ՀԱՆՐԱԿՐԹԱԿԱՆ ՀԱՄԱԿԱՐԳԻ ԲԱՐԵՓՈԽՈՒՄՆԵՐԻ ՓՈՐՁՆԱԿԱՆ ԾՐ ...

(ուժը կորցրել է 08.12.06 թիվ 420-Ն հրաման)

110.0420.110101

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐՈՒԹՅՈՒՆ
ՀՐԱՄԱՆ

22 դեկտեմբերի 2000 թվականի N 420-Մ

ՀԱՆՐԱԿՐԹԱԿԱՆ ՀԱՄԱԿԱՐԳԻ ԲԱՐԵՓՈԽՈՒՄՆԵՐԻ ՓՈՐՁՆԱԿԱՆ ԾՐԱԳՐՈՒՄ ԸՆԴԳՐԿՎԱԾ ՀԱՍՏԱՏՈՒԹՅԱՆ ԳՈՐԾԱԴԻՐ ՏՆՕՐԵՆԻ ԸՆՏՐՈՒԹՅԱՆ ԵՎ ՆՇԱՆԱԿՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Ի կատարումն ՀՀ կառավարության 2000թ. հոկտեմբերի 12-ի թիվ 634 «Հայաստանի Հանրապետության հանրակրթական համակարգի բարեփոխումների փորձնական ծրագրի հետագա ընթացքի մասին» որոշման`

Հրամայում եմ`

1. Հաստատել «Հանրակրթական համակարգի բարեփոխումների փորձնական ծրագրում ընդգրկված հաստատության գործադիր տնօրենի ընտրության և նշանակման» կարգը:

2. Ուժը կորցրած ճանաչել ՀՀ կրթության և գիտության նախարարության 1999թ. մարտի 22-ի «Համայնքի կառավարմանը հանձնված պետական հանրակրթական հաստատության գործադիր տնօրենի ընտրության և նշանակման կարգը հաստատելու մասին» թիվ 93-Մ հրամանը:

3. Նախարարության իրավաբանական բաժնի պետ` (Վ. Սարգսյան)` փաստաթուղթը սահմանված կարգով ներկայացնել ՀՀ արդարադատության նախարարություն` պետական գրանցման:

4. Հրամանի կատարման վերահսկողությունը հանձնարարել նախարարի տեղակալ Ա. Թոփուզյանին:

Հաստատում եմ

ՀՀ կրթության և գիտության

                                              նախարար       Է. Ղազարյան

                                              «22»      12     2000թ.

                                              Կոդ

ԿԱՐԳ

ՀԱՆՐԱԿՐԹԱԿԱՆ ՀԱՄԱԿԱՐԳԻ ԲԱՐԵՓՈԽՈՒՄՆԵՐԻ ՓՈՐՁՆԱԿԱՆ ԾՐԱԳՐՈՒՄ ԸՆԴԳՐԿՎԱԾ ՀԱՍՏԱՏՈՒԹՅԱՆ ԳՈՐԾԱԴԻՐ ՏՆՕՐԵՆԻ ԸՆՏՐՈՒԹՅԱՆ ԵՎ ՆՇԱՆԱԿՄԱՆ

Սույն կարգը սահմանվում է ՀՀ կառավարության 1997թ. հուլիսի 11-ի «Հայաստանի Հանրապետության կառավարության 1996թ. մայիսի 15-ի թիվ 150 որոշման մեջ փոփոխություններ կատարելու մասին» թիվ 263, 1998թ. հոկտեմբերի 28-ի «Պետական հանրակրթական հաստատությունների համակարգի կառավարման հետագա ապակենտրոնացման մասին» թիվ 661, 1999թ. հունիսի 1 «ՀՀ հանրակրթական համակարգի բարեփոխումների փորձնական ծրագիրը հաստատելու մասին» թիվ 377 և 2000թ. հոկտեմբերի 12-ի «Հայաստանի Հանրապետության հանրակրթական համակարգի բարեփոխումների հետագա ընթացքի մասին» թիվ 634 որոշումներով սահմանված պետական հանրակրթական հաստատության (այսուհետև հաստատություն) գործադիր տնօրենի (այսուհետև տնօրեն) ընտրության կատարումն ապահովելու նպատակով:

1. Հաստատության տնօրենի թափուր պաշտոնի համար բաց մրցույթ հայտարարելու մասին որոշումն ընդունում է հաստատության կառավարման բարձրագույն մարմինը` հաստատության խորհուրդը (այսուհետև խորհուրդ):

2. Տնօրենի թափուր պաշտոնի համար բաց մրցույթ անցկացնելու մասին խորհրդի նախագահը տեղյակ է պահում վերադասին (ըստ ենթակայության` համայնքի ղեկավարին, մարզպետին, Երևանի քաղաքապետին, ԿԳ նախարարին):

3. Տնօրենի թափուր պաշտոնի համար բաց մրցույթ անցկացնելու մասին խորհրդի որոշումը և մրցույթի պայմանները խորհուրդը տասնօրյա ժամկետում առնվազն մեկ անգամ հայտարարում է զանգվածային լրատվության միջոցներով (հանրապետական կամ տեղական ռադիո, հեռուստատեսություն, մամուլ):

4. Տնօրենի պաշտոնի համար մրցույթ անցկացնելու մասին խորհրդի հայտարարության տեքստում պարտադիր է նշել.

. մրցույթին մասնակցելու համար դիմումների ընդունման ժամկետը, որը չի

կարող պակաս լինել մրցույթ անցկացնելու մասին առաջին հայտարարության

հրապարակման պահից` հաշված մեկ ամիս,

. մրցույթի անցկացման վայրը, օրը, ժամը,

. մրցույթին մասնակցելու համար անհրաժեշտ փաստաթղթերը և նյութերը.

. հավակնորդին ներկայացվող պահանջները (չափանիշները):

5. Մրցույթին մասնակցելու համար պահանջվող փաստաթղթերն են`

. քաղվածք աշխատանքային գրքույկից,

. ինքնակենսագրություն (ձեռագիր),

. բարձրագույն կրթության դիպլոմի պատճենը,

. կադրերի հաշվառման անձնական թերթիկ,

. տեղեկանք մշտական բնակության վայրից,

. հրատարակված հոդվածների ցանկ (դրանց առկայության դեպքում),

. հաստատության գործունեության մասին հայեցակարգ (ծրագիր),

. բնութագիր վերջին աշխատավայրից:

6. Հավակնորդին ներկայացվող պահանջներն (չափանիշներն) են`

պարտադիր չափանիշներ

--------------------

. բարձրագույն մանկավարժական կրթություն*,

. առնվազն երեք տարվա մանկավարժական աշխատանքի փորձ,

. գրական հայերենի տիրապետում,

. կրթության համակարգի օրենսդրության և այլ իրավական ակտերի,

աշխատանքային օրենսգրքի և նորմացույց փաստաթղթերի (այդ թվում

ֆինանսատնտեսական գործունեության վերաբերյալ) պահանջների

իմացություն,

. հաստատության բարեփոխման և զարգացման ծրագիր (հայեցակարգ,

հիմնադրույթներ) մշակելու կարողություն,

ցանկալի չափանիշներ

--------------------

. կրթության հաստատության կառավարման և ղեկավարման հիմունքների

իմացություն,

. ֆինանսատնտեսական գործունեության իրականացման կարողություն,

. ներդպրոցական կառավարման և վերահսկողության վերաբերյալ փաստաթղթեր

կազմելու ունակություն,

. աշխատանքային կոլեկտիվի ղեկավարման հմտություններ,

. ուսուցչի որակավորման բարձր տարակարգ,

. վարչական աշխատանքի փորձ,

. օտար լեզվի իմացություն,

. համակարգչով աշխատելու հմտություն:

