04.04.2025 -
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
9 փետրվարի 2023 թվականի N 181-Ն
ՊԵՏԱԿԱՆ ՀԱՆՐԱԿՐԹԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅԱՆ ՏՆՕՐԵՆԻ ՊԱՇՏՈՆԻ ԹԱՓՈՒՐ ՏԵՂԻ ՄՐՑՈՒՅԹԻ ՀԱՅՏԱՐԱՐՄԱՆ, ԱՆՑԿԱՑՄԱՆ, ՄԱՍՆԱԳԻՏԱԿԱՆ ՀԱՆՁՆԱԺՈՂՈՎԻ ՁԵՎԱՎՈՐՄԱՆ, ԳՈՐԾՈՒՆԵՈՒԹՅԱՆ, ՏՆՕՐԵՆԻ ՆՇԱՆԱԿՄԱՆ ԵՎ ԲՈՂՈՔԱՐԿՄԱՆ, ՓՈՐՁԱՇՐՋԱՆԻ ՍԱՀՄԱՆՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ
«Հանրակրթության մասին» օրենքի 29-րդ հոդվածի 1-ին մասի 6-րդ կետին և «Նորմատիվ իրավական ակտերի մասին» օրենքի 37-րդ հոդվածի 1-ին մասին համապատասխան` Հայաստանի Հանրապետության կառավարությունը որոշում է.
1. Հաստատել պետական հանրակրթական ուսումնական հաստատության տնօրենի պաշտոնի թափուր տեղի մրցույթի հայտարարման, անցկացման, մասնագիտական հանձնաժողովի ձևավորման, գործունեության, տնօրենի նշանակման և բողոքարկման կարգը` համաձայն հավելվածի:
(1-ին կետը փոփ. 23.11.2023 թիվ 2039-Ն որոշում)
1.1. 2025 թվականի նոյեմբերի 1-ից հետո հայտարարված մրցույթների դեպքում սույն կարգի 7-րդ կետով սահմանված մրցույթին մասնակցելու համար հավակնորդը մասնակցության հայտը և զարգացման ծրագիրը ներկայացնում է միայն էլեկտրոնային եղանակով` Կրթության կառավարման տեղեկատվական համակարգում ձևավորված հարթակում:
(1.1-ին կետը լրաց. 03.04.2025 թիվ 363-Ն որոշում)
2. Ուժը կորցրած ճանաչել Հայաստանի Հանրապետության կառավարության 2010 թվականի մարտի 4-ի «Պետական հանրակրթական ուսումնական հաստատության տնօրենի ընտրության (նշանակման) կարգը հաստատելու մասին» N 319-Ն որոշումը:
3. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ աշխատանքային օրը և տարածվում է սույն որոշումն ուժի մեջ մտնելուց հետո պետական հանրակրթական ուսումնական հաստատության տնօրենի պաշտոնի թափուր տեղի համար հայտարարվող մրցույթի արդյունքում ծագած հարաբերության վրա:
(վերնագիրը փոփ. 23.11.2023 թիվ 2039-Ն, 03.04.2025 թիվ 363-Ն որոշումներ)
Հայաստանի Հանրապետության
վարչապետ Ն. Փաշինյան
2023 թ. փետրվարի 10
Երևան
Հավելված
ՀՀ կառավարության
2023 թվականի փետրվարի 9-ի
N 181-Ն որոշման
ԿԱՐԳ
ՊԵՏԱԿԱՆ ՀԱՆՐԱԿՐԹԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅԱՆ ՏՆՕՐԵՆԻ ՊԱՇՏՈՆԻ ԹԱՓՈՒՐ ՏԵՂԻ ՄՐՑՈՒՅԹԻ ՀԱՅՏԱՐԱՐՄԱՆ, ԱՆՑԿԱՑՄԱՆ, ՄԱՍՆԱԳԻՏԱԿԱՆ ՀԱՆՁՆԱԺՈՂՈՎԻ ՁԵՎԱՎՈՐՄԱՆ, ԳՈՐԾՈՒՆԵՈՒԹՅԱՆ, ՏՆՕՐԵՆԻ ՆՇԱՆԱԿՄԱՆ ԵՎ ԲՈՂՈՔԱՐԿՄԱՆ, ՓՈՐՁԱՇՐՋԱՆԻ ՍԱՀՄԱՆՄԱՆ
(վերնագիրը փոփ. 03.04.2025 թիվ 363-Ն որոշում)
1. Սույն կարգով կարգավորվում են պետական հանրակրթական ուսումնական հաստատության (այսուհետ` հաստատություն) տնօրենի պաշտոնի թափուր տեղի մրցույթի հայտարարման, անցկացման, մասնագիտական հանձնաժողովի ձևավորման, գործունեության, տնօրենի նշանակման և բողոքարկման, փորձաշրջանի սահմանման հետ կապված հարաբերությունները:
(1-ին կետը փոփ. 03.04.2025 թիվ 363-Ն որոշում)
2. Հայաստանի Հանրապետության կրթության, գիտության, մշակույթի և սպորտի նախարարության կամ մարզպետի աշխատակազմի կամ Երևանի քաղաքապետարանի (այսուհետ` լիազոր մարմին) համապատասխան ստորաբաժանումը, ըստ ենթակայության, տվյալ հաստատության տնօրենի պաշտոնավարման ժամկետը լրանալու օրվանից հաշված, առավելագույնը 45 աշխատանքային օր առաջ, բայց ոչ պակաս, քան 40 աշխատանքային օր առաջ հայտարարում է տնօրենի պաշտոնի թափուր տեղի համար մրցույթ, որը բաղկացած է 3 փուլից` հավակնորդների հայտերի ընդունում, զարգացման ծրագրի փորձաքննություն և հարցազրույցի անցկացում:
(2-րդ կետը փոփ. 03.04.2025 թիվ 363-Ն որոշում)
3. Հաստատության տնօրենի պաշտոնի թափուր տեղի համար մրցույթ չի հայտարարվում և չի անցկացվում հուլիսի 9-ից մինչև օգոստոսի 20-ը ներառյալ ընկած ժամանակահատվածում, բացառությամբ 3-րդ փուլի` հաշվի առնելով նախորդ երկու փուլերով անցած հավակնորդների համար հարցազրույցներն իրականացնելու նպատակահարմարությունը: Նշված ժամանակահատվածը չի ներառվում նաև սույն կարգի 2-րդ և 7-րդ կետերով սահմանված ժամկետների հաշվարկում:
(3-րդ կետը փոփ. 03.04.2025 թիվ 363-Ն որոշում)
4. Տնօրենի պաշտոնավարման պայմանագրի ժամկետը լրանալու, անձնական դիմումի հիման վրա կամ լիազոր մարմնի որոշմամբ պաշտոնից ազատման, փորձաշրջանը չանցնելու, մահվան, դատարանի օրինական ուժի մեջ մտած մեղադրական (վարչական կամ մանկավարժական պաշտոն զբաղեցնելու սահմանափակման, ազատազրկման) դատավճռի առկայության դեպքերում, ինչպես նաև սույն կարգի 10-րդ կետով սահմանված դեպքում լիազոր մարմինը` ըստ ենթակայության, թափուր տեղ առաջանալուց հետո` 1 աշխատանքային օրվա ընթացքում, նշանակում է հաստատության տնօրենի պարտականությունները կատարող կամ ժամանակավոր պաշտոնակատար:
(4-րդ կետը փոփ. 03.04.2025 թիվ 363-Ն որոշում)
5. Տվյալ հաստատության տնօրենը, որի լիազորությունների դադարեցման արդյունքում առաջացել է տնօրենի պաշտոնի թափուր տեղ, չի կարող նշանակվել նույն հաստատության տնօրենի ժամանակավոր պաշտոնակատար կամ տնօրենի պարտականությունները կատարող:
6. Հաստատության տնօրենի ժամանակավոր պաշտոնակատար կամ տնօրենի պարտականությունները կատարող կարող է նշանակվել տվյալ հաստատության խորհրդի անդամ չհանդիսացող`
1) տնօրենի տեղակալը.
2) Հայաստանի Հանրապետության քաղաքացի հանդիսացող այն անձը, որն ունի կրթության ոլորտի բարձրագույն կրթություն և վերջին 10 տարվա ընթացքում գիտամանկավարժական կամ մանկավարժական աշխատանքի կամ կրթության կառավարման ոլորտի առնվազն յոթ տարվա ընդհանուր աշխատանքային ստաժ:
7. Սույն կարգի 4-րդ կետով սահմանված դեպքերում (բացառությամբ տնօրենի պաշտոնավարման պայմանագրի ժամկետը լրանալու դեպքի) լիազոր մարմինը տնօրենի պաշտոնի թափուր տեղ առաջանալու օրվանից` 3 աշխատանքային օրվա ընթացքում, հայտարարում է տնօրենի պաշտոնի թափուր տեղի համար մրցույթ: Տնօրենի պաշտոնի թափուր տեղ առաջանալու օրվանից հետո` 45 աշխատանքային օրվա ընթացքում, բայց ոչ պակաս, քան 40 աշխատանքային օրվա ընթացքում կազմակերպվում և անցկացվում է տնօրենի պաշտոնի թափուր տեղի համար մրցույթ` սույն կարգի պահանջների համաձայն:
8. Լիազոր մարմինը հաստատության տնօրենի պաշտոնի թափուր տեղի համար մրցույթ անցկացնելու մասին հայտարարությունը` համաձայն N 1 ձևի, ներկայացնում է հրապարակման`
1) www.azdarar.am կայքում` Հայաստանի Հանրապետության կառավարության 2011 թվականի փետրվարի 17-ի N 174-Ն որոշմամբ սահմանված կարգով.
2) Հայաստանի Հանրապետության կրթության, գիտության, մշակույթի և սպորտի նախարարության (այսուհետ` նախարարություն) պաշտոնական կայքում, իսկ մարզպետների աշխատակազմերի և Երևանի քաղաքապետարանի ենթակայության հաստատությունների դեպքում` նաև համապատասխան մարզպետի աշխատակազմի կամ Երևանի քաղաքապետարանի պաշտոնական կայքում:
9. Մրցույթին մասնակցելու մասին հայտերն ընդունում է տվյալ լիազոր մարմնի համապատասխան ստորաբաժանումը` www.azdarar.am կայքում հայտարարության հրապարակման օրվանից սկսած 15 աշխատանքային օրվա ընթացքում:
9.1. Կրթության կառավարման տեղեկատվական համակարգում ձևավորված հարթակում (այսուհետ` հարթակ) էլեկտրոնային եղանակով հայտերն ընդունվում են www.azdarar.am կայքում հայտարարության հրապարակման օրվանից սկսած` 15 աշխատանքային օրվա ընթացքում:
(9.1-ին կետը լրաց. 03.04.2025 թիվ 363-Ն որոշում)
10. Մասնակցության հայտերի բացակայության դեպքում լիազոր մարմինը հայտերի ընդունման վերջին օրվանից հետո` 3 աշխատանքային օրվա ընթացքում, հայտարարում է նոր մրցույթ` սույն կարգի պահանջների համաձայն:
11. Հաստատության տնօրենի ընտրության համար անցկացվող մրցույթին կարող է մասնակցել Հայաստանի Հանրապետության քաղաքացի հանդիսացող այն անձը, որը`
1) չունի «Հանրակրթության մասին» օրենքի 12-րդ հոդվածի 25-րդ և 27-րդ մասերով նշված սահմանափակումներ.
2) ունի հաստատության ղեկավարման իրավունք (հավաստագիր).
3) մասնակցել է սույն կարգի 16-րդ կետի 1-ին ենթակետով սահմանված հանդիպումներին:
(11-րդ կետը փոփ. 03.04.2025 թիվ 363-Ն որոշում)
12. Մրցույթին մասնակցելու համար հավակնորդը ներկայացնում է`
1) դիմում` լիազոր մարմնի ղեկավարի անունով` համաձայն N 2 ձևի.
2) անձնագրի կամ նույնականացման քարտի բնօրինակի տեսաներածված տարբերակը (բնօրինակի հետ).
3) հաստատության ղեկավարման իրավունքի (հավաստագրի) բնօրինակի տեսաներածված տարբերակը (բնօրինակի հետ).
4) Հայաստանի Հանրապետության կրթության, գիտության, մշակույթի և սպորտի նախարարի (այսուհետ նաև` նախարար) 2022 թվականի սեպտեմբերի 22-ի N 35-Ն հրամանով հաստատված ձևաչափին համապատասխան տվյալ հաստատության զարգացման իր ծրագիրը (որը հավակնորդը կարող է ներկայացնել մինչև հայտերի ընդունման ժամկետի ավարտը, այդ թվում` էլեկտրոնային տարբերակով).
5) սույն կարգի 16-րդ կետի 1-ին ենթակետով սահմանված հանդիպումների արձանագրությունները, որոնք հավակնորդը կարող է ներկայացնել մինչև հայտերի ընդունման ժամկետի ավարտը, այդ թվում` էլեկտրոնային տարբերակով.
6) ինքնակենսագրություն` համաձայն N 3 ձևի:
(12-րդ կետը փոփ. 03.04.2025 թիվ 363-Ն որոշում)
12.1. Հարթակում էլեկտրոնային եղանակով հայտը ներկայացնելիս պահանջվում են`
1) անձնագրի կամ նույնականացման քարտի բնօրինակի տեսաներածված տարբերակը.
2) 3x4 չափի ներբեռնվող լուսանկար.
3) հաստատության ղեկավարման իրավունքի (հավաստագրի) բնօրինակի տեսաներածված տարբերակը.
4) Հայաստանի Հանրապետության կրթության, գիտության, մշակույթի և սպորտի նախարարի (այսուհետ` նաև նախարար) 2022 թվականի սեպտեմբերի 22-ի N 35-Ն հրամանով հաստատված ձևաչափին համապատասխան` տվյալ հաստատության զարգացման իր ծրագիրը.
5) սույն կարգի 16-րդ կետի 1-ին ենթակետով սահմանված հանդիպումների արձանագրությունները` տեսաներածված տարբերակով.
6) N 6 ձևով սահմանված տվյալները, որոնք լրացվում են հարթակում և վերբեռնվում համակարգ:
(12.1-ին կետը լրաց. 03.04.2025 թիվ 363-Ն որոշում)
12.2. Դիմումը ձևավորվում է ինքնաշխատ եղանակով` սույն կարգի 12.1-ին կետով սահմանված տվյալները մուտքագրելուց և «Հաստատել» կոճակը սեղմելուց հետո:
(12.2-րդ կետը լրաց. 03.04.2025 թիվ 363-Ն որոշում)
13. Լիազոր մարմնի համապատասխան ստորաբաժանումը փաստաթղթերի բնօրինակի տեսաներածված տարբերակները համեմատում է բնօրինակների հետ, բնօրինակները վերադարձնում է հավակնորդին: Փաստաթղթերն ամբողջական չլինելու կամ կարգի պահանջներին չհամապատասխանելու դեպքում հավակնորդը 2 աշխատանքային օրվա ընթացքում հնարավորություն է ունենում թերությունները շտկելու:
14. Հավակնորդը կարող է փաստաթղթերը ներկայացնել էլեկտրոնային եղանակով` հայտարարության մեջ նշված էլեկտրոնային փոստի հասցեին: Էլեկտրոնային եղանակով փաստաթղթերը ներկայացնելու դեպքում բնօրինակները ներկայացվում են հարցազրույցի օրը: Ներկայացված փաստաթղթերի անհամապատասխանության դեպքում հավակնորդը չի մասնակցում հարցազրույցին:
15. Հավակնորդը մրցույթին մասնակցելու հայտ ներկայացնելու հաջորդ օրվանից գրավոր դիմում է հաստատության տնօրենին (տնօրենի պաշտոնակատարին (պարտականությունները կատարողին) (այսուհետ` տնօրեն)` տվյալ հաստատության գործունեության վերաբերյալ իրեն անհրաժեշտ տեղեկատվությունը տրամադրելու և մանկավարժական, ծնողական և աշակերտական խորհուրդների հետ առանձին հանդիպումներ կազմակերպելու համար:
(15-րդ կետը փոփ. 03.04.2025 թիվ 363-Ն որոշում)
16. Հաստատության տնօրենը պարտավոր է`
1) հավակնորդի դիմումն ստանալու հաջորդ աշխատանքային օրը սույն կարգի 15-րդ կետով սահմանված հանդիպման մասին տեղեկատվությունը հրապարակել հաստատության պաշտոնական կայքում և 3 աշխատանքային օրվա ընթացքում ապահովել հավակնորդի առանձին հանդիպումները տվյալ հաստատության մանկավարժական, ծնողական և աշակերտական խորհուրդների հետ` զարգացման ծրագիրը կազմելու համար առաջարկություններ լսելու նպատակով.
2) հավակնորդի կողմից ներկայացված գրավոր դիմումն ստանալուց հետո` 3 աշխատանքային օրվա ընթացքում, տրամադրել գրավոր տեղեկատվություն հաստատության գործունեության վերաբերյալ (տվյալներ մանկավարժական, աշակերտական համակազմի, ուսումնադաստիարակչական, արտադպրոցական գործունեության, կառավարման և խորհրդակցական մարմինների մասին, ինչպես նաև հաստատության գործունեության վերաբերյալ հավակնորդի կողմից պահանջվող անհրաժեշտ տեղեկատվություն)` պահպանելով «Անձնական տվյալների պաշտպանության մասին» օրենքի պահանջները.
3) սույն կարգի 16-րդ կետի 1-ին ենթակետով սահմանված հանդիպման արձանագրությունները` հանդիպումից հետո 1 աշխատանքային օրվա ընթացքում տրամադրել հավակնորդին:
17. Տնօրենի պաշտոնի թափուր տեղը չհամալրվելու դեպքում հայտարարված նոր մրցույթին կրկին դիմելու դեպքում նախորդ մրցույթի հավակնորդը կարող է չդիմել սույն կարգի 16-րդ կետի 1-ին ենթակետով նախատեսվող հանդիպումներին մասնակցելու համար:
18. Սույն կարգի 16-րդ կետի 1-ին ենթակետով սահմանված հանդիպումներն անցկացնելուց հետո համապատասխան խորհուրդները 1 աշխատանքային օրվա ընթացքում կազմում են արձանագրություն հանդիպումը կայանալու մասին և ներկայացնում հրապարակման` հաստատության պաշտոնական կայքում:
19. Սույն կարգի 16-րդ կետի 1-ին ենթակետով սահմանված հանդիպումներից որևէ մեկին չմասնակցելու դեպքում հավակնորդը չի կարող մասնակցել մրցույթին:
20. Հավակնորդների զարգացման ծրագրերի փորձաքննության ներկայացման և հավակնորդների ընտրության նպատակով նախարարի հրամանով ձևավորվում է մասնագիտական հանձնաժողով:
21. Մասնագիտական հանձնաժողովը կազմված է 7 անդամից, ընդ որում`
1) նախարարության ենթակայության հաստատության մրցույթի դեպքում` 6, մարզպետի աշխատակազմի կամ Երևանի քաղաքապետարանի ենթակայության հաստատության մրցույթի դեպքում` 4 ներկայացուցիչ` նախարարությունից: Նախարարության ենթակայության հաստատության մրցույթի դեպքում ընդգրկվում է նաև մեկ ներկայացուցիչ Հայաստանի Հանրապետության տարածքային կառավարման և ենթակառուցվածքների նախարարությունից (իրենց առաջարկով).
2) մարզպետի աշխատակազմի կամ Երևանի քաղաքապետարանի ենթակայության հաստատությունների մրցույթի դեպքում հանձնաժողովի կազմում ընդգրկվում է նաև երեք ներկայացուցիչ` համապատասխանաբար Հայաստանի Հանրապետության տարածքային կառավարման և ենթակառուցվածքների նախարարությունից կամ Երևանի քաղաքապետարանից (իրենց առաջարկով).
3) մասնագիտական հանձնաժողովի ընթացիկ աշխատանքները համակարգում է քարտուղարը, որը հանձնաժողովի անդամ չէ:
(21-րդ կետը փոփ. 03.04.2025 թիվ 363-Ն որոշում)
22. Մասնագիտական հանձնաժողովի առաջին նիստը տեղի է ունենում մասնագիտական հանձնաժողովի կազմը հաստատվելուց հետո` 3 աշխատանքային օրվա ընթացքում:
23. Մասնագիտական հանձնաժողովն իր աշխատանքներն իրականացնում է նիստերի միջոցով, որոնք արձանագրվում են մասնագիտական հանձնաժողովի ընթացիկ աշխատանքները համակարգող քարտուղարի կողմից: Նիստերն իրավազոր են, եթե դրանց մասնակցում է մասնագիտական հանձնաժողովի 5 անդամ:
24. Մասնագիտական հանձնաժողովի որոշումներն ընդունվում են բաց քվեարկությամբ` մասնագիտական հանձնաժողովի առնվազն 5 անդամի կողմ քվեարկելու դեպքում:
25. Մասնագիտական հանձնաժողովն առաջին նիստից հետո` 3 աշխատանքային օրվա ընթացքում, նախարարության պաշտոնական կայքում հրապարակման է ներկայացնում մասնագիտական հանձնաժողովի հետ (ըստ անհրաժեշտության) կապ հաստատելու համար նախատեսված հեռախոսահամարը և հավակնորդի զարգացման ծրագիրը ներկայացնելու համար նախատեսված էլեկտրոնային փոստի հասցեն:
26. Մասնագիտական հանձնաժողովը մշակում և նախարարի հաստատմանն է ներկայացնում Հայաստանի Հանրապետության կրթության, գիտության, մշակույթի և սպորտի նախարարի 2022 թվականի սեպտեմբերի 22-ի N 35-Ն հրամանի պահանջներին համապատասխան` հավակնորդի զարգացման ծրագրի գնահատման չափանիշները և փորձաքննության ընթացակարգը:
(26-րդ կետը փոփ. 03.04.2025 թիվ 363-Ն որոշում)
27. Լիազոր մարմնի համապատասխան ստորաբաժանումը սույն կարգի 8-րդ կետով սահմանված մրցույթին մասնակցելու մասին հայտերն ընդունելու ժամկետն ավարտվելուց հետո` 3 աշխատանքային օրվա ընթացքում, հավակնորդների` սույն կարգի 12-րդ կետի 4-րդ ենթակետով սահմանված զարգացման ծրագիրն էլեկտրոնային եղանակով ներկայացնում է մասնագիտական հանձնաժողովին:
(27-րդ կետը փոփ. 03.04.2025 թիվ 363-Ն որոշում)
28. Մասնագիտական հանձնաժողովը հավակնորդի զարգացման ծրագիրն ստանալուց հետո` 3 աշխատանքային օրվա ընթացքում, այն ներկայացնում է փորձաքննության` առանց հավակնորդի անձնական տվյալները նշելու:
29. Մասնագիտական հանձնաժողովը հավակնորդի զարգացման ծրագիրն ստանալուց հետո 2 աշխատանքային օրվա ընթացքում էլեկտրոնային ծրագրի միջոցով համակարգում առկա բազայի հիման վրա ստուգում է հավակնորդի կողմից զարգացման ծրագրի ինքնուրույն մշակված լինելու հանգամանքը: 30 և ավելի տոկոս արտագրության փաստի բացահայտման, ինչպես նաև զարգացման ծրագրի որևէ բաղադրիչ ամբողջությամբ արտագրված լինելու դեպքում կամ արհեստական բանականությամբ աշխատող ծրագրերի միջոցով զարգացման ծրագիրը կամ դրա որևէ բաղադրիչ ամբողջությամբ ստեղծված լինելու դեպքում 2 աշխատանքային օրվա ընթացքում զարգացման ծրագիրը հանձնաժողովի կողմից վերադարձվում է լիազոր մարմնին` 2 աշխատանքային օրվա ընթացքում հավակնորդին փոխանցելու նպատակով` կցելով հիմք հանդիսացող ծրագրային վերլուծության լուսապատկերը: Արտագրության սահմանված շեմը չգերազանցող զարգացման ծրագիրը հանձնաժողովը 1 աշխատանքային օրվա ընթացքում ներկայացնում է փորձաքննության` առանց հավակնորդի անձնական տվյալները նշելու:
(29-րդ կետը փոփ. 03.04.2025 թիվ 363-Ն որոշում)
30. Փորձաքննությունն իրականացվում է ուղղակի կամ մրցութային դրամաշնորհի արդյունքում ընտրված կազմակերպության (այսուհետ` կազմակերպություն) կողմից:
31. Կազմակերպությունը զարգացման ծրագիրն ստանալուց հետո` 10 աշխատանքային օրվա ընթացքում, իրականացնում է փորձաքննություն` սույն կարգի 26-րդ կետով սահմանված` փորձաքննության ընթացակարգի և գնահատման չափանիշների համաձայն:
(31-րդ կետը փոփ. 03.04.2025 թիվ 363-Ն որոշում)
31.1. Փորձաքննության ընթացքում զարգացման ծրագրի վերաբերյալ տվյալների փոխանցման, արտահոսքի, հրապարակման կամ հավակնորդի հետ համագործակցության կամ փորձաքննող մյուս կազմակերպության (կազմակերպությունների) հետ փոխհամաձայնեցված գործունեության մասին տեղեկության առկայության և համապատասխան մարմինների կողմից տեղեկության ստուգման արդյունքներից կախված կամ հարցազրույցի ընթացքում զարգացման ծրագրի բաղադրիչից բացասական գնահատվելու դեպքում կազմակերպության հետ կնքված պայմանագիրը լուծվում է:
(31.1-ին կետը լրաց. 03.04.2025 թիվ 363-Ն որոշում)
32. Փորձաքննության արդյունքում կազմակերպությունը յուրաքանչյուր զարգացման ծրագրի մասին կազմում է տեղեկանք, որը ներկայացնում է մասնագիտական հանձնաժողովին, որն էլ 3 աշխատանքային օրվա ընթացքում ներկայացնում է լիազոր մարմնին:
(32-րդ կետը փոփ. 03.04.2025 թիվ 363-Ն որոշում)
33. Տեղեկանքում նշվում են հիմնավորումներ նախարարի 2022 թվականի սեպտեմբերի 22-ի N 35-Ն հրամանով հաստատված ձևաչափին զարգացման ծրագրի համապատասխանության, ձևաչափով սահմանված յուրաքանչյուր բաժնի բովանդակության, ներկայացվող ցուցանիշների չափելիության մասին: Փորձաքննության միավորային գնահատման արդյունքների հետ միասին պետք է տրվեն նաև հակիրճ մեկնաբանություններ:
(33-րդ կետը փոփ. 03.04.2025 թիվ 363-Ն որոշում)
34. (34-րդ կետն ուժը կորցրել է 03.04.2025 թիվ 363-Ն որոշում)
35. Փորձաքննության արդյունքներն ստանալուց հետո 11 աշխատանքային օրվա ընթացքում մասնագիտական հանձնաժողովը գնահատման արդյունքում անցողիկ շեմը հաղթահարած բոլոր հավակնորդների հետ անցկացնում է հարցազրույց` հավակնորդի ներկայացրած զարգացման ծրագրի, նրա մասնագիտական գործունեության, անձնային որակների, բարեվարքության և կարողունակությունների շրջանակներում (տրամաբանելու, հաղորդակցման հմտություններին տիրապետելու և տարբեր իրավիճակներում կողմնորոշվելու ունակություն, հանրակրթության բովանդակային մասի վերաբերյալ հստակ պատկերացում, համակարգչով և ժամանակակից այլ տեխնիկական միջոցներով աշխատելու ունակություն, աշխատանքի կազմակերպման և ղեկավարման անհրաժեշտ հմտություն, ենթակաների հետ վարվելու անհրաժեշտ էթիկայի կանոնների իմացություն, սթրեսային և խնդրահարույց իրավիճակներում ճիշտ կողմնորոշվելու կարողություն): Հիմնական հարցերից բացի, կարող են տրվել նաև հանրակրթության ոլորտին առնչվող լրացուցիչ հարցեր:
(35-րդ կետը փոփ. 03.04.2025 թիվ 363-Ն որոշում)
36. Յուրաքանչյուր հավակնորդի հետ անցկացվում է առանձին հարցազրույց, որի ամբողջ ընթացքը ձայնագրվում է: Համաձայն N 4 ձևի` մասնագիտական հանձնաժողովի յուրաքանչյուր անդամի կողմից արդյունքներն արձանագրվում են, և տրվում է դրական կամ բացասական եզրակացություն հավակնորդների հարցազրույցի արդյունքների վերաբերյալ:
37. Հանձնաժողովի առնվազն 5 անդամի դրական եզրակացություն ստացած մասնակիցը (մասնակիցները) համարվում է (են) հարցազրույցի փուլը հաղթահարած և լիազոր մարմնի կողմից տնօրենի պաշտոնում կարող է նշանակվել 5 տարի ժամկետով (առանց փորձաշրջանի):
(37-րդ կետը փոփ. 03.04.2025 թիվ 363-Ն որոշում)
37.1. Հանձնաժողովի անդամների 4 դրական եզրակացության դեպքում հավակնորդը լիազոր մարմնի կողմից տնօրենի պաշտոնում կարող է նշանակվել 5 տարի ժամկետով` 1 տարի փորձաշրջանով (հաշվի առնելով նաև Հայաստանի Հանրապետության աշխատանքային օրենսգրքի 92-րդ հոդվածի 3-րդ մասի պահանջը):
(37.1-ին կետը լրաց. 03.04.2025 թիվ 363-Ն որոշում)
37.2. Փորձաշրջանի ընթացքում կազմակերպական, զարգացման ծրագրի իրականացման, մասնագիտական կամ աշխատանքային այլ գործունեությանն աջակցելու նպատակով (նաև առնվազն 2 ամիսը մեկ անգամ տվյալ հաստատություն այցելելով) նշանակվում է փորձաշրջանի ղեկավար, որը նախարարի հրամանով հաստատված մենթոր դպրոցների ցանկում ընդգրկված` տվյալ տարածաշրջանի մենթոր դպրոցի տնօրեն է կամ մասնագիտական հանձնաժողովի որոշմամբ տվյալ տարածաշրջանի այլ դպրոցի տնօրեն կամ համապատասխան լիազոր մարմնի կրթության ոլորտը համակարգող վարչության մասնագետ (այսուհետ` փորձաշրջանի ղեկավար), ով փորձաշրջանի ավարտին` 3 աշխատանքային օրվա ընթացքում, գնահատում է փորձաշրջանի ընթացքում տնօրենի կատարած աշխատանքները` համաձայն N 5 ձևի:
(37.2-րդ կետը լրաց. 03.04.2025 թիվ 363-Ն որոշում)
37.3. Փորձաշրջանի ավարտին` 3 աշխատանքային օրվա ընթացքում, տնօրենը հաստատության կոլեգիալ կառավարման մարմնի (այսուհետ` խորհուրդ) գնահատմանն է ներկայացնում իր կազմած զարգացման ծրագրի 1 տարվա կատարողական հաշվետվությունը` համաձայն Հայաստանի Հանրապետության կրթության, գիտության, մշակույթի և սպորտի նախարարի 2022 թվականի սեպտեմբերի 22-ի N 35-Ն հրամանով հաստատված ձևաչափի (Ձև N 2): Փորձաշրջանի ավարտին` 3 աշխատանքային օրվա ընթացքում, փորձաշրջանի ղեկավարը մասնագիտական հանձնաժողովին է ներկայացնում տնօրենի աշխատանքների գնահատման թերթիկը` համաձայն N 5 ձևի:
(37.3-րդ կետը լրաց. 03.04.2025 թիվ 363-Ն որոշում)
37.4. Խորհրդի կողմից տնօրենի ներկայացրած կատարողական հաշվետվության վերաբերյալ դրական եզրակացության և ղեկավարի դրական գնահատման արդյունքով և մասնագիտական հանձնաժողովի որոշմամբ տնօրենը համարվում է փորձաշրջանն անցած: Ներկայացրած կատարողական հաշվետվության բացասական եզրակացության կամ փորձաշրջանի ղեկավարի կամ մասնագիտական հանձնաժողովի բացասական գնահատման դեպքում տնօրենը չի համարվում փորձաշրջանն անցած, որի մասին մասնագիտական հանձնաժողովը գրավոր տեղեկացնում է համապատասխան լիազոր մարմնին` 5 աշխատանքային օրվա ընթացքում պայմանագիրը լուծելու համար:
(37.4-րդ կետը լրաց. 03.04.2025 թիվ 363-Ն որոշում)
37.5. Լիազոր մարմինը պայմանագիրը լուծելուց հետո 3 աշխատանքային օրվա ընթացքում տնօրենի թափուր տեղը համալրելու համար սահմանված կարգով հայտարարում է նոր մրցույթ և նշանակում է պարտականությունները կատարող կամ ժամանակավոր պաշտոնակատար, որը չի կարող լինել փորձաշրջանը չհաղթահարած անձը:
(37.5-րդ կետը լրաց. 03.04.2025 թիվ 363-Ն որոշում)
38. Բոլոր հավակնորդների հետ հարցազրույցն անցկացնելուց հետո վերջիններս հրավիրվում են հարցազրույցի անցկացման սենյակ, որից հետո հանձնաժողովի նախագահը բարձրաձայն հայտարարում է հաղթող հավակնորդի (հավակնորդների) ազգանունը, անունը և հայրանունը:
38.1. Զարգացման ծրագրի դրական եզրակացություն ունեցող, բայց հարցազրույցի փուլը 2 անգամ չհաղթահարած անձը պետք է նորից զարգացման ծրագիր ներկայացնի, եթե մասնագիտական հանձնաժողովը բացասական է գնահատել զարգացման ծրագրի բաղադրիչը:
(38.1-ին կետը լրաց. 03.04.2025 թիվ 363-Ն որոշում)
39. Մասնագիտական հանձնաժողովը հաղթող հավակնորդի (հավակնորդների) (սույն կարգի 37.1-ին կետով սահմանված` փորձաշրջան նշանակված լինելու դեպքում` նաև սույն կարգի 37.2-րդ կետով սահմանված փորձաշրջանի ղեկավարի) տվյալները հարցազրույցի օրվանից հետո` 2 աշխատանքային օրվա ընթացքում, եթե առկա չէ գրավոր բողոք, ներկայացնում է համապատասխան լիազոր մարմնին (նախարարության ենթակայության հաստատությունների դեպքում` համապատասխան ստորաբաժանմանը): Լիազոր մարմինը, պահպանելով «Պետական ոչ առևտրային կազմակերպությունների մասին» օրենքի 16-րդ հոդվածի 3-րդ մասի «բ» ենթակետով սահմանված պահանջը, 5 աշխատանքային օրվա ընթացքում հաղթող հավակնորդի, մի քանի հաղթող հավակնորդների պարագայում` հավակնորդներից մեկի հետ կարող է կնքել աշխատանքային պայմանագիր` 5 տարի ժամկետով, իսկ փորձաշրջանով հաղթող հավակնորդի հետ` 5 տարի ժամկետով` 1 տարի փորձաշրջանով:
(39-րդ կետը փոփ. 03.04.2025 թիվ 363-Ն որոշում)
40. Մասնագիտական հանձնաժողովի կողմից մրցույթի արդյունքները հրապարակվելուց հետո` մեկ ժամվա ընթացքում, դրանք կարող են գրավոր բողոքարկվել մասնակցի կամ մասնագիտական հանձնաժողովի անդամի կողմից: Բողոքարկման ենթակա է միայն մասնագիտական հանձնաժողովի կայացրած որոշումը:
41. Մրցույթի արդյունքները բողոքարկվում են բողոքարկման հանձնաժողովին, որը ձևավորվում է նախարարի հրամանով: Մասնագիտական հանձնաժողովի անդամները չեն կարող ընդգրկվել բողոքարկման հանձնաժողովի կազմում:
42. Բողոքարկման հանձնաժողովը կազմվում է 5 անդամից, որոնցից մեկ ներկայացուցիչ Հայաստանի Հանրապետության կրթության տեսչական մարմնից, մեկ ներկայացուցիչ նախարարության իրավաբանական վարչությունից, մեկական ներկայացուցիչներ անձնակազմի կառավարման և հանրակրթության վարչություններից: Հանձնաժողովի անդամները տեղեկացվում են նիստի օրվա և ժամի վերաբերյալ: Բողոքարկման հանձնաժողովի նախագահն ի պաշտոնե նախարարության գլխավոր քարտուղարն է: Բողոքարկման հանձնաժողովի անդամի մասնակցության անհնարինության դեպքում հանձնաժողովի կազմում կարող է կատարվել փոփոխություն: Բողոքարկման հանձնաժողովի նախագահը նշանակում է քարտուղար, որը հանձնաժողովի անդամ չէ:
43. Բողոքարկման հանձնաժողովի նիստն իրավազոր է, եթե նիստին մասնակցում է հանձնաժողովի առնվազն 4 անդամ:
44. Բողոքը քննվում է բողոքարկման հանձնաժողովի կողմից` բողոքարկմանը հաջորդող երկու աշխատանքային օրվա ընթացքում: Բողոքի քննարկման գործընթացում ուսումնասիրվում են տվյալ մրցույթի հարցազրույցի փուլում մասնակցի պատասխանները, դրանց վերաբերյալ հանձնաժողովի եզրակացությունը: Անհրաժեշտության դեպքում բողոքի քննմանը կարող է հրավիրվել մասնագիտական հանձնաժողովի անդամներից մեկը (կամ անդամները):
45. Բողոքարկման հանձնաժողովը ստացված բողոքն օրենսդրությամբ սահմանված կարգով ուսումնասիրելուց հետո ընդունում է հետևյալ որոշումներից մեկը`
1) մրցույթի արդյունքները թողնել անփոփոխ.
2) մրցույթի արդյունքները ճանաչել անվավեր.
3) մրցույթի արդյունքների վերաբերյալ մասնագիտական հանձնաժողովի բացասական եզրակացության և բողոքարկման դրական արդյունքի դեպքում` մրցույթի արդյունքները փոփոխելու վերաբերյալ:
(45-րդ կետը փոփ. 03.04.2025 թիվ 363-Ն որոշում)
46. Բողոքարկման արդյունքում մրցույթի արդյունքներն անվավեր ճանաչվելու դեպքում լիազոր մարմինը 3 աշխատանքային օրվա ընթացքում հայտարարում է նոր մրցույթ` սույն կարգի պահանջներին համապատասխան:
47. Բողոքի քննման արդյունքներով բողոքի վերաբերյալ կազմվում է եզրակացություն, որը ներկայացվում է մասնագիտական հանձնաժողովին` այն նաև բողոքը ներկայացնողին տրամադրելու համար: Բողոքարկման արդյունքների վերաբերյալ բողոքը ներկայացնողը մասնագիտական հանձնաժողովի ընթացիկ աշխատանքները համակարգող քարտուղարի կողմից ծանուցվում է էլեկտրոնային փոստով` բողոքարկման արդյունքները մասնագիտական հանձնաժողովին տրամադրելու հաջորդ աշխատանքային օրը` մինչև աշխատանքային օրվա ավարտը:
48. Բողոքարկման հանձնաժողովի եզրակացության հետ համաձայն չլինելու դեպքում մրցույթի արդյունքները կարող են բողոքարկվել դատական կարգով:
49. Բոլոր հավակնորդների զարգացման ծրագրերի` փորձաքննության արդյունքում գնահատման անցողիկ շեմը չհաղթահարելու կամ հարցազրույցին հավակնորդներից ոչ մեկի չներկայանալու կամ հարցազրույցի արդյունքում հավակնորդներից որևէ մեկի հաղթող չճանաչվելու դեպքում մասնագիտական հանձնաժողովը 1 աշխատանքային օրվա ընթացքում դրա մասին տեղեկացնում է լիազոր մարմնին (նախարարության ենթակայության հաստատությունների դեպքում` հավակնորդին):
(49-րդ կետը փոփ. 03.04.2025 թիվ 363-Ն որոշում)
50. Մրցույթի արդյունքում հաղթող չունենալու դեպքում լիազոր մարմինը 3 աշխատանքային օրվա ընթացքում հայտարարում է նոր մրցույթ` սույն կարգի պահանջներին համապատասխան, բացառությամբ այն դեպքի, երբ առկա է գրավոր բողոք:
51. Հավակնորդը նույն հաստատության տնօրենի թափուր տեղի համար հայտարարված հաջորդ մրցույթին (մրցույթներին) դիմելու դեպքում կարող է մասնակցել հարցազրույցի փուլին` նախորդ մրցույթին ներկայացրած իր զարգացման ծրագրի փորձաքննության արդյունքում ստացած դրական եզրակացության և զարգացման ծրագրում որևէ փոփոխություն չիրականացնելու պարագայում:
Ձև N 1
Մրցույթի հայտարարություն
«______________________________________________________» ՊՈԱԿ-ի
(ուսումնական հաստատության անվանումը)
տնօրենի պաշտոնի թափուր տեղը զբաղեցնելու մասին
Հայաստանի Հանրապետության կառավարության 2023 թվականի փետրվարի 9-ի «Պետական հանրակրթական ուսումնական հաստատության տնօրենի պաշտոնի թափուր տեղի մրցույթի հայտարարման, անցկացման, մասնագիտական հանձնաժողովի ձևավորման, գործունեության, տնօրենի նշանակման և բողոքարկման, փորձաշրջանի սահմանման կարգը հաստատելու մասին» N 181-Ն որոշմամբ հաստատված հավելվածի 2-րդ, 4-րդ, 7-րդ կամ 41-րդ կետերի համաձայն (նշել կետը)` հայտարարվում է մրցույթ`
«_______________________________________________________________» ՊՈԱԿ-ի
(ուսումնական հաստատության անվանումը) տնօրենի պաշտոնի թափուր տեղն զբաղեցնելու համար:
1. Հաստատության տնօրենի պաշտոնի թափուր տեղի համար անցկացվող մրցույթին մասնակցելու պարտադիր պայմաններն են`
1) Հայաստանի Հանրապետության քաղաքացիությունը.
2) հաստատության ղեկավարման իրավունքը (հավաստագիրը).
3) «Հանրակրթության մասին» օրենքի 12-րդ հոդվածի 21-րդ և 22-րդ մասերով սահմանված հիմքերի բացակայությունը:
2. Մրցույթին մասնակցելու համար հավակնորդը ներկայացնում է`
1) դիմում` լիազոր մարմնի ղեկավարի անունով (Ձև N 2).
2) անձնագրի կամ նույնականացման քարտի պատճենը.
3) հաստատության ղեկավարման իրավունքի` հավաստագրի պատճենը.
4) տվյալ հաստատության զարգացման ծրագիրը` թղթային և էլեկտրոնային տարբերակներով.
5) ինքնակենսագրություն (Ձև N 3).
6) սույն կարգի 16-րդ կետի 1-ին ենթակետով սահմանված 3 հանդիպումների արձանագրությունները:
Փաստաթղթերի պատճենները պետք է ներկայացնել բնօրինակների հետ, իսկ էլեկտրոնային եղանակով փաստաթղթերը ներկայացնելու դեպքում` բնօրինակները ներկայացնել հարցազրույցի օրը:
Փաստաթղթերն ընդունվում են ____________________________________-ում
(լիազոր մարմնի անվանումը և հասցեն)
20 ___ թվականի _________ -ից մինչև _________ -ը ներառյալ, ամեն օր` ժամը ____ -ից մինչև ժամը ____ -ը, բացի հանգստյան (շաբաթ, կիրակի) և օրենքով սահմանված ոչ աշխատանքային` տոնական և հիշատակի օրերից:
«էլեկտրոնային դիմումներն ուղարկել _________ էլեկտրոնային փոստի հասցեին»
(1-ին ձևը փոփ. 03.04.2025 թիվ 363-Ն որոշում)
Ձև N 2
___________________________________
3x4 ___________________________________
___________________________________
լուսանկար ___________________________________
___________________________________
լիազոր մարմնի ամբողջական անվանում,
մարմնի ղեկավարի պաշտոն
_______________________________ -ին
_______________________________ -ից
դիմողի անունը, հայրանունը, ազգանունը
___________________________________
դիմողի հաշվառման վայրը
___________________________________
դիմողի հեռ. (աշխ., բնակ., բջջ.)
___________________________________
անձնագրի կամ նույնականացման քարտի
սերիան, համարը, երբ և ում կողմից է
տրվել
ծնված ________________________
օրը, ամիսը, տարին, վայրը
ԴԻՄՈՒՄ
Ծանոթացել եմ _____________________________________________________
(լիազոր մարմնի անվանումը)
կողմից հանրակրթական ուսումնական հաստատության տնօրենի պաշտոնի թափուր տեղն զբաղեցնելու մասին հայտարարությանը:
Իմ մասին հայտնում եմ.
Քաղաքացիությունը
___________________________________________________________________________
(Հայաստանի Հանրապետության, իսկ երկքաղաքացիության դեպքում` նշել
կարգավիճակի ստացման ժամկետը և երկիրը)
Հայտնում եմ, որ «Հանրակրթության մասին» օրենքի 12-րդ հոդվածի 25-րդ և 27-րդ մասերով սահմանված սահմանափակումներ չունեմ:
Համակարգչային գրագիտություն
__________________________________________________________________________
__________________________________________________________________________
(տիրապետման մակարդակը, համակարգչային ծրագրերի իմացությունը)
Նախազգուշացված եմ կեղծ տվյալներ և փաստաթղթեր ներկայացնելու համար սահմանված կարգով պատասխանատվության ենթարկվելու մասին:
Դիմող` _____________________ ___ ______________20____ թ.
ստորագրություն
(2-րդ ձևը փոփ. 03.04.2025 թիվ 363-Ն որոշում)
Ձև N 3
ԻՆՔՆԱԿԵՆՍԱԳՐՈՒԹՅՈՒՆ
.__________________________________________________________.
|Անունը, հայրանունը, ազգանունը | |
|______________________________|___________________________|
|Ծննդյան օրը, ամիսը, տարեթիվը | |
|______________________________|___________________________|
|Ծննդյան վայրը, երկիրը | |
|______________________________|___________________________|
|Հաշվառման բնակավայրը | |
|______________________________|___________________________|
|Մշտական բնակավայրը | |
|______________________________|___________________________|
|Քաղաքացիությունը | |
|______________________________|___________________________|
|Այլ քաղաքացիություն, եթե կա | |
|______________________________|___________________________|
|Ընտանեկան դրությունը | |
|(պարտադիր չէ պատասխանել) | |
|______________________________|___________________________|
|Օտար լեզուների իմացությունը. | |
|բանավոր (նշել լեզուն և | |
|իմացության մակարդակը` վատ, | |
|բավարար կամ լավ) | |
|______________________________|___________________________|
|Օտար լեզուների իմացությունը. | |
|գրավոր (նշել լեզուն և | |
|իմացության մակարդակը` վատ, | |
|բավարար կամ լավ) | |
|______________________________|___________________________|
|Ուսումնառությունը, կրթու- | |
|թյունը. (թվել կրթօջախները, | |
|տարիները, մասնագիտությունը | |
|(մասնագիտությունները) | |
|______________________________|___________________________|
|Աշխատանքային գործունեությունը.| |
|(թվել աշխատավայրը (աշխատա- | |
|վայրերը), տարիները, պաշտոնը | |
|(պաշտոնները) | |
|______________________________|___________________________|
|Մասնագիտական ոլորտներում | |
|գործունեության փորձի նկարա- | |
|գիրը. (թվել հիմնարկը (հիմնարկ-| |
|ները) կամ կազմակերպությունը | |
|(կազմակերպությունները), | |
|տարիները, մասնագիտությունը | |
|(մասնագիտությունները) | |
|______________________________|___________________________|
|Վերապատրաստումները. (թվել | |
|տարիները, ծրագրերը, մասնակցու-| |
|թյան կարգավիճակը) | |
|______________________________|___________________________|
|Այլ տեղեկություններ. (գիտական | |
|հոդվածներ, մենագրություններ, | |
|պետական, կառավարական և այլ | |
|պարգևներ: Հնարավորության | |
|դեպքում նշել համացանցային | |
|հղումները) | |
|______________________________|___________________________|
|Այլ տեղեկություններ, որոնք | |
|անհրաժեշտ եք համարում | |
|տրամադրել | |
|______________________________|___________________________|
|Հեռախոսահամար | |
|______________________________|___________________________|
|Էլեկտրոնային հասցե | |
|______________________________|___________________________|
|Փոստային հասցե | |
|______________________________|___________________________|
|Անհատական բլոգը կամ համացան- | |
|ցային էջը (առկայության | |
|դեպքում) | |
.__________________________________________________________.
Ձև N 4
Հարցազրույցի արդյունքների ամփոփաթերթ
(համապատասխան ՊՈԱԿ-ի անվանումը, հավակնորդի ազգանունը,
անունը, հայրանունը)
_________________________________________________________________________
.___________________________________________________.
|NN |Հարցերի շրջանակը |Պատասխանի արդյունքը (V)|
|ը/կ| |_______________________|
| | |Դրական |Բացասական |
|___|_______________________|_______|_______________|
|1. |Մասնագիտական գիտելիքներ| | |
|___|_______________________|_______|_______________|
|2. |Կարողունակություններ | | |
|___|_______________________|_______|_______________|
|3. |Անձնային որակներ | | |
|___|_______________________|_______|_______________|
|4. |Զարգացման ծրագիր | | |
/բաժանել 2 մասի`
բովանդակություն և
ինքնուրույն աշխատանք/
|___|_______________________|_______|_______________|
|5. |Լրացուցիչ հարցեր | | |
.___________________________________________________.
Եզրակացություն __________________ _____________________
դրական/բացասական ստորագրություն
Հանձնաժողովի անդամի ազգանունը, անունը
___________________________________________________________________
(4-րդ ձևը փոփ. 03.04.2025 թիվ 363-Ն որոշում)
Ձև N 5
ՓՈՐՁԱՇՐՋԱՆԻ ԸՆԹԱՑՔՈՒՄ ՏՆՕՐԵՆԻ ԿԱՏԱՐԱԾ ԱՇԽԱՏԱՆՔՆԵՐԻ ԳՆԱՀԱՏՄԱՆ ԹԵՐԹԻԿ
._____________________________________________________________.
|1. Փորձաշրջանի ղեկավարի տվյալները |
|_____________________________________________________________|
|Անունը, ազգանունը |Պաշտոնը |
|__________________________________|__________________________|
|Էլ-փոստը |Հեռախոսահամարը |
|_____________________________________________________________|
|2. Տնօրենի (փորձաշրջանն անցնողի) տվյալները |
|_____________________________________________________________|
|Անունը, ազգանունը | |
._____________________________________________________________.
._____________________________________________________________.
|Փորձաշրջանի սկիզբը |Փորձաշրջանի ավարտը |
|_______________________ |_______________________ |
._____________________________________________________________.
._____________________________________________________________________.
|Նշել համապատասխան վարկանիշը` հետևյալ |Գերա- |Լավ |Բավա-|Անբա-|
|չափանիշների մասով. |զանց |(0.75|րար |վարար|
| |(1 միա-|միա- |(0.5 |(0 |
| |վոր) |վոր) |միա- |միա- |
| | | |վոր) |վոր) |
|___________________________________________|_______|_____|_____|_____|
|1. Իրականացնում է հաստատության | | | | |
|ուսումնադաստիարակչական գործընթացի | | | | |
|համակարգումն ու մեթոդական ղեկավարումը` | | | | |
|Հայաստանի Հանրապետության օրենսդրությանը, | | | | |
|հաստատության կանոնադրությանը և այլ | | | | |
|իրավական ակտերին համապատասխան | | | | |
|___________________________________________|_______|_____|_____|_____|
|2. Հաստատության զարգացման ծրագրի տարեկան | | | | |
|գործողություններն իրականացվում են սահմանված| | | | |
|ժամանակացույցին համապատասխան | | | | |
|___________________________________________|_______|_____|_____|_____|
|3. Հաստատության ուսումնադաստիարակչական | | | | |
|աշխատանքների տարեկան պլանի և ներդպրոցական | | | | |
|վերահսկողության պլանի հիման վրա պլանավորում| | | | |
|է հաստատության աշխատանքը և գործընթացների | | | | |
|նկատմամբ իրականացնում վերահսկողություն | | | | |
|___________________________________________|_______|_____|_____|_____|
|4. Իրականացնում է հսկողություն | | | | |
|հաստատությունում ուսումնադաստիարակչական | | | | |
|աշխատանքի ընթացքի, սովորողների ուսումնական | | | | |
|ծանրաբեռնվածության, առաջադիմության և | | | | |
|հաստատության ներքին կարգապահական, այդ | | | | |
|թվում` աշխատողների և սովորողների վարքագծի | | | | |
|կանոնների նկատմամբ | | | | |
|___________________________________________|_______|_____|_____|_____|
|5. Ապահովում է հաստատության հանրակրթական | | | | |
|ծրագրերի, ուսումնական առարկաների ծրագրերի, | | | | |
|թեմատիկ պլանների, հաստատության | | | | |
|կանոնադրության պահանջների կատարումը | | | | |
|___________________________________________|_______|_____|_____|_____|
|6. Ուսումնական պլանի հիման վրա կրթության | | | | |
|կառավարման տեղեկատվական համակարգում | | | | |
|իրականացնում է դասաբաշխում | | | | |
|___________________________________________|_______|_____|_____|_____|
|7. Ապահովում է հաստատության մանկավարժական | | | | |
|աշխատողների մասնագիտական զարգացմանն ուղղված| | | | |
|հերթական և կամավոր ատեստավորումներին | | | | |
|մասնակցությունը, պայմաններ է ստեղծում նրանց| | | | |
|հմտությունների զարգացման և բարելավման | | | | |
|համար | | | | |
|___________________________________________|_______|_____|_____|_____|
|8. Ուսուցիչների մասնագիտական զարգացման | | | | |
|կարիքի գնահատումն իրականացնում է օբյեկտիվ | | | | |
|և հիմնավորված | | | | |
|___________________________________________|_______|_____|_____|_____|
|9. Ապահովում է ուսուցիչների մասնակցությունը| | | | |
|մասնագիտական աջակցություն ստանալու | | | | |
|գործընթացին | | | | |
|___________________________________________|_______|_____|_____|_____|
|10. Ապահովում է արտադասարանական խմբակների, | | | | |
|լրացուցիչ կրթական ծառայությունների, | | | | |
|նախագծային աշխատանքների իրականացման, | | | | |
|ուսումնական լաբորատորիաների, երկարօրյա | | | | |
|պարապմունքների բնականոն գործունեությունը | | | | |
|___________________________________________|_______|_____|_____|_____|
|11. Իրականացնում է վերահսկողություն | | | | |
|դասավանդման բովանդակության, սովորողների | | | | |
|գիտելիքների յուրացման որակի նկատմամբ, | | | | |
|պարբերաբար իրականացնում է դասալսումներ, | | | | |
|մշտադիտարկումներ, կրում | | | | |
|պատասխանատվություն կրթության որակի և | | | | |
|բովանդակության համար | | | | |
|___________________________________________|_______|_____|_____|_____|
|12. Իրականացնում է վերահսկողություն | | | | |
|սովորողների և մանկավարժական աշխատողների | | | | |
|վարքականոնների պահպանման, մանկավարժական | | | | |
|աշխատողների աշխատանքային | | | | |
|պարտականությունների կատարման նկատմամբ | | | | |
|___________________________________________|_______|_____|_____|_____|
|13. Իրականացնում է մասնակցային և | | | | |
|ժողովրդավարական կառավարում, ապահովում է | | | | |
|մասնակցային ներառական միջավայրը դպրոցում | | | | |
|___________________________________________|_______|_____|_____|_____|
|14. Վարչատնտեսական մասի համակարգողի հետ | | | | |
|համագործակցելով` ապահովում է դպրոցի | | | | |
|միջավայրի հարմարեցումները (այդ թվում` | | | | |
|կրթության առանձնահատուկ պայմանների կարիք | | | | |
|ունեցող սովորողների համար) | | | | |
|___________________________________________|_______|_____|_____|_____|
|15. Ապահովում է Հայաստանի Հանրապետության | | | | |
|կրթության, գիտության, մշակույթի և սպորտի | | | | |
|նախարարի 2020 թվականի սեպտեմբերի 8-ի N 28-Ն| | | | |
|հրամանով սահմանված փաստաթղթերի վարումը և | | | | |
|պահպանումը | | | | |
|___________________________________________|_______|_____|_____|_____|
|16. Ուսումնական գործընթացի արդյունավետ | | | | |
|կազմակերպման համար համագործակցում է | | | | |
|հաստատության վարչատնտեսական մասի | | | | |
|համակարգողի հետ | | | | |
|___________________________________________|_______|_____|_____|_____|
|17. Հաստատությունում ապահովում է բարենպաստ | | | | |
|բարոյահոգեբանական մթնոլորտ և սովորողների | | | | |
|համար անվտանգ միջավայր | | | | |
|___________________________________________|_______|_____|_____|_____|
|18. Իր գործառույթների շրջանակում | | | | |
|իրականացնում է օրենսդրությամբ սահմանված` | | | | |
|պարտադիր կրթությունից դուրս մնացած և | | | | |
|կրթությունից դուրս մնալու ռիսկի տակ գտնվող | | | | |
|երեխաների հայտնաբերման և դպրոց ուղղորդման | | | | |
|կամ վերաուղղորդման աշխատանքները և | | | | |
|սահմանված ժամկետում տեղեկացնում է սովորողի | | | | |
|հաշվառման հասցեի խնամակալության և | | | | |
|հոգաբարձության մարմնին` կյանքի դժվարին | | | | |
|իրավիճակում հայտնված սովորողի (ընտանիքի) | | | | |
|հայտնաբերման դեպքում | | | | |
|___________________________________________|_______|_____|_____|_____|
|19. Խրախուսում և խթանում է մանկավարժական | | | | |
|աշխատողների ստեղծագործական նախաձեռնությունը| | | | |
|___________________________________________|_______|_____|_____|_____|
|20. Ժամանակ և ջանք է ներդնում դիտարկելու | | | | |
|և ուղղորդելու/ղեկավարելու համար | | | | |
|___________________________________________|_______|_____|_____|_____|
|21. Կազմում է ուսումնական պարապմունքների | | | | |
|դասացուցակը և ուսումնադաստիարակչական | | | | |
|աշխատանքների վիճակի մասին | | | | |
|հաշվետվությունները | | | | |
|___________________________________________|_______|_____|_____|_____|
|22. Աջակցում է դպրոցի խորհրդակցական | | | | |
|մարմինների աշխատանքներին | | | | |
|___________________________________________|_______|_____|_____|_____|
|23. Մասնակցում է խորհրդի նիստերին | | | | |
|(խորհրդակցական ձայնի իրավունքով) | | | | |
|___________________________________________|_______|_____|_____|_____|
|24. Ճկուն է մոտեցումների մեջ, ճիշտ է | | | | |
|կառավարում ժամանակը, օրինակ է ծառայում` | | | | |
|սեփական աշխատանքով | | | | |
|___________________________________________|_______|_____|_____|_____|
|ԸՆԴԱՄԵՆԸ | | | | |
._____________________________________________________________________.
1. Գնահատումն իրականացնել` յուրաքանչյուր չափանիշի դիմաց նշելով սահմանված միավորը: Փորձաշրջանն անցած է համարվում 18 և ավելի միավոր ստացած տնօրենը:
.__________________________________________________________________.
|Փորձաշրջանի ղեկավարի եզրակացությունը ____________________ |
| դրական/բացասական/ |
| |
|Փորձաշրջանի ղեկավարի ստորագրությունը ____________________ |
| |
| ___________________ |
| ամսաթիվը |
.__________________________________________________________________.
(5-րդ ձևը լրաց. 03.04.2025 թիվ 363-Ն որոշում)
Ձև N 6
ԷԼԵԿՏՐՈՆԱՅԻՆ ԵՂԱՆԱԿՈՎ ՀԱՅՏԱԳՐՄԱՆ ՀԱՄԱՐ ՊԱՀԱՆՋՎՈՂ ՏՎՅԱԼՆԵՐԸ
(Սույն ձևում առկա տվյալները լրացվում են միայն սույն որոշման 1.1-ին կետով սահմանված էլեկտրոնային եղանակով հայտը լրացնելու դեպքում)`
1. անունը, հայրանունը, ազգանունը.
2. ծննդյան օրը, ամիսը, տարեթիվը.
3. ծննդյան վայրը, երկիրը.
4. հաշվառման բնակավայրը.
5. մշտական բնակավայրը.
6. քաղաքացիությունը.
7. այլ քաղաքացիություն, եթե կա.
8. ընտանեկան դրությունը (պարտադիր չէ պատասխանել).
9. օտար լեզուների իմացությունը. բանավոր (նշել լեզուն և իմացության մակարդակը` վատ, բավարար կամ լավ).
10. օտար լեզուների իմացությունը. գրավոր (նշել լեզուն և իմացության մակարդակը` վատ, բավարար կամ լավ).
11. ուսումնառությունը, կրթությունը. (թվել կրթօջախները, տարիները, մասնագիտությունը (մասնագիտությունները).
12. կրթության ոլորտում աշխատանքային ստաժը (թվել աշխատավայրը (աշխատավայրերը), տարիները, պաշտոնը (պաշտոնները).
13. վերապատրաստումները (թվել տարիները, ծրագրերը, մասնակցության կարգավիճակը).
14. այլ տեղեկություններ (գիտական հոդվածներ, մենագրություններ, պետական, կառավարական և այլ պարգևներ: Հնարավորության դեպքում նշել համացանցային հղումները).
15. այլ տեղեկություններ, որոնք անհրաժեշտ եք համարում տրամադրել.
16. հեռախոսահամարը.
17. էլեկտրոնային հասցեն.
18. փոստային հասցեն.
19. անհատական բլոգը կամ համացանցային էջը (առկայության դեպքում):
(6-րդ ձևը լրաց. 03.04.2025 թիվ 363-Ն որոշում)
(հավելվածը խմբ. 23.11.2023 թիվ 2039-Ն որոշում)
Պաշտոնական հրապարակման օրը` 10 փետրվարի 2023 թվական: