ՀԱՄԱՁԱՅՆԱԳԻՐ ԽՈՐՀՐԴԱՅԻՆ ՍՈՑԻԱԼԻՍՏԱԿԱՆ ՀԱՆՐԱՊԵՏՈՒԹՅ ...

ՀԱՄԱՁԱՅՆԱԳԻՐ
ԽՈՐՀՐԴԱՅԻՆ ՍՈՑԻԱԼԻՍՏԱԿԱՆ ՀԱՆՐԱՊԵՏՈՒԹՅՈՒՆՆԵՐԻ ՄԻՈՒԹՅԱՆ ԳՈՅՈՒԹՅԱՆ ԺԱՄԱՆԱԿԱՇՐՋԱՆՈՒՄ ԳԱՂՏՆԱԳՐՎԱԾ ՏԵՂԵԿՈՒԹՅՈՒՆՆԵՐԻ ԳԱՂՏՆԻՈՒԹՅԱՆ ԱՍՏԻՃԱՆԻ ՎԵՐԱՆԱՅՄԱՆ ԿԱՐԳԻ ՄԱՍԻՆ

Սույն Համաձայնագրի մասնակից պետությունների կառավարությունները, այսուհետ` Կողմեր,

ընդունելով Խորհրդային Սոցիալիստական Հանրապետությունների Միության գոյության ժամանակաշրջանում գաղտնագրված տեղեկությունների գաղտնիության աստիճանի վերանայման` Կողմ հանդիսացող պետություններից յուրաքանչյուրի ազգային անվտանգության ապահովման շահերից բխող անհրաժեշտությունը,

նկատի առնելով միջպետական գաղտնիքների պահպանման փոխադարձ ապահովման վերաբերյալ 1993թ. հունվարի 22-ի Համաձայնագիրը և գաղտնի տեղեկությունների (պետական գաղտնիքների) փոխադարձ պաշտպանության երկկողմանի համաձայնագիրը,

համաձայնեցին հետևյալի մասին.

ՀՈԴՎԱԾ 1

Սույն Համաձայնագրի նպատակների համար օգտագործվում են հետևյալ հասկացությունները.

Գաղտնիության դրոշմագիր - ռեկվիզիտ, որը վկայում է գաղտնի տեղեկությունների կրիչի մեջ առկա տեղեկությունների գաղտնիության աստիճանը` դրված հենց կրիչի կամ դրան կցված փաստաթղթի վրա:

Գաղտնի տեղեկությունների կրիչներ - նյութական օբյեկտներ, այդ թվում` ֆիզիկական դաշտեր, որոնցում գաղտնի տեղեկությունները գտնում են իրենց արտացոլումը խորհրդանիշների, պատկերների, ազդանշանների, տեխնիկական որոշումների և գործընթացների տեսքով:

Կողմ հանդիսացող պետությունների կազմակերպություններ - պետական մարմիններ կամ այլ կազմակերպություններ, որոնք իրենց տրամադրության տակ ունեն գաղտնի տեղեկություններ:

Տեղեկությունների գաղտնիության աստիճանի վերանայում - գաղտնի տեղեկությունների հետագա պաշտպանության կամ գաղտնազերծման նպատակահարմարությունը որոշելու նպատակով գաղտնի տեղեկությունների գնահատման ընթացակարգ:

Գաղտնի տեղեկություններ - Խորհրդային Սոցիալիստական Հանրապետությունների Միության գոյության շրջանում գաղտնագրված տեղեկություններ, որոնց գաղտնիության աստիճանը ենթակա է վերանայման, որոնք չեն դասվում պետական գաղտնիքների շարքին այն պետություններում, որտեղ որոշում է կայացվել դրանց գաղտնիության աստիճանի վերանայման մասին:

ՀՈԴՎԱԾ 2

Սույն Համաձայնագրի նպատակը Կողմ հանդիսացող պետությունների կազմակերպություններում գտնվող գաղտնի տեղեկությունների գաղտնիության աստիճանի վերանայման կարգի հաստատումն է:

