(ուժը կորցրել է 26.04.05 թիվ 192-ն որոշում)
i
050.0046.190202
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ
ՈՐՈՇՈՒՄ
19 փետրվարի 2002 թվականի թիվ 46
i
«ԻՐԱՎԱԲԱՆԱԿԱՆ ԱՆՁԱՆՑ ԿԱՌԱՎԱՐՄԱՆ ՄԱՐՄԻՆՆԵՐԻ ՈՐՈՇՈՒՄՆԵՐԸ ԿԱՆԽՈՐՈՇԵԼՈՒ ԿԱՄ ՈՐՈՇՈՒՄՆԵՐԻ ՎՐԱ ԷԱՊԵՍ ԱԶԴԵԼՈՒ ՀՆԱՐԱՎՈՐՈՒԹՅՈՒՆ ՈՒՆԵՑՈՂ ԱՆՁԱՆՑ ԲԱՑԱՀԱՅՏՄԱՆ ՄԵԹՈԴԱԿԱՆ ՈՒՂԵՑՈՒՅՑԸ» ՀԱՍՏԱՏԵԼՈՒ ՄԱՍԻՆ
Հիմք ընդունելով «Բանկերի և բանկային գործունեության մասին» Հայաստանի Հանրապետության օրենքի 9-րդ հոդվածի 2-րդ մասը, ղեկավարվելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ հոդվածով` Հայաստանի Հանրապետության կենտրոնական բանկի խորհուրդը
Որոշում է.
1. Հաստատել «Իրավաբանական անձանց կառավարման մարմինների որոշումները կանխորոշելու կամ որոշումների վրա էապես ազդելու հնարավորություն ունեցող անձանց բացահայտման մեթոդական ուղեցույցը» (կցվում է):
2. Սահմանել, որ սույն որոշման 1-ին կետով հաստատված մեթոդական ուղեցույցը Հայաստանի Հանրապետության կենտրոնական բանկի կողմից ընդունված նորմատիվ իրավական ակտ չէ:
3. Սույն որոշումն ուժի մեջ է ընդունման պահից:
Հաստատված է
Հայաստանի Հանրապետության
կենտրոնական բանկի խորհրդի
2002 թվականի փետրվարի 19-ի
թիվ 46 որոշմամբ
ԻՐԱՎԱԲԱՆԱԿԱՆ ԱՆՁԱՆՑ ԿԱՌԱՎԱՐՄԱՆ ՄԱՐՄԻՆՆԵՐԻ ՈՐՈՇՈՒՄՆԵՐԸ ԿԱՆԽՈՐՈՇԵԼՈՒ ԿԱՄ ՈՐՈՇՈՒՄՆԵՐԻ ՎՐԱ ԷԱՊԵՍ ԱԶԴԵԼՈՒ ՀՆԱՐԱՎՈՐՈՒԹՅՈՒՆ ՈՒՆԵՑՈՂ ԱՆՁԱՆՑ ԲԱՑԱՀԱՅՏՄԱՆ ՄԵԹՈԴԱԿԱՆ ՈԻՂԵՑՈՒՅՑ
Սույն մեթոդական ուղեցույցի նպատակն է` օժանդակել Հայաստանի Հանրապետության տարածքում գործող բանկերին, օտարերկրյա բանկերի մասնաճյուղերին (այսուհետև` բանկեր) և Հայաստանի Հանրապետության կենտրոնական բանկի աշխատակիցներին բացահայտել իրավաբանական անձանց կառավարման մարմինների որոշումները կանխորոշելու կամ որոշումների վրա էապես ազդելու հնարավորություն ունեցող անձանց` նշանակալից մասնակցությունը ուսումնասիրելու ժամանակ:
1. Համաձայն «Բանկերի և բանկային գործունեության մասին» Հայաստանի Հանրապետության օրենքի 9-րդ հոդվածի 2-րդ մասի` նշված օրենքի և բանկերի գործունեությունը կարգավորող այլ օրենքների իմաստով` նշանակալից մասնակցություն ունեցող է նաև այն անձը, որը հնարավորություն ունի կանխորոշել տվյալ իրավաբանական անձի կառավարման մարմինների որոշումները կամ էապես ազդել նրանց որոշումների կայացման կամ կիրառման վրա, կամ կանխորոշել տվյալ իրավաբանական անձի գործունեության ուղղությունները, ոլորտները` տվյալ բանկի նկատմամբ իր ունեցած պահանջի իրավունքի ուժով:
2. Հաշվի առնելով, որ օրենսդիրը նշանակալից մասնակցություն է համարում ոչ միայն իրավաբանական անձի կանոնադրական կապիտալում ուղղակի մասնակցությունը, այլև իրավաբանական անձի կառավարման մարմինների որոշումները կանխորոշելու կամ որոշումների վրա էապես ազդելու` անձանց հնարավորությունները (այսուհետև` անուղղակի նշանակալից մասնակցություն), սույն մեթոդական ուղեցույցի 3-րդ կետը նշում է այն հարաբերությունները, որոնք կարող են առաջացնել անուղղակի նշանակալից մասնակցություն:
3. Անուղղակի նշանակալից մասնակցություն կարող է առաջացնել`
- այն դեպքը, երբ երրորդ անձը հնարավորություն ունի կանխորոշել տվյալ իրավաբանական անձի որոշումները` իրենց միջև կնքված պայմանագրի ուժով (դուստր տնտեսական ընկերություն).
- իրավաբանական անձի և երրորդ անձի միջև կնքված համալիր ձեռնարկատիրական գործունեության թույլտվության (ֆրանչայզինգ) այն պայմանագիրը, որով իրավաբանական անձը հանդես է գալիս որպես օգտագործող.
- իրավաբանական անձի և այլ անձանց միջև կնքված` առանց իրավաբանական անձ կազմավորելու համատեղ գործունեության այն պայմանագիրը, որով տվյալ իրավաբանական անձը իր գույքի գերակշռող մասը ներդրել է ընդհանուր գործում.
- իրավաբանական անձի և երրորդ անձի միջև կնքված այն վարկային կամ փոխառության պայմանագիրը (մուրհակը, պարտավորագիրը, պարտատոմսը կամ այլ պարտավորական արժեթուղթը), որի միջոցով ձևավորվել է տվյալ իրավաբանական անձի ակտիվների գերակշռող մասը, կամ որի միջոցով փոխատուն փոխառուին է տրամադրել իր ակտիվների գերակշռող մասը.
- իրավաբանական անձի և երրորդ անձի միջև կնքված ծառայությունների մատուցման, կապալի, հանձնարարության, կոմիսիայի կամ գործակալության այն պայմանագիրը, որով տվյալ իրավաբանական անձը պարտավորվել է որպես կատարող, կապալառու, հանձնակատար, կոմիսիոներ կամ գործակալ մատուցել որոշակի ծառայություններ կամ կատարել որոշակի աշխատանքներ, կամ կատարել որոշակի իրավաբանական ու այլ գործողություններ, կամ կնքել մեկ կամ մի քանի գործարքներ, և որոնց միջոցով տվյալ իրավաբանական անձը ձևավորում է իր տարեկան եկամուտների գերակշռող մասը.
- իրավաբանական անձի և երրորդ անձի միջև կնքված գույքի անհատույց օգտագործման այն պայմանագիրը, որով տվյալ իրավաբանական անձը (փոխառուն) մեկ տարուց ավելի ժամկետով անհատույց օգտագործման իրավունքով օգտագործում է փոխատուի գույքը, և այդ գույքի արժեքը գերազանցում է փոխառուի ակտիվների գերակշիռ մասը: Սույն դրույթը կիրառվում է նաև գույքի վարձակալության և ֆինանսական վարձակալության (լիզինգ) պայմանագրերի վրա.
- իրավաբանական անձի և երրորդ անձի միջև կնքված այն պայմանագիրը, որով երրորդ անձը տվյալ իրավաբանական անձի հիմնական մատակարարն է, կամ երրորդ անձը իր կողմից մատակարարվող ապրանքների գերակշռող մասը մատակարարում է տվյալ իրավաբանական անձին: Սույն դրույթի իմաստով` հիմնական մատակարար է համարվում այն մատակարարը, որը մատակարարում է տվյալ իրավաբանական անձի կողմից ձեռք բերվող ապրանքների գերակշռող մասը.
- այն դեպքը, երբ իրավաբանական անձի գույքի գերակշռող մասը ընդհանուր սեփականության առարկա է (բաժնային կամ համատեղ).
- այն դեպքը, երբ իրավաբանական անձի գույքի գերակշռող մասը առաջնային գրավի իրավունքով գրավադրված է երրորդ անձի մոտ:
4. Սույն ուղեցույցի իմաստով` «գերակշռող» բառը նշանակում է հիսուն տոկոսը գերազանցող.
5. Սույն մեթոդական ուղեցույցում նշված դեպքերը սպառիչ չեն և չեն կարող համարվել որպես անուղղակի նշանակալից մասնակցություն առաջացնող միակ դեպքեր:
6. Սույն մեթոդական ուղեցույցում նախատեսված դեպքերն ունեն բացառապես ուղեցուցային նշանակություն և չեն կարող մեկնաբանվել որպես անուղղակի նշանակալից մասնակցություն ապահովող պարտադիր հիմքեր: