ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՆԻՍՏԻ
ԱՐՁԱՆԱԳՐՈՒԹՅՈՒՆԻՑ ՔԱՂՎԱԾՔ
7 մարտի 2012 թվականի N 9
29. ԵՐԵՎԱՆ ՔԱՂԱՔՈՒՄ ԱՎՏՈՄԱՅՐՈՒՂԻ ԿԱՌՈՒՑԵԼՈՒ ՆԵՐԴՐՈՒՄԱՅԻՆ ԾՐԱԳՐԻՆ ՀԱՎԱՆՈՒԹՅՈՒՆ ՏԱԼՈՒ ՄԱՍԻՆ
Հավանություն տալ Երևան քաղաքում ավտոմայրուղի կառուցելու ներդրումային ծրագրին` համաձայն հավելվածի:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ 2012 ԹՎԱԿԱՆԻ ՄԱՐՏԻ 15-ԻՆ
Հավելված
ՀՀ կառավարության
2012 թվականի մարտի 7-ի նիստի
N 9 արձանագրային որոշման
ԵՐԵՎԱՆ ՔԱՂԱՔՈՒՄ ԱՎՏՈՄԱՅՐՈՒՂԻ ԿԱՌՈՒՑԵԼՈՒ ՆԵՐԴՐՈՒՄԱՅԻՆ ԾՐԱԳԻՐԸ
Հայաստանի Հանրապետության կառավարության 2005 թվականի դեկտեմբերի 15-ի N 2330-Ն որոշմամբ հաստատված Երևան քաղաքի 2005-2020 թթ. գլխավոր հատակագծի համաձայն` նախատեսված է Երևան քաղաքի օղակաձև արագընթաց մայրուղու (անընդհատ երթևեկության համաքաղաքային նշանակության մայրուղի) բաղկացուցիչ մաս կազմող Ծովակալ Իսակովի պողոտան Լենինգրադյան փողոցին կապող ավտոմայրուղու կառուցում: Մայրուղու կառուցումը նպատակ ունի թեթևացնել երթևեկության հոսքերը դեպի քաղաքի կենտրոնական հատվածը: Արդյունքում` զգալիորեն կթեթևանա նաև Ծիծեռնակաբերդի խճուղու երթևեկությունը:
Նախագծով նախատեսվում է երկու տրանսպորտային հանգույցների մասնակի լուծում` Ծովակալ Իսակովի պողոտայի և Լենինգրադյան փողոցի հետ հատումներում: Ծովակալ Իսակովի պողոտայի հատվածի տրանսպորտային հանգույցը հետագայում կզարգանա (2-րդ փուլ)` մայրուղու շարունակություն նախատեսող «Երևան Բերդ» նախագծային թաղամասի եզրով և Հրազդանի գետի վրայով` ապահովելով դեպի Արշակունյաց պողոտա: Լենինգրադյան փողոցի հետ միացման հանգույցը հետագայում նույնպես կզարգանա` այն Տիչինայի փողոցի շարունակությամբ միանալով Սեբաստիա փողոցի հետ (ավելի մանրամասն տես «Երևաննախագիծ» ՓԲԸ-ի կողմից կազմված նախագծի բացատրագիրը): Մայրուղուն զուգահեռ նախատեսվում է ջրատարի, հեղեղային և կենցաղային կոյուղու, գազատարի և արտաքին լուսավորության, կապի ստորգետնյա մագիստրալ հաղորդակցուղիներ:
Ներկայումս «Երևաննախագիծ» ՓԲԸ-ի կողմից կազմվել է նշված ավտոմայրուղու տեխնիկական նախագիծը (տես «Երևաննախագիծ» ՓԲԸ-ի կողմից կազմված ծրագիրը` տեխնիկական ցուցանիշները, շինարարության և նախագծային աշխատանքների խոշորացված հաշվարկը):
Ավտոմայրուղին անցնում է Դալմայի այգիների անտառային ֆոնդի հողերի սահմանով Ծիծեռնակաբերդի խճուղուց դեպի հարավ-արևմուտք ընկած տարածքով: Ավտոմայրուղու կառուցման արդյունքում նշված տարածքում առաջանում է 9.16 հա ազատ հողամաս, որը գտնվում է Մալաթիա-Սեբաստիա վարչական շրջանում, անմիջապես Կենտրոն վարչական շրջանի սահմանին հարակից:
Երևան քաղաքի գլխավոր հատակագծի համաձայն` նշված տարածքն ընդգրկված է նախագծային ավտոմայրուղու բուֆերային (անցումային) հատվածում:
Նշված հողամասը ներդրումային հետաքրքրություն է ներկայացնում բնակելի և հասարակական կառուցապատման նպատակով:
Այդ կապակցությամբ Երևանի քաղաքապետարանին ներդրումային ծրագիր է առաջարկվել «Սահակյանշին» ՓԲԸ-ի կողմից:
Ծրագրով առաջարկվում է հետևյալը.
(նախաբանը փոփ. 19.09.13 թիվ 37 արձանագրային որոշում)
1. «Սահակյանշին» ՓԲԸ-ն սեփական ուժերով և միջոցներով իրականացնում է Երևան քաղաքի Ծովակալ Իսակովի պողոտայի և Լենինգրադյան փողոցի միջև 2,9 կմ երկարությամբ ավտոմայրուղու և շուրջ 2,3 կմ ուղետարների կառուցման շինարարությունը, ինչպես նաև վճարում այդ քաղաքաշինական օբյեկտի նախագծանախահաշվային փաստաթղթերի կազմման, տեխնիկական և հեղինակային հսկողության ծառայությունների արժեքները (ըստ «Երևաննախագիծ» ՓԲԸ-ի կողմից կազմված և փորձաքննություն անցած աշխատանքային նախագծի` ավտոմայրուղու շինարարության նախահաշվային ընդհանուր արժեքը կազմում է 7896,0 մլն ՀՀ դրամ):
Ավտոմայրուղու կառուցման հիմնական ցուցանիշներն են`
- նախագծվող ճանապարհի նշանակությունը` համաքաղաքային նշանակության
մայրուղի,
- ավտոմայրուղու երկարությունը` 2,9 կմ,
- ուղետարների/ուղեանցների/երկարությունը` շուրջ 2,3 կմ
- հողային պաստառի լայնությունը` 35,5,0 մ,
- երթևեկելի մասի լայնությունը` (2 x 3,75) x 2=15,0 մ,
- բաժանիչ գոտու լայնությունը` 4,0 մ,
մայթերի լայնությունը` 2.25 x 2,5 մ,
- տեղական նշանակության փողոց` լայն. 6,0 մ,
- Ծովակալ Իսակովի պողոտայի հատվածում տրանսպորտային հանգույց,
- Լենինգրադյան փողոցի հատվածում տրանսպորտային հանգույց,
- Ինժեներական ստորգետնյա անհրաժեշտ հաղորդակցուղիներ` մայրուղուն
զուգահեռ առանձնացված շերտով` լայն. 6,0 մետր,
ջրատար,
հեղեղային և կենցաղային կոյուղի,
արտաքին լուսավորություն,
կապի ստորգետնյա մագիստրալ հաղորդակցուղիներ:
Ինժեներական հաղորդակցուղիների մասով աշխատանքները նախատեսվում են միայն Իսակով-Լենինգրադյան ներհրապարակային տարածքում, կապի մասով` անցուղիները, էլեկտրամատակարարման մասով` արտաքին լուսավորությունը և ուղեգիծը: Տեղական նշանակության ավտոճանապարհի հատվածում նախատեսել անհրաժեշտ պահուստային անցումներ: Տեխնիկական լուծումները կհստակեցվեն հաղորդակցուղիները շահագործող կազմակերպությունների հետ նախագծային համապատասխան փուլերում:
(1-ին կետը փոփ. 19.09.13 թիվ 37 արձանագրային որոշում)
2. Երևանի համայնքի և «Սահակյանշին» ՓԲԸ-ի բանակցությունների արդյունքում համաձայնություն է ձեռք բերվել 1-ին կետում նշված աշխատանքները և ծառայությունները «Սահակյանշին» ՓԲԸ-ի կողմից 6,409.3 մլն դրամով իրականացնելու հարցում: 1-ին կետում նշված աշխատանքների իրականացման և ծառայությունների բանակցված արժեքի` 6,409.3 մլն դրամ, դիմաց Երևանի համայնքը կազմակերպությանն ուղղակի վաճառքի ձևով հատկացնում է նշված ճանապարհին կից առաջացող 9,16 հա մակերեսով հողամասը, որի գինը սահմանվելու է մեկ քառ. մետրի շուկայական արժեքը մոտավորապես 70,0 հազ. ՀՀ դրամ հաշվարկով:
(2-րդ կետը փոփ. 19.09.13 թիվ 37 արձանագրային որոշում)
3. Արդյունքում, իհարկե որոշակի ռիսկ վերցնելով կազմակերպության վրա, վերջինս ձեռք է բերում որոշակի հողատարածք, որի սահմաններում կարող է իրականացվել կառուցապատման ծրագիր հետևյալ ցուցանիշներով`
- կառուցապատման նշանակությունը` բնակելի և հասարակական,
- կառուցապատման տոկոսը` 25-40%,
- կառուցապատման մակերեսը` 10000 քառ.մ-30000 քառ.մ,
- կառույցների միջին հարկայնությունը` 10 հարկ,
- նախատեսվող շինարարության
ընդհանուր ծավալը` 100000 քառ.մ-300000 քառ.մ,
- ծրագրի իրականացման ժամկետը` 15-20 տարի,
- Դրանց շինարարության արժեքը ըստ խոշորացված հաշվարկների կկազմի
նվազագույնը 32 725,0 մլն ՀՀ դրամ, որը հաշվարկման պահին համարժեք է
85,0 մլն ԱՄՆ դոլարին, 1 քառ.մետրի կառուցապատման արժեքը կազմում է
327 250 ՀՀ դրամ, որը հաշվարկման պահին համարժեք է 850 ԱՄՆ դոլարին:
Կառուցապատման հարկայնությունը կհստակեցվի նախագծման փուլում` ելնելով կառուցապատման քաղաքաշինական և ճարտարապետական կոմպոզիցիայի առանձնահատկություններից:
Այս գումարի ներդրումը ընկերությունը կարող է իրականացնել`
1) սեփական ուժերով` վարկային միջոցներ ներգրավելու արդյունքում,
2) այլ ներդրողների գումարներ ներգրավելու միջոցով,
3) հողատարածքների որոշակի մասը վաճառելուց առաջացած միջոցներով` պայմանով, որ գնորդն իրականացնի ծրագրով նախատեսված կառուցապատումը:
Ծրագրում բերված ցուցանիշները վերջնական կհստակեցվեն անհրաժեշտ տվյալների ճշտման, ինժեներական հաղորդակցուղիների տեխնիկական պայմանների տրամադրման և աշխատանքային նախագծերի մշակման արդյունքում:
(3-րդ կետը փոփ. 19.09.13 թիվ 37, 13.04.17 թիվ 15 արձանագրային որոշումներ)
4. Ծրագիրը լիակատար իրականացնելու համար անհրաժեշտ է ծրագրի իրականացումը կարգավորող իրավական ակտերում նախատեսել հետևյալ պայմանները.
1) անհրաժեշտության դեպքում փոխել Երևան քաղաքի գլխավոր հատակագծով նախատեսված հողերի նպատակային և գործառնական նշանակությունը:
2) Երևանի քաղաքապետարանի կողմից հողամասի առուվաճառքի և գրավի պայմանագիրը կնքվելուց հետո քաղաքապետարանը տրամադրում է այդ հողամասի ճարտարապետահատակագծային առաջադրանքները, ինժեներական հաղորդակցուղիների թույլտվությունները և տեխնիկական պայմանները:
(4-րդ կետը փոփ. 19.09.13 թիվ 37 արձանագրային որոշում)
4.3. Ավտոմայրուղու շինարարության ավարտման ժամկետ սահմանել 2014 թվականի մայիսի 31-ը:
(4.3-րդ կետը փոփ. 19.09.13 թիվ 37, 10.04.14 թիվ 14 արձանագրային որոշումներ)