ՀՈԴՎԱԾ 3

Կողմերը, ազգային օրենսդրությանը համապատասխան, որոշում են սույն Համաձայնագրի կատարման համար պատասխանատու իրավասու մարմիններին (այսուհետ` իրավասու մարմիններ) և այդ մասին իրազեկում են Անկախ Պետությունների Համագործակցության Գործադիր կոմիտեին, որը սույն Համաձայնագրի ավանդապահն է:

Իրավասու մարմինների փոփոխության մասին համապատասխան Կողմը մեկ ամսվա ընթացքում գրավոր ծանուցում է ավանդապահին:

Սույն Համաձայնագիրն իրականացնելիս իրավասու մարմիններն անմիջականորեն համագործակցում են իրար հետ, իրենցից որևէ մեկի խնդրանքով անցկացնում են համատեղ խորհրդակցություններ:

ՀՈԴՎԱԾ 4

Սույն Համաձայնագրի իրականացման նպատակով Կողմ հանդիսացող պետությունների կազմակերպություններն իրենց պետությունների իրավասու մարմիններին ուղարկում են գաղտնի տեղեկությունների գաղտնիության աստիճանի վերանայման մասին առաջարկներ` նշելով.

ա) վերանայման ենթակա գաղտնի տեղեկությունների կրիչների ամբողջական անվանումները,

բ) դրանց մշակման (պատրաստման) և (կամ) գրանցման համարները և ամսաթվերը,

գ) գաղտնի տեղեկությունների կրիչների գաղտնիության դրոշմագիրը,

դ) գաղտնի տեղեկությունների կրիչին գաղտնիության դրոշմագիր շնորհած կազմակերպությունների անվանումները և դրանց գտնվելու վայրը,

ե) գաղտնի տեղեկությունների հետագա պաշտպանության կամ դրանց գաղտնազերծման նպատակահարմարությունը,

զ) այլ տեղեկություններ, որոնք կարող են անհրաժեշտ լինել առաջարկի կատարման համար:

Իրավասու մարմինը տվյալ առաջարկներն ուղարկում է Կողմ հանդիսացող պետությունների շահագրգիռ իրավասու մարմիններին:

ՀՈԴՎԱԾ 5

Գաղտնի տեղեկությունների գաղտնիության աստիճանի վերանայման մասին առաջարկ ստացած իրավասու մարմինները, ազգային օրենսդրությանը համապատասխան, կազմակերպում են դրանց քննարկումը` դրանց հետագա պաշտպանության կամ գաղտնազերծման նպատակահարմարության հարցի լուծման նպատակով, որից հետո քննարկման արդյունքների մասին տեղեկացնում են առաջարկն ուղարկած իրավասու մարմնին:

Իրավասու մարմինների փոխգործակցության արդյունքներով որոշվում են Կողմ հանդիսացող այն պետությունները, որոնք շահագրգռված են գաղտնի տեղեկությունների պաշտպանությամբ, կամ էլ որոշում է ընդունվում դրանց գաղտնազերծման մասին:

Առաջարկի քննարկման ժամկետը կազմում է դրա ստացման ամսաթվից սկսած 6 ամսից ոչ ավել, եթե յուրաքանչյուր կոնկրետ դեպքում իրավասու մարմինների կողմից չհամաձայնեցվի այլ ժամկետ:

Գաղտնի տեղեկությունների կրիչների գաղտնազերծումն իրականացվում է իրավասու մարմինների փոխադարձ համաձայնությամբ, Կողմ հանդիսացող պետությունների կազմակերպությունների կողմից` ազգային օրենսդրությանը համապատասխան:

Գաղտնի տեղեկությունների պաշտպանությամբ շահագրգիռ Կողմ հանդիսացող պետություններում, ազգային օրենսդրությանը համապատասխան, լուծվում է գաղտնի տեղեկությունները պետական գաղտնիքների շարքին դասելու հարցը:

ՀՈԴՎԱԾ 6

Կողմ հանդիսացող այն պետությունների իրավասու մարմինները, որոնք գաղտնի տեղեկությունները պետական գաղտնիքների շարքին դասելու մասին որոշում են ընդունել, շահագրգիռ իրավասու մարմիններին են ուղարկում գաղտնի տեղեկությունների պաշտպանության անհրաժեշտության և ժամկետների մասին տեղեկատվություն:

Ստացված տեղեկատվության հիման վրա Կողմերը միջոցներ են ձեռնարկում գաղտնի տեղեկությունները պաշտպանելու ուղղությամբ` գաղտնի տեղեկության (պետական գաղտնիքների) փոխադարձ պաշտպանության մասին միջազգային պայմանագրերին համապատասխան:

Յուրաքանչյուր Կողմի պետություն իրավունք ունի այլ Կողմերի պետությունների շահերին չդիպչող այն գաղտնի տեղեկությունների գաղտնազերծման վերաբերյալ ինքնուրույն որոշում ընդունելու, որոնց գաղտնագրման ժամկետը լրացել է:

ՀՈԴՎԱԾ 7

Կողմերն ինքնուրույն են կրում սույն Համաձայնագրի կատարման ընթացքում առաջացող ծախսերը, եթե յուրաքանչյուր կոնկրետ դեպքում չի պայմանավորվել այլ կարգ:

ՀՈԴՎԱԾ 8

Սույն Համաձայնագրում Կողմերի համաձայնությամբ կարող են կատարվել փոփոխություններ և լրացումներ, որոնք կհանդիսանան նրա անքակտելի մասը, կձևակերպվեն համապատասխան արձանագրություններով և ուժի մեջ կմտնեն սույն Համաձայնագրի 10-րդ հոդվածի համաձայն:

ՀՈԴՎԱԾ 9

Սույն Համաձայնագրի կիրառության և մեկնաբանման ընթացքում Կողմերի միջև ծագած վիճելի հարցերը լուծվում են շահագրգիռ Կողմերի միջև` խորհրդակցությունների և բանակցությունների միջոցով:

ՀՈԴՎԱԾ 10

Սույն Համաձայնագիրն ուժի մեջ է մտնում ստորագրած Կողմերի կողմից դրա ուժի մեջ մտնելու համար անհրաժեշտ ներպետական ընթացակարգերի կատարման մասին երրորդ ծանուցագիրն ավանդապահի ստանալուց 30 օր հետո:

Ներպետական ընթացակարգերն ավելի ուշ կատարած Կողմերի համար սույն Համաձայնագիրն ուժի մեջ է մտնում համապատասխան փաստաթղթերն ավանդապահի ստանալու օրվանից 30 օր հետո:

ՀՈԴՎԱԾ 11

Սույն Համաձայնագիրը գործում է 5 տարվա ընթացքում` ուժի մեջ մտնելու օրվանից սկսած: Այդ ժամկետը լրանալուց հետո Համաձայնագիրն ինքնաբերաբար ամեն անգամ երկարաձգվում է 5 տարի ժամկետով, եթե Կողմերը չեն ընդունում այլ որոշում:

ՀՈԴՎԱԾ 12

ՈՒժի մեջ մտնելուց հետո սույն Համաձայնագիրը բաց է Անկախ Պետությունների Համագործակցության ցանկացած պետության միանալու համար, ինչպես նաև` ցանկացած այլ պետության համար, որն ընդունում է նրա դրույթները, նպատակները և սկզբունքները` ավանդապահին միացման մասին փաստաթղթի հանձնման միջոցով:

Միացող պետության համար սույն Համաձայնագիրն ուժի մեջ է մտնում միացման մասին համապատասխան փաստաթուղթն ավանդապահի ստանալուց 30 օր հետո:

ՀՈԴՎԱԾ 13

Յուրաքանչյուր Կողմ կարող է դուրս գալ սույն Համաձայնագրից` այդ մասին ավանդապահին գրավոր ծանուցում ուղարկելով, ոչ ուշ, քան դուրս գալուց 6 ամիս առաջ:

Կատարված է Սանկտ Պետերբուրգ քաղաքում 2011թ. հոկտեմբերի 18-ին, մեկ բնօրինակով, ռուսերենով: Բնօրինակը պահվում է Անկախ Պետությունների Համագործակցության Գործադիր կոմիտեում, որը սույն Համաձայնագիրն ստորագրած յուրաքանչյուր պետության կուղարկի դրա հաստատված պատճենը:

Համաձայնագիրը Հայաստանի Հանրապետության համար ուժի մեջ է մտել 2014թ. դեկտեմբերի 3-ին