(ուժը կորցրել է 01.05.2022 թվականից` 23.02.2022 թիվ 218-Ա որոշում)
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
12 մարտի 2020 թվականի N 296-Ա
ԳՆՄԱՆ ԳՈՐԾԸՆԹԱՑՆԵՐԸ ՍԱՀՄԱՆԵԼՈՒ ՄԱՍԻՆ
Հիմք ընդունելով Հայաստանի Հանրապետության 2017 թվականի մայիսի 4-ի N 526-Ն որոշմամբ հաստատված կարգի 3-րդ կետը` Հայաստանի Հանրապետության կառավարությունը որոշում է.
1. Սահմանել, որ`
i
1) Հայաստանի Հանրապետությունում կորոնավիրուսային վարակի (COVID-19) կանխարգելման, վերահսկման, բուժման և այլ համալիր միջոցառումների շրջանակում պետական կառավարման մարմինների, մարզպետարանների և Երևանի քաղաքապետարանի, ինչպես նաև Հայաստանի Հանրապետության առողջապահության նախարարության ենթակայության պետական ոչ առևտրային և հիսուն տոկոսից ավելի բաժնեմաս ունեցող կազմակերպությունների, բժշկական օգնության և սպասարկման ծառայություններ մատուցող կազմակերպությունների (այսուհետ` պատվիրատուներ) կողմից Հայաստանի Հանրապետության կառավարության 2017 թվականի մայիսի 4-ի N 526-Ն որոշմամբ հաստատված կարգի 23-րդ կետի 5-րդ ենթակետի «ա» պարբերության հիման վրա մեկ անձից գնման ձևով իրականացվող ապրանքների, աշխատանքների և ծառայությունների ձեռքբերման դեպքերում կարող են չկիրառվել ինչպես նույն պարբերությամբ սահմանված` գնման առարկայի ամբողջ ծավալով ձեռքբերման ժամկետային սահմանափակման (երեսուն օրացուցային օր), այնպես էլ Հայաստանի Հանրապետության 2017 թվականի ապրիլի 6-ի N 386-Ն որոշման 2-րդ կետի 1-ին ենթակետի և Հայաստանի Հանրապետության կառավարության 2017 թվականի մայիսի 4-ի N 526-Ն որոշման N 1 հավելվածի 21-րդ կետի պահանջները.
2) սույն կետի 1-ին ենթակետում նշված գործարքները կարող են կատարվել կամ գրավոր պայմանագրերի կամ հաշիվ ապրանքագրերի հիման վրա: Սույն կետով նախատեսված գործարքների դիմաց վճարումները կարող են կատարվել նաև Հայաստանի Հանրապետության կառավարության 2018 թվականի հունիսի 15-ի N 706-Ն որոշմամբ հաստատված կարգի 58-րդ կետով նախատեսված կարգով` Հայաստանի Հանրապետության կառավարության կողմից սահմանված չափաքանակների հիման վրա բանկային վճարային քարտերով շրջանառվող միջոցներից վճարումներ կատարելու ձևով, պատվիրատուները տվյալ գործարքը հնարավորություն չեն ունեցել կատարել Հայաստանի Հանրապետության օրենսդրությամբ տվյալ ծախսը հիմնավորող փաստաթղթերի հիման վրա:
(1-ին կետը փոփ. 27.08.2020 թիվ 1434-Ա /որոշման գործողությունը տարածվում է 2020 թվականի հունվարի 25-ից ծագած հարաբերությունների վրա/,
11.11.2021 թիվ 1849-Ա որոշումներ)
i
2. Պատվիրատուներին` սույն որոշման 1-ին կետում նշված միջոցառումներն իրականացնելուց հետո Հայաստանի Հանրապետության առողջապահության նախարարություն ներկայացնել իրականացված փաստացի ծախսերի վերաբերյալ հաշվետվություն:
(2-րդ կետը փոփ. 27.08.2020 թիվ 1434-Ա /որոշման գործողությունը տարածվում է 2020 թվականի հունվարի 25-ից ծագած հարաբերությունների վրա/ որոշում)
i
3. (3-րդ կետն ուժը կորցրել է 27.08.2020 թիվ 1434-Ա /որոշման գործողությունը տարածվում է 2020 թվականի հունվարի 25-ից ծագած հարաբերությունների վրա/ որոշում)
4. Հայաստանի Հանրապետության առողջապահության նախարարին` պետական կառավարման մարմիններից և Երևանի քաղաքապետարանի կողմից հաշվետվությունները ստանալուց, ամփոփելուց հետո ներկայացնել Հայաստանի Հանրապետության կառավարության որոշման նախագիծ` Հայաստանի Հանրապետության կառավարության պահուստային ֆոնդից վերաբաշխում կատարելու և սույն որոշման 1-ին կետում նշված մարմիններին գումար հատկացնելու մասին:
5. Առաջարկել պետության կողմից երաշխավորված անվճար և արտոնյալ պայմաններով բժշկական օգնություն և սպասարկում իրականացնող կազմակերպությունների ղեկավարներին` ապահովել կորոնավիրուսային վարակի հետ կապված կարանտինի և բժշկական հսկողության ներքո գտնվող անձանց անաշխատունակության թերթիկների տրամադրումը:
6. Սահմանել, որ սույն որոշման պահանջները տարածվում են 2020 թվականի հունվարի 25-ից ծագած գործարքների վրա:
Հայաստանի Հանրապետության
վարչապետ Ն. Փաշինյան
2020 թ. մարտի
Երևան