ՄԱՐԴԱՍԻՐԱԿԱՆ ՕԳՆՈՒԹՅԱՆ ԵՎ ԲԱՐԵԳՈՐԾԱԿԱՆ ԾՐԱԳՐԵՐԻ ՄԱՍԻՆ

040.0594.280900

«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ

«28» սեպտեմբերի 2000 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

28 սեպտեմբերի 2000 թվականի N 594

ՄԱՐԴԱՍԻՐԱԿԱՆ ՕԳՆՈՒԹՅԱՆ ԵՎ ԲԱՐԵԳՈՐԾԱԿԱՆ ԾՐԱԳՐԵՐԻ ՄԱՍԻՆ

Հիմք ընդունելով «Ավելացված արժեքի հարկի մասին» Հայաստանի Հանրապետության օրենքի 15 հոդվածի 20-րդ կետը և 39 հոդվածը, ինչպես նաև մարդասիրական օգնության և բարեգործական ծրագրերի իրականացման արդյունավետությունը բարձրացնելու նպատակով Հայաստանի Հանրապետության կառավարությունը որոշում է.

1. Սահմանել, որ Հայաստանի Հանրապետության օրենքներով և Հայաստանի Հանրապետության միջազգային պայմանագրերով ուղղակիորեն կարգավորված չլինելու դեպքում այլ պետությունների, միջազգային միջկառավարական (միջպետական) կազմակերպությունների, միջազգային, օտարերկրյա ու Հայաստանի Հանրապետության հասարակական (ներառյալ` բարեգործական), կրոնական և համանման բնույթի ոչ պետական այլ կազմակերպությունների, առանձին բարերարների կողմից ապրանքների մատակարարումը և ծառայությունների մատուցումը կարող են որակվել որպես`

ա) մարդասիրական օգնություն, եթե այն անմիջականորեն ֆիզիկական անձանց հասցեագրված գործունեություն է` ուղղված մարդկանց ֆիզիկական և հոգևոր պահանջմունքների բավարարմանը, մասնավորապես, նրանց սննդի, առողջության, կրթության, բնակարանային կամ կենցաղային պայմանների բարելավմանը, աշխատանքային հմտությունների և ունակությունների զարգացմանը.

բ) բարեգործական գործունեություն, եթե ապրանքները մատակարարվում կամ ծառայությունները մատուցվում են բժշկական, սոցիալական, գիտական, ուսումնական, դաստիարակչական, մշակութային, մարզական, բնապահպանական և համանման բնույթի այլ կազմակերպություններին, ինչպես նաև Հայաստանի Հանրապետությանն ու Հայաստանի Հանրապետության համայնքներին:

Նշված սահմանումները վերաբերում են Հայաստանի Հանրապետության հարկային և մաքսային օրենսդրությամբ տվյալ գործունեության համար նախատեսված արտոնությունների կիրառման շրջանակին և չեն կարող մեկնաբանվել որպես այլ հարաբերություններ կարգավորող սահմանումներ:

Հայաստանի Հանրապետության հարկային և մաքսային օրենսդրությամբ սահմանված արտոնությունները կիրառվում են ծրագրերը Հայաստանի Հանրապետության կառավարության կամ Հայաստանի Հանրապետության կառավարության մարդասիրական օգնության կենտրոնական հանձնաժողովի կողմից մարդասիրական օգնության կամ բարեգործական ծրագրեր որակելու մասին համապատասխան որոշման ընդունումից հետո:

(1-ին կետն ուժը կորցրել է 28.06.01 թիվ 573 որոշում)

2. Մարդասիրական օգնության կամ բարեգործական գործունեության առարկա կարող են լինել`

գույքը` ներառյալ դրամական միջոցները, արժեթղթերը և գույքային իրավունքները,

աշխատանքները և ծառայությունները,

մտավոր գործունեության արդյունքները (մտավոր սեփականություն):

Մարդասիրական օգնությունը կամ բարեգործական գործունեությունն իրականացվում է անշահախնդրորեն` անհատույց կամ արտոնյալ պայմաններով:

(2-րդ կետն ուժը կորցրել է 28.06.01 թիվ 573 որոշում)

3. Գործարքը (գործառնությունը) կամ որևէ ծրագիր մարդասիրական օգնության կամ բարեգործական ծրագրի իրականացման հետ անմիջականորեն կապված և դրա համար զգալի նշանակություն ունեցող որակվելու համար դրանք պետք է էական նշանակություն ունենան վերջինիս արդյունավետ կատարումը, մասնավորապես, բաշխվող ապրանքների ներմուծումը, ձեռքբերումը, պահպանումը և տեղափոխումը, ինչպես նաև աշխատանքների կատարումն ու ծառայությունների մատուցումն ապահովելու համար:

(3-րդ կետն ուժը կորցրել է 28.06.01 թիվ 573 որոշում)

4. Ծրագրերը որպես մարդասիրական օգնության կամ բարեգործական կամ դրանց հետ անմիջականորեն կապված և դրանց համար զգալի նշանակություն ունեցող ծրագրեր որակվելու հետ մեկտեղ, բարերարի համաձայնությամբ, կարող են սահմանվել դրանց իրականացման հատուկ պայմաններ:

(4-րդ կետն ուժը կորցրել է 28.06.01 թիվ 573 որոշում)

5. Սահմանել, որ ծրագրերը Հայաստանի Հանրապետության օրենքներով, Հայաստանի Հանրապետության միջազգային պայմանագրերով կամ Հայաստանի Հանրապետության կառավարության որոշումներով որպես մարդասիրական օգնության կամ բարեգործական կամ դրանց հետ անմիջականորեն կապված և դրանց համար զգալի նշանակություն ունեցող ծրագրեր որակված չլինելու դեպքում նման որակման են ենթակա Հայաստանի Հանրապետության կառավարության մարդասիրական օգնության կենտրոնական հանձնաժողովի որոշմամբ:

Հայաստանի Հանրապետության կառավարության մարդասիրական օգնության կենտրոնական հանձնաժողովի կանոնադրությունն ու անհատական կազմը հաստատում է Հայաստանի Հանրապետության վարչապետը:

(5-րդ կետն ուժը կորցրել է 28.06.01 թիվ 573 որոշում)

6. Սահմանել, որ ծրագիրն իրականացնող կազմակերպությունը, անկախ այն հանգամանքից, թե ինչ կարգով է ծրագիրը որակված որպես մարդասիրական օգնության կամ բարեգործական, սահմանված ձևերին համապատասխան, Հայաստանի Հանրապետության կառավարության մարդասիրական օգնության կենտրոնական հանձնաժողով է ներկայացնում`

ա) մինչև յուրաքանչյուր եռամսյակին հաջորդող ամսվա 25-ը` այդ եռամսյակի ընթացքում ծրագրի շրջանակներում կազմակերպության կողմից, ինչպես նաև կազմակերպությանը մատակարարված ապրանքների ու մատուցված ծառայությունների մասին տեղեկությունները.

բ) ծրագրի ավարտից հետո մեկամսյա ժամկետում ծրագրի կատարման մասին ամփոփ տեղեկությունները:

Նշված տեղեկությունները չտրամադրվելու կամ ծրագրի նպատակները չիրականացվելու դեպքում Հայաստանի Հանրապետության կառավարության մարդասիրական օգնության կենտրոնական հանձնաժողովն իրավասու է փոփոխելու կամ կասեցնելու ծրագիրը մարդասիրական օգնության կամ բարեգործական որակելու մասին իր որոշումը, իսկ եթե նման որակում տրված է այլ իրավական ակտով, ապա հանձնաժողովն իրավասու է այդ որակումը փոփոխելու կամ կասեցնելու մասին միջնորդություն ներկայացնելու տվյալ իրավական ակտն ընդունած մարմին:

(6-րդ կետն ուժը կորցրել է 28.06.01 թիվ 573 որոշում)

7. Հայաստանի Հանրապետության պետական եկամուտների նախարարությանը` համաձայնեցնելով Հայաստանի Հանրապետության ֆինանսների և էկոնոմիկայի նախարարության հետ, մեկամսյա ժամկետում հաստատել`

ա) մարդասիրական օգնության կամ բարեգործական ծրագրերի, ինչպես նաև դրանց հետ անմիջականորեն կապված ու դրանց համար զգալի նշանակություն ունեցող ծրագրերի գծով արտոնությունների կիրառման մասին հրահանգը.

բ) սույն որոշման 6-րդ կետով նախատեսվող ձևերը:

8. Ուժը կորցրած ճանաչել Հայաստանի Հանրապետության կառավարության 1999 թվականի սեպտեմբերի 7-ի «Հայաստանի Հանրապետության կառավարության մարդասիրական օգնության կենտրոնական հանձնաժողովի գործունեության կանոնակարգման լրացուցիչ միջոցառումների մասին» N 562 որոշումը:

9. Սույն որոշումն ուժի մեջ է մտնում պաշտոնական հրապարակման պահից: