ՀԱՄԱՁԱՅՆԱԳԻՐ ՀՀ ԿԱՌԱՎԱՐՈՒԹՅԱՆ ԵՎ ՈՒՐՈՒԳՎԱՅԻ ԱՐԵՎԵԼ ...

ՀԱՄԱՁԱՅՆԱԳԻՐ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ՈՒՐՈՒԳՎԱՅԻ ԱՐԵՎԵԼՅԱՆ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ ՄՇԱԿՈՒՅԹԻ ԲՆԱԳԱՎԱՌՈՒՄ ՀԱՄԱԳՈՐԾԱԿՑՈՒԹՅԱՆ ՄԱՍԻՆ

Հայաստանի Հանրապետության Կառավարությունը և ՈՒրուգվայի Արևելյան Հանրապետության կառավարությունը, այսուհետ Կողմերը,

Ցանկանալով զարգացնել և խորացնել երկու երկրների միջև արդեն առկա բարեկամական հարաբերությունները,

Ձգտելով զարգացնել համագործակցությունը մշակույթի բնագավառում,

Պայմանավորվեցին հետևյալի մասին.

Հոդված 1

Կողմերը կզարգացնեն համագործակցությունը երկկողմ հետաքրքրություն ներկայացնող մշակույթի տարբեր ոլորտներում և մասնավորապես կխրախուսեն.

արվեստի, թատերական և երաժշտական խմբերի, ինչպես նաև անհատ կատարողների փոխանակումները,

համագործակցությունը կինոյի բնագավառում` ֆիլմերի փոխանակումների կամ մյուս Կողմի կազմակերպած կինոփառատոններին մասնակցության միջոցով,

գեղարվեստական ցուցահանդեսների փոխանակումները:

Հոդված 2

Կողմերը կխրախուսեն համագործակցությունը և տեղեկատվության փոխանակումը երկու երկրների թանգարանների, գրադարանների և արխիվների միջև:

Հոդված 3

Կողմերը կկազմակերպեն մշակութային բնույթի կոնֆերանսների և միջազգային գիտաժողովներ` մասնագիտացված, պետական և մասնավոր կազմակերպությունների փորձագետների, ինչպես նաև ազգային մշակութային ժառանգության պահպանման ուսումնասիրմամբ զբաղվող մասնագետների մասնակցությամբ:

Հոդված 4

Յուրաքանչյուր Կողմ կօժանդակի իր ներկայացուցիչների մասնակցությունը մյուս Կողմի կազմակերպած մշակութային բնույթի կոնֆերանսներին, մրցույթներին ու հանդիպումներին:

Հոդված 5

Կողմերը կշարունակեն իրենց մայրաքաղաքներում փոխադարձության սկզբունքներով մշակութային կենտրոնների ստեղծման գործընթացները:

Կողմերը հատուկ համաձայնագրի միջոցով կորոշեն տվյալ կենտրոնների գործունեության իրավական հիմքը և պայմանները:

Հոդված 6

Կողմերը կխրախուսեն հանդիպումների անցկացումը և մշակույթի գործիչների, գեղարվեստի ուսուցման ոլորտներում մասնագետների և փորձի փոխանակումները:

Հոդված 7

Կողմերը կհիմնեն հայ-ուրուգվայական համատեղ հանձնաժողով, որը կազմված կլինի երկու երկրների ներկայացուցիչներից, որոնք հաջորդաբար հանդիպումներ կանցկացնեն Երևանում և Մոնտեվիդեոյում յուրաքանչյուր երեք տարին մեկ:

Հանձնաժողովը կմշակի համագործակցության ծրագրերը, ինչպես նաև կհաստատի դրանց ֆինանսավորման մանրամասները: Միաժամանակ այն կքննարկի սույն Համաձայնագրի կիրառմանն առնչվող բոլոր հարցերը:

Հոդված 8

Սույն Համաձայնագիրն ուժի մեջ կմտնի միջազգային պայամանագրերին համապատասխան Կողմերի ներքին օրենսդրությամբ սահմանված անհրաժեշտ ընթացակարգերն ավարտելու մասին միմյանց գրավոր կերպով տեղեկացնելու վերջին ծանուցման օրվանից:

Հոդված 9

Սույն Համաձայնագիրը կգործի հինգ տարի ժամկետով և ինքնաբերաբար կերկարաձգվի հաջորդ հինգ տարիների համար, բացառությամբ, երբ Կողմերից մեկը համապատասխան ժամկետը լրանալուց վեց ամիս առաջ մյուս Կողմին դիվանագիտական ուղիներով կտեղեկացնի Համաձայնագրի գործողությունը դադարեցնելու իր մտադրության մասին:

Կատարված է Մոնտեվիդեոյում, 2000թ. մայիսի 23-ին, երկու բնօրինակից` յուրաքանչյուրը հայերեն և իսպաներեն լեզուներով, ընդ որում երկուսն էլ հավասարազոր են:

Համաձայնագիրն ուժի մեջ է մտել 2008թ. հուլիսի 7-ին: