ՀԱՄԱՁԱՅՆԱԳԻՐ ՀՀ ԿԱՌԱՎԱՐՈՒԹՅԱՆՆ ԱՌԸՆԹԵՐ ՖԻԶԻԿԱԿԱՆ Կ ...

ՀԱՄԱՁԱՅՆԱԳԻՐ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆՆ ԱՌԸՆԹԵՐ ՖԻԶԻԿԱԿԱՆ ԿՈՒԼՏՈՒՐԱՅԻ, ՍՊՈՐՏԻ ԵՎ ԵՐԻՏԱՍԱՐԴՈՒԹՅԱՆ ՀԱՐՑԵՐՈՎ ՎԱՐՉՈՒԹՅԱՆ ԵՎ ՈՒԿՐԱԻՆԱՅԻ ՍՊՈՐՏԻ ԵՎ ԵՐԻՏԱՍԱՐԴՈՒԹՅԱՆ ՀԱՐՑԵՐՈՎ ՆԱԽԱՐԱՐՈՒԹՅԱՆ ՄԻՋԵՎ ՍՊՈՐՏԻ ԵՎ ՖԻԶԻԿԱԿԱՆ ԿՈՒԼՏՈՒՐԱՅԻ ԲՆԱԳԱՎԱՌՈՒՄ ՀԱՄԱԳՈՐԾԱԿՑՈՒԹՅԱՆ ՄԱՍԻՆ

Հայաստանի Հանրապետության կառավարությանն առընթեր ֆիզիկական կուլտուրայի, սպորտի և երիտասարդության հարցերով վարչությունը և ՈՒկրաինայի սպորտի և երիտասարդության հարցերով նախարարությունը, այսուհետ` Կողմեր,

ղեկավարվելով`

երկու երկրների ժողովուրդների միջև սպորտային կապերի զարգացմամբ,

երկու երկրների բնակչության սպորտով զբաղվելու և առողջության ամրապնդման նպատակներով սպորտային սարքավորումների փոխօգտագործման համար պայմանների ստեղծմամբ,

հաստատելով իրենց նվիրվածությունը Օլիմպիական խարտիայի սկզբունքներին և նպատակներին,

ընդունեցին համագործակցության հետևյալ սկզբունքները.

ՀՈԴՎԱԾ 1

Կողմերը կնպաստեն սպորտի բնագավառում մասնագետների և ղեկավարների փոխադարձ հանդիպումների կազմակերպմանը` երկկողմ համագործակցության գծով խորհրդակցությունների անցկացման նպատակով:

Կողմերը սպորտային կապերի համաձայնեցման նպատակով կնպաստեն մարզական կազմակերպությունների և ֆեդերացիաների պատվիրակությունների, ղեկավարների փոխանակմանը, ինչպես նաև միջազգային մարզական և օլիմպիական շարժման հիմնախնդիրներին կապված փոխադարձ խորհրդակցությունների անցկացմանը:

Կողմերը կնպաստեն երկու երկրներում անցկացվող մրցումներին և միջազգային մարզական միջոցառումներին երկկողմանի մասնակցությանը:

Կողմերը կնպաստեն տարբեր մարզաձևերով սպորտային թիմերի և ակումբների փոխանակմանը` մարզական հավաքների, համատեղ մարզումների, ընկերական և խաղային հանդիպումների անցկացման նպատակով:

Կողմերը կմասնակցեն երկու երկրներում անցկացվող գիտական սեմինարներին, որոնք վերաբերում են սպորտի հարցերին:

Կողմերը փոխադարձ համաձայնությամբ կնպաստեն ցանկացած մարզաձևերից մարզիչների և մասնագետների փոխանակմանը:

ՀՈԴՎԱԾ 2

Կողմերը անհրաժեշտ միջոցներ կձեռնարկեն սպորտի, սպորտային գիտության և բժշկության բնագավառում ինֆորմացիայի, ինչպես նաև բարձրակարգ մարզիկների և սպորտային փոխարինողների պատրաստման ուղղությամբ ձեռք բերած փորձի փոխանակման համար:

Կողմերը կնպաստեն երկու երկրների սպորտային ակումբների, սարքավորումների պատրաստման կենտրոնների, ֆիզիկական դաստիարակության համակարգի աշխատողների փոխանակմանը, մարզչական, մանկավարժական և սպասարկող անձնակազմի պատրաստմանը:

Կողմերը անհրաժեշտ միջոցներ կձեռնարկեն գիտական աշխատությունների, ծրագրերի, ուսումնական մարզական գրքերի, ձեռնարկների, հրատարակությունների և ֆիլմերի փոխադարձ փոխանակումը, ինչպես նաև տարբեր մակարդակներով և բոլոր տարիքային խմբերում տարբեր սպորտաձևերի վերջին նվաճումների փոխանակումը, սպորտային կառույցների շինարարության և շահագործման, սպորտային գույքի և սարքավորումների, գիտական տեխնիկայի արտադրության բնագավառում տեղեկությունների փոխանակումն ապահովելու ուղղությամբ:

Կողմերը կնպաստեն իրենց բարձրագույն ուսումնական հաստատություններում տարբեր մարզաձևերի գծով մարզիչների, գիտամանկավարժական կադրերի դասախոսների պատրաստմանը և վերապատրաստմանը:

ՀՈԴՎԱԾ 3

Կողմերը անհրաժեշտ միջոցներ կձեռնարկեն սպորտային համազգեստի, գույքի և սարքավորումների ձեռք բերման հարցում միմյանց կարիքները բավարարելու համար և կնպաստեն սպորտային ապրանքներ, գույք, սարքավորումներ արտադրող և թողարկող համատեղ ձեռնարկությունների ստեղծմանը և դրանց իրացմանը, կհամագործակցեն սպորտային շինությունների շինարարության և վերակառուցման գործում:

ՀՈԴՎԱԾ 4

Կողմերը կարծիքներ և առաջարկություններ կփոխանակեն, ինչպես նաև կհամակարգեն իրենց գործունեությունը միջազգային օլիմպիական և մարզական շարժման հարցերում:

ՀՈԴՎԱԾ 5

Կողմերը որոշեցին, որ սույն Համաձայնագրի հոդվածներում շարադրված` երկու պետությունների միջև մարզական համագործակցության ձևերը կիրականացվեն երկու պետությունների համար փոխընդունելի պայմաններով:

Երկիրը, որը գործուղում է մարզական պատվիրակություններին, թիմերին, մարզիչներին, գիտնականներին, մասնագետներին, առանձին մարզիկներին և այլ անձանց, վճարում է նրանց` մինչև ընդունող պետության մայրաքաղաքը և հետադարձի ճանապարհածախսը:

Ընդունող կողմը իր վրա է վերցնում ժամանման հետ կապված ծախսերը (տեղավորումը, պետության տարածքով մինչև մրցույթների վայր տեղափոխումը, անհրաժեշտ բժշկական սպասարկումը, սնունդը, անհրաժեշտության դեպքում` թարգմանիչների ծառայությունները):

Կողմերը պայմանավորվեցին, որ սպորտային թիմերի, մարզիկների, գիտնական-մասնագետների, առանձին մարզիկների և այլ անձանց գործուղումը և ժամանումը պետություն` ծրագրով նախատեսված օրերից ավելի լինելու դեպքում, պետք է յուրաքանչյուր կոնկրետ դեպքում համաձայնեցվեն երկու պետությունների համապատասխան ֆեդերացիաների և այլ սպորտային կազմակերպությունների միջև:

ՀՈԴՎԱԾ 6

Սույն Համաձայնագիրը չի շոշափում պայմանավորվող Կողմերի պարտավորությունները երկրորդ երկրի նկատմամբ, չի բացառում մարզական համագործակցության այլ փոխադարձ ընդունելի ձևերը ֆիզիկական կուլտուրայի և սպորտի բնագավառում: Կողմերի համաձայնությամբ կարող են ձևակերպվել լրացուցիչ արձանագրություններ և համաձայնագրեր, որոնցում հստակեցվում են փոխհամագործակցության այլ ձևերը:

ՀՈԴՎԱԾ 7

Սույն Համաձայնագիրը ուժի մեջ է մտնում ստորագրման օրվանից և ուժի մեջ կմնա այնքան ժամանակ, մինչև Կողմերից մեկը վեց ամիս առաջ գրավոր կտեղեկացնի մյուս Կողմին սույն Համաձայնագրի գործողությունը դադարեցնելու իր մտադրության մասին:

Կատարված է Սանկտ Պետերբուրգ քաղաքում 1993 թվականի հոկտեմբերի 26-ին, երկու բնօրինակով, յուրաքանչյուրը` հայերեն, ուկրաիներեն և ռուսերեն, ընդ որում բոլոր տեքստերը հավասարազոր են:

Համաձայնագիրը ուժի մեջ է մտել 1993 թվականի հոկտեմբերի 26-ից: