ՈՒՍՈՒՄՆԱԿԱՆ ՀԱՍՏԱՏՈՒԹՅԱՆ ՍՈՎՈՐՈՂՆԵՐԻ ԿՈՂՄԻՑ ԿՐԹԱԿԱ ...

(ուժը կորցրել է 22.04.11 թիվ 391-Ն հրաման)

110.0193.260410

ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ

                                      «26»        04            2010 Թ.

                                        ՊԵՏԱԿԱՆ ԳՐԱՆՑՄԱՆ ԹԻՎ 11010174

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐ ՀՐԱՄԱՆ

10 ապրիլի 2010 թվականի N 193-Ն

ՈՒՍՈՒՄՆԱԿԱՆ ՀԱՍՏԱՏՈՒԹՅԱՆ ՍՈՎՈՐՈՂՆԵՐԻ ԿՈՂՄԻՑ ԿՐԹԱԿԱՆ ԾՐԱԳՐԵՐԻ ՅՈՒՐԱՑՄԱՆ ԱՄՓՈՓԻՉ ՍՏՈՒԳՄԱՆ ԿԱՄ ԱՏԵՍՏԱՎՈՐՄԱՆ ԱՆՑԿԱՑՄԱՆ, ՍՈՎՈՐՈՂՆԵՐԻ ՓՈԽԱԴՐՄԱՆ ԵՎ ԱՎԱՐՏՄԱՆ ԿԱՐԳԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐԻ 2009 ԹՎԱԿԱՆԻ ՄԱՅԻՍԻ 4-Ի N 404-Ն ՀՐԱՄԱՆՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

Հիմք ընդունելով «Կրթության մասին» ՀՀ օրենքի 37-րդ հոդվածի 10-րդ մասը, «Հանրակրթության մասին» ՀՀ օրենքի 30-րդ հոդվածի 1-ին մասի 15-րդ ենթակետը, «Իրավական ակտերի մասին» ՀՀ օրենքի 72-րդ հոդվածը, ՀՀ կառավարության 2002 թ. սեպտեմբերի 12-ի N 1579-Ն որոշմամբ հաստատված «Հայաստանի Հանրապետության կրթության և գիտության նախարարության կանոնադրության» 10-րդ կետի «ժէ», «ժթ» ենթակետերը`

ՀՐԱՄԱՅՈՒՄ ԵՄ`

1. Հաստատել «ՈՒսումնական հաստատության սովորողների կողմից կրթական ծրագրերի յուրացման ամփոփիչ ստուգման կամ ատեստավորման անցկացման, սովորողի փոխադրման և ավարտման կարգը»` համաձայն հավելվածի:

2. ՈՒժը կորցրած ճանաչել Հայաստանի Հանրապետության կրթության և գիտության նախարարի 2009 թվականի մայիսի 4-ի «Հանրակրթական ուսումնական հաստատություններում սովորողների փոխադրական և ամփոփիչ ստուգման կազմակերպման կարգը հաստատելու և Հայաստանի Հանրապետության կրթության և գիտության նախարարի 2008 թվականի ապրիլի 8-ի N 207-Ն հրամանն ուժը կորցրած ճանաչելու մասին» N 404-Ն հրամանը:

3. Նախարարության աշխատակազմի հանրակրթության վարչությանը /պետ` Ն. Հովհաննիսյան/ և օրենսդրության իրավաբանական վարչությանը /պետ` Մ. Գրիգորյան/ սույն հրամանը սահմանված կարգով ներկայացնել ՀՀ արդարադատության նախարարություն` պետական գրանցման:

4. Հրամանի կատարման հսկողությունը վերապահել նախարարի տեղակալ Մ. Մկրտչյանին:

Հավելված

ՀՀ կրթության և գիտության

նախարարի

2010 թվականի ապրիլի 10-ի

N 193-Ն հրամանի

ԿԱՐԳ

ՈՒՍՈՒՄՆԱԿԱՆ ՀԱՍՏԱՏՈՒԹՅԱՆ ՍՈՎՈՐՈՂՆԵՐԻ ԿՈՂՄԻՑ ԿՐԹԱԿԱՆ ԾՐԱԳՐԵՐԻ ՅՈՒՐԱՑՄԱՆ ԱՄՓՈՓԻՉ ՍՏՈՒԳՄԱՆ ԿԱՄ ԱՏԵՍՏԱՎՈՐՄԱՆ ԱՆՑԿԱՑՄԱՆ, ՍՈՎՈՐՈՂՆԵՐԻ ՓՈԽԱԴՐՄԱՆ ԵՎ ԱՎԱՐՏՄԱՆ

ԳԼՈՒԽ I
ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում են հանրակրթական ուսումնական հաստատություններում սովորողների փոխադրական և ամփոփիչ ստուգման կազմակերպման, ինչպես նաև մեդալի հավակնորդ շրջանավարտներին մեդալով պարգևատրելու գործընթացի կազմակերպման հետ կապված հարաբերությունները:

ԳԼՈՒԽ II
ՍՈՎՈՐՈՂԻ ՓՈԽԱԴՐՈՒՄԸ ԴԱՍԱՐԱՆԻՑ ԴԱՍԱՐԱՆ ԵՎ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆ ԱՎԱՐՏԵԼԸ

2. 1-ին դասարանում բոլոր սովորողները, որպես կանոն, փոխադրվում են հաջորդ դասարան` գիտելիքների անհրաժեշտ նվազագույնի յուրացման պայմանով: Առանձին դեպքերում սովորողը կարող է կրկնել տվյալ ուսումնական տարվա դասընթացը` ուսումնական հաստատության մանկավարժական խորհրդի որոշմամբ և ծնողի /նրա օրինական ներկայացուցչի/ համաձայնությամբ:

3. 2-րդ, 3-րդ, 5-8-րդ և 10-րդ դասարանների ուսումնական բոլոր առարկաներից տարեկան դրական գնահատականներ ունեցող սովորողները փոխադրվում են հաջորդ դասարան:

4. 4-րդ դասարանի /տարրական ուսումնական հաստատության ավարտական դասարան/ բոլոր ուսումնական առարկաներից տարեկան և գիտելիքների ստուգումից դրական գնահատականներ ունեցող սովորողները փոխադրվում են հաջորդ դասարան:

5. 9-րդ դասարանի /հիմնական ուսումնական հաստատության ավարտական դասարան/ բոլոր ուսումնական առարկաներից տարեկան և ավարտական քննություններից դրական գնահատականներ ունեցող սովորողները ստանում են հիմնական կրթության ավարտական վկայական:

6. 11-րդ դասարանի /միջնակարգ ուսումնական հաստատության ավարտական դասարան/ ուսումնական բոլոր առարկաներից տարեկան և պետական ավարտական քննություններից դրական գնահատականներ ունեցող շրջանավարտները ստանում են միջնակարգ կրթության ատեստատ: Հանրակրթական ուսումնական հաստատությունում որևէ առարկա չդասավանդվելու պատճառով տվյալ առարկայից գնահատական չունեցող շրջանավարտն իր ցանկությամբ այդ առարկայից կարող է քննություն հանձնել էքստեռն կարգով: Այդ քննության արդյունքը հիմք է հանդիսանում միջնակարգ կրթության ատեստատում տարեկան, իսկ քննական առարկաների դեպքում` տարեկան և քննական գնահատականներ նշանակելու համար:

7. 2-10-րդ դասարաններում մեկ կամ երկու առարկայից տարեկան կամ գիտելիքների ստուգումից անբավարար գնահատական ունեցող սովորողների փոխադրման կամ ավարտման հարցը որոշվում է օգոստոսի 20-30-ը ընկած ժամանակահատվածում նրանց հանձնած վերաքննությունների արդյունքներով:

8. Ամառային առաջադրանքների ստուգման արդյունքում թեկուզ մեկ առարկայից անբավարար գնահատական ունեցող 2-10-րդ դասարանների սովորողները կրկնում են տվյալ ուսումնական տարվա դասընթացը: Սովորողին ամառային առաջադրանք տալու կամ դասընթացը կրկնելու ուսումնական հաստատության մանկավարժական խորհրդի որոշումների մասին սովորողի ծնողին տեղյակ է պահում դասղեկը, մանկխորհրդի նիստից հետո երեք օրվա ընթացքում`գրավոր ծանուցմամբ:

9. 11-րդ դասարանի այն սովորողները, որոնց տարեկան կամ քննական/ միասնականի ավարտական կամ ավարտական/անբավարար գնահատականների ընդհանուր թիվը չի գերազանցում երկուսը, վերաքննություններ են հանձնում.

1) «Հայոց լեզու և հայ գրականություն», «Օտար լեզու», «Մաթեմատիկա», «Բնագիտություն» և «Հայոց պատմություն» առարկաներից հուլիսի 4-14-ը Երևան քաղաքում և մարզերի տարածքային կենտրոններում:

2) Մնացած առարկաներից` վերջին քննությունից հետո` հնգօրյա ժամկետում իրենց դպրոցում:

10. 11-րդ դասարանի այն սովորողները, ովքեր որպես միասնական քննություն ընտրել են բնագիտական կամ օտար լեզուների առարկայախմբի առարկաներից երկուսը, ապա «Ա» մակարդակից դրական գնահատականներ ստանալու դեպքում, ատեստատում դրվում է առավելագույն գնահատականը, իսկ որևէ առարկայի /ների/ քննություն/ներ/-ից անբավարար գնահատական ստանալու դեպքում ատեստատում գնահատական է դրվում տվյալ առարկայից /ներից/ վերաքննություն հանձնելուց հետո:

11. Եթե որպես միասնական քննություն ընտրվել է բնագիտական կամ օտար լեզուների առարկայախմբի առարկա, ապա նույն առարկայախմբից որևէ այլ առարկա չի կարող ընտրվել որպես ավարտական քննություն:

12. 9-րդ և 11-րդ դասարանների այն սովորողները, որոնք տարեկան անբավարար գնահատական ունեն քննական առարկաներից, ապա նրանց հանձնած վերաքննությունների արդյունքները հիմք են հանդիսանում միջնակարգ կրթության ատեստատում տարեկան և քննական գնահատական նշանակելու համար:

13. 2-րդ, 3-րդ, 5-8-րդ և 10-րդ դասարանների այն սովորողները, ովքեր ուսումնական երեք և ավելի առարկաներից ստացել են տարեկան անբավարար գնահատականներ, կրկնում են տվյալ ուսումնական տարվա դասընթացը:

1) 4-րդ, 9-րդ և 11-րդ դասարաններում երեք և ավելի ուսումնական առարկաներից տարեկան անբավարար գնահատականներ ունեցող սովորողներին գիտելիքների ստուգման, փոխադրական կամ ավարտական քննություններին մասնակցել չի թույլատրվում:

2) 4-րդ դասարանի երեք և ավելի ուսումնական առարկաներից տարեկան անբավարար գնահատականներ ունեցող սովորողները կրկնում են տվյալ ուսումնական տարվա դասընթացը:

3) 16 տարին չլրացած 9-րդ դասարանի երեք և ավելի ուսումնական առարկաներից տարեկան անբավարար գնահատականներ ունեցող սովորողները, որոնց չի թույլատրվում մասնակցել ավարտական քննություններին կամ քննությունների ընթացքում անբավարար գնահատականների թիվը /տարեկան և քննական միասին/ երեք և ավելի է, ինչպես նաև ամառային առաջադրանքները հանձնելուց հետո թեկուզ մեկ առարկայից ստացել են անբավարար գնահատական, կրկնում են տվյալ ուսումնական տարվա դասընթացը:

4) 16 տարին լրացած, մինչև 18 տարեկան 9-րդ դասարանի երեք և ավելի ուսումնական առարկաներից տարեկան անբավարար գնահատականներ ունեցող սովորողները, որոնց չի թույլատրվում մասնակցել ավարտական քննություններին կամ քննությունների ընթացքում անբավարար գնահատականների թիվը /տարեկան և քննական միասին/ երեք և ավելի է, ինչպես նաև ամառային առաջադրանքների ստուգման արդյունքում թեկուզ մեկ առարկայից ստացել են անբավարար գնահատական` ծնողի /որդեգրողների կամ հոգաբարձուի/ դիմումի հիման վրա կարող են թողնել հանրակրթական ուսումնական հաստատությունը:

5) 18 տարին լրացած երեք և ավելի ուսումնական առարկաներից տարեկան անբավարար գնահատականներ ունեցող սովորողները, ում չի թույլատրվում մասնակցել ավարտական քննություններին կամ քննությունների ընթացքում անբավարար գնահատականների թիվը /տարեկան և քննական միասին/ դարձել է երեք և ավելի, ինչպես նաև ամառային առաջադրանքների ստուգման արդյունքում թեկուզ մեկ առարկայից ստացել են անբավարար գնահատական` դուրս են մնում հանրակրթական ուսումնական հաստատությունից:

14. 11-րդ դասարանի այն սովորողները, որոնց չի թույլատրվում մասնակցել պետական ավարտական քննություններին կամ քննությունների ընթացքում անբավարար գնահատականների թիվը /տարեկան և քննական միասին/ դարձել է երեք և ավելի, ինչպես նաև ամառային առաջադրանքների ստուգման արդյունքում թեկուզ մեկ առարկայից ստացել են անբավարար գնահատական, դուրս են մնում հանրակրթական ուսումնական հաստատությունից:

15. Ինչպես տարեկան, այնպես էլ քննական առարկաներից անբավարար գնահատական ունենալու պատճառով հանրակրթական ուսումնական հաստատությունից դուրս մնացած 9-րդ և 11-րդ դասարանի սովորողներին իրավունք է վերապահվում միայն հաջորդ տարի նույն հաստատությունում հանձնել քննություններ այդ առարկաներից: Նոր բնակավայր տեղափոխվելու դեպքում նրանց իրավունք է վերապահվում քննություններ հանձնել նոր բնակավայրի հանրակրթական հաստատություններից մեկում:

16. Քննաշրջանի ընթացքում պարտադիր զինվորական ծառայության զորակոչված սովորողներին իրավունք է վերապահվում զորացրվելուց անմիջապես հետո քննություններ հանձնել նույն ուսումնական հաստատությունում մինչև քննաշրջանի ավարտը:

17. 14 և 15-րդ կետերով սահմանված կարգով վերաքննություն չհանձնած սովորողներին հետագայում իրավունք է վերապահվում ընդհանուր հիմունքներով հանձնելու էքստեռն ավարտական քննություններ և ստանալ հիմնական կամ միջնակարգ հանրակրթական ուսումնական հաստատության ավարտական վկայական:

18. 1-8-րդ և 10-րդ դասարաններում տարեկան գերազանց առաջադիմություն ունեցող սովորողները պարգևատրվում են նախարարության գովասանագրով: 9-րդ դասարանը տարեկան և քննական գերազանց գնահատականներով ավարտած սովորողները ստանում են «Գերազանցության» նշումով հիմնական կրթության վկայական:

1) 11-րդ դասարանը տարեկանում գերազանց գնահատականներով ավարտող շրջանավարտները ուսումնական հաստատության կողմից ներկայացվում են որպես գերազանցության մեդալի հավակնորդ, ըստ սույն կարգի 38 և 39 կետերի պահանջների:

19. ՈՒսումնական առարկաներից տարեկան գնահատականներ նշանակում են դասավանդող ուսուցիչներն ուսումնական տարվա վերջին շաբաթվա ընթացքում` հաշվի առնելով սովորողի կիսամյակային գնահատականները: Աշխատանքի ուսուցում, ֆիզկուլտուրա, նախնական զինվորական պատրաստություն առարկաների պարապմունքներից առողջական վիճակի պատճառով սովորողի ազատված լինելը, ինչպես նաև չդասավանդելու պատճառով որևէ առարկայից տարեկան գնահատական չունենալը չի ազդում նրա հաջորդ դասարան փոխադրվելու կամ ուսումնական հաստատությունն ավարտելու վրա:

20. ՈՒսումնական տարվա ընթացքում, մինչև մայիսի 1-ը, 20-30 օր կամ 120-160 ժամ դասերից բացակայած սովորողը հանձնում է քննություններ ուսումնական պլանով նախատեսված 5 առարկաներից` ուսումնական հաստատության մանկավարժական խորհրդի որոշմամբ: Քննություններից անբավարար գնահատական ստացած կամ 160 ժամից ավելի բացակայած սովորողը կրկնում է տվյալ ուսումնական տարվա դասընթացը:

1) Քննական առարկաների ցանկը քննարկվում և հաստատվում է ուսումնական հաստատության մանկավարժական խորհրդի նիստում:

2) Քննություններն անցկացվում են մայիսի 17-ից մայիսի 28-ը ընկած ժամանակամիջոցում` գրավոր կամ բանավոր:

3) Քննական առաջադրանքները կազմում են առարկայական մեթոդմիավորումները` հաստատում է տնօրենը: Քննություններն ընդունում են տվյալ առարկայի ուսուցիչը և տնօրենի կողմից նշանակված ներկայացուցիչը:

4) Քննությունների արդյունքների հիման վրա նշանակվում են կիսամյակային և տարեկան գնահատականներ: Տարեկանում տվյալ առարկայից դրական գնահատվել չեն կարող այն սովորողները, ովքեր տվյալ առարկայի քննությունից ստացել են անբավարար գնահատական:

ԳԼՈՒԽ III
ՔՆՆՈՒԹՅՈՒՆՆԵՐԸ ԵՎ ԴՐԱՆՑ ԱՆՑԿԱՑՄԱՆ ԿԱՐԳԸ

21. 4-րդ դասարանում սովորողների գիտելիքների ստուգումը անցկացվում է «Հայոց լեզու» և «Մաթեմատիկա» առարկաներից /գրավոր/, ուսումնական հաստատության տնօրենի սահմանած աշխատակարգով, նախարարության սահմանած միասնական օրերին` հունիսի 1-5-ը ժամանակահատվածում: Ռուսերենով ուսուցմամբ դասարաններում քննություններ անցկացվում են նաև ռուսաց լեզվից: Քննությունները ընդունում են դասավանդող ուսուցիչը և տնօրենի կողմից նշանակված ներկայացուցիչը:

1) 4-րդ դասարանի համար հայոց լեզվի և մաթեմատիկայի գիտելիքների ստուգման առաջադրանքները /գնահատումը 10-բալանոց համակարգով/ կազմում են ուսումնական հաստատությունների մեթոդմիավորումները` ըստ ՀՀ կառավարության աշխատակազմի գնահատման և թեստավորման կենտրոնի /այսուհետ` գնահատման և թեստավորման կենտրոն/ կողմից հաստատված նմուշների:

22. 9-րդ դասարանում քննություններն անցկացվում են հետևյալ առարկաներից «Հայոց լեզու և հայ գրականություն» /գրավոր/, «Մաթեմատիկա» /գրավոր/, «Հայոց պատմություն» /գրավոր/, «Օտար լեզու» /ռուսերեն, անգլերեն, ֆրանսերեն, գերմաներեն և այլ լեզուներ, սովորողի ընտրությամբ` գրավոր/, «Բնագիտություն» /ֆիզիկա, քիմիա, կենսաբանություն, աշխարհագրություն, սովորողի ընտրությամբ`գրավոր/, «Ֆիզկուլտուրա»: Ռուսերենով ուսուցմամբ դասարաններում քննություններն անցկացվում են հետևյալ առարկաներից` «Հայոց լեզու և հայ գրականություն» /գրավոր/, «Ռուսաց լեզու» /գրավոր/, «Մաթեմատիկա» /գրավոր/, «Հայոց պատմություն» /գրավոր/, «Օտար լեզու» /անգլերեն, ֆրանսերեն, գերմաներեն և այլ լեզուներ, սովորողի ընտրությամբ` գրավոր/, «Բնագիտություն» /ֆիզիկա, քիմիա, կենսաբանություն, աշխարհագրություն սովորողի ընտրությամբ` գրավոր/, «Ֆիզկուլտուրա»:

23. 9-րդ դասարանի ավարտական քննությունները կազմակերպվում են ուսումնական հաստատություններում` գնահատման և թեստավորման կենտրոնի կազմած թեստերով /բացառությամբ ֆիզկուլտուրայի/: Քննական աշխատանքը ստուգվում է քննական կենտրոնի ղեկավարի /տնօրենի/ հրամանով ստեղծված ստուգող հանձնաժողովի կողմից, քննության հաջորդ օրը ժամը 11.00-ին գնահատման և թեստավորման կենտրոնի համակարգչային կայքում տեղադրված թեստերի ճիշտ պատասխանների հիման վրա: Գնահատումը կատարվում է 20 բալային համակարգով /բացառությամբ ֆիզկուլտուրայի/: Ստուգող հանձնաժողովի նախագահը ի պաշտոնե կենտրոնի տնօրենն է: Ստուգող հանձնաժողովի անդամների 50%-ը տվյալ առարկայի մասնագետներ են:

24. 11-րդ դասարանում սահմանված են 6 պետական ավարտական քննություններ`

1) «Հայոց լեզու և հայ գրականություն» /գրավոր/,

2) «Մաթեմատիկա» /գրավոր/,

3) «Հայոց պատմություն» /գրավոր/,

4) «Օտար լեզու» /գրավոր/ (ռուսերեն, անգլերեն, ֆրանսերեն, գերմաներեն)` սովորողի ընտրությամբ,

5) Ընտրովի /գրավոր/ (ֆիզիկա, քիմիա, կենսաբանություն, աշխարհագրություն)` սովորողի ընտրությամբ,

6) «Ֆիզկուլտուրա»:

Ռուսերենով ուսուցմամբ դասարաններում սահմանվում է ևս մեկ ավարտական քննություն «Ռուս գրականություն» /բանավոր/, որն անցկացվում է դպրոցի սահմանած օրը` հունիսի 1-20 ժամանակահատվածում:

25. Բոլոր պետական ավարտական քննություններն անցկացվում են նախարարության սահմանած միասնական օրերին:

26. «ֆիզկուլտուրա» առարկայի պետական ավարտական քննություններն ընդունվում են հանրակրթական ուսումնական հաստատության տնօրենի հրամանով ստեղծված հանձնաժողովի կողմից` հանձնաժողովի նախագահ, դասավանդող ուսուցիչ և հանձնաժողովի երկու անդամներ /անդամներից առնվազն մեկը տվյալ առարկայի մասնագետ/:

1) «Հայոց լեզու և հայ գրականություն», «Մաթեմատիկա», «Օտար լեզու», «Բնագիտություն» և «Հայոց պատմություն» առարկաների պետական ավարտական քննությունների ընթացքը կազմակերպելու համար տնօրենը նշանակում է քննության ընթացքի կազմակերպիչներ, որոնք չեն կարող լինել տվյալ քննական առարկայի մասնագետներ:

27. 11-րդ դասարանի համար քննական առարկաների առաջադրանքները /գնահատումը 20 բալային համակարգով /բացառությամբ ֆիզկուլտուրայի/ կազմվում են գնահատման և թեստավորման կենտրոնի կողմից: Քննական առաջադրանքների ծրարները թույլատրվում է բացել քննության օրը` քննասենյակում:

28. Սովորողներին չի թույլատրվում իրենց հետ քննասենյակ բերել տետրեր, դասագրքեր, ուսումնական և այլ ուղեցույց ձեռնարկներ:

29. Սահմանված ժամանակամիջոցում գրավոր աշխատանքը չավարտած սովորողներն այն հանձնում են անավարտ վիճակում:

30. 11-րդ դասարանում քննական աշխատանքները ստուգվում են քննական կենտրոնի ղեկավարի /տնօրենի/ հրամանով ստեղծված ստուգող հանձնաժողովի կողմից, քննության հաջորդ օրը ժամը 11.00-ին, գնահատման և թեստավորման կենտրոնի համակարգչային կայքում տեղադրված թեստերի ճիշտ պատասխանների հիման վրա: Ստուգող հանձնաժողովի նախագահը ի պաշտոնե քննական կենտրոնի տնօրենն է: Հանձնաժողովի անդամները չեն կարող լինել տվյալ առարկայի մասնագետներ: Քննական գրավոր աշխատանքները, մինչև դրանց ստուգման ավարտը, պահվում են քննական հանձնաժողովի նախագահի մոտ:

31. Սովորողի գրավոր աշխատանքը գնահատելիս, քննական հանձնաժողովի անդամների միջև տարաձայնություն առաջանալու դեպքում հարցը լուծվում է հանձնաժողովի անդամների ձայների պարզ մեծամասնությամբ.

1) հավասար ձայների դեպքում` 4-րդ դասարանում վճռորոշ է դասավանդող ուսուցչի առաջարկած գնահատականը, 9-րդ դասարանում` հանձնաժողովի նախագահի առաջարկած գնահատականը: Նշանակված գնահատականի հետ համաձայն չլինելու դեպքում հանձնաժողովի անդամը/ները/ արձանագրության մեջ կարող է /են/ կատարել հատուկ նշում:

32. 9-րդ և 11-րդ դասարանների այն սովորողները, ովքեր «Հանրահաշիվ և անալիզի տարրեր» կամ «Երկրաչափություն» առարկաներից, կամ երկուսից միաժամանակ ունեն տարեկան անբավարար գնահատական, չեն մասնակցում «Մաթեմատիկայի» ավարտական քննությանը: Նրանք վերաքննություն են հանձնում «Մաթեմատիկա» առարկայից` 11-րդ դասարանցիները հուլիսի 4-14-ը, իսկ 9-րդ դասարանցիները` օգոստոսի` 20-30 ընկած ժամանակահատվածում: Այդ քննության արդյունքը հիմք է հանդիսանում հիմնական կրթության վկայականում և միջնակարգ կրթության ատեստատում «Երկրաչափություն» և «Հանրահաշիվ և մաթ. անալիզի տարրեր» /հանրահաշիվ/ առարկաների տարեկան և «Մաթեմատիկա»-ից քննական գնահատական նշանակելու համար/: Տարեկան գնահատականները նշանակվում է 10 բալային, իսկ քննականը` 20 բալային համակարգով:

33. 9-րդ և 11-րդ դասարանների այն սովորողները, ովքեր «Հայոց լեզու» կամ «Գրականություն» առարկաներից կամ երկուսից միաժամանակ ունեն տարեկան անբավարար գնահատականներ, չեն մասնակցում «Հայոց լեզու և հայ գրականություն» առարկայի ավարտական քննությանը: Նրանք վերաքննություն են հանձնում «Հայոց լեզու և հայ գրականություն»» առարկայից` 11-րդ դասարանցիները հուլիսի 4-14-ը, իսկ 9-րդ դասարանցիները` օգոստոսի` 20-30-ն ընկած ժամանակահատվածում: Այդ քննության արդյունքը հիմք է հանդիսանում հիմնական կրթության վկայականում և միջնակարգ կրթության ատեստատում «Հայոց լեզու», «Գրականություն» առարկաներից տարեկան և «Հայոց լեզու և հայ գրականություն» առարկայից քննական գնահատական նշանակելու համար: Տարեկան գնահատականները նշանակվում են 10 բալային, իսկ քննականը` 20 բալային համակարգով/:

34. Գնահատման 20 միավորանոց համակարգում մինչև 7 միավորը ներառյալ և 10 միավորանոց համակարգում մինչև 3 միավորը ներառյալ համարվում է անբավարար գնահատական:

35. Եթե 11-րդ դասարանի շրջանավարտը «Հայոց լեզու» ուսումնասիրել է միայն 10-րդ և 11-րդ դասարաններում, ապա ատեստատում այդ առարկայի համապատասխան տողում գրվում է. «չի ուսումնասիրել»: Նա իր ցանկությամբ կարող է ազատվել «Հայոց լեզու և հայ գրականություն» առարկայի պետական ավարտական քննությունից և ատեստատի համապատասխան տողում գրվում է «ազատված է»:

36. Հանրակրթական ուսումնական հաստատությունների պետական ավարտական քննությունները կազմակերպելու և վերահսկելու նպատակով նախարարի հրամանով ստեղծվում է հանրապետական հանձնաժողով:

37. Հատուկ հանրակրթական ուսումնական հաստատություններն առաջնորդվում են սույն կարգով:

ԳԼՈՒԽ IV
ՄԵԴԱԼԻ ՀԱՎԱԿՆՈՐԴՆԵՐԻ ՆԵՐԿԱՅԱՑՈՒՄԸ

38. Մեդալի հավակնորդ են ներկայացվում այն շրջանավարտները, ովքեր 9-րդ դասարանը ավարտել են գերազանցությամբ /ստացել են գերազանցության վկայական/, 10-րդ և 11-րդ դասարաններում բոլոր առարկաներից գնահատվել են` «9» կամ «10»:

39. ՈՒսումնական պլանով նախատեսված որևէ առարկայից /բացի առողջության պատճառով «Տեխնոլոգիա», «Ֆիզկուլտուրա», «Նախնական զինվորական պատրաստություն և անվտանգ կենսագործունեություն» առարկաներից ազատված լինելու դեպքերը/ չգնահատված շրջանավարտներն, անկախ չգնահատման պատճառներից որպես մեդալի հավակնորդ չեն ներկայացվում:

40. Մեդալի հավակնորդ շրջանավարտների նախնական ցուցակները մինչև մարտի 21-ը ուսումնական հաստատությունները ներկայացնում են մարզպետարանի /Երևանի քաղաքապետարանի/ կրթության վարչություն: Նախարարության ենթակայության հանրակրթական ուսումնական հաստատությունները նախնական ցուցակները մինչև մարտի 31-ը ներկայացնում են նախարարության հանրակրթության վարչություն:

1) Մինչև մայիսի 1-ը համապատասխան վարչությունները ուսումնական հաստատություններում ստուգում են ներկայացումների օրինականությունը ու հիմնավորվածությունը և ճշգրտված ցուցակները ներկայացնում նախարարություն:

Մայիս ամսվա ընթացքում, ըստ անհրաժեշտության, նախարարությունը ուսումնասիրում է մեդալի հավակնորդների ներկայացման հավաստիությունը:

2) Նախարարությունը` մինչև մայիսի 25-ը մարզպետարաններ /Երևանի քաղաքապետարան/ է ներկայացնում մեդալի հավակնորդների վերջնական ցուցակները, որոնցում ընդգրկված են նաև նախարարության ենթակայության ուսումնական հաստատությունների մեդալի հավակնորդ շրջանավարտները:

41. Մեդալի հավակնորդ շրջանավարտների կենտրոնացված քննություններն անցկացվում են ՀՀ մարզկենտրոններում /Երևան քաղաքում/:

ԳԼՈՒԽ V
ՄԵԴԱԼԻ ՀԱՎԱԿՆՈՐԴՆԵՐԻ ՔՆՆՈՒԹՅՈՒՆՆԵՐԻ ԿԱԶՄԱԿԵՐՊՈՒՄԸ

42. Մեդալի հավակնորդ բոլոր շրջանավարտները /անկախ ուսումնական հաստատության ենթակայությունից և անկախ հաստատությունում ուսուցման լեզվից «Հայոց լեզու և հայ գրականություն» և «Մաթեմատիկա» առարկաների պետական ավարտական քննությունները հանձնում են կենտրոնացված կարգով մարզկենտրոններում /Երևան քաղաքում/.

1) մեդալի հավակնորդ այն շրջանավարտները, որոնց համար «Հայոց լեզու և հայ գրականություն» և «Մաթեմատիկա» առարկաները բուհ ընդունվելիս համարվում են մրցութային, քննություն են հանձնում միասնական համակարգով /քննական բալերը հաշվարկվում են «Ա» մակարդակի առաջադրանքների հիման վրա իսկ ոչ մրցութային համարվելու դեպքում` կենտրոնացված համակարգով/,

2) քննություններն անցկացվում են մարզպետարանների /Երևանի քաղաքապետարանի/ կողմից նախապես որոշված հաստատությունում`

ա) «Հայոց լեզու և հայ գրականություն» առարկայից` հունիսի 5-ին,

բ) «Մաթեմատիկա» առարկայից` հունիսի 9-ին,

3) քննությունների նախապատրաստման և անցկացման համար մարզպետի /Երևանի քաղաքապետի/ կարգադրությամբ ստեղծվում է հանձնաժողով: Քննությունների ընթացքը և աշխատանքների ստուգումը վերահսկում են նախարարության ներկայացուցիչները:

43. «Հայոց լեզու և հայ գրականություն» և «Մաթեմատիկա» առարկաների քննական աշխատանքները ստուգվում են ՀՀ կրթության և գիտության նախարարի հրամանով ստեղծված ստուգող հանձնաժողովի կողմից, քննության հաջորդ օրը ժամը 11.00-ին ԳԹԿ համակարգչային կայքում տեղադրված թեստերի ճիշտ պատասխանների հիման վրա: Ստուգող հանձնաժողովի նախագահը ի պաշտոնե ՀՀ կրթության և գիտության նախարարության ներկայացուցիչն է: Հանձնաժողովի անդամները չեն կարող լինել տվյալ առարկայի մասնագետներ: Քննական գրավոր աշխատանքները, մինչև դրանց ստուգման ավարտը, պահվում են քննական հանձնաժողովի նախագահի մոտ: «Հայոց պատմություն», «Բնագիտություն» /ֆիզիկա, քիմիա կամ կենսաբանություն մեդալի հավակնորդի ընտրությամբ/, «Օտար լեզու» /ռուսերեն, անգլերեն, ֆրանսերեն, գերմաներեն մեդալի հավակնորդի ընտրությամբ/, «Ֆիզկուլտուրա» ավարտական պետական քննությունները մեդալի հավակնորդ շրջանավարտները հանձնում են իրենց ուսումնական հաստատություններում նույն կարգով, ինչ կարգով մյուս շրջանավարտները: Նշված առարկաների քննությունների անցկացումը վերահսկվում է նախարարության կողմից:

44. Մեդալի հավակնորդ շրջանավարտների, ինչպես և հանրակրթական ուսումնական հաստատությունների մյուս բոլոր շրջանավարտների համար քննական առաջադրանքները բովանդակությամբ ու կառուցվածքով նույնական են:

45. Մինչև հունիսի 25-ը հանրակրթական ուսումնական հաստատությունները մարզպետարանի /Երևանի քաղաքապետարանի/ կրթության վարչություն են ներկայացնում սահմանված ձևի տեղեկանք, հանրակրթական ուսումնական հաստատությունում մյուս չորս առարկաներից, մեդալի հավակնորդ շրջանավարտների հանձնած պետական քննությունների արդյունքների մասին: Ստացված արդյունքները ընդհանրացվում են մարզպետարանի /Երևանի քաղաքապետարանի/ կրթության վարչությունում և մինչև հունիսի 28-ը ներկայացվում է նախարարության հանրակրթության վարչություն: Նախարարության ենթակայության հանրակրթական ուսումնական հաստատությունները նման տեղեկանք նույն ժամկետում ներկայացնում են նախարարության հանրակրթության վարչություն:

ԳԼՈՒԽ VI
ՄԵԴԱԼՈՎ ՊԱՐԳԵՎԱՏՐՈՒՄԸ

46. Մեդալի հավակնորդ այն շրջանավարտները, ովքեր բոլոր ավարտական քննություններից ստացել են 19-20 միավոր /20 միավորային համակարգում/ կամ «9» կամ «10» միավոր /10 միավորային համակարգում/` պարգևատրվում են մեդալով: Մնացած դեպքերում մեդալի հավակնորդ շրջանավարտները մեդալով չեն պարգևատրվում: