ԱՌՈՂՋԱՊԱՀՈՒԹՅԱՆ ՆԱԽԱՐԱՐԻ 2018 ԹՎԱԿԱՆԻ ՄԱՅԻՍԻ 3-Ի Թ ...

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌՈՂՋԱՊԱՀՈՒԹՅԱՆ ՆԱԽԱՐԱՐ
ՀՐԱՄԱՆ

20 փետրվարի 2019 թվականի N 414-Ա

ԱՌՈՂՋԱՊԱՀՈՒԹՅԱՆ ՆԱԽԱՐԱՐԻ 2018 ԹՎԱԿԱՆԻ ՄԱՅԻՍԻ 3-Ի ԹԻՎ 1145-Ա ՀՐԱՄԱՆՈՒՄ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

Հիմք ընդունելով Հայաստանի Հանրապետության կառավարության 2019 թվականի հունվարի 31-ի N 53-Ն որոշումր և Հայաստանի Հանրապետության վարչապետի 2018 թվականի հունիսի 11-ի N 728-Լ որոշման հավելվածով հաստատված առողջապահության նախարարության կանոնադրության 18-րդ կետի 20-րդ ենթակետը.

ՀՐԱՄԱՅՈՒՄ ԵՄ`

1. Առողջապահության նախարարի 2018 թվականի մայիսի 3-ի «Պետության կողմից երաշխավորված անվճար և արտոնյալ պայմաններով ստոմատոլոգիական ծառայությունների մատուցման ուղեցույցը հաստատելու մասին» N 1145-Ա հրամանում (այսուհետ` Հրաման) կատարել հետևյալ փոփոխությունները.

1) Հրամանի N 1 հավելվածը շարադրել նոր խմբագրությամբ` համաձայն հավելված N 1-ի:

2) Հրամանի N 3 հավելվածը շարադրել նոր խմբագրությամբ` համաձայն հավելված N 2-ի:

2. Սույն հրամանը տարածվում է 2019 թվականի փետրվարի 7-ից հետո ծագած հարաբերությունների վրա:

3. Սույն հրամանի կատարման հսկողությունը հանձնարարել առողջապահության նախարարի տեղակալ Արսեն Դավթյանին:

Հայաստանի Հանրապետության

    առողջապահության նախարար      Ա. Թորոսյան

Հավելված 1

Առողջապահության նախարարի

2019 թվականի փետրվարի 20-ի

թիվ 414-Ա հրամանի

«Հավելված N 1

ՀՀ առողջապահության նախարարի

2018 թվականի մայիսի 3-ի

թիվ 1145-Ա հրամանի

ՈՒՂԵՑՈՒՅՑ ՊԵՏՈՒԹՅԱՆ ԿՈՂՄԻՑ ԵՐԱՇԽԱՎՈՐՎԱԾ ԱՆՎՃԱՐ ԵՎ ԱՐՏՈՆՅԱԼ ՊԱՅՄԱՆՆԵՐՈՎ ՍՏՈՄԱՏՈԼՈԳԻԱԿԱՆ ԾԱՌԱՅՈՒԹՅՈՒՆՆԵՐԻ ՄԱՏՈՒՑՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն ուղեցույցով սահմանվում են պետության կողմից երաշխավորված անվճար և արտոնյալ պայմաններով արտահիվանդանոցային ստոմատոլոգիական ծառայությունների կազմակերպման կարգը և պայմանները:

2. Պետության կողմից երաշխավորված անվճար և արտոնյալ պայմաններով ստոմատոլոգիական ծառայությունները մատուցելիս կազմակերպությունները առաջնորդվում են կառավարության 2004 թվականի մարտի 4-ի թիվ 318-Ն որոշմամբ, առողջապահության նախարարության և բժշկական կազմակերպության միջև կնքված «Պետության կողմից երաշխավորված անվճար և արտոնյալ պայմաններով բժշկական օգնության և սպասարկման ծառայությունների մատուցման մասին» պայմանագրով և ոլորտը կարգավորող այլ իրավական ակտերով:

3. Պետության կողմից երաշխավորված անվճար և արտոնյալ պայմաններով ստոմատոլոգիական բժշկական օգնություն և սպասարկում ստանալու համար ներկայացվում են ստորև նշված փաստաթղթերը, որոնց կրկնօրինակները փակցվում են ամբուլատոր քարտին.

1) պացիենտի անձը հաստատող փաստաթուղթ,

2) կառավարության 2004 թվականի մարտի 4-ի N 318-Ն որոշմամբ պետության կողմից երաշխավորված անվճար և արտոնյալ պայմաններով ստոմատոլոգիական բժշկական օգնություն և սպասարկում ստանալու իրավունք ունեցող բնակչության սոցիալապես անապահով ու առանձին (հատուկ) խմբերի ցանկում ընդգրկված խմբերից որևէ մեկին պատկանելիության փաստը հավաստող համապատասխան փաստաթուղթ:

4. Պետության կողմից երաշխավորված անվճար և արտոնյալ պայմաններով բժշկական օգնության և սպասարկման շրջանակներում բնակչությանը ցուցաբերվող ստոմատոլոգիական բժշկական օգնությունն ու սպասարկումը ներառում է`

1) վիրաբուժական ստոմատոլոգիական բժշկական օգնություն և սպասարկում` բնակչության կողմից բժշկի ազատ ընտրության սկզբունքով` առանց տարածքային սահմանափակումների,

2) օրթոպեդիկ, թերապևտիկ ստոմատոլոգիական բժշկական օգնություն և սպասարկում` տարածքային սկզբունքով, ըստ վարչական տարածքների` Երևան քաղաք և մարզեր կտրվածքով,

3) այն դեպքում, երբ մարզի տարածքում պետական պատվերի շրջանակներում չի մատուցվում սույն կետի 2-րդ ենթակետում նշված ծառայություններից որևէ մեկը, ապա շահառուներին ստոմատոլոգիական բժշկական օգնություն և սպասարկումը իրականացվում է բժշկի ազատ ընտրության սկզբունքով` առանց տարածքային սահմանափակումների:

II. ՊԵՏՈՒԹՅԱՆ ԿՈՂՄԻՑ ԵՐԱՇԽԱՎՈՐՎԱԾ ԱՆՎՃԱՐ ԵՎ ԱՐՏՈՆՅԱԼ ՊԱՅՄԱՆՆԵՐՈՎ ՏՐԱՄԱԴՐՎՈՂ ՍՏՈՄԱՏՈԼՈԳԻԱԿԱՆ ԾԱՌԱՅՈՒԹՅՈՒՆՆԵՐ

5. Պետության կողմից երաշխավորված անվճար պայմաններով ստոմատոլոգիական ծառայությունները տրամադրվում են.

1) ատամի հեռացում` կառավարության 2004 թվականի մարտի 4-ի թիվ 318-Ն որոշմամբ հաստատված N 1 հավելվածով նախատեսված բոլոր շահառուներին,

2) պուլպիտ, պերիոդոնտիտ, կարիեսի բուժում, մասնակի կամ լրիվ շարժական թիթեղային պրոթեզ, պրոթեզավորման համար անհրաժեշտ ատամնաշապիկի պատրաստում, տեղադրում և պրոթեզի վերանորոգում (յուրաքանչյուր երեք տարին մեկ անգամ)` ընտանեկան նպաստի համակարգում ընդգրկված 30.01 և ավելի բարձր անապահովության միավոր ունեցող նպաստառուներին, 1-ին խմբի հաշմանդամություն ունեցող անձանց, մինչև 18 տարեկան սոցիալապես անապահով և առանձին (հատուկ) խմբերում ընդգրկված երեխաներին, զորակոչային և նախազորակոչային տարիքի անձանց,

3) բերանի խոռոչի լորձաթաղանթի հիվանդությունների բուժում` սոցիալապես անապահով և առանձին (հատուկ) խմբերում ընդգրկված մինչև 18 տարեկան երեխաներին, այդ թվում նախազորակոչային տարիքի անձանց:

6. Պետության կողմից երաշխավորված արտոնյալ պայմաններով ստոմատոլոգիական ծառայությունները տրամադրվում են` պուլպիտ, պերիոդոնտիտ, կարիեսի բուժում, մասնակի կամ լրիվ շարժական թիթեղային պրոթեզ, պրոթեզավորման համար անհրաժեշտ ատամնաշապիկի պատրաստում, տեղադրում և պրոթեզի վերանորոգում (յուրաքանչյուր երեք տարին մեկ անգամ)` կառավարության 2004 թվականի մարտի 4-ի N 318-Ն որոշման N 1 հավելվածով հաստատված բոլոր շահառուներին, բացառությամբ` սույն ուղեցույցի 5-րդ կետի 2-րդ և 3-րդ ենթակետերով նախատեսված շահառուների:

III. ՊԵՏՈՒԹՅԱՆ ԿՈՂՄԻՑ ԵՐԱՇԽԱՎՈՐՎԱԾ ԱՆՎՃԱՐ ԵՎ ԱՐՏՈՆՅԱԼ ՊԱՅՄԱՆՆԵՐՈՎ ՏՐԱՄԱԴՐՎՈՂ ՍՏՈՄԱՏՈԼՈԳԻԱԿԱՆ ԾԱՌԱՅՈՒԹՅՈՒՆՆԵՐԻ ՇՐՋԱՆԱԿՆԵՐԸ

7. Պետության կողմից երաշխավորված անվճար և արտոնյալ պայմաններով տրամադրվող ստոմատոլոգիական ծառայությունները ներառում են.

1) ատամի հեռացումը` ծնոտի տվյալ շրջանի ռենտգեն հետազոտություն, ատամի հեռացման համար անհրաժեշտ անզգայացում (տեսակը ընտրում է բժիշկը), ատամի հեռացում,

2) պուլպիտի բուժումը` ծնոտի տվյալ շրջանի ռենտգեն հետազոտություն, անզգայացում (տեսակը ընտրում է բժիշկը), արմատախողովակների մշակում, լեցավորում, ատամի պլոմբավորում,

3) պերիոդոնտիտի բուժումը` ըստ բժշկական ցուցումների ծնոտի տվյալ շրջանի ռենտգեն հետազոտություն և պերիոդոնտիտի բուժման համար անհրաժեշտ համալիր բժշկական միջոցառումների իրականացում,

4) մասնակի շարժական թիթեղային պրոթեզը` պրոթեզի պատրաստում` ըստ բժշկական ցուցումների ռենտգեն հետազոտությունով, չափսանյութի կիրառումով, անհատական գդալի պատրաստումով, բռնիչների (կլամերաներ) պատրաստումով, ըստ ցուցումների` մետաղական շապիկի պատրաստումով և տեղադրումով,

5) լրիվ շարժական թիթեղային պրոթեզը` պրոթեզի պատրաստումը` ըստ բժշկական ցուցումների ռենտգեն հետազոտությունով, չափանյութի կիրառումով, անհատական, գդալի պատրաստումով, կլամերաների պատրաստումով,

6) մինչև 18 տարեկան երեխաների բերանի խոռոչի լորձաթաղանթի հիվանդությունների բուժումը` բերանի խոռոչի լորձաթաղանթի հակաբորբոքային բուժումը, այդ թվում հակավիրուսային, հակամանրէային, հակասնկային դեղերով բուժումը, վիտամինոթերապիան, տեղային բուժումը (կերատոպլաստիկ թերապիա, ողողումներ անտիսեպտիկներով, անզգայացնող նյութեր և այլն),

7) ատամնապրոթեզների վերանորոգումը և տեղադրումը` արհեստական ատամնաշարի ճաքերի վերացումը, կոտրված պրոթեզի վերականգնումը, արհեստական ատամի կոտրվածքների վերականգնումը, վնասված կլամերայի վերականգնումը, պրոթեզի վերաբազավորումը և այլն` տեղադրումով:

8. Սույն հավելվածի 7-րդ կետով նախատեսված ծառայությունները փոխհատուցվում են ավարտված դեպքի համար:

9. Սույն հավելվածի 7-րդ կետով նախատեսված ստոմատոլոգիական ծառայությունների մեջ ներառված են նաև բժշկի կոնսուլտացիայի, նյութերի, անզգայացման, լաբորատոր-գործիքային ախտորոշիչ հետազոտությունների (այդ թվում` ռենտգեն հետազոտությունը) և ներառված չեն բուժող բժշկի կողմից նշանակված տնային պայմաններում թերապևտիկ բուժումը (հակաբորբոքային, ներծծող դեղերի կիրառում և այլն):

IV. 12 ՏԱՐԵԿԱՆ ԵՐԵԽԱՆԵՐԻՆ ՊԵՏՈՒԹՅԱՆ ԿՈՂՄԻՑ ԵՐԱՇԽԱՎՈՐՎԱԾ ԱՆՎՃԱՐ ՊԱՅՄԱՆՆԵՐՈՎ «ԵՐԵԽԱՆԵՐԻ ՍՏՈՄԱՏՈԼՈԳԻԱԿԱՆ ԱՌԱՋՆԱՅԻՆ ԿԱՆԽԱՐԳԵԼՄԱՆ ԾԱՌԱՅՈՒԹՅՈՒՆՆԵՐ» ԾՐԱԳՐԻ ՇՐՋԱՆԱԿՆԵՐՈՒՄ ՄԱՏՈՒՑՎՈՂ ԲԺՇԿԱԿԱՆ ՕԳՆՈՒԹՅԱՆ ԵՎ ՍՊԱՍԱՐԿՄԱՆ ԾԱՌԱՅՈՒԹՅՈՒՆՆԵՐԻ ԻՐԱԿԱՆԱՑՄԱՆ ԿԱՐԳ

10. «Երեխաների ստոմատոլոգիական առաջնային կանխարգելման ծառայություններ» ծրագրով (այսուհետ` ծրագիր) նախատեսված ծառայությունները տրամադրվում են 12 տարեկան կամ 7-րդ դասարանում սովորող երեխաներին, յուրաքանչյուր երեխային` տարեկան մեկ անգամ:

11. Ծրագրի իրականացումը կազմակերպվում է հանրակրթական ուսումնական հաստատության, իսկ անհնարինության դեպքում` առողջության առաջնային պահպանում իրականացնող բժշկական կազմակերպության միջոցով:

12. Ծրագրի իրականացման վերաբերյալ նախապես տեղեկացվում է հանրակրթական ուսումնական հաստատության ղեկավարը, իսկ գյուղական համայնքներում` նաև բժշկական ամբուլատորիաների և բուժակ-մանկաբարձական կետերի պատասխանատուները, ովքեր մինչև ծրագրի իրականացումը կազմում են 12 տարեկան կամ 7-րդ դասարանում սովորող երեխաների ցուցակ:

13. Ծրագիրն իրականացվում է հանրակրթական ուսումնական հաստատություններում արտագնա մասնագիտական խմբի միջոցով` ծրագիրն իրականացնող բժշկական կազմակերպության տնօրենի կողմից հաստատված ժամանակացույցին համապատասխան:

14. Ծրագիրն իրականացվում է համապատասխան որակավորում և մասնագիտացում ունեցող բժիշկ-ստոմատոլոգի կողմից:

15. Ծրագրի իրականացման ընթացակարգը ներառում է.

1) երեխայի ստոմատոլոգիական կարգավիճակի գնահատումը,

2) ատամնաշարի մշակումը ֆտոր պարունակող մածուկով` բացառությամբ ֆլյուորոզ,

3) երեխայի բերանի խոռոչի հիգիենայի վերաբերյալ խորհրդատվության, ապահովումը (երեխայի օրինական ներկայացուցչին, երեխային),

4) ստոմատոլոգիական բժշկական օգնության և սպասարկման (թերապևտիկ կամ վիրաբուժական բուժում և այլն) կարիք ունեցող երեխաների ուղղորդումն ստոմատոլոգիական բժշկական օգնություն և սպասարկում իրականացնող կազմակերպություն` երեխայի օրինական ներկայացուցչին (դպրոցական, առողջության առաջնային պահպանում իրականացնող բուժքույրերի կամ հեռախոսակապի միջոցով) տրամադրելով տեղեկատվություն պետության կողմից երաշխավորված անվճար և արտոնյալ պայմաններով ստոմատոլոգիական բժշկական օգնության ծառայությունների մասին,

5) ստոմատոլոգիական քարտում տվյալների լրացումը և դրանց մուտքագրումն էլեկտրոնային առողջապահության համակարգում:

Հավելված 2

Առողջապահության նախարարի

2019 թվականի փետրվարի 20-ի

թիվ 414-Ա հրամանի