ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
11 փետրվարի 2021 թվականի N 154-Ն
ՊԱՐՏԱԴԻՐ ԿՐԹՈՒԹՅՈՒՆԻՑ ԴՈՒՐՍ ՄՆԱՑԱԾ ԵՐԵԽԱՆԵՐԻ ԲԱՑԱՀԱՅՏՄԱՆ ԵՎ ՈՒՂՂՈՐԴՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ
Ղեկավարվելով «Հանրակրթության մասին» Հայաստանի Հանրապետության օրենքի 29-րդ հոդվածի 1-ին մասի 18.1-ին կետով` Հայաստանի Հանրապետության կառավարությունը որոշում է.
1. Սահմանել պարտադիր կրթությունից դուրս մնացած երեխաների բացահայտման և ուղղորդման կարգը` համաձայն հավելվածի:
2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
Հայաստանի Հանրապետության
վարչապետ Ն. Փաշինյան
2021 թ. փետրվարի 12
Երևան
Հավելված
i
ՀՀ կառավարության
2021 թվականի փետրվարի 11-ի
N 154-Ն որոշման
ԿԱՐԳ
ՊԱՐՏԱԴԻՐ ԿՐԹՈՒԹՅՈՒՆԻՑ ԴՈՒՐՍ ՄՆԱՑԱԾ ԵՐԵԽԱՆԵՐԻ ԲԱՑԱՀԱՅՏՄԱՆ ԵՎ ՈՒՂՂՈՐԴՄԱՆ
1. Սույն կարգով կարգավորվում են պարտադիր կրթությունից դուրս մնացած կամ պարտադիր կրթությունից դուրս մնալու ռիսկի տակ գտնվող դպրոցահասակ երեխաների բացահայտման և ուղղորդման (կրթության մեջ ներառման) հետ կապված իրավահարաբերությունները:
2. Պարտադիր կրթությունից դուրս մնացած են համարվում 6-ից մինչև 19 տարին չլրացած` Հայաստանի Հանրապետության տարածքում գործող հանրակրթական ուսումնական հաստատությունում (այսուհետ` հաստատություն), հանրակրթական հիմնական ընդհանուր կրթության հիմքի վրա նախնական մասնագիտական (արհեստագործական) կամ միջին մասնագիտական ուսումնական հաստատությունում (այսուհետ` ՆՄՄԿ) չհաշվառված կամ հաշվառված, բայց մեկ ամսվա ընթացքում ամսվա համար գումարային հաշվարկով 10 աշխատանքային օրից ավելի չհաճախած անձինք:
3. Պարտադիր կրթությունից դուրս մնալու ռիսկի տակ գտնվող են համարվում 6-ից մինչև 19 տարին չլրացած`
1) հաստատությունում, ՆՄՄԿ-ում հաշվառված, սակայն մեկ ամսվա ընթացքում 6 աշխատանքային օր անընդմեջ չհաճախած սովորողները.
2) ՆՄՄԿ-ում կրթությունն ընդհատած սովորողները, որոնց համար կրթությունն ընդհատելու մասին հրամանի ընդունման օրը հաստատությունը «Պարտադիր կրթությունից դուրս մնացած և պարտադիր կրթությունից դուրս մնալու ռիսկի տակ գտնվող երեխաների բացահայտման» էլեկտրոնային ենթահամակարգում (այսուհետ` էլեկտրոնային ենթահամակարգ) ստեղծում է հայտ` նշելով պատճառը.
3) հաստատություն, ՆՄՄԿ հաճախած, սակայն ծնողի (օրինական ներկայացուցչի) դիմումի (արտերկիր մեկնելու նպատակով) հիման վրա ուսումն անավարտ թողած սովորողները:
4. Սույն կարգի 3-րդ կետի 1-ին, 2-րդ ենթակետերով նախատեսված դեպքերում սույն կարգի 6-րդ կետով սահմանված մարմինների կողմից ապահովվում է սովորողի ներգրավվածությունն ուսումնական գործընթացին` համաձայն «Կրթության մասին» օրենքի 18-րդ հոդվածի 7-րդ մասի պահանջի: Սույն կարգի 3-րդ կետի 3-րդ ենթակետով նախատեսված դեպքում սույն կարգի 6-րդ կետով սահմանված շահագրգիռ և պատասխանատու կառույցների կողմից միջոցներ են ձեռնարկվում պարզելու սովորողի` Հայաստանի Հանրապետությունում լինելու կամ չլինելու հանգամանքը: Հայաստանի Հանրապետությունում լինելու դեպքում ապահովվում է ներգրավվածությունն ուսումնական գործընթացին:
5. Հաստատություն, ՆՄՄԿ չհաճախած կամ հաստատությունում, ՆՄՄԿ-ում հաշվառված չլինելու դեպքում պարտադիր կրթությունից դուրս մնացած անձանց բացահայտելու համար Հայաստանի Հանրապետության կրթության, գիտության, մշակույթի և սպորտի նախարարության (այսուհետ` նախարարություն) «Կրթական տեխնոլոգիաների ազգային կենտրոն» պետական ոչ առևտրային կազմակերպությունը (այսուհետ` ԿՏԱԿ) յուրաքանչյուր ուսումնական տարվա սեպտեմբեր և հունվար ամիսներին, համեմատելով բնակչության պետական ռեգիստրի և կրթության կառավարման տեղեկատվական համակարգի տվյալները, նախարարությանը ներկայացնում է 6-ից մինչև 19 տարին չլրացած այն անձանց տվյալները, որոնք որևէ հաստատությունում, ՆՄՄԿ-ում հաշվառված չեն: Նշված երեխաների տվյալներն էլեկտրոնային եղանակով հասանելի են երեխայի բնակության վայրի խնամակալության և հոգաբարձության մարմնին (այսուհետ` ԽՀՄ)` երեխաների` պարտադիր կրթությանը ներգրավվածությունն ապահովելու նպատակով:
(5-րդ կետը փոփ. 25.04.2024 թիվ 597-Ն որոշում)
i
6. «Կրթության կառավարման տեղեկատվական համակարգի» մաս կազմող էլեկտրոնային ենթահամակարգի տեղեկատվությունը հասանելի է, և ԿՏԱԿ-ի կողմից համակարգ մուտք գործելու համար, բացի տվյալ հաստատությունից, ՆՄՄԿ-ից, հաշիվներ են տրամադրվում հետևյալ շահագրգիռ և պատասխանատու կառույցներին`
1) ԽՀՄ-ին դեմս համայնքի ղեկավարի.
2) աշխատանքի և սոցիալական հարցերի նախարարությանը.
3) կրթության, գիտության, մշակույթի և սպորտի նախարարությանը.
4) կրթության տեսչական մարմնին.
5) ՀՀ մարզպետների աշխատակազմերին.
6) Միասնական սոցիալական ծառայությանը.
7) ՀՀ ոստիկանությանը:
(6-րդ կետը փոփ. 25.04.2024 թիվ 597-Ն որոշում)
i
7. Սույն կարգի 3-րդ կետի 1-ին ենթակետում սահմանված դեպքում ինքնաշխատ եղանակով ստեղծվում է նախնական հայտ: Հաստատության, ՆՄՄԿ-ի տնօրենը նախնական հայտի ձևավորման պահից սկսած` մեկ աշխատանքային օրվա ընթացքում հաստատում կամ փակում է նախնական հայտը` նշելով հաստատման կամ փակման պատճառները` սովորողի ծնողի (օրինական ներկայացուցչի) թղթային կամ էլեկտրոնային եղանակով ներկայացրած գրավոր բացատրագրի հիման վրա: Նախնական հայտը հաստատելուց հետո այն հասանելի է դառնում երեխայի բնակության վայրի ԽՀՄ-ին:
(7-րդ կետը փոփ. 25.04.2024 թիվ 597-Ն որոշում)
i
8. Սույն կարգի 2-րդ կետով և 3-րդ կետի 2-րդ և 3-րդ ենթակետերով սահմանված դեպքերում ինքնաշխատ եղանակով ստեղծվում է հայտ, որը հասանելի է տարածքային ԽՀՄ-ին: Տվյալ դեպքերում հայտերի ստեղծող է համարվում տարածքային ԽՀՄ-ն:
(8-րդ կետը փոփ. 25.04.2024 թիվ 597-Ն որոշում)
i
8.1. Արտերկիր մեկնելու նպատակով հաստատությունից, ՆՄՄԿ-ից սովորողին ազատելու վերաբերյալ սովորողի ծնողի (օրինական ներկայացուցչի) դիմումի առկայության դեպքում, երբ երեխայի բնակության վայրի ԽՀՄ-ն հսկողության արդյունքում բացահայտում է երեխայի` արտերկիր չմեկնելու վերաբերյալ փաստը, ձեռնարկում է սույն կարգով սահմանված գործողություններ` սովորողի պարտադիր կրթության շարունակականությունն ապահովելու նպատակով:
(8.1-ին կետը լրաց. 25.04.2024 թիվ 597-Ն որոշում)
i
9. Էլեկտրոնային ենթահամակարգում պարտադիր կրթությունից դուրս մնալու ռիսկի տակ գտնվող սովորողների կամ պարտադիր կրթությունից դուրս մնացած երեխաների վերաբերյալ հայտը ստանալուց հետո տվյալ տարածքի ԽՀՄ-ն երեք աշխատանքային օրվա ընթացքում ընդունում է հայտը և օրենսդրությամբ իրեն վերապահված լիազորությունների շրջանակում քայլեր է ձեռնարկում սովորողի կրթության շարունակականությունն ապահովելու համար:
(9-րդ կետը փոփ. 25.04.2024 թիվ 597-Ն որոշում)
