ՀԱՄԱՁԱՅՆԱԳԻՐ ՀՀ ՄՇԱԿՈՒՅԹԻ, ԵՐԻՏԱՍԱՐԴՈՒԹՅԱՆ ՀԱՐՑԵՐԻ ...

ՀԱՄԱՁԱՅՆԱԳԻՐ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՄՇԱԿՈՒՅԹԻ, ԵՐԻՏԱՍԱՐԴՈՒԹՅԱՆ ՀԱՐՑԵՐԻ ԵՎ ՍՊՈՐՏԻ ՆԱԽԱՐԱՐՈՒԹՅԱՆ ԵՎ ՉԻՆԱՍՏԱՆԻ ՀԱՆՐԱՊԵՏՈՒԹՅԱՆ ՍՊՈՐՏԻ ՊԵՏԱԿԱՆ ԳԼԽԱՎՈՐ ՎԱՐՉՈՒԹՅԱՆ ՄԻՋԵՎ ՍՊՈՐՏԱՅԻՆ ՀԱՄԱԳՈՐԾԱԿՑՈՒԹՅԱՆ ՄԱՍԻՆ

Հայաստանի Հանրապետության մշակույթի, երիտասարդության հարցերի և սպորտի նախարարությունը և Չինաստանի Հանրապետության սպորտի պետական գլխավոր վարչությունը (այսուհետ` Կողմեր) Հայաստանի ու Չինաստանի մարզիկների միջև համագործակցությունը և հետագա սպորտային փոխանակումները զարգացնելու, երկու ժողովուրդների միջև փոխըմբռնմանը նպաստելու նպատակով, փոխադարձ հարգանքի, հավասարության և փոխշահավետ սկզբունքների հիման վրա,

համաձայնեցին հետևյալի մասին.

ՀՈԴՎԱԾ 1

1. Երկու Կողմերը կխրախուսեն սպորտային ղեկավարների փոխանակումը` համատեղ քննարկելու երկկողմ փոխանակումները և համագործակցությունը սպորտի ասպարեզում և ընդհանուր խնդիրները` միջազգային սպորտի բնագավառում:

2. Կողմերը կխրախուսեն և կաջակցեն սպորտային կազմակերպությունների, սպորտային ընկերակցությունների, սպորտային գիտահետազոտական ինստիտուտների, ինչպես նաև ֆիզիկական կրթության համալսարանների և քոլեջների միջև փոխանակումները:

3. Կողմերը կխրախուսեն իրենց կազմակերպած սպորտային գիտահետազոտական սեմինարներին և սիմպոզիումներին միմյանց գիտնականների և ուսումնասիրողների մասնակցությունը:

4. Կողմերը կխրախուսեն իրենց սպորտային թիմերի մասնակցությունը երկու երկրներում անցկացվող միջազգային մրցումներին և սպորտային միջոցառումներին:

5. Երկկողմ սպորտային փոխանակումների ծրագիրը կորոշվի և կիրականացվի կողմերի համապատասխան սպորտային կազմակերպությունների, հաստատությունների կամ սպորտային միությունների կողմից` քննարկումների միջոցով:

6. Կողմերը կհամագործակցեն միջազգային սպորտի բնագավառում, և կփոխանակեն գաղափարներ ու տեսակետներ միջազգային սպորտի շարժման զարգացման վերաբերյալ:

ՀՈԴՎԱԾ 2

Կողմերը կխրախուսեն տեղեկություններին, ֆիզիկական կրթությանը, սպորտային գիտությանը, սպորտային բժշկությանը վերաբերող նյութերի փոխանակմանը և բարձրակարգ մարզիկների ու պահեստայինների մարզումները:

ՀՈԴՎԱԾ 3

1. Համաձայն երկկողմ փոխանակման, ուղարկող կողմը կհոգա միջազգային ճանապարհածախսը, իսկ ընդունող կողմը` կեցության, սննդի և տեղի տրանսպորտի, ինչպես նաև բուժական ծառայության ծախսերը վնասվածքի կամ հիվանդության դեպքում:

2. Կողմերի երկրներում կազմակերպված աշխարհի առաջնությունների, միջազգային մրցումների կամ հանդիպումների ֆինանսական պայմանները կիրականացվեն տվյալ միջոցառման կանոններին համապատասխան:

3. Մարզիչների և տեխնիկական աշխատողների փոխանակման ֆինանսական համապատասխան պայմանները կքննարկվեն և կորոշվեն Կողմերի միջև:

Սույն Համաձայնագիրը ուժի մեջ է մտնում դրա ուժի մեջ մտնելու համար անհրաժեշտ ներպետական ընթացակարգերն ավարտելու մասին Կողմերի կողմից միմյանց ծանուցելու պահից:

Սույն Համաձայնագիրը ուժի մեջ կմնա հինգ տարի ժամկետով և հաջորդաբար կերկարաձգվի ևս հինգ տարիներով, մինչ կողմերից մեկը երեք ամիս առաջ գրավոր չի ծանուցի Համաձայնագիրը դադարեցնելու իր ցանկության մասին:

Կատարված է Պեկին քաղաքում 2002 թվականի հոկտեմբերի 17-ին, երկու բնօրինակով, յուրաքանչյուրը` հայերեն, չինարեն և անգլերեն:

Տարաձայնության դեպքում գերակայությունը կտրվի անգլերեն տեքստին:

Համաձայնագիրն ուժի մեջ է մտել 2003 թվականի ապրիլի 10-ից: