ՄԱԿԵՐԵՎՈՒԹԱԱԿՏԻՎ ՄԻՋՈՑՆԵՐԻ ԵՎ ՄԱԿԵՐԵՎՈՒԹԱԱԿՏԻՎ ՆՅՈ ...

05.12.2023 -

040.1795.251204

«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ

«25» դեկտեմբերի 2004 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

16 դեկտեմբերի 2004 թվականի N 1795-Ն

ՄԱԿԵՐԵՎՈՒԹԱԱԿՏԻՎ ՄԻՋՈՑՆԵՐԻ ԵՎ ՄԱԿԵՐԵՎՈՒԹԱԱԿՏԻՎ ՆՅՈՒԹԵՐ ՊԱՐՈՒՆԱԿՈՂ ԼՎԱՑՈՂ ՈՒ ՄԱՔՐՈՂ ՄԻՋՈՑՆԵՐԻ ՏԵԽՆԻԿԱԿԱՆ ԿԱՆՈՆԱԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Տեխնիկական կանոնակարգման մասին» Հայաստանի Հանրապետության օրենքի 8-րդ հոդվածի 1-ին մասի 3-րդ կետի «ա» ենթակետը` Հայաստանի Հանրապետության կառավարությունը որոշում է.

1. Հաստատել մակերևութաակտիվ միջոցների և մակերևութաակտիվ նյութեր պարունակող լվացող ու մաքրող միջոցների տեխնիկական կանոնակարգը` համաձայն հավելվածի:

2. Հայաստանի Հանրապետության առողջապահության նախարարին` սույն որոշման պաշտոնական հրապարակման պահից`

ա) 2 տարվա ընթացքում Հայաստանի Հանրապետության օրենսդրությամբ սահմանված կարգով հաստատել մակերևութաակտիվ միջոցների և մակերևութաակտիվ նյութեր պարունակող լվացող ու մաքրող միջոցների արտադրության և իրացման սանիտարական կանոններն ու նորմերը.

բ) 3 ամսվա ընթացքում մշակել հիգիենիկ եզրակացության տրամադրման կարգը և ներկայացնել Հայաստանի Հանրապետության կառավարություն` հաստատման.

գ) մեկ տարվա ընթացքում մակերևութաակտիվ միջոցների և մակերևութաակտիվ նյութեր պարունակող լվացող ու մաքրող միջոցներ արտադրող այն պետությունների առողջապահական մարմինների հետ, որոնց արտադրանքը ներմուծվում է Հայաստանի Հանրապետություն, կնքել հիգիենիկ եզրակացությունների փոխճանաչման պայմանագրեր:

3. Սույն որոշումն ուժի մեջ է մտնում պաշտոնական հրապարակման օրվանից երկու տարի հետո:

(նախաբանը փոփ. 08.06.2023 թիվ 905-Ն որոշում)

ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ

2004 ԹՎԱԿԱՆԻ ԴԵԿՏԵՄԲԵՐԻ 17-ԻՆ

Հավելված

ՀՀ կառավարության

2004 թվականի դեկտեմբերի 16-ի

N 1795-Ն որոշման

ՏԵԽՆԻԿԱԿԱՆ ԿԱՆՈՆԱԿԱՐԳ ՄԱԿԵՐԵՎՈՒԹԱԱԿՏԻՎ ՄԻՋՈՑՆԵՐԻ ԵՎ ՄԱԿԵՐԵՎՈՒԹԱԱԿՏԻՎ ՆՅՈՒԹԵՐ ՊԱՐՈՒՆԱԿՈՂ ԼՎԱՑՈՂ ՈՒ ՄԱՔՐՈՂ ՄԻՋՈՑՆԵՐԻ

1. ԿԻՐԱՌՄԱՆ ՈԼՈՐՏԸ

1. Սույն մակերևութաակտիվ միջոցների և մակերևութաակտիվ նյութեր պարունակող լվացող ու մաքրող միջոցների տեխնիկական կանոնակարգի (այսուհետ` տեխնիկական կանոնակարգ) գործողությունը տարածվում է արտաքին տնտեսական գործունեության ապրանքային անվանացանկի ծածկագրերին համապատասխան` հետևյալ միջոցների վրա`

    մակերևութաակտիվ  միջոցներ        3402 31 000 0, 3402 39 000 0,

                                     3402 41 000 0, 3402 42 000 0,

                                     3402 49 000 0, 3402 50 000 0,

                                     3402 90, 3402 90 100

    լվացող ու մաքրող միջոցներ        3402 90 900 0

(1-ին կետը փոփ. 08.06.2023 թիվ 905-Ն որոշում)

2. Սույն տեխնիկական կանոնակարգի 1-ին կետում նշված մակերևութաակտիվ միջոցների և մակերևութաակտիվ նյութեր պարունակող լվացող ու մաքրող միջոցները (այսուհետ` լվացող միջոցներ) նախատեսված են կաշվե կոշկեղենային արդյունաբերության գործվածքների և ամանեղենի բոլոր տեսակների, ինչպես նաև սալիկների, հատակի, խոհանոցային ու սանհանգույցի պարագաների, արդյունաբերական ու բժշկական սարքավորումների լվացման ու մաքրման համար:

(2-րդ կետը փոփ. 08.06.2023 թիվ 905-Ն որոշում)

3. Սույն տեխնիկական կանոնակարգով սահմանվում են 1-ին կետում նշված լվացող միջոցների անվտանգությունը բնութագրող, ինչպես նաև մակնշմանն ու փաթեթավորմանը ներկայացվող պահանջները և համապատասխանության գնահատման ընթացակարգերը:

4. Լվացող միջոցները ենթակա են համապատասխանության պարտադիր գնահատման:

2. ՀԱՍԿԱՑՈՒԹՅՈՒՆՆԵՐԸ

5. Սույն տեխնիկական կանոնակարգում կիրառվում են հետևյալ հասկացությունները`

լվացող միջոց` արտադրանք, որի բաղադրությունը հատուկ ընտրված է լվացող ազդեցության միջոցով աղտոտվածությունների հեռացման համար: Լվացող միջոցները ներառում են հիմնական (մակերևութաակտիվ նյութեր կամ օճառ) և լրացուցիչ (ակտիվ հավելանյութեր) բաղադրիչներ:

Լվացող միջոցները կարող են ունենալ ցանկացած տեսք (հեղուկ, փոշի, մածուկ, կտոր, բրիկետ, թափծու կտոր, ձևավոր կտոր և այլն).

մաքրող միջոց` փոքր քանակությամբ օճառ (կարող է նաև չպարունակել) կամ ուրիշ մակերևութաակտիվ նյութ պարունակող արտադրանք, որն օգտագործվում է հատակների, սալիկների, պատուհանների և այլ մակերեսների մաքրման համար.

մակերևութաակտիվ միջոց` մակերևութաակտիվ նյութերի (անիոնային, կատիոնային, ոչ իոնածին, ամֆոլիտիկ) խառնուրդները, օրգանական լուծիչում դրանց լուծույթները կամ դիսպերսիաները, մակերևութաակտիվ նյութի հիման վրա օճառ պարունակող կամ չպարունակող այլ խառնուրդները, ինչպես նաև օրգանական լուծիչում օճառի լուծույթները.

մակերևութաակտիվ նյութ` մակերևութային ակտիվությամբ օժտված քիմիական միացություն, որը հեղուկում (մասնավորապես, ջրում) լուծելիս հեղուկ-գոլորշի կամ միջֆազային այլ մակերևույթների վրա նախընտրելի մակակլանման շնորհիվ իջեցնում է դրա մակերևութային կամ միջֆազային լարվածությունը.

մակերևութային ակտիվություն` լուծույթում մակերևութաակտիվ նյութի գործողություն, որը սովորաբար հանգեցնում է մակերևութային և միջֆազային լարվածության իջեցման.

անիոնային մակերևութաակտիվ նյութ` մակերևութաակտիվ նյութ, որը ջրային լուծույթում իոնացվում է մակերևութային ակտիվությունը պայմանավորող բացասական լիցքավորված իոնների.

կատիոնային մակերևութաակտիվ նյութ` մակերևութաակտիվ նյութ, որը ջրային լուծույթում իոնացվում է մակերևութային ակտիվությունը պայմանավորող դրական լիցքավորված իոնների.

ոչ իոնածին մակերևութաակտիվ նյութ` մակերևութաակտիվ նյութ, որը ջրային լուծույթում իոններ չի առաջացնում, և որի լուծելիությունը ջրում պայմանավորված է մոլեկուլում ջրի նկատմամբ խիստ խնամակցություն ունեցող գործառութային խմբերի առկայությամբ.

ամֆոլիտ մակերևութաակտիվ նյութ` մակերևութաակտիվ նյութ մի քանի գործառութային խմբերով, որը ջրային միջավայրում, կախված պայմաններից, իոնացվում է առաջացնելով բացասական լիցքավորված կամ դրական լիցքավորված իոններ.

մակերևութային լարվածություն` լարվածություն հեղուկի մակերևութային շերտում, որն արտահայտվում է երկարության միավորին ընկնող ուժով: Մակերևութային լարվածությունը մակերևույթի և այդ մակերևույթի տակ գտնվող մոլեկուլների միջև փոխադարձ ձգողականությունն է, որն ուղղված է դեպի հեղուկի ներքին ծավալը:

Մակերևութային լարվածությունը չափվում է միլինյուտոնով մետրում (մՆ/մ):

Մակերևութային լարվածությունը հեղուկ և գոլորշի ֆազերի բաժանման մակերևույթին առաջացող ուժերի մասնավոր դեպք է.

միջֆազային լարվածություն` լարվածություն երկու հեղուկի բաժանման մակերևույթին, որն արտահայտվում է երկարության միավորին ընկնող ուժով:

Միջֆազային լարվածությունը չափվում է միլինյուտոնով մետրում (մՆ/մ).

առաջնային կենսատարրալուծում մանրէների ազդեցությամբ մակերևութաակտիվ նյութի քայքայումը (սովորաբար ջրային միջավայրում), որի հետևանքով այն կորցնում է իր մակերևութային ակտիվությունը.

լրիվ կենսատարրալուծում` մակերևութաակտիվ նյութի կենսատարրալուծման աստիճան, երբ ջրային միջավայրում օդի ներկայությամբ մանրէների ազդեցությամբ այն ամբողջովին տարրալուծվում է ածխածնի երկօքսիդի, ջրի, առկա այլ տարրերի հանքային աղերի և մանրէների կենսագործունեության այլ միացությունների.

լվացող ազդեցություն` լվացման գործողություն իրականացնելու` լվացող միջոցի ունակություն.

լվացման գործողություն` աղտոտվածքների հեռացման գործընթաց հիմքից դրանք վերածելով լուծույթ կամ դիսպերս վիճակի.

հավելանյութ` ակտիվ (լվացող միջոցների համար) լվացող միջոցի օժանդակ բաղադրիչ, սովորաբար անօրգանական կառուցվածքով, որի բնութագրական հատկությունները, զուգակցելով հիմնական բաղադրիչների հատկություններին, ի հայտ են գալիս լվացման ժամանակ:

(5-րդ կետը փոփ. 08.06.2023 թիվ 905-Ն որոշում)

3. ՇՈՒԿԱՅԱՀԱՆՄԱՆԸ ՆԵՐԿԱՅԱՑՎՈՂ ՊԱՀԱՆՋՆԵՐԸ

(վերնագիրը փոփ. 08.06.2023 թիվ 905-Ն որոշում)

6. Հայաստանի Հանրապետության տարածքում լվացող միջոցների իրացումն առանց համապատասխանության գնահատման արգելվում է:

7. Հայաստանի Հանրապետության տարածքում համապատասխանության պարտադիր գնահատման ենթակա և շրջանառության մեջ գտնվող լվացող միջոցները պետք է ուղեկցվեն համապատասխանության ազգային նշանի մակնշմամբ, համապատասխանության սերտիֆիկատով կամ գրանցված համապատասխանության հայտարարագրով:

