ՀՀ ՔԱՂԱՔԱՑԻԱԿԱՆ ԴԱՏԱՎԱՐՈՒԹՅԱՆ ՕՐԵՆՍԳՐՔԻ 33-ՐԴ ՀՈԴՎ ...

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ՎՃՌԱԲԵԿ ԴԱՏԱՐԱՆ

    ՀՀ վերաքննիչ քաղաքացիական        Քաղաքացիական գործ թիվ ԵԿԴ/1446/02/10

    դատարանի որոշում                                              2012 թ.

Քաղաքացիական գործ թիվ ԵԿԴ/1446/02/10

Նախագահող դատավոր` Կ. Չիլինգարյան

    Դատավորներ`        Ա. Պետրոսյան

                       Տ. Նազարյան

ՈՐՈՇՈՒՄ ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Հայաստանի Հանրապետության վճռաբեկ դատարանի քաղաքացիական և վարչական

պալատը (այսուհետ` Վճռաբեկ դատարան)

    նախագահությամբ                            Ե. Խունդկարյանի

    մասնակցությամբ դատավորներ                 Մ. Դրմեյանի

                                              Վ. Աբելյանի

                                              Ս. Անտոնյանի

                                              Վ. Ավանեսյանի

                                              Ա. Բարսեղյանի

                                              Գ. Հակոբյանի

                                              Է. Հայրիյանի

                                              Տ. Պետրոսյանի

                                              Ե. Սողոմոնյանի

2012 թվականի ապրիլի 27-ին

դռնբաց դատական նիստում, քննելով Մնացական Մնացականյանի ներկայացուցիչ Կարեն Պետրոսյանի վճռաբեկ բողոքը ՀՀ վերաքննիչ քաղաքացիական դատարանի 15.12.2011 թվականի որոշման դեմ` ըստ հայցի Մնացական Մնացականյանի ընդդեմ «Էյչ-Էս-Բի-Սի Բանկ Հայաստան» ՓԲԸ-ի (այսուհետ` Բանկ)` պայմանագիրը լուծելու և վնասները հատուցելու պահանջների մասին քաղաքացիական գործով լրացուցիչ վճիռ կայացնելու վերաբերյալ,

ՊԱՐԶԵՑ

1. Գործի դատավարական նախապատմությունը

Դիմելով դատարան` Մնացական Մնացականյանը պահանջել է լուծել 03.06.2008 թվականին կնքված պայմանագիրը և Բանկից բռնագանձել 70.806.711 ՀՀ դրամ` որպես պայմանագրի լուծմամբ պատճառված վնասի հատուցում, ինչպես նաև Բանկից բռնագանձել փաստաբանի վարձատրության գումարը:

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 13.10.2010 թվականի վճռով հայցը բավարարվել է:

ՀՀ վերաքննիչ քաղաքացիական դատարանի 24.12.2010 թվականի որոշմամբ Բանկի վերաքննիչ բողոքը մերժվել է, իսկ Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 13.10.2010 թվականի վճիռը թողնվել է օրինական ուժի մեջ:

Վճռաբեկ դատարանի 09.03.2011 թվականի որոշմամբ վերադարձվել է ՀՀ վերաքննիչ քաղաքացիական դատարանի 24.12.2010 թվականի որոշման դեմ Բանկի ներկայացուցչի բերած վճռաբեկ բողոքը:

26.11.2010 թվականին դիմելով դատարան` Մնացական Մնացականյանը պահանջել է կայացնել լրացուցիչ վճիռ և Բանկից բռնագանձել 7.080.671 ՀՀ դրամ` որպես փաստաբանի վարձատրություն:

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի (դատավոր` Էդ. Ավետիսյան) (այսուհետ` Դատարան) 16.06.2011 թվականի լրացուցիչ վճռով դիմումը բավարարվել է մասնակիորեն:

ՀՀ վերաքննիչ քաղաքացիական դատարանի (այսուհետ` Վերաքննիչ դատարան) 15.12.2011 թվականի որոշմամբ Մնացական Մնացականյանի վերաքննիչ բողոքը մերժվել է, իսկ Բանկի բերած վերաքննիչ բողոքը բավարարվել է, որոշվել է Դատարանի 16.06.2011 թվականի լրացուցիչ վճիռը բեկանել ու փոփոխել` դիմումը մերժել:

Սույն գործով վճռաբեկ բողոք է ներկայացրել Մնացական Մնացականյանը:

Վճռաբեկ բողոքի պատասխան չի ներկայացվել:

Կողմերը Վճռաբեկ դատարան են ներկայացրել 29.02.2012 թվականի հաշտության համաձայնությունը:

2. Վճռաբեկ դատարանի պատճառաբանությունները և եզրահանգումը

ՀՀ քաղաքացիական դատավարության օրենսգրքի 33-րդ հոդվածի համաձայն` կողմերը դատավարության ցանկացած փուլում կարող են գործն ավարտել հաշտության համաձայնությամբ:

Կողմերի միջև կայացված հաշտության համաձայնությունը ձևակերպվում է գրավոր:

ՀՀ քաղաքացիական դատավարության օրենսգրքի 109-րդ հոդվածի 7-րդ կետի համաձայն` դատարանը կարճում է գործի վարույթը, եթե դատարանը հաստատել է կնքված հաշտության համաձայնությունը:

ՈՒսումնասիրելով կողմերի 29.02.2012 թվականի հաշտության համաձայնությունը` Վճռաբեկ դատարանը գտնում է, որ այն չի հակասում օրենքին և այլ իրավական ակտերին, չի խախտում այլ անձանց իրավունքներն ու օրինական շահերը:

Այսպիսով, Վճռաբեկ դատարանը գտնում է, որ կողմերի ներկայացրած հաշտության համաձայնությունը պետք է հաստատել:

Ելնելով վերոգրյալից և ղեկավարվելով ՀՀ քաղաքացիական դատավարության օրենսգրքի 33-րդ, 240-241.2-րդ հոդվածներով` Վճռաբեկ դատարանը

ՈՐՈՇԵՑ

1. Հաստատել կողմերի միջև կնքված 29.02.2012 թվականի հաշտության համաձայնությունը հետևյալ բովանդակությամբ.

«ՀԱՇՏՈՒԹՅԱՆ ՀԱՄԱՁԱՅՆԱԳԻՐ

ք. Երևան

երկու հազար տասներկու թվականի փետրվարի քսանիննին

«էյչ-էս-Բի-Սի Բանկ Հայաստան» ՓԲԸ-ն (այսուհետ` Կողմ 1), ի դեմս լիազորված անձ` Գևորգ Պողոսյանի, մի կոմից, և Մնացական Մնացականյանը (այսուհետ` Կողմ 2), ի դեմս լիազորված անձ Կարեն Պետրոսյանի, մյուս կողմից, որոնք այսուհետ տեքստում համատեղ հիշատակման դեպքում կանվանվեն` Կողմեր, կնքեցին սույն հաշտության համաձայնագիրը (այսուհետ նաև` Համաձայնագիր) հետևյալի մասին:

Հաշվի առնելով, որ`

I. Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանը, քննելով ԵԿԴ/1446/02/10 քաղաքացիական գործով լրացուցիչ վճիռ կայացնելու մասին Կողմ 2-ի դիմումը, վճռել Է` Կողմ 1-ից հօգուտ Կողմ 2-ի բռնագանձել 2 124 201.0 ՀՀ դրամ` որպես իրավաբանի վարձատրության ծախս:

II. Կողմերը ներկայացրել են վերաքննիչ բողոք:

III. ՀՀ վերաքննիչ քաղաքացիական դատարանը 15.12.2011թ. որոշմամբ բավարարել է Կողմ 1-ի անունից բերված վերաքննիչ բողոքը:

IV. Կողմ 2-ը ՀՀ Վճռաբեկ դատարան է ներկայացրել վճռաբեկ բողոք:

ՈՒստի կողմերը կնքեցին սույն Հաշտության համաձայնությունը, համաձայն որի,

1. Կողմ 1-ը, սույն հաշտության համաձայնագրի ուժի մեջ մտնելու օրվանից 3 բանկային օրվա ընթացքում Կողմ 2-ին կվճարի 2 124 201.0 ՀՀ դրամ` որպես ողջամիտ փաստաբանական ծախսերի հատուցման գումար:

2. Սույն համաձայնագրով Կողմերն ընդունում են, որ համաձայն չեն սույն քաղաքացիական գործով միմյանց արտահայտած իրավական դիրքորոշումներին, և սույն Համաձայնագրի դրույթները չեն կարող մեկնաբանվել որպես դրա որևէ կողմի պահանջների ընդունում մյուս կողմի կողմից:

3. Սույն համաձայնագրով Կողմերն արտահայտում են միմյանց միջև առկա վեճերն ավարտելու իրենց կամքը` բացառապես խուսափելու համար դատավարական գործընթացներից, իրավական ռիսկերից և իրավունքի հետագա պաշտպանությանն ուղղված ծախսերից:

4. Կողմերը հաստատում են, որ մնացած դատական ծախսերի հարցը, ներառյալ` փաստաբանական ծախսերի, համարվում են լուծված:

5. Կողմերը ծանոթ են իրենց իրավունքներին և պարտավորություններին և հաշտության համաձայնության կնքման օրենքով նախատեսված հետևանքներին և դիմում են ՀՀ Վճռաբեկ դատարան Կողմ 2-ի ներկայացրած վճռաբեկ բողոքը վարույթ ընդունելու և սույն հաշտության համաձայնությունը հաստատելու խնդրանքով:

Կողմ 1-ի անունից` (ստորագրություն) Գևորգ Պողոսյան

Կողմ 2` (ստորագրություն) Մնացական Մնացականյան

Ներկայացուցիչ` (ստորագրություն) Կարեն Պետրոսյան»:

2. ՀՀ վերաքննիչ քաղաքացիական դատարանի 15.12.2011 թվականի որոշումը բեկանել և լրացուցիչ վճիռ կայացնելու վերաբերյալ դիմումի մասով գործի վարույթը կարճել:

3. Որոշումն օրինական ուժի մեջ է մտնում հրապարակման պահից, վերջնական է և ենթակա չէ բողոքարկման:

Նախագահող`  Ե. Խունդկարյան

Դատավորներ` Մ. Դրմեյան

Վ. Աբելյան

Ս. Անտոնյան

Վ. Ավանեսյան

Ա. Բարսեղյան

Գ. Հակոբյան

Է. Հայրիյան

Տ. Պետրոսյան

Ե. Սողոմոնյան