ՆԵՐԴՐՈՒՄԱՅԻՆ ԾՐԱԳՐԵՐԻ ՀԱՄԱՁԱՅՆԵՑՄԱՆ ԿԱՐԳԸ ՀԱՍՏԱՏԵԼ ...

(ուժը կորցրել է 14.07.10 թիվ 365-Ն որոշում)

600.0056.040504

ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ

                                      «04»         05           2004 Թ.

                                        ՊԵՏԱԿԱՆ ԳՐԱՆՑՄԱՆ ԹԻՎ 60004137

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԸ ԿԱՐԳԱՎՈՐՈՂ ՀԱՆՁՆԱԺՈՂՈՎ

ՈՐՈՇՈՒՄ

12 մայիսի 2004 թվականի N 56-Ն

ՆԵՐԴՐՈՒՄԱՅԻՆ ԾՐԱԳՐԵՐԻ ՀԱՄԱՁԱՅՆԵՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Էներգետիկայի մասին» Հայաստանի Հանրապետության օրենքի 28-րդ հոդվածի 1-ին կետի ը) ենթակետը Հայաստանի Հանրապետության հանրային ծառայությունները կարգավորող հանձնաժողովը որոշում է.

1. Հաստատել ներդրումային ծրագրերի համաձայնեցման կարգը (հավելված):

2. ՈՒժը կորցրած ճանաչել Հայաստանի Հանրապետության էներգետիկայի կարգավորող հանձնաժողովի 2002 թվականի հոկտեմբերի 2-ի «Լիցենզավորված անձանց կողմից Հայաստանի Հանրապետության էներգետիկայի կարգավորող հանձնաժողով ներկայացվող զարգացման ներդրումային ծրագրերի համաձայնեցման կարգը հաստատելու մասին» N 64-Ն որոշումը:

3. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

ԿԱՐԳ

ՆԵՐԴՐՈՒՄԱՅԻՆ ԾՐԱԳՐԵՐԻ ՀԱՄԱՁԱՅՆԵՑՄԱՆ

Սույն կարգը սահմանում է Հայաստանի Հանրապետության հանրային ծառայությունները կարգավորող հանձնաժողովի հետ (այսուհետև` հանձնաժողով) ներդրումային ծրագրերի համաձայնեցման ընթացակարգը:

1. ԸՆԴՀԱՆՈՒՐ ԴՐՈՒՅԹՆԵՐ

1.1 Սույն կարգի իմաստով ներդրումներ են համարվում լիցենզավորված գործունեության իրականացման համար անհրաժեշտ օգտակար և օգտագործվող ակտիվների մեծացմանը կամ փոխարինմանն ուղղված ներդրումները:

1.2 Սույն կարգում ամրագրված դրույթները պարտադիր են լիցենզավորված անձանց կողմից կատարվող բոլոր այն ներդրումների համար, որոնք հետագայում լրիվ կամ մասնակիորեն պետք է ներառվեն լիցենզավորված անձի սակագնում (ծառայությունների մատուցման վճարում):

1.3 Լիցենզավորված անձի կողմից հանձնաժողով ներկայացվող ներդրումային ծրագիրը պետք է նպատակաուղղված լինի հետևյալ հիմնախնդիրներից որևէ մեկի կամ մի քանիսի լուծմանը.

ա) արտադրական հզորությունների ավելացում,

բ) ծառայությունների մատուցման և սպասարկման որակի ցուցանիշների բարելավում կամ համապատասխանեցում սահմանված նորմերին,

գ) տեխնոլոգիական ու առևտրային կորուստների կամ սեփական կարիքների ծախսերի իջեցում,

դ) մաշված և դուրս գրված ակտիվների նորով փոխարինում,

ե) անվտանգության և հուսալիության ցուցանիշների մակարդակի բարձրացում,

զ) շրջակա միջավայրի պահպանությանն ուղղված միջոցառումների իրականացում,

է) հաղորդման (փոխադրման) և բաշխման ցանցերի ընդլայնում կամ թողունակության մեծացում,

ը) ժամանակակից արդյունավետ տեխնոլոգիաների ներդրում, տեղական պաշարների արդյունավետ օգտագործում,

թ) հանձնաժողովի և իրավասու այլ մարմինների նորմատիվ ակտերի պահանջների կատարում,

ժ) լիցենզավորված գործունեության արդյունավետության բարձրացմանն ուղղված այլ անհրաժեշտ միջոցառումների իրականացում:

2. ՀԱՆՁՆԱԺՈՂՈՎԻ ՀԱՄԱՁԱՅՆԵՑՄԱՆԸ ՆԵՐԿԱՅԱՑՎՈՂ ՆԵՐԴՐՈՒՄԱՅԻՆ ԾՐԱԳՐԵՐԸ

2.1 Ներդրումային ծրագրերը, լիցենզավորված անձի հայեցողությամբ, հանձնաժողովի համաձայնեցմանը կարող են ներկայացվել մեկ կամ երկու փուլով:

2.2 Ներդրումային ծրագրերը հանձնաժողովի համաձայնեցմանն են ներկայացվում երկու փուլով, եթե.

ա) առաջին փուլով հանձնաժողովի համաձայնեցմանն են ներկայացվում ներդրումների իրականացման հիմնական ուղղությունները և սպասվող արդյունքները,

բ) երկրորդ փուլով հանձնաժողովի համաձայնեցմանն են ներկայացվում ներդրումային ծրագրով նախատեսված աշխատանքների նախագծերը:

2.3 Ներդրումային ծրագրերը հանձնաժողովի համաձայնեցմանն են ներկայացվում մեկ փուլով, եթե.

ա) հանձնաժողովի համաձայնեցմանն են ներկայացվում ներդրումային ծրագրով նախատեսված աշխատանքների նախագծերը,

բ) ներդրումային ծրագիրն ուղղված է լիցենզավորված գործունեության իրականացման համար անհրաժեշտ տնտեսական գույքի, գործիքների և տրանսպորտային միջոցների ձեռքբերմանը:

2.4 Ներդրումների իրականացման հիմնական ուղղությունների և սպասվող արդյունքների մասին հանձնաժողով ներկայացվող ներդրումային ծրագրերում պետք է արտացոլված լինեն.

ա) ներդրումային ծրագրի նպատակը և հիմնական ուղղությունները,

բ) ընտրված ուղղություններից յուրաքանչյուրով ներդրումներ կատարելու անհրաժեշտության հիմնավորումները,

գ) ընտրված ուղղություններից յուրաքանչյուրով ներդրումների ծավալի, իրականացման ժամանակացույցի և սպասվող արդյունքների գնահատականը,

դ) լիցենզավորված անձի սակագնի (մատուցվող ծառայության վճարի) վրա ընտրված ուղղություններից յուրաքանչյուրի ազդեցության գնահատականը,

ե) ծրագրի ֆինանսավորման աղբյուրները և պայմանները:

2.5 Ներդրումային ծրագրերի նախագծային փաստաթղթերում պետք է ընդգրկվեն.

ա) նախագծի նպատակը և ընդհանուր նկարագրությունը,

բ) դրված նպատակին հասնելու հնարավոր տարբերակները, դրանց համեմատական վերլուծությունը և լավագույնի ընտրությունը,

գ) ընտրված տարբերակի բնութագրերը` սպասվող տեխնիկատնտեսական ցուցանիշները և անհրաժեշտ ներդրումների ծավալը,

դ) նախագծի իրականացման ժամանակացույցը, ֆինանսավորման աղբյուրները և պայմանները,

ե) ներդրումների ֆինանսատնտեսական արդյունավետության հաշվարկները:

ՀՀ օրենսդրությամբ նախատեսված դեպքերում նախագծերի հետ հանձնաժողով են ներկայացվում նաև համապատասխան փորձաքննական եզրակացությունները:

2.6 Լիցենզավորված գործունեության իրականացման համար անհրաժեշտ տնտեսական գույքի, գործիքների և տրանսպորտային միջոցների ձեռքբերմանն ուղղված ներդրումային ծրագրերը պետք է ներառեն.

