ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ
ԻՐԱԶԵԿՄԱՆ ԹԵՐԹԻԿ
20 օգոստոսի 2020 թվականի N 48
ԱՎԵԼԱՑՎԱԾ ԱՐԺԵՔԻ ՀԱՐԿԻ ԵՎ ԱԿՑԻԶԱՅԻՆ ՀԱՐԿԻ ՄԻԱՍՆԱԿԱՆ ՀԱՇՎԱՐԿԻ ԼՐԱՑՄԱՆ ԿԱՐԳԻ ՎԵՐԱԲԵՐՅԱԼ
Հարց
i
Ստորև ներկայացվում է 30.12.2016թ.-ի «Ավելացված արժեքի հարկի և ակցիզային հարկի միասնական հաշվարկի (այսուհետ` միասնական հաշվարկ) ձևը և դրա լրացման կարգը հաստատելու մասին» N 298-Ն հրամանի հետ կապված հետևյալ հարցերը.
i
1. Միասնական հաշվարկի 18-րդ կետի [Ա] վանդակում լրացվում է հաշվետու ժամանակաշրջանում Հայաստանի Հանրապետության տարածքում ձեռք բերված ապրանքների, ընդունված աշխատանքների և ստացված ծառայությունների ընդհանուր հարկման բազան (այդ թվում` Հարկային օրենսգրքի 55-րդ հոդվածի 2-րդ մասի 3-րդ և 5-րդ կետերով սահմանված հաշվարկային փաստաթղթերում նշված)` անկախ ձեռքբերումների մասով հաշվարկային փաստաթուղթ ստացած լինելու հանգամանքից, իսկ [P] վանդակում` մատակարարների, աշխատանք կատարողների և ծառայություն մատուցողների կողմից դուրս գրված միայն հարկային հաշիվներում առանձնացված ԱԱՀ-ի ընդհանուր գումարը:
Հարց. Հարկային օրենսգրքի 55-րդ հոդվածի 2-րդ մասի 1-ին, 3-րդ և 5-րդ կետերով սահմանված հաշվարկային փաստաթղթերից բացի 18-րդ կետի [Ա] վանդակում պե՞տք է արդյոք ներառվեն նույն հոդվածի 13-րդ մասում նշված փաստաթղթերով հիմնավորված ձեռք բերված ապրանքները, ընդունված աշխատանքները և (կամ) ստացված ծառայությունները:
2. Միասնական հաշվարկի 19-րդ կետի 1-ին ենթակետի [Ա] վանդակում լրացվում է ձեռքբերումներին վերաբերող հարկային օրենսգրքի 42-րդ հոդվածի 4-րդ մասի 1-ին կետով սահմանված դեպքերում` դուրս գրված ճշգրտող հարկային հաշիվներով գործարքների հարկման բազան` առանց ԱԱՀ-ի, իսկ [Բ] վանդակում` այդ հարկման բազայի նկատմամբ հաշվարկված ԱԱՀ-ի գումարը:
Հարց. Նախորդ հաշվետու ժամանակաշրջանի ձեռքբերումներին վերաբերող ճշգրտող հաշիվ-վավերագրի առկայության դեպքում հաշվարկի ո՞ր վանդակում պետք է արտացոլել ճշտումը, եթե վերոնշյալ դրույթը վերաբերում է միայն հարկային հաշիվներով գործարքներին: Արդյո՞ք անհրաժեշտություն է առաջանում ճշտելու այն միասնական հաշվարկը, որտեղ ներառվել է ճշտված գործարքը:
Պատասխան
ՀՀ հարկային օրենսգրքի`
- 42-րդ հոդվածի 1-ին մասով սահմանված է ապրանքի մատակարարման, աշխատանքի կատարման և (կամ) ծառայության մատուցման գործարքների ճշգրտման դեպքերը,
- 42-րդ հոդվածի 4-րդ մասի համաձայն` գործարքի ճշգրտման դեպքում գործարքի կողմեր համարվող հարկ վճարողները (բացառությամբ նույն հոդվածի 5-րդ մասով սահմանված հարկ վճարողների) պարտավոր են գործարքի ճշգրտման արդյունքները`
1) ԱԱՀ-ի և ակցիզային հարկի մասով արտացոլել համապատասխան ճշգրտող հաշվարկային փաստաթղթի դուրսգրման օրը ներառող հաշվետու ժամանակաշրջանների համար օրենսգրքի 52-րդ և 53-րդ հոդվածներով սահմանված կարգով իրենց կողմից կազմվող և հարկային մարմին ներկայացվող հարկային հաշվարկներում, եթե գործարքի ճշգրտման արդյունքում նվազում են գործարքից առաջացած հարկային պարտավորության և հաշվանցման (պակասեցման) ենթակա հարկի գումարները.
2) ԱԱՀ-ի և ակցիզային հարկի մասով արտացոլել հիմնական գործարքի կատարման օրը ներառող հաշվետու ժամանակաշրջանների համար օրենսգրքի 52-րդ և 53-րդ հոդվածներով սահմանված կարգով իրենց կողմից կազմվող և հարկային մարմին ներկայացվող հարկային հաշվարկներում, եթե գործարքի ճշգրտման արդյունքում ավելանում են գործարքից առաջացած հարկային պարտավորության և հաշվանցման (պակասեցման) ենթակա հարկի գումարները,
i
- 55-րդ հոդվածով սահմանված են ապրանքների մատակարարման, աշխատանքների կատարման և (կամ) ծառայությունների մատուցման գործարքների փաստաթղթավորման համար կիրառվող հաշվարկային փաստաթղթերի տեսակները և դրանցում պարտադիր լրացման ենթակա տվյալները: Մասնավորապես, նույն հոդվածի 13-րդ մասով սահմանված են այն դեպքերը, երբ ապրանքների ձեռքբերումը, աշխատանքների ընդունումը և (կամ) ծառայությունների ստացումը կարող է փաստաթղթավորվել հաշվարկային փաստաթուղթ չհամարվող` օրենսդրությամբ սահմանված կարգով կազմված այլ փաստաթղթերով` նույն մասով սահմանված պահանջներին համապատասխան:
Միաժամանակ, ԱԱՀ-ի և ակցիզային հարկի միասնական հաշվարկի ձևը և լրացման կարգը սահմանված է ՀՀ ՊԵԿ նախագահի 30.12.2016թ. N 298-Ն հրամանով: Այդ հրամանով հաստատված հաշվարկի ձևի լրացման կարգի`
- 22-րդ կետի համաձայն` միասնական հաշվարկի 18-րդ կետի [Ա] վանդակում լրացվում է հաշվետու ժամանակաշրջանում Հայաստանի Հանրապետության տարածքում ձեռք բերված ապրանքների, ընդունված աշխատանքների և ստացված ծառայությունների ընդհանուր հարկման բազան (այդ թվում` հարկային օրենսգրքի 55- րդ հոդվածի 2-րդ մասի 3-րդ և 5-րդ կետերով սահմանված հաշվարկային փաստաթղթերում նշված)` անկախ ձեռքբերումների մասով հաշվարկային փաստաթուղթ ստացած լինելու հանգամանքից, իսկ [Բ] վանդակում` մատակարարների, աշխատանք կատարողների և ծառայություն մատուցողների կողմից դուրս գրված միայն հարկային հաշիվներում առանձնացված ԱԱՀ-ի ընդհանուր գումարը,
- 23-րդ կետի համաձայն` միասնական հաշվարկի 19-րդ կետի [Ա] վանդակում լրացվում է ձեռքբերումներին վերաբերվող հարկային օրենսգրքի 42-րդ հոդվածի 4-րդ մասի 1-ին կետով սահմանված դեպքերում` դուրս գրված ճշգրտող հարկային հաշիվներով գործարքների հարկման բազան` առանց ԱԱՀ-ի, իսկ [Բ] վանդակում` այդ հարկման բազայի նկատմամբ հաշվարկված ԱԱՀ-ի գումարը: Միասնական հաշվարկի 19-րդ կետի 2-րդ ենթակետի [Ա] վանդակում լրացվում է ձեռքբերումներին վերաբերվող հարկային օրենսգրքի 42-րդ հոդվածի 4-րդ մասի 2-րդ կետով սահմանված դեպքերում` դուրս գրված ճշգրտող հարկային հաշիվներով գործարքների հարկման բազան` առանց ԱԱՀ-ի, իսկ [Բ] վանդակում` այդ հարկման բազայի նկատմամբ հաշվարկված ԱԱՀ-ի գումարը:
Հաշվի առնելով վերոնշյալ կարգավորումները` հայտնում ենք, որ.
1) ԱԱՀ-ի և ակցիզային հարկի միասնական հաշվարկի 18-րդ կետի [Ա] վանդակում լրացվում է ԱԱՀ վճարող համարվող հարկ վճարողի կողմից ՀՀ տարածքում ձեռք բերված ապրանքների, ընդունված աշխատանքների և ստացված ծառայությունների մասով ընդհանուր հարկման բազան, այդ թվում` ՀՀ հարկային օրենսգրքի 55-րդ հոդվածի 13-րդ մասին համապատասխան փաստաթղթավորված գործարքների (ապրանքների ձեռքբերման, աշխատանքների ընդունման և (կամ) ծառայությունների ստացման) մասով հարկման բազաները,
2) նախորդ հաշվետու ժամանակաշրջաններում հաշիվ վավերագրերով ձեռքբերումների մասով գործարքի ճշգրտման արդյունքները, որոնց մասով սահմանված կարգով դուրս են գրվել ճշգրտող հաշիվ վավերագրեր, պետք է արտացոլվեն հիմնական գործարքի կատարման օրն ընդգրկող հաշվետու ժամանակաշրջանի ԱԱՀ-ի և ակցիզային հարկի միասնական հաշվարկում:
ՀՀ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