ՀԱՄԱՁԱՅՆԱԳԻՐ ՀՀ ԿԱՌԱՎԱՐՈՒԹՅԱՆ ԵՎ ԹՈՒՐՔՄԵՆՍՏԱՆԻ ԿԱՌ ...

ՀԱՄԱՁԱՅՆԱԳԻՐ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ԹՈՒՐՔՄԵՆՍՏԱՆԻ ԿԱՌԱՎԱՐՈՒԹՅԱՆ ՄԻՋԵՎ ԻՐԱՎԱԿԱՆ ՏԵՂԵԿՈՒԹՅԱՆ ՓՈԽԱՆԱԿՄԱՆ ՄԱՍԻՆ

Հայաստանի Հանրապետության կառավարությունը և Թուրքմենստանի կառավարությունը, այսուհետ` Կողմեր,

համաձայնեցին ներքոհիշյալի մասին.

ՀՈԴՎԱԾ 1

Կողմերն ընդունում են հրապարակման համար բաց և նորմատիվ իրավական ակտերի թեմատիկ ցանկում /կցվում է/ նշված հարցերով տեղեկության երկկողմ փոխանակման անհրաժեշտությունը:

ՀՈԴՎԱԾ 2

Կողմերից յուրաքանչյուրը պարտավորվում է մյուս Կողմին տրամադրել իրավական ակտերի մասին պահանջվող տեղեկություն: Համագործակցության ընթացքում Կողմերից մեկի ստացած տեղեկությունը կարող է երրորդ կողմի տրամադրվել միայն այդ տեղեկությունը տրամադրած Կողմի համաձայնության դեպքում:

ՀՈԴՎԱԾ 3

Կողմերը, օգտագործելով ազգային տեղեկատվական պաշարները, իրավական տեղեկության փոխանակման համար կազմակերպում են անհրաժեշտ տվյալների սեփական չափանիշային կայաններ:

ՀՈԴՎԱԾ 4

Կողմերը, իրականացնելով իրավական տեղեկության փոխանակման համակարգի ստեղծման համաձայնեցված միջոցառումներ, համապատասխանաբար որոշում են.

այն լիազոր մարմինը (նախարարություն, կոմիտե, գերատեսչություն), որն իրականացնում է տվյալների ազգային չափանիշային կայանների ստեղծման և հաղորդակցման միջոցների զարգացման աշխատանքների համակարգումը` իրավական տեղեկության միջպետական փոխանակման համար,

տեղեկատվությունից օգտվող սուբյեկտների ցանկը,

տեղեկատվության իրավական կարգավիճակը, նորմատիվ կարգով սահմանված կանոնները, որոնք որոշում են տեղեկատվության բաց լինելու աստիճանը, փաստաթղթավորման, մատչելիության, պահպանման, տարածման և պաշտպանության կարգը:

ՀՈԴՎԱԾ 5

Կողմերը ապահովում են համատեղ օգտագործման համար սահմանված իրավական տեղեկատվության ազգային միջոցների (տվյալների չափանիշային կայանների) մատչելիությունը, դրանք ապահովում են այժմեական (հսկիչ) վիճակում և պատասխանատվություն են կրում տեղեկատվական տվյալների ու ծառայությունների ամբողջականության, հավաստիության և ժամանակին տրամադրելու համար:

ՀՈԴՎԱԾ 6

Կողմերը փոխադարձ պայմանավորվածությամբ իրավական տեղեկության փոխանակումներն իրականացնում են փաստաթղթերի էլեկտրոնային փոխանցման միջոցով` պահպանելով միջազգային ստանդարտներով բաց համակարգերի համար հաղորդակցությունների և փաթեթների կոմուտացիայի հաստատված ձևերը, կամ տեղեկությունը իրավական ակտերն օգտագործող սուբյեկտներին թղթակիրների վրա ռուսերենով տրամադրելու միջոցով:

ՀՈԴՎԱԾ 7

Կողմերն անհրաժեշտ են համարում.

տվյալների կայանները փոխանակելիս միմյանց տրամադրել Կողմերի ու նրանց հաստատությունների դասակարգիչները,

իրավական տեղեկության փոխանակում կատարել` օգտագործելով համակարգերի գործող` տեղեկատվական, հաղորդակցական միջոցների համակարգերը, ինչպես նաև գաղտնի կապի նոր ստեղծվող համակարգերը:

ՀՈԴՎԱԾ 8

Իրավական տեղեկության փոխանակումն իրականացվում է Համաձայնագրին մասնակցող Կողմերի օրենսդրությանը համապատասխան:

Կողմերը կքննարկեն իրենց տարածքներում գործող օրենսդրական ակտերի մերձեցման մասին հարցը:

ՀՈԴՎԱԾ 9

Սույն Համաձայնագիրը չի շոշափում այլ միջազգային պայմանագրերով Կողմերի իրավունքներն ու պարտականությունները:

ՀՈԴՎԱԾ 10

Սույն Համաձայնագիրը ուժի մեջ է մտնում Կողմերի կողմից անհրաժեշտ ներպետական ընթացակարգերը կատարվելու մասին ծանուցումների փոխանակման պահից:

Կողմերն իրավունք ունեն դուրս գալու սույն Համաձայնագրից: Սույն Համաձայնագրին մասնակցելուց Կողմի հրաժարվելը ուժի մեջ է մտնում հրաժարման մասին Կողմի գրավոր ծանուցումը փոխանցելուց վեց ամիս հետո:

Կողմերն իրավասու են փոփոխություններ և լրացումներ կատարել սույն Համաձայնագրում: Բոլոր փոփոխությունները և լրացումները ձևակերպվում են առանձին արձանագրություններով, որոնք հանդիսանում են սույն Համաձայնագրի անբաժանելի մասը:

Արձանագրություններն ուժի մեջ են մտնում սույն Համաձայնագրի ուժի մեջ մտնելու համար սահմանված կարգով:

Կատարված է Երևան քաղաքում 1996 թվականի մարտի 19-ին, երկու բնօրինակով, յուրաքանչյուրը` հայերեն և թուրքմեներեն:

Համաձայնագրի բոլոր տեքստերն էլ ունեն միատեսակ իրավաբանական ուժ:

Համաձայնագիրն ուժի մեջ է մտել 1996 թվականի օգոստոսի 30-ից:

Հավելված

«Հայաստանի Հանրապետության

կառավարության և Թուրքմենստանի

կառավարության միջև իրավական

տեղեկության փոխանակման մասին»

Համաձայնագրի

ՑԱՆԿ

միջպետական փոխանակման ենթակա նորմատիվ իրավական ակտերի

1. Պետական կարգի հիմունքներ

2. Քաղաքացիական իրավունք

3. Ամուսնություն և ընտանիք

4. Քաղաքացիական դատավարության օրենսդրություն

5. Արբիտրաժային դատավարություն

6. Աշխատանքի տեղավորում և բնակչության զբաղվածություն

7. Աշխատանք

8. Սոցիալական ապահովագրություն և սոցիալական ապահովություն

9. Ֆինանսներ և վարկ

10. Ժողովրդական տնտեսություն (ամբողջությամբ)

11. Ձեռնարկություններ և ձեռնարկատիրական գործունեություն

12. Արդյունաբերություն

13. Կապիտալ շինարարություն և հիմնանորոգում

14. Քաղաքաշինություն և ճարտարապետական համալիրներ

15. Գյուղատնտեսություն և ագրոարդյունաբերական համալիրներ

16. Առևտուր

17. Բնակարանային կոմունալ տնտեսություն և բնակչության կենցաղային

սպասարկում

18. Տրանսպորտ և կապ

19. Կրթություն

20. Գիտություն

21. Մշակույթ

22. Քաղաքացիների առողջության պահպանում

23. Բնակչության ֆիզիկական դաստիարակություն

24. Շրջակա բնական միջավայրի պահպանություն և բնական ռեսուրսների

ռացիոնալ օգտագործում (ամբողջությամբ)

25. Հողի մասին օրենսդրություն

26. Ընդերքի մասին օրենսդրություն

27. Անտառների պահպանություն և օգտագործում

28. Ջրերի պահպանություն և օգտագործում

29. Կենդանական աշխարհի պահպանություն և օգտագործում

30. Մթնոլորտային օդի պահպանություն

31. Երկրաբաշխություն և քարտեզագրություն

32. Հիդրոօդերևութաբանություն

33. Պետական ծառայություն

34. Պաշտպանություն

35. Պետական անվտանգություն

36. Մաքսային գործ

37. Հասարակական կարգի պահպանություն

38. Դատարան: Արդարադատություն: Դատախազություն

39. Քրեական օրենսդրություն

40. Քրեական դատավարության օրենսդրություն

41. ՈՒղղիչ աշխատանքային օրենսդրություն

42. Վարչական պատասխանատվություն

43. Արտաքին քաղաքականություն և միջազգային հարաբերություններ

44. Միջազգային մասնավոր իրավունք և դատավարություն

45. Արտաքին տնտեսական հարաբերություններ