ա) գույքի անվանացանկը և նախնական արժեքները,

բ) գույքի ձեռքբերման անհրաժեշտության հիմնավորումները:

2.7 Անհետաձգելի աշխատանքների իրականացման նպատակով կատարված ներդրումները, որոնց իրականացման հրատապությամբ պայմանավորված ժամանակահատվածը բավարար չի եղել դրանք հանձնաժողովի հետ նախապես համաձայնեցնելու համար, հանձնաժողովի համաձայնեցմանն են ներկայացվում աշխատանքների ավարտից հետո` յուրաքանչյուր եռամսյակի ավարտին հաջորդող մեկ ամսվա ընթացքում: Նշված նպատակով կատարված ներդրումների մասին հանձնաժողով ներկայացվող փաստաթղթերի փաթեթը պետք է ներառի դրանց իրականացման անհրաժեշտությունը և կատարված ծախսերը հիմնավորող փաստաթղթերը:

Հանձնաժողովը 30 օրյա ժամկետում կայացնում է համապատասխան որոշում անհետաձգելի աշխատանքների իրականացման նպատակով կատարված ներդրումները լիցենզավորված անձի սակագնում (ծառայությունների մատուցման վճարում) հետագայում լրիվ կամ մասնակիորեն ներառելու մասին:

3. ՀԱՆՁՆԱԺՈՂՈՎԻ ՀԵՏ ՆԵՐԴՐՈՒՄԱՅԻՆ ԾՐԱԳՐԵՐԻ ՀԱՄԱՁԱՅՆԵՑՄԱՆ ԸՆԹԱՑԱԿԱՐԳԸ

3.1 Լիցենզավորված անձի կողմից ներկայացված ներդրումային ծրագիրն ստանալու օրվանից հանձնաժողովն սկսում է դրա ուսումնասիրման գործընթացը և 30 օրվա ընթացքում`

ա) կայացնում է որոշում ներդրումային ծրագրին ամբողջությամբ կամ մասնակիորեն համաձայնություն տալու կամ չտալու մասին կամ,

բ) համապատասխան գրությամբ լիցենզավորված անձին է ներկայացնում իր դիտողությունները և առաջարկությունները:

3.2 Սույն ծրագրի 3.1 կետի բ) ենթակետով սահմանված դեպքում լիցենզավորված անձը դիտարկում է հանձնաժողովի ներկայացրած դիտողությունները և առաջարկությունները և ծրագրի լրամշակված տարբերակը կրկին ներկայացնում է հանձնաժողովի համաձայնեցմանը: Ներդրումային ծրագրի լրամշակված տարբերակում հանձնաժողովի դիտողություններն ու առաջարկությունները չընդունելու դեպքում լիցենզավորված անձը ներկայացնում է պարզաբանումներ և հիմնավորումներ:

Հանձնաժողովը ներդրումային ծրագրի լրամշակված տարբերակն ստանալուց հետո 30-օրյա ժամկետում կայացնում է որոշում` ներդրումային ծրագրին ամբողջությամբ կամ մասնակիորեն համաձայնություն տալու կամ չտալու մասին:

3.3 Հանձնաժողովի հետ համաձայնեցված ներդրումային ծրագրերում փոփոխություններ կատարելու անհրաժեշտության դեպքում լիցենզավորված անձը դիմում է հանձնաժողով` ներկայացնելով ներդրումային ծրագրում փոփոխությունների կատարման անհրաժեշտությունը հիմնավորող համապատասխան փաստաթղթեր:

Հանձնաժողովն առաջարկվող փոփոխությունների վերաբերյալ 30 օրվա ընթացքում կայացնում է համապատասխան որոշում:

4. ԴՐԱՄԱՇՆՈՐՀՆԵՐԻ ԵՎ ՄԻՋԱԶԳԱՅԻՆ ԿԱԶՄԱԿԵՐՊՈՒԹՅՈՒՆՆԵՐԻ ԿՈՂՄԻՑ ՏՐԱՄԱԴՐՎԱԾ ՎԱՐԿԱՅԻՆ ՄԻՋՈՑՆԵՐՈՎ ԻՐԱԿԱՆԱՑՎՈՂ ՆՊԱՏԱԿԱՅԻՆ ՆԵՐԴՐՈՒՄԱՅԻՆ ԾՐԱԳՐԵՐԸ

Դրամաշնորհների և միջազգային կազմակերպությունների կողմից Հայաստանի Հանրապետության կառավարության երաշխիքով տրամադրված վարկային միջոցներով իրականացվող նպատակային ներդրումային ծրագրերի համար հանձնաժողովը կարող է սահմանել առանձին ընթացակարգեր` ելնելով ներկայացված ծրագրի նպատակային առանձնահատկություններից: