետ` համապատասխան մարմին) աշխատակազմի ղեկավարը (իսկ քաղաքացիական ծառայող համարվող աշխատակազմի ղեկավարի փոխարինման դեպքում` Օրենքի 15-րդ հոդվածի 2-րդ մասում նշված համապատասխան պաշտոնատար անձը) սույն կետով նախատեսված հրամանի (որոշման) պատճենը եռօրյա ժամկետում ներկայացնում է Հայաստանի Հանրապետության քաղաքացիական ծառայության խորհուրդ (այսուհետ` Խորհուրդ):
5. Սույն կարգի 3-րդ կետում նշված փոխարինողի բացակայության կամ սույն կարգի 2-րդ կետի «ա» և «բ» ենթակետերով նախատեսված, ինչպես նաև երկու ամիսը գերազանցող ժամկետով սույն կարգի 2-րդ կետի «գ» ենթակետում նշված գործուղման դեպքերում համապատասխան մարմնի աշխատակազմի ղեկավարը (իսկ քաղաքացիական ծառայող համարվող աշխատակազմի ղեկավարի փոխարինման դեպքում` Օրենքի 15-րդ հոդվածի 2-րդ մասում նշված համապատասխան պաշտոնատար անձը) այդ մասին գրավոր հայտնում է Խորհրդին` եռօրյա ժամկետում:
6. Սույն կարգի 5-րդ կետում նշված գրությունն ստանալուց հետո հնգօրյա ժամկետում Խորհուրդն ընդունում է որոշում կադրերի կարճաժամկետ ռեզերվից հանելու և կադրերի կարճաժամկետ ռեզերվում գտնվող քաղաքացիական ծառայության տվյալ պաշտոնի անձնագրի պահանջները բավարարող քաղաքացիական ծառայողին պարտադիր գործուղելու վերաբերյալ:
7. Պարտադիր գործուղելու վերաբերյալ Խորհրդի որոշումն ստանալուց հետո եռօրյա ժամկետում տվյալ ժամանակավոր թափուր պաշտոնում նշանակելու իրավասություն ունեցող պաշտոնատար անձը պարտադիր գործուղումը ձևակերպում է առավելագույնը մեկ տարի ժամկետով իր հրամանով (որոշմամբ)` երկօրյա ժամկետում Խորհուրդ ներկայացնելով այդ հրամանի (որոշման) պատճենը:
8. Եթե կադրերի կարճաժամկետ ռեզերվում գտնվում են պարտադիր գործուղման ենթակա մեկից ավելի քաղաքացիական ծառայողներ, ապա պարտադիր գործուղման է ուղարկվում այն քաղաքացիական ծառայողը, որի վերջին զբաղեցրած քաղաքացիական ծառայության պաշտոնին համապատասխանում է քաղաքացիական ծառայության պաշտոնների հետևյալ խմբում առավելագույն ենթախումբը.
ա/ քաղաքացիական ծառայության ժամանակավոր թափուր կրտսեր պաշտոններ զբաղեցնելու դեպքում` քաղաքացիական ծառայության կրտսեր պաշտոնների խմբում և քաղաքացիական ծառայության առաջատար պաշտոնների խմբի 3-րդ ենթախմբում.
բ/ քաղաքացիական ծառայության ժամանակավոր թափուր առաջատար պաշտոններ զբաղեցնելու դեպքում` քաղաքացիական ծառայության առաջատար պաշտոնների խմբում և քաղաքացիական ծառայության գլխավոր պաշտոնների 3-րդ ենթախմբում.
գ/ քաղաքացիական ծառայության ժամանակավոր թափուր գլխավոր պաշտոններ զբաղեցնելու դեպքում` քաղաքացիական ծառայության գլխավոր պաշտոնների խմբում և քաղաքացիական ծառայության բարձրագույն պաշտոնների 2-րդ ենթախմբում.
դ/ քաղաքացիական ծառայության ժամանակավոր թափուր բարձրագույն պաշտոններ զբաղեցնելու դեպքում` քաղաքացիական ծառայության բարձրագույն պաշտոնների խմբում:
Այս պայմանի հավասարության դեպքում պարտադիր գործուղման է ուղարկվում քաղաքացիական ծառայության առավել բարձր դասային աստիճան ունեցող քաղաքացիական ծառայողը, իսկ այս պայմանի հավասարության դեպքում` քաղաքացիական ծառայության առավել երկար ստաժ ունեցող քաղաքացիական ծառայողը:
9. Պարտադիր գործուղման ձևակերպման մասին ոչ ուշ, քան մեկ օր առաջ տեղյակ է պահվում կադրերի կարճաժամկետ ռեզերվում գտնվող քաղաքացիական ծառայողին:
10. Կադրերի կարճաժամկետ ռեզերվում գտնվող քաղաքացիական ծառայողը չի կարող պարտադիր գործուղման ուղարկվել ժամանակավոր անաշխատունակության ժամանակաշրջանում:
11. Կադրերի կարճաժամկետ ռեզերվում գտնվող հղի կամ մինչև ութ տարեկան երեխա խնամող քաղաքացիական ծառայողն այլ վայր մեկնելու հետ կապված պարտադիր գործուղման է ուղարկվում միայն իր համաձայնությամբ:
12. Կադրերի կարճաժամկետ ռեզերվում գրանցված այն քաղաքացիական ծառայողների հետ, որոնց այլ վայր մեկնելու հետ կապված նախորդ պարտադիր գործուղման ժամկետի ավարտից անցել է մեկ տարուց պակաս ժամանակ, պարտադիր գործուղումը ձևակերպվում է միայն տվյալ անձանց համաձայնությամբ:
13. Պարտադիր գործուղումը ժամկետից շուտ ավարտվում է սույն կարգի 18-րդ կետով նախատեսված դեպքերում:
14. Կադրերի կարճաժամկետ ռեզերվում քաղաքացիական ծառայության ժամանակավոր թափուր պաշտոնի անձնագրի պահանջները բավարարող քաղաքացիական ծառայող գրանցված չլինելու դեպքում, սույն կարգի 5-րդ կետում նշված գրությունն ստանալուց հետո Խորհուրդը հնգօրյա ժամկետում քաղաքացիական ծառայության տվյալ պաշտոնում նշանակելու իրավասություն ունեցող պաշտոնատար անձին տրամադրում է տեղեկություններ քաղաքացիական ծառայության կադրերի երկարաժակետ ռեզերվում գտնվող քաղաքացիական ծառայության տվյալ պաշտոնի անձնագրի պահանջները բավարարող այն անձի մասին, ում հետ պետք է կնքվի Պայմանագիր:
15. Սույն կարգի 14-րդ կետում նշված Պայմանագիրը (հավելված) կնքվում է կադրերի երկարաժամկետ ռեզերվում գտնվող անձի հետ` մեկշաբաթյա ժամկետում:
16. Եթե կադրերի երկարաժամկետ ռեզերվում գտնվում են քաղաքացիական ծառայության ժամանակավոր թափուր պաշտոնի անձնագրի պահանջները բավարարող մեկից ավելի անձինք, ապա Պայմանագիրը կնքվում է կադրերի կարճաժամկետ ռեզերվում միանգամյա գտնվելու առավելագույն ժամկետը լրանալու հիմքով կադրերի երկարաժամկետ ռեզերվում գրանցված քաղաքացիական ծառայողի հետ, այս պայմանի հավասարության դեպքում` առավել երկար քաղաքացիական ծառայության ստաժ ունեցող անձանց հետ, այս պայմանի հավասարության դեպքում Պայմանագիրը կնքվում է քաղաքացիական ծառայության կադրերի ռեզերվում առավել երկար ժամկետով գտնվող անձանց հետ, իսկ այս պայմանի հավասարության դեպքում Պայմանագիրը կնքվում է առավել երկար աշխատանքային ստաժ ունեցող անձի հետ:
17. Կադրերի երկարաժամկետ ռեզերվում գտնվող անձի հետ չի կարող կնքվել Պայմանագիր ժամանակավոր անաշխատունակության ժամանակաշրջանում:
18. Պայմանագիրը կնքվում է քաղաքացիական ծառայության տվյալ պաշտոնը ժամանակավոր թափուր մնալու ժամկետով և կադրերի երկարաժամկետ ռեզերվում գրանցված անձի համաձայնությամբ: Այդ ժամկետից շուտ Պայմանագիրը լուծվում է`
ա/ Օրենքի 33-րդ հոդվածով (բացառությամբ այդ հոդվածի 1-ին մասի «դ», «ե» և «ժդ» կետերով) նախատեսված դեպքերում.
բ/ քաղաքացիական ծառայության ժամանակավոր թափուր պաշտոն առաջանալու հիմքի վերացման դեպքում (այդ պաշտոնն զբաղեցնող քաղաքացիական ծառայողի` հղիության, ծննդաբերության և երեխայի խնամքի կապակցությամբ արձակուրդի համար նախատեսված ժամկետից ավելի շուտ վերադառնալու, պարտադիր զինվորական ծառայությունը նախատեսված ժամկետից ավելի շուտ ավարտվելու (դադարելու), մասնագիտական գիտելիքների և աշխատանքային ունակությունների կատարելագործման նպատակով գործուղումը նախատեսված ժամկետից ավելի շուտ ավարտելու և նմանատիպ այլ դեպքերում, ինչպես նաև մրցույթի արդյունքում տվյալ պաշտոնում նշանակում կատարելու դեպքում, եթե այդ պաշտոնն զբաղեցնող քաղաքացիական ծառայողն ազատվել է պաշտոնից):
19. Կադրերի կարճաժամկետ ռեզերվում և կադրերի երկարաժամկետ ռեզերվում քաղաքացիական ծառայության ժամանակավոր թափուր պաշտոնի անձնագրի պահանջները բավարարող քաղաքացիական ծառայող (անձ) գրանցված չլինելու դեպքում տվյալ պաշտոնում նշանակելու իրավասություն ունեցող պաշտոնատար անձը կարող է կնքել Պայմանագիր մեկ այլ անձի հետ, հաշվի առնելով Օրենքի 11-րդ, 12-րդ, 24-րդ հոդվածի 3-րդ կետի և 34-րդ հոդվածի 1-ին կետի պահանջները:
20. Սույն կարգի 19-րդ կետում նշված անձանց հետ Պայմանագիրը կնքվում է քաղաքացիական ծառայության տվյալ պաշտոնը ժամանակավոր թափուր մնալու ժամկետով: Այդ ժամկետից շուտ Պայմանագիրը լուծվում է սույն կարգի 18-րդ կետում նշված դեպքերում:
21. Պայմանագիրը կնքվում է երեք հավասարազոր օրինակից, որի առաջին օրինակը պահվում է համապատասխան մարմնում, երկրորդը` Խորհրդում, իսկ երրորդը` Պայմանագրի կողմ հանդիսացող անձի մոտ:
Հավելված
ժամկետային աշխատանքային
պայմանագրի կնքման կարգի
ԺԱՄԿԵՏԱՅԻՆ ԱՇԽԱՏԱՆՔԱՅԻՆ ՊԱՅՄԱՆԱԳԻՐ N ------
ք.--------------- «----» ---------- 200--թ.
Հայաստանի Հանրապետության -----------------------------------------
(համապատասխան մարմնի անվանումը)
կողմից, ի դեմս ---------------------------------------------------
(պաշտոնատար անձի պաշտոնը, անունը, ազգանունը)
------------------------------------------------------------------
(այսուհետ` Համապատասխան մարմին) և -------------------------------
------------------------------------------------------------------
(կադրերի երկարաժամկետ ռեզերվում գրանցված քաղաքացիական ծառայողի գրանցման ամսաթիվը, գրանցման թերթիկի համարը և անունը, ազգանունը, հայրանունը կամ այլ անձի անունը, ազգանունը, հայրանունը)
(ծնված 19-- թ.-------- «--»-ին, բնակության վայրը` ------------------
անձնագիր N -------- տրված ------ կողմից --- թ. --------- «---»-ին) մյուս կողմից
(այսուհետ` Փոխարինող) կնքեցին սույն պայմանագիրը հետևյալի մասին.
I. ՊԱՅՄԱՆԱԳՐԻ ԱՌԱՐԿԱՆ
1. Համապատասխան մարմինը հանձնարարում է, իսկ Փոխարինողն ապահովում է
------------------------------------------------------------- -ում
(համապատասխան մարմնի անվանումը)
------------------------------------------------------------------
(քաղաքացիական ծառայության ժամանակավոր թափուր պաշտոնի անվանումը,
ծածկագիրը)
պաշտոնի անձնագրով սահմանված պահանջների ճշգրիտ և ժամանակին կատարումը:
II. ԿՈՂՄԵՐԻ ԻՐԱՎՈՒՆՔՆԵՐՆ ՈՒ ՊԱՐՏԱԿԱՆՈՒԹՅՈՒՆՆԵՐԸ
2. Կողմերն ունեն Հայաստանի Հանրապետության օրենսդրությամբ սահմանված իրավունքներ և պարտականություններ:
III. ՎԱՐՁԱՏՐՈՒԹՅՈՒՆԸ
3. Համապատասխան մարմինը Փոխարինողին վճարում է ամենամսյա աշխատավարձ
-------------------------------------------- դրամի չափով:
(տառերով և թվերով)
IV. ԿՈՂՄԵՐԻ ՊԱՏԱՍԽԱՆԱՏՎՈՒԹՅՈՒՆԸ
4. Սույն պայմանագրով նախատեսված պարտավորությունների չկատարման դեպքում կողմերը կրում են պատասխանատվություն օրենքով սահմանված կարգով:
5. Սույն պայմանագրի հետ կապված վեճերը լուծվում են քաղաքացիական ծառայության օրենսդրությամբ սահմանված կարգով, ինչպես նաև դատական կարգով:
6. Սույն պայմանագիրը կարող է լուծվել օրենքով սահմանված կարգով:
7. Սույն պայմանագրով չկարգավորված հարաբերությունները կարգավորվում են Հայաստանի Հանրապետության օրենսդրությանը համապատասխան:
V. ՊԱՅՄԱՆԱԳՐԻ ԺԱՄԿԵՏԸ
8. Սույն պայմանագիրը գործում է ստորագրման պահից սկսած մինչև 200 - թ. --------------------- -ը կամ քաղաքացիական ծառայության օրենսդրությամբ նախատեսված ժամանակավոր թափուր պաշտոն առաջանալու հիմքի վերացումը:
Սույն պայմանագիրը կնքվել է երեք հավասարազոր օրինակից:
Համապատասխան մարմին Փոխարինող
------------------- -------------------
(ստորագրություն) (ստորագրություն)
Կ.Տ.