(ուժը կորցրել է 09.04.18 թվականից` 05.04.18 ՆՀ-227-Ն հրամանագիր)
i
030.1164.220802
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ
ՀՐԱՄԱՆԱԳԻՐԸ
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ՄՐՑԱՆԱԿՆԵՐ ՀԻՄՆԵԼՈՒ ԵՎ ՇՆՈՐՀԵԼՈՒ ԿԱՐԳԻ ՄԱՍԻՆ
i
Հայրենական գրականության և արվեստի, ճարտարապետության և քաղաքաշինության, ճշգրիտ և բնական, հումանիտար և հասարակական գիտությունների բնագավառներում լավագույն ստեղծագործությունները, հայտնագործությունները (գյուտերը) և աշխատանքները գնահատելու, ինչպես նաև հեղինակներին խրախուսելու նպատակով որոշում եմ.
i
1. Հիմնել Հայաստանի Հանրապետության պետական մրցանակներ` գրականության և արվեստի բնագավառում` բարձրարժեք ստեղծագործությունների համար, ճարտարապետության և քաղաքաշինության բնագավառում` լավագույն աշխատանքների (ինքնատիպ նախագծեր և Հայաստանի Հանրապետության տարածքում ավարտված շինություններ կամ համալիրներ) համար, ճշգրիտ և բնական գիտությունների բնագավառում` նշանակալի, ակնառու հայտնագործությունների (գյուտերի) համար, որոնց արդյունքներն էապես հարստացրել են հայրենական ու միջազգային գիտությունը և էական ազդեցություն ունեցել գիտատեխնիկական առաջընթացի վրա, հումանիտար և հասարակական գիտությունների բնագավառում` արժեքավոր աշխատանքների համար, հետևյալ համամասնությամբ`
1) գրականության և արվեստի բնագավառում`
ա. գրականության և հրապարակախոսության ոլորտում` մեկ մրցանակ,
բ. երաժշտության ոլորտում` մեկ մրցանակ,
գ. կերպարվեստի ոլորտում` մեկ մրցանակ,
դ) թատերական արվեստի ոլորտում` մեկ մրցանակ,
ե) կինոարվեստի ոլորտում` մեկ մրցանակ.
2) ճարտարապետության և քաղաքաշինության բնագավառում` մեկ մրցանակ.
3) ճշգրիտ և բնական գիտությունների բնագավառում` մեկ մրցանակ.
4) հումանիտար և հասարակական գիտությունների բնագավառում` մեկ մրցանակ:
(1-ին կետը փոփ. 18.12.10 ՆՀ-314-Ն, 06.06.11 ՆՀ-93-Ն, 04.06.13 ՆՀ-128-Ն հրամանագրեր)
i
2. Սահմանել, որ որպես մրցանակ շնորհվում են` մրցանակի դափնեկրի վկայագիր, կրծքանշան և դրամական պարգև` 5 000 000 (հինգ միլիոն) դրամի չափով:
(2-րդ կետը փոփ. 18.12.10 ՆՀ-314-Ն հրամանագիր)
i
3. Հաստատել Հայաստանի Հանրապետության պետական մրցանակների շնորհման կարգը` համաձայն հավելվածի:
(3-րդ կետը փոփ. 18.12.10 ՆՀ-314-Ն հրամանագիր)
i
3.1. Հաստատել Հայաստանի Հանրապետության պետական մրցանակի դափնեկրի կրծքանշանի նկարագրությունը և ձևը` համաձայն 1.1-ին և վկայագրի ձևը` համաձայն 1.2-րդ հավելվածների:
(3.1-ին կետը լրաց. 23.12.13 ՆՀ-333-Ն հրամանագիր)
i
4. Հայաստանի Հանրապետության պետական մրցանակների հանձնախմբերի պահպանման, մրցանակաբաշխության կազմակերպման, մրցանակների մաս կազմող վկայագրերի, կրծքանշանների պատրաստման և դրամական պարգևների ֆինանսավորման համար Հայաստանի Հանրապետության կառավարությունը պետական բյուջեի` Հայաստանի Հանրապետության Նախագահի աշխատակազմի ծախսերի մասում սահմանված կարգով նախատեսում է համապատասխան միջոցներ:
(4-րդ կետը փոփ. 15.06.04 ՆՀ-108-Ն, 18.12.10 ՆՀ-314-Ն հրամանարեր)
5. Հայաստանի Հանրապետության Նախագահի աշխատակազմին` ապահովել Հայաստանի Հանրապետության պետական մրցանակների մաս կազմող կրծքանշանների և վկայագրերի պատրաստումը:
i
6. ՈՒժը կորցրած ճանաչել Հայաստանի Հանրապետության Նախագահի 2000 թվականի ապրիլի 4-ի «Գրականության և արվեստի բնագավառում պետական մրցանակներ հիմնելու և շնորհելու կարգի մասին» ՆՀ-543 հրամանագիրը:
7. Սույն հրամանագիրն ուժի մեջ է մտնում պաշտոնական հրապարակմանը հաջորդող օրվանից:
(վերնագիրը և նախաբանը փոփ. 18.12.10 ՆՀ-314-Ն հրամանագիր)
22 օգոստոսի 2002 թ.
ՆՀ-1164-Ն
Հավելված
Հայաստանի Հանրապետության
Նախագահի 2002 թվականի
օգոստոսի 22-ի ՆՀ-1164-Ն հրամանագրի
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ՄՐՑԱՆԱԿՆԵՐԻ ՇՆՈՐՀՄԱՆ ԿԱՐԳԸ
i
1. Հայաստանի Հանրապետության պետական մրցանակները (այսուհետ` մրցանակ) շնորհվում են լավագույն ստեղծագործությունների, հայտնագործությունների (գյուտերի) և աշխատանքների հեղինակներին:
(1-ին կետը փոփ. 18.12.10 ՆՀ-314-Ն հրամանագիր)
i
2. Մրցանակը շնորհվում է երկու տարին մեկ անգամ և որպես կանոն հանձնվում է մրցանակաբաշխության տարվա դեկտեմբեր ամսվա վերջին 10 օրվա ընթացքում:
Ստեղծագործությունները, հայտնագործությունները (գյուտերը) և աշխատանքները մրցանակի կարող են ներկայացվել միայն մեկ անգամ:
(2-րդ կետը փոփ. 04.06.13 ՆՀ-128-Ն հրամանագիր)
i
3. Հայաստանի Հանրապետության պետական մրցանակների հանձնախմբերը (այսուհետ` հանձնախումբ) մրցանակաբաշխության տարվա մարտի 1-ից մինչև 15-ն ընկած ժամանակահատվածում (2002 թվականի համար` սեպտեմբերի 1-ից մինչև 15-ն, իսկ 2013 թվականի համար` հուլիսի 24-ից մինչև 31-ն ընկած ժամանակահատվածում)` միևնույն օրը, մամուլի և զանգվածային լրատվության միևնույն միջոցներով տեղեկացնում են մրցանակաբաշխության անցկացման, ինչպես նաև մրցանակի հայցման առաջարկությունների ներկայացման մասին:
(3-րդ կետը փոփ. 18.12.10 ՆՀ-314-Ն, 22.07.13 ՆՀ-187-Ն հրամանագրեր)
i
4. Գրականության և արվեստի ստեղծագործությունները, ճարտարապետության և քաղաքաշինության բնագավառի աշխատանքները մրցանակի հայցման կարող են ներկայացվել հեղինակների, ստեղծագործական միավորումների, ինչպես նաև գրականության և արվեստի, ճարտարապետության և քաղաքաշինության բնագավառների այլ կազմակերպությունների կողմից:
Ճշգրիտ և բնական, հումանիտար և հասարակական գիտությունների բնագավառների հայտնագործությունները (գյուտերը) և աշխատանքները մրցանակի հայցման կարող են ներկայացվել Հայաստանի Հանրապետության կրթության և գիտության նախարարության, Հայաստանի Հանրապետության կրթության և գիտության կառավարման ոլորտում գիտության պետական կոմիտեի, Հայաստանի Հանրապետության գիտությունների ազգային ակադեմիայի նախագահության, բաժանմունքների, պետական գիտահետազոտական ինստիտուտների և կենտրոնների, պետական և հավատարմագրված ոչ պետական բուհերի գիտական խորհուրդների կողմից:
(4-րդ կետը փոփ. 18.12.10 ՆՀ-314-Ն հրամանագիր)
i
5. Մրցանակաբաշխության կարող են ներկայացվել միայն այն ստեղծագործությունները, հայտնագործությունները (գյուտերը) և աշխատանքները, որոնք առաջին անգամ իրագործվել (հրատարակվել, հրապարակվել, կատարվել, ցուցադրվել, կառուցվել-ավարտվել, բեմադրվել) են`
1) գրականության և արվեստի բնագավառներում` մրցանակի հայցման առաջարկությունների ներկայացման ժամկետն ավարտվելու օրվան նախորդող երկու տարվա ընթացքում.
2) ճարտարապետության և քաղաքաշինության, ճշգրիտ և բնական գիտությունների, հումանիտար և հասարակական գիտությունների բնագավառներում` մրցանակի հայցման առաջարկությունների ներկայացման ժամկետն ավարտվելու օրվան նախորդող երեք տարվա ընթացքում:
(5-րդ կետը փոփ. 18.12.10 ՆՀ-314-Ն, 04.06.13 ՆՀ-128-Ն հրամանագրեր)
i
6. Ստեղծագործությունները, հայտնագործությունները (գյուտը(երը) և աշխատանքները մրցանակի հայցման են ներկայացվում հանձնախմբերին մրցանակաբաշխության տարվա հուլիսի 15-ից մինչև սեպտեմբերի 15-ը:
(6-րդ կետը փոփ. 18.12.10 ՆՀ-314-Ն, 22.07.13 ՆՀ-187-Ն, 12.09.13 ՆՀ-219-Ն, 13.06.15 ՆՀ-434-Ն հրամանագրեր)
i
7. Ստեղծագործությունները, հայտնագործությունները) (գյուտերը) և աշխատանքները մրցանակի հայցման ներկայացվելիս դրան կցվում են այդ ոլորտի երեք մասնագետների` ստեղծագործության վերաբերյալ գրավոր դրական կարծիքներ, որոնցում պետք է փաստարկված ներկայացվի ստեղծագործության` մրցանակի արժանի լինելու հանգամանքը:
(7-րդ կետը փոփ. 18.12.10 ՆՀ-314-Ն հրամանագիր)
i
8. Մրցանակի հայցման ներկայացվելիս ստեղծագործության, հայտնագործության, (գյուտի) և աշխատանքի հեղինակի (հեղինակների) և այդ ոլորտում նրա (նրանց) գործունեության վերաբերյալ ներկայացվում է նաև հակիրճ տեղեկատվություն:
(8-րդ կետը փոփ. 18.12.10 ՆՀ-314-Ն հրամանագիր)
9. Մրցանակի հայցման ներկայացված ստեղծագործությունները, հայտնագործություները, (գյուտերը և աշխատանքերը քննարկում, մրցանակի հավակնորդների ընտրությունը կազմակերպում և անցկացնում են հանձնախմբերը:
(9-րդ կետը փոփ. 18.12.10 ՆՀ-314-Ն հրամանագիր)
i
10. Հանձնախմբերի կազմերը, սույն հրամանագրի 1-ին կետում նշված բնագավառներին և ոլորտներին համապատասխան, հաստատվում և փոփոխվում են Հայաստանի Հանրապետության Նախագահի կարգադրությամբ:
(10-րդ կետը փոփ. 18.12.10 ՆՀ-314-Ն հրամանագիր)
11. Հանձնախումբը բաղկացած է ինն անդամից:
i
(11-րդ կետը փոփ. 14.03.05 ՆՀ-52-Ն հրամանագիր)
12. Հանձնախմբերում անդամներն ընդգրկվում են իրենց համաձայնությամբ և իրենց պարտականությունները կատարում են հասարակական հիմունքներով:
13. Հանձնախմբի ընթացիկ աշխատանքը կազմակերպելու նպատակով հանձնախումբն իր անդամների ընդհանուր թվի ձայների մեծամասնությամբ ընդունում է իր աշխատակարգը:
14. Հանձնախումբն ունի նախագահ, որին իր անդամներից ընտրում է հանձնախումբը:
i
15. Հանձնախմբերի անդամները իրենց ստեղծագործությունների, հայտնագործությունների (գյուտերի) և աշխատանքերի) համար չեն կարող հավակնել հրամանագրի 1-ին կետում նշված պետական մրցանակներ ստանալուն:
(15-րդ կետը փոփ. 18.12.10 ՆՀ-314-Ն հրամանագիր)
16. Հանձնախումբը, սույն կարգին և իր աշխատակարգին համապատասխան, աշխատանքը կազմակերպում է նիստերի միջոցով, որոնք գումարվում են ոչ պակաս, քան երկու ամիսը մեկ անգամ, ինչպես նաև արտահերթ նիստերի միջոցով, որոնք կարող են գումարվել հանձնախմբի նախագահի կամ հանձնախմբի անդամների առնվազն մեկ երրորդի կողմից:
17. Հանձնախմբի նիստն իրավազոր է, եթե դրան մասնակցում է հանձնախմբի անդամների կեսից ավելին:
18. Հանձնախմբի նախագահի կողմից իր պարտականությունների կատարման ժամանակավոր անհնարինության կամ նրա բացակայության դեպքում նախագահի պարտականությունների կատարումը ժամանակավորապես դրվում է հանձնախմբի անդամներից որևէ մեկի վրա` հանձնախմբի որոշմամբ:
19. Հանձնախմբի նախագահը`
ա) հրավիրում և վարում է հանձնախմբի նիստը.
բ) նշանակում է հանձնախմբի նիստի անցկացման վայրը, օրը և ժամը.
գ) ստորագրում է հանձնախմբի որոշումները.
դ) իրականացնում է հանձնախմբի գործառույթներից բխող այլ կազմակերպական աշխատանքներ:
20. Հանձնախմբի անդամը`
ա) մասնակցում է հանձնախմբի աշխատանքներին.
բ) կատարում է հանձնախմբի հանձնարարականները.
գ) առաջարկություններ է ներկայացնում հանձնախմբի գործունեությանն առնչվող հարցերի վերաբերյալ.
դ) իրականացնում է հանձնախմբի գործառույթներից բխող այլ աշխատանքներ:
21. (21-րդ կետն ուժը կորցրել է 12.09.07 ՆՀ-205-Ն հրամանագիր)
i
22. Հանձնախումբն է որոշում մրցանակի հավակնորդների ընտրության չափանիշները:
Ճշգրիտ և բնական գիտությունների, հումանիտար և հասարակական գիտությունների բնագավառների հանձնախմբերը մրցանակի թեկնածուների հայտնագործությունները (գյուտերը) և աշխատանքները, ինչպես նաև դրանց կցված նյութերը կարող են ուղարկել անկախ փորձաքննության` սույն հրամանագրի 1-ին կետով սահմանված պահանջներին համապատասխանությունը որոշելու նպատակով:
Փորձաքննությունն անցկացվում է համապատասխան ոլորտի առաջատար կազմակերպությունների կամ առանձին փորձագետների կողմից, որոնց ցանկը յուրաքանչյուր տարի որոշում է համապատասխան հանձնախումբը:
Փորձաքննության արդյունքները հանձնախմբին ներկայացվում են հիմնավորված գրավոր եզրակացության ձևով, որը ստորագրում է այն կատարած անձը, իսկ կազմակերպության կողմից կատարվելու դեպքում` տվյալ կազմակերպության ղեկավարը:
(22-րդ կետը փոփ. 18.12.10 ՆՀ-314-Ն հրամանագիր)
23. Մրցանակի դափնեկրի թեկնածուին ընտրելու որոշումը հանձնախումբն ընդունում է գաղտնի քվեարկությամբ, հանձնախմբի անդամների ընդհանուր թվի ձայների մեծամասնությամբ:
24. Մրցանակների շնորհման մասին առաջարկությունները հանձնախմբերը Հայաստանի Հանրապետության Նախագահին են ներկայացնում ոչ շուտ, քան մրցանակաբաշխության տարվա դեկտեմբերի 1-ը և ոչ ուշ, քան դեկտեմբերի 15-ը:
25. Մրցանակների շնորհման մասին հանձնախմբերի առաջարկությունների հիման վրա մրցանակները շնորհում է Հայաստանի Հանրապետության Նախագահը` համապատասխան հրամանագրով:
i
26. Մրցանակը ստեղծագործության, հայտնագործության, (գյուտի) և աշխատանքի համահեղինակների շնորհվելու դեպքում մրցանակի մաս կազմող դրամական պարգևը հավասար բաշխվում է համահեղինակների միջև, յուրաքանչյուրին հանձնվում է նաև կրծքանշան և վկայագիր:
(26-րդ կետը փոփ. 18.12.10 ՆՀ-314-Ն հրամանագիր)
27. Մահացած դափնեկրի կրծքանշանը և վկայագիրը հանձնվում են նրա ընտանիքին, իսկ դրամական պարգևը փոխանցվում է նրա ժառանգներին` Հայաստանի Հանրապետության օրենսդրությամբ սահմանված կարգով:
28. Հանձնախմբերի նյութատեխնիկական ապահովումն իրականացնում է Հայաստանի Հանրապետության Նախագահի աշխատակազմը:
29. Մրցանակի արժանացած անձանց մրցանակները հանձնում է Հայաստանի Հանրապետության Նախագահը կամ նրա կողմից լիազորված անձը` հանդիսավոր պայմաններում:
Հավելված 1.1
i
ՀՀ Նախագահի
2002 թվականի օգոստոսի 22-ի
ՆՀ-1164-Ն հրամանագրի
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ՄՐՑԱՆԱԿԻ ԴԱՓՆԵԿՐԻ ԿՐԾՔԱՆՇԱՆԻ ՆԿԱՐԱԳՐՈՒԹՅՈՒՆԸ ԵՎ ՁԵՎԸ
Հայաստանի Հանրապետության պետական մրցանակի դափնեկրի կրծքանշանը իրենից ներկայացնում է 26 մմ տրամագծով սկավառակ, որի կենտրոնում պատկերված է Արարատ լեռը, իսկ ներքևում` գիտությունը և արվեստը խորհրդանշող գիրք և փետուր:
Կրծքանշանի կենտրոնական պատկերները եզերված են դափնեպսակով, որի վերին մասի ներքևում կամարաձև գրված են «ՀՀ ՊԵՏԱԿԱՆ ՄՐՑԱՆԱԿԻ ԴԱՓՆԵԿԻՐ» բառերը:
Կրծքանշանը պատրաստված է 585 հարգի դեղին ոսկուց:
Կրծքանշանն օղակների միջոցով ամրանում է 25 x 15 մմ չափերով` ծայրերում անկյունակներով երիզված ուղղանկյունաձև կախիչին: Կախիչն արծնապատված է Հայաստանի Հանրապետության դրոշի գույներով (կարմիր, կապույտ, նարնջագույն), պատրաստված է 925 հարգի արծաթից և ոսկեպատված 999 հարգի ոսկով, հակառակ կողմում ունի հարմարանք` հագուստին ամրացնելու համար:
Կրծքանշանի դարձերեսին փորագրված է կրծքանշանի հերթական համարը և ոսկու հարգը:
____________________________________
ԻՐՏԵԿ - կրծքանշանի նկարը չի բերվում
(1.1-ին հավելվածը լրաց. 23.12.13 ՆՀ-333-Ն հրամանագիր)
Հավելված 1.2
ՀՀ Նախագահի
2002 թվականի օգոստոսի 22-ի
ՆՀ-1164-Ն հրամանագրի
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ՄՐՑԱՆԱԿԻ ԴԱՓՆԵԿՐԻ ՎԿԱՅԱԳՐԻ ՁԵՎԸ
_________________________________
ԻՐՏԵԿ - վկայագրի ձևը չի բերվում
(1.2-րդ հավելվածը լրաց. 23.12.13 ՆՀ-333-Ն հրամանագիր)