7. Մրցույթը անցկացնում է խորհուրդը ՀՀ կրթության և գիտության նախարարության ներկայացուցչի (փորձագետի) մասնակցությամբ (խորհրդակցական ձայնի իրավունքով): Մրցույթի արդյունքների ամփոփման ժամանակ փորձագետը ներկայացնում է գրավոր եզրակացություն, որը կցվում է արձանագրությանը: Մրցույթի անցկացման խորհրդի նիստը համարվում է իրավազոր, եթե դրան մասնակցել է խորհրդի անդամներից առնվազն 4-ը խորհրդի 5 անդամների դեպքում, առնվազն 5-ը` 7-ի դեպքում, առնվազն 6-ը` 9-ի դեպքում: Ընտրված է համարվում այն թեկնածուն, որին փակ քվեարկությամբ կողմ են քվեարկել խորհրդի անդամների ընդհանուր թվի կեսից ավելին: Խորհրդի (մրցութային) նիստերն արձանագրվում են (հավակնորդներին տրված հարցերը, պատասխանները, խորհրդի անդամների կարծիքները):

8. Քվեարկության արդյունքները հրապարակում է խորհրդի նախագահը, որի հիման վրա խորհուրդը կայացնում է համապատասխան որոշում:

9. Խորհրդի որոշման հիման վրա ընտրված տնօրենի հետ վերադասը երեք տարի ժամկետով կնքում է աշխատանքային պայմանագիր: Պայմանագրի կնքումը կատարվում է մրցույթի անցկացման պահից տասնօրյա ժամկետում` յոթ օրից ոչ շուտ:

10. Մրցույթի արդյունքները ենթակա են վերանայման ՀՀ օրենսդրությամբ սահմանված կարգով:

11. Մրցույթը չեղյալ է համարվում այն դեպքում, երբ մրցույթի մասնակիցները, կազմակերպիչները թույլ են տվել սույն կարգի, ինչպես նաև օրենքով նախատեսված այլ խախտումներ:

12. Մրցույթը չեղյալ կարող է համարել ՀՀ ԿԳՆ նախարարի կողմից ստեղծված հանձնաժողովը: Հանձնաժողովի որոշման հիման վրա խորհուրդը չեղյալ է համարում մրցույթի արդյունքները:

13. Եթե մրցույթում ոչ մի հավակնորդ չի անցնում, նույն օրվա ընթացքում կազմակերպվում է կրկնակի քվեարկություն: Կրկնական քվեարկությամբ ևս տնօրեն չընտրվելու դեպքում հայտարարվում է լրացուցիչ մրցույթ` նույն կարգով: Այդ դեպքում վերադասի կողմից նշանակվում է տնօրենի պաշտոնակատար (տնօրենի հավակնորդներից պաշտոնակատար չի նշանակվում): Տնօրենի պաշտոնակատարը շարունակում է աշխատանքը մինչև տնօրենի ընտրվելը:

14. Խորհրդի արձակումը կամ լիազորությունների ավարտումը չի կարող հիմք հանդիսանալ տնօրենի հետ վաղօրոք կնքված աշխատանքային պայմանագրի լուծման կամ փոփոխման համար:

--------------------------------

* մինչև փաստաթղթերի ընդունման վերջին ժամկետը սույն պահանջին բավարարող

հավակնորդ չլինելու դեպքում հայտարարվում է լրացուցիչ մրցույթ, որի

պահանջներում «բարձրագույն մանկավարժական կրթությունը» փոխարինվում է

«բարձրագույն կրթությամբ»:

ԳՐԱՆՑՎԱԾ Է ՀԱՅԱՍՏԱՆԻ  ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅՈՒՆ ԿՈՂՄԻՑ

11.01.2001թ.

ՊԵՏԱԿԱՆ ԳՐԱՆՑՄԱՆ ԹԻՎ 11001016