8. (8-րդ կետն ուժը կորցրել է 08.06.2023 թիվ 905-Ն որոշում)

4. ՀԻՄՆԱԿԱՆ ՏԵԽՆԻԿԱԿԱՆ ՊԱՀԱՆՋՆԵՐԸ

(4-րդ բաժինը փոփ. 15.02.07 թիվ 174-Ն որոշում)

ԼՎԱՑՈՂ ՄԻՋՈՑՆԵՐԻՆ ՆԵՐԿԱՅԱՑՎՈՂ ՀԻԳԻԵՆԻԿ ՊԱՀԱՆՋՆԵՐԸ

9. Լվացող միջոցները պետք է անվնաս լինեն ինչպես արտադրության, այնպես էլ պահման, փոխադրման, իրացման և օգտագործման ժամանակ` մարդու կյանքի և առողջության համար, չառաջացնեն տեղային մաշկագրգռիչ ազդեցություններ, ինչպես նաև չպետք է ունենան թունավոր, մաշկաներծծվող, ալերգիկ, մուտագեն, քաղցկեղածին ազդեցություններ օրգանիզմի վրա:

(9-րդ կետը փոփ. 08.06.2023 թիվ 905-Ն որոշում)

10. Լվացող միջոցները չպետք է ունենան օրգանիզմում կուտակվելու (կումուլյատիվ) հատկություններ:

11. Լվացող միջոցները պետք է հեշտ և արագ մաքրվեն (հեռացվեն) մարդու մաշկածածկույթից և լվացող-մաքրվող արտադրատեսակների վրայից:

12. Լվացող միջոցները պետք է լավ լուծվեն ջրում և չունենան սուր հոտ:

13. Լվացող միջոցները չպետք է ունենան մակակլանվելու հատկություն` մաշկը և լվացման-մաքրման ենթակա իրերը դրանցով մշակելու ժամանակ:

Լվացող միջոցներին ներկայացվող անվտանգության պահանջները

14. Լվացող միջոցների արտադրման համար օգտագործվող մակերևութաակտիվ նյութերի առաջնային կենսատարրալուծման աստիճանը պետք է լինի 80 տոկոսից ոչ պակաս:

15. Լվացող միջոցների արտադրման համար օգտագործվող մակերևութաակտիվ նյութերի լրիվ կենսատարրալուծման աստիճանը 28 օրվա ընթացքում պետք է հասնի առնվազն 60 տոկոսի (ըստ ածխածնի երկօքսիդի):

16. Լվացող միջոցներում կամ դրանց մեկ տոկոսանոց ջրային լուծույթում ջրածնի իոնների խտությունը (pH) պետք է լինի`

3-ից պակաս` ձեռքերի մաշկի հետ չշփվող թթվային լվացող միջոցների համար,

3-ից մինչև 11,5` ձեռքերի մաշկի հետ շփվող լվացող միջոցների համար,

11,5-ից ավելի` ձեռքերի մաշկի հետ չշփվող հիմնային լվացող միջոցների համար:

16ա. Լվացող միջոցներում ֆոսֆոր պարունակող միացությունների զանգվածային մասը (վերահաշվարկված ըստ P2O5) պետք է լինի`

17 տոկոսից ոչ ավելի` ֆոսֆատներ պարունակող լվացող միջոցներում (բացառությամբ ջուրը փափկացնող լվացող միջոցների),

30 տոկոսից ոչ ավելի` ջուրը փափկացնող լվացող միջոցներում:

16բ. Քլորակտիվ միացություններ պարունակող լվացող միջոցներում ակտիվ քլորի զանգվածային մասը պետք է լինի 8 տոկոսից կամ 200 գ/դմ3-ից ոչ ավելի:

16գ. Փոշենման լվացող միջոցներում փոշու զանգվածային մասը չպետք է լինի 3 տոկոսից ավելի:

Լվացվող միջոցների մակնշմանը ներկայացվող պահանջները

17. Հայաստանի Հանրապետության տարածքում իրացվող լվացող միջոցների փաթեթվածքի կամ պիտակների վրա տեսանելի տեղում և ընթեռնելի ձևով պետք է նշված լինեն հետևյալ տեղեկությունները`

ա) լվացող միջոցի անվանումը, պիտանիության ժամկետը, պահման պայմանները (անհրաժեշտության դեպքում), զտաքաշը,

բ) արտադրողի (մատակարարի) անվանումը, ապրանքային նշանը (առկայության դեպքում), գտնվելու վայրը,

գ) լվացող միջոցի բաղադրությունը, որը նշվում է հետևյալ բաղադրամասերի 0.2 տոկոսից ավելի պարունակության դեպքում`

ֆոսֆատներ,

ֆոսֆոնատներ,

անիոնային մակերևութաակտիվ նյութեր,

կատիոնային մակերևութաակտիվ նյութեր,

ոչ իոնածին մակերևութաակտիվ նյութեր,

ամֆոլիտ մակերևութաակտիվ նյութեր,

թթվածին պարունակող սպիտակեցնող բաղադրիչներ,

քլոր պարունակող սպիտակեցնող բաղադրիչներ,

ԷԴՏԱ (EDTA) (տրիլոն Բ),

նիտրիլեռքացախաթթու,

ֆենոլներ և հալոգենացված ֆենոլներ,

պարադիքլորբենզոլ,

արոմատիկ ածխաջրածիններ,

ալիֆատիկ ածխաջրածիններ,

հալոգենացված ածխաջրածիններ,

օճառ,

զեոլիտներ,

պոլիկարբօքսիլատներ:

Մակնշվածքում բաղադրամասերի տոկոսային պարունակությունը պետք է նշվի հետևյալ ձևով`

5 տոկոսից պակաս (0,2-ից մինչև 5 տոկոս պարունակության դեպքում),

5-15 տոկոս,

15-30 տոկոս,

30 տոկոսից բարձր:

Ֆերմենտների, պահպանող (կոնսերվացնող) նյութերի, ինչպես նաև ախտահանող նյութերի պարունակությունը նշվում է անկախ դրանց քանակությունից.

դ) ցուցումներ` օգտագործման վերաբերյալ (լվացվող և մաքրվող օբյեկտը, լվացման եղանակը, ջրի և լվացող միջոցի քանակությունը և այլն).

ե) (ե ենթակետն ուժը կորցրել է 08.06.2023 թիվ 905-Ն որոշում)

զ) (զ ենթակետն ուժը կորցրել է 08.06.2023 թիվ 905-Ն որոշում)

է) լվացքի համար նախատեսված լվացող միջոցի փաթեթվածքի վրա լրացուցիչ նշվում է նաև լվացքի մեքենայի ինչ տարողության բեռնաչափերի համար է լվացող միջոցի առաջարկվող քանակությունը (չափաբաժինը)` հաշվի առնելով ջրի կոշտությունը և լվացման ցիկլերը:

Պոտենցիալ ալերգենները նշվում են լվացող միջոցներում դրանց 0,01 տոկոսից ավելի պարունակության դեպքում:

Ջրածնի իոնների ակտիվությունը նշվում է 3-ից ցածր կամ 11,5-ից բարձր pH-ի արժեքի դեպքում` «Ձեռքերի մաշկի հետ շփման ենթակա չէ» մակագրությամբ կամ այդ պահանջը բնութագրող նշանի մակնշմամբ:

«Պարունակում է ակտիվ քլոր» մակագրությունը` քլոր պարունակող սպիտակեցնող բաղադրիչներով լվացող միջոցների համար:

Լվացող միջոցը համարվում է ուժեղ, եթե արտադրողը կամ մատակարարը փաթեթվածքի վրա չի նշել, որ այն հիմնականում նախատեսված է գործվածքների խնամքի համար, բայց այն կարող է օգտագործվել նաև նուրբ և գունավոր գործվածքների լվացման համար` ցածր ջերմաստիճանում:

(17-րդ կետը փոփ. 15.02.07 թիվ 174-Ն, 08.06.2023 թիվ 905-Ն որոշում)

18. Արդյունաբերական նպատակով օգտագործվող լվացող միջոցների փաթեթվածքների վրա պարտադիր չէ նշել 17-րդ կետի «գ» և «դ» ենթակետերով սահմանված պահանջները, եթե այդ տեղեկությունները տրվում են ապրանքաուղեկից փաստաթղթերում:

19. Արտադրողը, մատակարարը կամ նրա լիազոր ներկայացուցիչը պետք է ապահովեն Հայաստանի Հանրապետությունում իրացվող, Հայաստանի Հանրապետությունում արտադրվող և ներմուծվող լվացող միջոցների վերաբերյալ սույն տեխնիկական կանոնակարգի 17-րդ կետի «ա», «բ», «գ» և «դ» ենթակետերում սահմանված տեղեկատվության տրամադրումը սպառողին` հայերենով:

20. Լվացող միջոցի փաթեթավորումը և դրա համար օգտագործվող նյութերը պետք է ապահովեն արտադրանքի պահպանվածությունը, ինչպես նաև շրջակա միջավայրի պահպանությունը դրա փոխադրման, պահման, իրացման և օգտագործման ժամանակ:

5. ՀԱՄԱՊԱՏԱՍԽԱՆՈՒԹՅԱՆ ԳՆԱՀԱՏՄԱՆ ԸՆԹԱՑԱԿԱՐԳԵՐԸ

21. Սույն տեխնիկական կանոնակարգի պահանջներին լվացող միջոցների խմբաքանակի կամ սերիական արտադրության համար համապատասխանությունը հավաստելու համար հայտատուն`

1) պետք է կիրառի Հայաստանի Հանրապետության կառավարության 2014 թվականի հունվարի 16-ի N 56-Ն որոշմամբ սահմանված սերտիֆիկացման կամ հայտարարագրման ընթացակարգերը խմբաքանակի կամ սերիական արտադրության համար.

2) պետք է զետեղի Հայաստանի Հանրապետության կառավարության 2013 թվականի մարտի 14-ի N 337-Ն որոշմամբ սահմանված համապատասխանության ազգային նշանը կենցաղային և սանիտարահիգիենիկ նշանակության ապրանքների փաթեթի կամ դրանց փակցված պիտակների վրա:

(21-րդ կետը փոփ. 02.04.15 թիվ 356-Ն, 08.06.2023 թիվ 905-Ն որոշումներ)

22. (22-րդ կետն ուժը կորցրել է 08.06.2023 թիվ 905-Ն որոշում)

23. (23-րդ կետն ուժը կորցրել է 08.06.2023 թիվ 905-Ն որոշում)

24. Համապատասխանության գնահատման նշանակված մարմինը փորձարկումները պետք է կատարի սույն տեխնիկական կանոնակարգի կիրարկումն ապահովող և փորձարկման մեթոդներ սահմանող ստանդարտներին համապատասխան:

(24-րդ կետը փոփ. 02.04.15 թիվ 356-Ն որոշում)

25. (25-րդ կետն ուժը կորցրել է 02.04.15 թիվ 356-Ն որոշում)

26. Համապատասխանության սերտիֆիկատի և համապատասխանության հայտարարագրի գործողության ժամկետը սահմանվում է մինչև 24 ամիս` հաշվի առնելով լվացող միջոցների պիտանիության ժամկետը:

(26-րդ կետը փոփ. 02.04.15 թիվ 356-Ն, 08.06.2023 թիվ 905-Ն որոշումներ)

27. (27-րդ կետն ուժը կորցրել է 02.04.15 թիվ 356-Ն որոշում)

28. Սույն տեխնիկական կանոնակարգով սահմանված պահանջներին համապատասխանության սերտիֆիկատի կամ համապատասխանության հայտարարագրի կասեցնելու կամ դադարեցնելու պայմանները և գործընթացները սահմանված են Հայաստանի Հանրապետության կառավարության 2014 թվականի հունվարի 16-ի N 56-Ն որոշմամբ:

(28-րդ կետը փոփ. 02.04.15 թիվ 356-Ն, 08.06.2023 թիվ 905-Ն որոշումներ)

6. ՉԱՓՈՒՄՆԵՐԻ ՄԻԱՍՆԱԿԱՆՈՒԹՅԱՆ ԱՊԱՀՈՎՈՒՄԸ

29. Լվացող միջոցների չափումների միասնականության ապահովումը պետք է իրականացվի «Չափումների միասնականության ապահովման մասին» Հայաստանի Հանրապետության օրենքով սահմանված կարգով:

7. ՊԵՏԱԿԱՆ ՎԵՐԱՀՍԿՈՂՈՒԹՅՈՒՆԸ

30. Սույն տեխնիկական կանոնակարգի պահանջներին լվացող միջոցների համապատասխանության պետական վերահսկողությունն իրականացվում է «Տեխնիկական կանոնակարգման մասին», «Հայաստանի Հանրապետությունում ստուգումների կազմակերպման և անցկացման մասին» օրենքներով և այլ իրավական ակտերով սահմանված կարգով:

(30-րդ կետը փոփ. 02.04.15 թիվ 356-Ն, 08.06.2023 թիվ 905-Ն որոշումներ)

8. ՏԵԽՆԻԿԱԿԱՆ ԿԱՆՈՆԱԿԱՐԳՈՎ ՍԱՀՄԱՆՎԱԾ ՊԱՀԱՆՋՆԵՐԻ ԿԱՏԱՐՈՒՄՆ ԱՊԱՀՈՎՈՂ ՍՏԱՆԴԱՐՏՆԵՐԻ ՑԱՆԿԸ

._____________________________________________________________________.

|Ստանդարտի նշագիրը|Ստանդարտի անվանումը                                |

|_________________|___________________________________________________|

|ԳՕՍՏ 22567.5     |Միջոցներ լվացող սինթետիկ և  մակերևութաակտիվ        |

|                 |նյութեր.                                           |

|                 |Ջրածնական իոնների խտության որոշման մեթոդներ        |

|_________________|___________________________________________________|

|ԳՕՍՏ 30024       |Նյութեր մակերևութաակտիվ  և  միջոցներ լվացող        |

|(ԻՍՕ 607-80)     |սինթետիկ.                                          |

|                 |Նմուշի բաժանման մեթոդներ                           |

|_________________|___________________________________________________|

|ԳՕՍՏ 32509       |Նյութեր մակերևութաակտիվ.                           |

|                 |Ջրային միջավայրում կենսաքայքայման որոշում          |

|_________________|___________________________________________________|

|ԳՕՍՏ 32385       |Ապրանքներ կենցաղային քիմիայի. Ջրածնական            |

|                 |իոնների ակտիվության ցուցիչի (pH) որոշման մեթոդ     |

|_________________|___________________________________________________|

|ԳՕՍՏ 22567.7     |Սինթետիկ լվացող միջոցներ. Ֆոսֆորաթթվական աղերի     |

|                 |զանգվածային մասի որոշման մեթոդ                     |

|_________________|___________________________________________________|

|ԳՕՍՏ 25644       |Սինթետիկ լվացող փոշենման միջոցներ. Ընդհանուր       |

|(հավելված Բ`     |տեխնիկական պահանջներ                               |

|փորձարկման մեթոդ)|                                                   |

|_________________|___________________________________________________|

|ԳՕՍՏ 32386       |Կենցաղային քիմիայի ապրանքներ. Ակտիվ քլորի որոշման  |

|                 |մեթոդ                                              |

|_________________|___________________________________________________|

|ԳՕՍՏ 32444       |Կենցաղային քիմիայի ապրանքներ. Ֆոսֆոր պարունակող    |

|                 |միացությունների որոշման մեթոդներ                   |

|_________________|___________________________________________________|

|ՀՍՏ 275          |Լվացող միջոցներ. Ընդհանուր տեխնիկական պայմաններ    |

._____________________________________________________________________.

(8-րդ բաժինը փոփ. 15.02.07 թիվ 174-Ն, 08.06.2023 թիվ 905-Ն որոշումներ)

(հավելվածը փոփ. 02.04.15 թիվ 356-Ն, 08.06.2023 թիվ 905-Ն որոշումներ)