(ուժը կորցրել է 25.12.00 թիվ 422-Մ հրաման)
i
110.0055.300300
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐՈՒԹՅՈՒՆ
ՀՐԱՄԱՆ
13 մարտի 2000 թվականի թիվ 55-Մ
ՀԱՆՐԱԿՐԹԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐՈՒՄ ԱՇԱԿԵՐՏՆԵՐԻ ՓՈԽԱԴՐՄԱՆ, ԱՎԱՐՏՄԱՆ ԵՎ ՔՆՆՈՒԹՅՈՒՆՆԵՐԻ ԿԱԶՄԱԿԵՐՊՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ
Հիմք ընդունելով ՀՀ կրթության և գիտության նախարարության միջնակարգ կրթության վարչության առաջարկությունը և նախարարության կոլեգիայի 25-ը փետրվարի 2000թ. հմ. 2/5 որոշումը
ՀՐԱՄԱՅՈՒՄ ԵՄ
1. Հաստատել «Հանրակրթական ուսումնական հաստատություններում աշակերտների փոխադրման, ավարտման և քննությունների կազմակերպման» կարգը:
2. Միջնակարգ կրթության վարչությանը (պետ` Ա. Ավետիսյան), իրավաբանական բաժնին (պետ` Վ. Սարգսյան), 10-օրյա ժամկետում, սահմանված կարգով փաստաթուղթը ներկայացնել ՀՀ արդարադատության նախարարություն` պետական գրանցման:
3. Հրամանի կատարման հսկողությունը հանձնարարել նախարարի տեղակալ Ա. Թոփուզյանին:
ՀԱՍՏԱՏՈՒՄ ԵՄ
ՀՀ ԿՐԹՈՒԹՅԱՆ ԵՎ ԳԻՏՈՒԹՅԱՆ
ՆԱԽԱՐԱՐ Է. ՂԱԶԱՐՅԱՆ
«25» փետրվարի 2000թ.
կոդ 110
ԿԱՐԳ ՀԱՆՐԱԿՐԹԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐՈՒՄ ԱՇԱԿԵՐՏՆԵՐԻ ՓՈԽԱԴՐՄԱՆ, ԱՎԱՐՏՄԱՆ ԵՎ ՔՆՆՈՒԹՅՈՒՆՆԵՐԻ ԿԱԶՄԱԿԵՐՊՄԱՆ
i
Սույն կարգը մշակվել է ՀՀ «Կրթության մասին» օրենքի 14-րդ հոդվածի 6-րդ, 16-րդ հոդվածի 3-րդ, 37-րդ հոդվածի 10-րդ կետերին, ՀՀ կառավարության 1996թ. մայիսի 15-ի թիվ 150 որոշմամբ հաստատված «Հայաստանի Հանրապետության պետական հանրակրթական հաստատության օրինակելի կանոնադրության» 43-րդ կետին, ՀՀ վարչապետի 1996թ. փետրվարի 1-ի թիվ 36 որոշմամբ հաստատված «Հայաստանի Հանրապետության կրթության և գիտության նախարարության կանոնադրության» 2-րդ գլխի 4-րդ կետի «ը» ենթակետին համապատասխան:
ԱՇԱԿԵՐՏԻ ՓՈԽԱԴՐՈՒՄԸ ԴԱՍԱՐԱՆԻՑ ԴԱՍԱՐԱՆ ԵՎ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆ ԱՎԱՐՏԵԼԸ
1. Առաջին և երկրորդ դասարաններում բոլոր աշակերտները, որպես կանոն, փոխադրվում են հաջորդ դասարան` գիտելիքների անհրաժեշտ նվազագույն յուրացման պայմանով: Առանձին դեպքերում (աշակերտի մտավոր թերզարգացվածություն) աշակերտը կարող է մնալ նույն դասարանում` դպրոցի մանկավարժական խորհրդի որոշմամբ և ծնողի (նրա օրինական ներկայացուցչի) գիտությամբ:
2. 4-7-րդ և 9-րդ դասարանների ուսումնական բոլոր առարկաներից տարեկան դրական գնահատականներ ունեցող աշակերտները փոխադրվում են հաջորդ դասարան:
3. 3-րդ դասարանի (կրտսեր դպրոցի ավարտական դասարան) բոլոր ուսումնական առարկաներից տարեկան և գիտելիքների ստուգումից դրական գնահատականներ ունեցող աշակերտները փոխադրվում են հաջորդ դասարան:
4. 8-րդ դասարանի (միջին դպրոցի ավարտական դասարան) բոլոր ուսումնական առարկաներից տարեկան, ավարտական քննություններից դրական գնահատականներ ստացած աշակերտները ստանում են հիմնական (ութամյա) կրթության ավարտական վկայական:
5. 10-րդ դասարանի (միջնակարգ դպրոցի ավարտական դասարան) բոլոր ուսումնական առարկաներից տարեկան, պետական քննություններից դրական գնահատականներ ստացած շրջանավարտները ստանում են միջնակարգ կրթության ատեստատ:
Հանրակրթական ուսումնական հաստատությունում որևէ առարկա չդասավանդելու պատճառով տվյալ առարկայից գնահատական չունեցող շրջանավարտն իր ցանկությամբ այդ առարկայից կարող է հանձնել քննություն էքստեռն կարգով: Այդ քննության արդյունքը հիմք է հանդիսանում միջնակարգ կրթության ատեստատում գնահատական նշանակելու համար:
6. 3-10-րդ դասարաններում մեկ կամ երկու առարկայից տարեկան կամ քննական անբավարար գնահատական ունեցող աշակերտների փոխադրման կամ ավարտման հարցը որոշվում է նրանց տրված ամառային առաջադրանքների ստուգման (վերաքննության) արդյունքներով:
Ամառային առաջադրանքների ստուգման արդյունքում թեկուզ մեկ առարկայից անբավարար գնահատական ունեցող 3-9-րդ դասարանների աշակերտները մնում են նույն դասարանում` դասընթացը կրկնելու: Աշակերտին ամառային առաջադրանք տալու, կամ նույն դասարանում մնալու դպրոցի մանկավարժական խորհրդի որոշումների մասին աշակերտի ծնողին տեղյակ է պահում դասղեկը, մանկխորհրդի նիստից հետո 3 (երեք) օրվա ընթացքում` գրավոր ծանուցմամբ:
«Հայոց լեզուն» և «Հայ գրականությունը» , «Հանրահաշիվը» և «Երկրաչափությունը» , «Հայոց պատմությունը» և «Պատմությունը» , «Հայաստանի աշխարհագրությունը» և «Աշխարհագրությունը» համարվում են առանձին առարկաներ:
7. 4-7-րդ և 9-րդ դասարանների այն աշակերտները, ովքեր երեք և ավելի ուսումնական առարկաներից ստացել են տարեկան անբավարար գնահատականներ, մնում են նույն դասարանում` դասընթացը կրկնելու:
3-րդ, 8-րդ և 10-րդ դասարաններում երեք և ավելի ուսումնական առարկաներից տարեկան անբավարար գնահատականներ ունեցող աշակերտներին գիտելիքների ստուգման, փոխադրական կամ ավարտական քննություններին մասնակցել չի թույլատրվում:
3-րդ դասարանի այդ աշակերտները մնում են նույն դասարանում դասընթացը կրկնելու:
8. 10-րդ դասարանի այն աշակերտները, որոնց չի թույլատրվում մասնակցել պետական ավարտական քննություններին կամ քննությունների ընթացքում անբավարար գնահատականների թիվը (տարեկան և քննականը միասին) դարձել է երեք և ավելի, ինչպես նաև ամառային առաջադրանքների ստուգման արդյունքում թեկուզ մեկ առարկայից ստացել են անբավարար գնահատական, դուրս են մնում հանրակրթական ուսումնական հաստատությունից: Նրանց իրավունք է վերապահվում հաջորդ տարում, նույն հաստատությունում կրկին քննություններ հանձնել այն առարկաներից, որոնցից ունեն տարեկան կամ քննական անբավարար գնահատական: Նոր բնակավայր տեղափոխվելու դեպքում նրանց իրավունք է վերապահվում քննություններ հանձնել նոր բնակավայրի հանրակրթական ուսումնական հաստատություններից մեկում` ՀՀ կրթության և գիտության նախարարության ուղեգրով:
9. 16 տարին չլրացած, 8-րդ դասարանի այն աշակերտները, որոնց չի թույլատրվում մասնակցել ավարտական քննություններին կամ քննությունների ընթացքում անբավարար գնահատականների թիվը (տարեկան և քննականը միասին) դարձել է երեք և ավելի, ինչպես նաև ամառային առաջադրանքները հանձնելուց հետո թեկուզ մեկ առարկայից ստացել են անբավարար գնահատական, մնում են նույն դասարանում` դասընթացը կրկնելու:
16 տարին լրացած, 8-րդ դասարանի այն աշակերտները, որոնց չի թույլատրվում մասնակցել ավարտական քննություններին կամ քննությունների ընթացքում անբավարար գնահատականների թիվը (տարեկան և քննականը միասին) դարձել է երեք և ավելի, ինչպես նաև ամառային առաջադրանքների ստուգման արդյունքում թեկուզ մեկ առարկայից ստացել են անբավարար գնահատական, դուրս են մնում հանրակրթական ուսումնական հաստատությունից:
10. 10-րդ և 8-րդ դասարաններում հանրակրթական ուսումնական հաստատությունից դուրս մնացած աշակերտներին իրավունք է վերապահվում հաջորդ տարում, նույն հաստատությունում կրկին քննություններ հանձնել այն առարկաներից, որոնցից ունեն տարեկան կամ քննական անբավարար գնահատական:
նոր բնակավայր տեղափոխվելու դեպքում նրանց իրավունք է վերապահվում քննություններ հանձնել նոր բնակավայրի հանրակրթական հաստատություններից մեկում` ՀՀ կրթության և գիտության նախարարության ուղեգրով:
Հետագայում նրանց իրավունք է վերապահվում ընդհանուր հիմունքներով հանձնելու էքստեռն ավարտական քննություններ և ստանալ հիմնական և միջնակարգ հանրակրթական ուսումնական հաստատությունների ավարտական վկայականներ:
11. 1-ից 7-րդ և 9-րդ դասարանները տարեկանում գերազանց ավարտած սովորողները պարգևատրվում են ՀՀ կրթության և գիտության նախարարության Գովասանագրով:
8-րդ դասարանը տարեկանում և քննություններում գերազանց գնահատականներով ավարտած սովորողները ստանում են «Գերազանցության» նշումով հիմնական կրթության վկայական:
10-րդ դասարանը գերազանց գնահատականներով ավարտող շրջանավարտները ուսումնական հաստատության կողմից կարող են ներկայացվել որպես Ոսկե կամ Արծաթե մեդալի հավակնորդ, ըստ սույն կարգի 28 և 29 կետերի պահանջների:
12. Ուսումնական առարկաներից տարեկան գնահատականներ նշանակվում են դասավանդող ուսուցիչներն ուսումնական տարվա վերջին շաբաթվա ընթացքում` հաշվի առնելով աշակերտի փաստացի գիտելիքները, նրա կիսամյակային (քառորդային) գնահատականները: Աշխատանքի ուսուցում, ֆիզկուլտուրա, նախնական զինվորական պատրաստություն առարկաների պարապմունքներից առողջական վիճակի պատճառով աշակերտի ազատված լինելը, ինչպես նաև չդասավանդելու պատճառով որևէ առարկայից տարեկան գնահատական չունենալը չի ազդում նրա հաջորդ դասարան փոխադրվելու կամ դպրոցն ավարտելու վրա:
13. Բոլոր դասարաններում աշակերտները գնահատվում են վարքից: Սահմանվում են վարքի հետևյալ գնահատականներ` «բավարար» , «անբավարար»: Վարքի գնահատական նշանակում է դասղեկը` հաշվի առնելով դասավանդող ուսուցիչների կարծիքը: Վարքից անբավարար գնահատական ունեցող աշակերտի դպրոցից հեռացման հարցը որոշում է մանկավարժական խորհուրդը, այդ մասին նախօրոք տեղյակ պահելով աշակերտի ծնողին (կամ նրա օրինական ներկայացուցչին):
Ուսումնառության ընթացքում 160 և ավելի ժամ անընդմեջ դասերից բացակայած աշակերտների համար մինչև տվյալ կիսամյակի (քառորդի) գնահատումը, կազմակերպվում է գիտելիքների լրացուցիչ ստուգում ուսումնական պլանով նախատեսված այն առարկաներից, որոնցից սովորողն ունի 10 և ավելի ժամ բացակայություն:
Գիտելիքների լրացուցիչ ստուգման արդյունքների և ընթացիկ գնահատականների հիման վրա, յուրաքանչյուր առարկայի ուսուցիչ կատարում է աշակերտի կիսամյակային (քառորդային) գնահատում:
ՔՆՆՈՒԹՅՈՒՆՆԵՐԸ ԵՎ ԴՐԱՆՑ ԱՆՑԿԱՑՄԱՆ ԿԱՐԳԸ
14. 3-րդ դասարանում սովորողների գիտելիքների ստուգումը անցկացվում է «Հայոց լեզու» և «Մաթեմատիկա» առարկաներից (գրավոր), դպրոցի տնօրենի սահմանած աշխատակարգով, ՀՀ կրթության և գիտության նախարարության սահմանած միասնական օրերին` հունիսի 1-5-ը ժամանակահատվածում:
Ռուսերենով ուսուցման դպրոցներում (դասարաններում) քննություններ անց են կացվում նաև «Ռուսաց լեզվից»: Քննությունները ընդունում են տվյալ առարկայի դասավանդող ուսուցիչը և տնօրենի կողմից նշանակված ընթերական:
15. 8-րդ դասարանում քննություններն անցկացվում են հայոց լեզվից, մաթեմատիկայից` գրավոր, օտար լեզվից (ռուսերեն, անգլերեն, ֆրանսերեն կամ գերմաներեն` աշակերտի ընտրությամբ)` բանավոր:
Ռուսերենով ուսուցմամբ դպրոցներում (դասարաններում) քննությունները անցկացվում են հայոց լեզվից, մաթեմատիկայից, ռուսաց լեզվից գրավոր: Քննությունները անց են կացվում, ՀՀ կրթության և գիտության նախարարության սահմանած միասնական օրերին` հունիսի 1-10-ը ժամանակահատվածում:
Քննություններն ընդունվում են դպրոցի տնօրենի հրամանով ստեղծված հանձնաժողովի կողմից. հանձնաժողովի նախագահ, դասավանդող ուսուցիչ և հանձնաժողովի երկու անդամ:
16. 10-րդ դասարանում սահմանված են վեց պետական քննություններ`
- «Հայոց լեզու» - գրավոր,
- «Մաթեմատիկա» - գրավոր,
- «Հայոց պատմություն» - բանավոր,
- «Հայ գրականություն» - բանավոր,
- «Բնագիտություն» (ֆիզիկա, քիմիա կամ կենսաբանություն` աշակերտի
ընտրությամբ) - գրավոր
- «Օտար լեզու» (ռուսերեն, անգլերեն, ֆրանսերեն, գերմաներեն, պարսկերեն
կամ իսպաներեն` աշակերտի ընտրությամբ) - բանավոր:
Ռուսերենով ուսուցմամբ դպրոցներում (դասարաններում) սահմանվում է ևս մեկ պետական քննություն «Ռուս գրականություն» առարկայից - բանավոր:
Քննություններն անց են կացվում, ՀՀ կրթության և գիտության նախարարության սահմանած միասնական օրերին` հունիսի 1-20-ը ժամանակահատվածում:
Պետական քննությունները ընդունվում են հանրակրթական ուսումնական հաստատության տնօրենի հրամանով ստեղծված հանձնաժողովի կողմից. հանձնաժողովի նախագահ, դասավանդող ուսուցիչ և հանձնաժողովի երկու անդամներ:
17. 10-րդ դասարանի համար մաթեմատիկայի (գնահատումը 20 բալանոց համակարգով), 8-րդ դասարանի համար հայոց լեզվի (գնահատումը 5 բալանոց համակարգով) և մաթեմատիկայի (գնահատումը 5 բալանոց համակարգով) քննական առաջադրանքները կազմվում են ՀՀ կրթության և գիտության նախարարության կողմից և հաղորդվում ռադիոյով` քննությունները սկսելուց 30 րոպե առաջ (այդ ընթացքում աշակերտները և քննական հանձնաժողովի անդամները պետք է գտնվեն քննասենյակում):
10-րդ դասարանի համար հայոց լեզվի քննական առաջադրանքները (գնահատումը 20 բալանոց համակարգով) կազմվում են ՀՀ կրթության և գիտության նախարարության կողմից և հասցվում դպրոցներ քննության օրը:
10-րդ դասարանում «Հայ գրականություն» , «Հայոց պատմություն» , «Օտար լեզու» առարկաների բանավոր քննությունները (գնահատումը 5 բալանոց համակարգով) և «Ֆիզիկա» , «Քիմիա» , «Կենսաբանություն» առարկաների գրավոր քննությունները (գնահատումը 20 բալանոց համակարգով) անցկացվում են ՀՀ կրթության և գիտության նախարարության կողմից հաստատված հարցատոմսերով:
8-րդ դասարանի «Օտար լեզվի» քննական առաջադրանքները (գնահատումը 5 բալանոց համակարգով) կազմում են դպրոցների մեթոդմիավորումները ըստ ՀՀ կրթության և գիտության նախարարության կողմից հաստատված նմուշների:
3-րդ դասարանի համար հայոց լեզվի և մաթեմատիկայի գիտելիքների ստուգման առաջադրանքները (գնահատումը 5 բալանոց համակարգով) կազմում են դպրոցների մեթոդմիավորումները ըստ ՀՀ կրթության և գիտության նախարարության կողմից հաստատված նմուշների:
Ռուսերենով ուսուցման 3-րդ, 8-րդ, 10-րդ դասարանների ռուսաց լեզվի քննական առաջադրանքները (գնահատումը 5 բալանոց համակարգով) կազմում են դպրոցների մեթոդմիավորումները ըստ ՀՀ կրթության և գիտության նախարարության կողմից հաստատված նմուշների:
18. Աշակերտներին չի թույլատրվում իրենց հետ քննասենյակ բերել տետրեր, դասագրքեր, ուսումնական և այլ ուղեցույց նյութեր:
19. Գրավոր աշխատանքները կատարելու և բանավոր պատասխաններին պատրաստվելու համար քննվողներին տրվում է դպրոցի դրոշմակնիքով կնքված տետր (թուղթ):
20. Սահմանված ժամանակամիջոցում գրավոր աշխատանքը չավարտած աշակերտներն այն հանձնում են անավարտ վիճակում:
21. Քննական աշխատանքների ստուգումն ավարտվում է քննության օրը: Քննական գրավոր աշխատանքները, մինչև դրանց ստուգման ավարտը, պահվում են քննական հանձնաժողովի նախագահի մոտ:
22. Աշակերտի գրավոր աշխատանքը կամ բանավոր պատասխանը գնահատելիս, քննական հանձնաժողովի անդամների միջև տարաձայնություն առաջանալու դեպքում հարցը լուծվում է հանձնաժողովի անդամների ձայների պարզ մեծամասնությամբ: Հավասար ձայների դեպքում 3-րդ դասարանում նշանակվում է դասավանդող ուսուցչի առաջարկած գնահատականը, 8-րդ և 10-րդ դասարաններում` հանձնաժողովի նախագահի առաջարկած գնահատականը:
23. Քննությունների ընթացքում հիվանդացած (համապատասխան փաստաթղթերի առկայություն) և այդ ընթացքում ապաքինված աշակերտներին մինչև քննությունների ավարտը թույլատրվում է հանձնել դեռևս չհանձնած և բաց թողնված առարկաների քննությունները: Մինչև քննությունների ավարտը չապաքինված աշակերտները քննություններ են հանձնում օգոստոսի 20-30-ը:
24. 8-րդ և 10-րդ դասարանների այն աշակերտները, ովքեր «Հանրահաշիվ» «Երկրաչափություն» առարկաներից որևէ մեկից ունեն տարեկան անբավարար գնահատական, մասնակցում են «Մաթեմատիկայի» պետական քննությանը: Քննությունից ստացած դրական գնահատականը հիմք է հանդիսանում տարեկանում ունեցած անբավարար գնահատականը վերագնահատելու համար: Քննությունից անբավարար ստանալու դեպքում, օգոստոսին սովորողը ամառային առաջադրանք է հանձնում «Մաթեմատիկայից»: Վերաքննության արդյունքը հիմք է հանդիսանում ինչպես քննական, այնպես էլ տարեկան գնահատումների համար:
25. 8-րդ և 10-րդ դասարանների այն աշակերտները, ովքեր և «Հանրահաշիվ» և «Երկրաչափություն» առարկաներից ունեն տարեկան անբավարար գնահատականներ, չեն թույլատրվում մասնակցելու «Մաթեմատիկայի» պետական քննությանը և օգոստոսին ամառային առաջադրանք են հանձնում «Մաթեմատիկայից: Վերաքննության արդյունքը հիմք է հանդիսանում, ինչպես քննական, այնպես էլ տարեկան գնահատումների համար:
26. Գնահատման 20 միավորանոց համակարգում` մինչև 7 միավորը ներառյալ և 5 միավորանոց համակարգում` մինչև 2 միավորը ներառյալ, համարվում են անբավարար գնահատական:
Տվյալ առարկայի տարեկան և քննական գնահատականները ատեստատում գրանցվում են առանձին-առանձին, համապատասխան տողերում:
27. Եթե 10-րդ դասարանի շրջանավարտը հայոց լեզու ուսումնասիրել է միայն 9-րդ և 10-րդ դասարաններում, ապա նա իր ցանկությամբ կարող է ազատվել հայոց լեզվի պետական քննությունից: Այդ դեպքում շրջանավարտի ատեստատում հայոց լեզվի տողում գրվում է. «չի ուսումնասիրել»:
ՄԵԴԱԼԻ ՀԱՎԱԿՆՈՐԴՆԵՐԻ ՆԵՐԿԱՅԱՑՈՒՄԸ
28. Միջնակարգ հանրակրթական ուսումնական հաստատությունների այն շրջանավարտները, ովքեր 8-րդ դասարանը ավարտել են գերազանցությամբ և 9-րդ և 10-րդ դասարաններում բոլոր առարկաներից տարեկանում գնահատվել են «5» , դպրոցի մանկավարժական խորհրդի որոշմամբ (աշակերտի ծնողի, կամ նրա օրինական ներկայացուցչի համաձայնությամբ) ներկայացվում են որպես Ոսկե մեդալի հավակնորդ:
29. Միջնակարգ հանրակրթական ուսումնական հաստատությունների այն շրջանավարտները, ովքեր 8-րդ դասարանը ավարտել են գերազանցությամբ և 9-րդ և 10-րդ դասարաններում տարեկանում գնահատվել են «5» և ունեն ոչ ավելի, քան երկու առարկայից «4» տարեկան գնահատական, դպրոցի մանկավարժական խորհրդի որոշմամբ (աշակերտի ծնողի, կամ նրա օրինական ներկայացուցչի համաձայնությամբ) ներկայացվում են որպես Արծաթե մեդալի հավակնորդ:
30. Ուսումնական պլանով նախատեսված որևէ առարկայից (բացի առողջության պատճառով «Աշխատանքի ուսուցում» , «Ֆիզկուլտուրա» և «նախնական զինվորական պատրաստություն» առարկաներից ազատված լինելու դեպքերը) չգնահատված շրջանավարտները, անկախ չգնահատման այլ պատճառներից, որպես մեդալի հավակնորդ չեն ներկայացվում, եթե նրանք սահմանված կարգով չեն հանձնում էքստեռն քննություն տվյալ առարկայից, համապատասխան դպրոցում:
31. Մեդալի հավակնորդ շրջանավարտների նախնական ցուցակները մինչև մարտի 1-ը ուսումնական հաստատությունները ներկայացնում են մարզպետարանի (Երևանի քաղաքապետարանի) կրթության վարչություն: Նախարարության ենթակայության հանրակրթական ուսումնական հաստատությունները նախնական ցուցակները մինչև մարտի 1-ը ներկայացնում են նախարարության միջնակարգ կրթության վարչություն:
Մարզպետարանների (Երևանի քաղաքապետարանի) կրթության վարչությունները մարզից մեդալի հավակնորդների ընդհանրացված նախնական ցուցակները մինչև մարտի 15-ը ներկայացնում են ՀՀ կրթության և գիտության նախարարություն:
Մինչև մայիսի 1-ը նախարարությունը ուսումնական հաստատություններում ստուգում է ներկայացումների համապատասխանությունը սույն կարգի 28-րդ կամ 29-րդ կետերի պահանջներին և արդյունքների մասին տեղեկացնում մարզպետարանի (Երևանի քաղաքապետարանի) կրթության վարչություններին ու տվյալ ուսումնական հաստատության տնօրինությանը:
32. Ուսումնական հաստատությունների պետական ավարտական քննությունները կազմակերպելու և վերահսկելու նպատակով նախարարի հրամանով ստեղծվում է հանրապետական հանձնաժողով:
Մեդալի հավակնորդ շրջանավարտների կենտրոնացված քննությունները անցկացնելու համար նախարարի հրամանով ստեղծվում են «Հայոց լեզվի» ու «Մաթեմատիկայի» առարկայական հանձնաժողովներ:
ՄԵԴԱԼԻ ՀԱՎԱԿՆՈՐԴՆԵՐԻ ՔՆՆՈՒԹՅՈՒՆՆԵՐԻ ԿԱԶՄԱԿԵՐՊՈՒՄԸ
33. Մեդալի հավակնորդ բոլոր շրջանավարտները (անկախ ուսումնական հաստատության ենթակայությունից և անկախ հաստատությունում ուսուցման լեզվից), կենտրոնացված կարգով, հանձնում են պետական քննություններ.
«Հայոց լեզու» առարկայից - հունիսի 1-ին,
«Մաթեմատիկա» առարկայից - հունիսի 3-ին,
նախարարության կողմից նախօրոք որոշված հաստատությունում:
Քննության համար մեդալի հավակնորդ շրջանավարտին տրվում է գրիչ և հատուկ նմուշի ծածկագրված տետր:
Յուրաքանչյուր առարկայի քննական աշխատանքները ստուգվում են քննության օրը, ՀՀ կրթության և գիտության նախարարի հրամանով ստեղծված համապատասխան առարկայական հանձնաժողովի կողմից:
Քննությունների արդյունքները հրապարակվում են յուրաքանչյուր առարկայի քննության հաջորդ օրը, ժամը 18.00-ին:
Տվյալ առարկայի քննության արդյունքները հրապարակելուց հետո, աշակերտը (ծնողի կամ մասնագետի ներկայությամբ) կարող է բողոքարկել քննության արդյունքը առարկայական հանձնաժողովում` մինչև տվյալ օրվա ժամը 24.00-ը:
Կենտրոնացված կարգով անցկացվող երկու քննությունների վերջնական արդյունքների մասին մարզպետարանների (Երևանի քաղաքապետարանի) կրթության վարչությունները և նախարարության ենթակայության հանրակրթական ուսումնական հաստատությունները տեղեկացվում են մինչև հունիսի 7-ը:
34. «Հայոց պատմություն» , «Հայ գրականություն» , «Բնագիտություն» (ֆիզիկա, քիմիա կամ կենսաբանություն մեդալի հավակնորդի ընտրությամբ), «Օտար լեզու» (ռուսերեն, անգլերեն, ֆրանսերեն, գերմաներեն, պարսկերեն կամ իսպաներեն մեդալի հավակնորդի ընտրությամբ) առարկաներից ավարտական պետական քննությունները մեդալի հավակնորդ շրջանավարտները հանձնում են իրենց ուսումնական հաստատություններում նույն կարգով, ինչ կարգով մյուս շրջանավարտները:
Նշված առարկաների քննությունների անցկացումը վերահսկվում է նախարարության կողմից:
35. Մեդալի հավակնորդ շրջանավարտների, ինչպես և հանրակրթական ուսումնական հաստատությունների մյուս բոլոր շրջանավարտների համար քննական առաջադրանքները բովանդակությամբ ու կառուցվածքով նույնական են և սահմանվում են ՀՀ կրթության և գիտության նախարարության կողմից:
36. Մինչև հունիսի 22-ը հանրակրթական ուսումնական հաստատությունները մարզպետարանի (Երևանի քաղաքապետարանի) կրթության վարչություն են ներկայացնում սահմանված ձևի տեղեկանք, հանրակրթական ուսումնական հաստատությունում մյուս չորս առարկաներից, մեդալի հավակնորդ շրջանավարտների հանձնած պետական քննությունների արդյունքների մասին: Ստացված արդյունքները ընդհանրացվում է մարզպետարանի (Երևանի քաղաքապետարանի) կրթության վարչությունում և մինչև հունիսի 25-ը ներկայացվում է նախարարության միջնակարգ կրթության վարչություն):
Նախարարության ենթակայության հանրակրթական ուսումնական հաստատությունները նման տեղեկանքը նույն ժամկետում ներկայացվում են նախարարության միջնակարգ կրթության վարչություն:
ՈՍԿԵ ԿԱՄ ԱՐԾԱԹԵ ՄԵԴԱԼՈՎ ՊԱՐԳԵՎԱՏՐՈՒՄԸ
37. Բոլոր ավարտական քննությունների արդյունքների հիման վրա մեդալի հավակնորդ շրջանավարտները Ոսկե կամ Արծաթե մեդալով պարգևատրվում են նախարարության կողմից`
ա) Ոսկե մեդալի այն հավակնորդ շրջանավարտները, ովքեր բոլոր պետական քննություններից ստացել են 19-20 միավոր (20 միավորային համակարգում) կամ 5 միավոր (5 միավորային համակարգում)` պարգևատրվում են Ոսկե մեդալով:
բ) Ոսկե մեդալի այն հավակնորդ շրջանավարտները, ովքեր պետական քննություններից ստացել են 19-20 միավոր (20 միավորային համակարգում) կամ 5 միավոր (5 միավորային համակարգում) և ոչ ավել, քան երկու առարկայից 17-18 միավոր (20 միավորային համակարգում) կամ 4 միավոր (5 միավորային համակարգում)` պարգևատրվում են Արծաթե մեդալով:
գ) Արծաթե մեդալի հավակնորդ շրջանավարտները պարգևատրվում են Արծաթե մեդալով, եթե պետական քննություններից ստացել են 19-20 միավոր (20 միավորային համակարգում) կամ 5 միավոր (5 միավորային համակարգում) և ոչ ավել քան երկու առարկայից 17-18 միավոր (20 միավորային համակարգում) կամ 4 միավոր (5 միավորային համակարգում):
դ) Մնացած դեպքերում մեդալի հավակնորդ շրջանավարտները մեդալով չեն պարգևատրվում:
38. Ավարտական և փոխադրական քննությունները հատուկ գիշերօթիկ հաստատություններում սահմանվում են առանձին կարգով:
39. Երեկոյան դպրոցներում միջնակարգ կրթության ավարտական դասարան է համարվում նաև 11-րդ դասարանը:
Ծանոթություն. 1999-2000 թթ. ուսումնական տարում գիտելիքների ստուգում է
անցկացվում նաև 4-րդ դասարաններում
ԳՐԱՆՑՎԱԾ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
«30» 03 2000 Թ.
ՊԵՏԱԿԱՆ ԳՐԱՆՑՄԱՆ ԹԻՎ 11000027