10. Անձի` հաստատություն կամ ՆՄՄԿ հաճախելը վերսկսելու օրվան հաջորդող աշխատանքային օրը հայտը ստեղծող մարմինը փակում է տվյալ հայտը: Սույն կարգի 3-րդ կետի 3-րդ ենթակետով սահմանված դեպքում բացված հայտը ԽՀՄ-ի կողմից փակվում է, եթե հաստատվում է անձի` Հայաստանի Հանրապետությունից դուրս լինելը: Եթե ԽՀՄ-ն իր համայնքում չի հայտնաբերում անձին կամ անձին կրթություն վերադարձնելու համար արձանագրում է խոչընդոտներ, հայտ է ուղարկում ՀՀ ոստիկանությանը: Հայտնաբերելու դեպքում եթե պարզվում է, որ անձի բացակայությունների պատճառը սոցիալական կարիքներով է պայմանավորված, հայտ է ուղարկում Միասնական սոցիալական ծառայությանը` անձի սոցիալական կարիքները հոգալու համար:
11. Եթե անձն ունի կրթության առանձնահատուկ պայմանների կարիք, համապատասխան փաստաթուղթ ներկայացված չլինելու պարագայում ԽՀՄ-ն դիմում է տարածքային մանկավարժահոգեբանական աջակցության կենտրոնին: Վերջինս, տեղեկացնելով ծնողին (օրինական ներկայացուցչին), ապահովում է անձի կրթության առանձնահատուկ պայմանների կարիքի գնահատումը և ուղղորդում է անձին հաստատություն կամ ՆՄՄԿ` սահմանված կարգով կրթությունը կազմակերպելու համար:
12. Բացված հայտերի մասին պատմությունը և աշխատող կողմերի գործողությունները հասանելի են շահագրգիռ և պատասխանատու բոլոր կառույցներին:
i
12.1. Յուրաքանչյուր տարվա հոկտեմբեր և փետրվար ամիսների վերջին աշխատանքային օրը ԽՀՄ-ն հայտնաբերված բոլոր երեխաների մասին հաշվետվություն (այսուհետ` հաշվետվություն) է ներկայացնում Երևան քաղաքում` Երևանի քաղաքապետարանի աշխատակազմին, մյուս մարզերում` տվյալ մարզի մարզպետի աշխատակազմին` պարտադիր կրթությունից դուրս մնացած դպրոցահասակ երեխաների հետ տարված աշխատանքների և դրանց արդյունքում կրթության մեջ ներառված երեխաների թվի վերաբերյալ: Հաշվետվությունը ստանալուց հետո` 5 աշխատանքային օրվա ընթացքում, Երևանի քաղաքապետարանի աշխատակազմը և ՀՀ մարզպետերի աշխատակազմերը, ամփոփված հաշվետվությանը կցելով համապատասխան վերլուծությունը և իրենց կողմից ձեռնարկված միջոցառումների մասին տեղեկությունը, ներկայացնում են նախարարությանը:
(12.1-ին կետը լրաց. 25.04.2024 թիվ 597-Ն որոշում)
12.2. Յուրաքանչյուր ամսվա վերջին աշխատանքային օրվա տվյալների հիման վրա` մինչև հաջորդող ամսվա 5-րդ աշխատանքային օրը, ԽՀՄ-ն հաշվետվություն է ներկայացնում Երևան քաղաքում` Երևանի քաղաքապետարանի աշխատակազմին, մյուս մարզերում` տվյալ մարզի մարզպետի աշխատակազմին` պարտադիր կրթությունից դուրս մնալու ռիսկի տակ գտնվող դպրոցահասակ երեխաների վերաբերյալ սույն կարգի 9-րդ կետով սահմանված գործառույթների իրականացման և երեխաների թվի վերաբերյալ:
(12.2-րդ կետը լրաց. 25.04.2024 թիվ 597-Ն որոշում)
12.3. Սույն կարգի 12.1-ին և 12.2-րդ կետերով սահմանված հաշվետվությունները հնարավոր է ներբեռնել «Պարտադիր կրթությունից դուրս մնացած և պարտադիր կրթությունից դուրս մնալու ռիսկի տակ գտնվող երեխաների բացահայտման» էլեկտրոնային համակարգ, և դրանք հասանելի են Աշխատանքի և սոցիալական հարցերի նախարարությանը, այդ թվում` Միասնական սոցիալական ծառայությանը:
(12.3-րդ կետը լրաց. 25.04.2024 թիվ 597-Ն որոշում)
i
13. Պարտադիր կրթությունից դուրս մնացած երեխաների բացահայտման և ուղղորդման հետ կապված` սույն կարգով չկարգավորվող հարաբերությունները կարգավորվում են ՀՀ կառավարության 2015 թվականի սեպտեմբերի 10-ի N 1044-Ն որոշմամբ:
(հավելվածը խմբ. 02.11.2023 թիվ 1886-Ն որոշում)
Պաշտոնական հրապարակման օրը` 12 փետրվարի 2021 թվական: