ԴՈՆՈՐԻ ԿՈՂՄԻՑ ԱՐՅՈՒՆ ԿԱՄ ԱՐՅԱՆ ԲԱՂԱԴՐԱՄԱՍ ՀԱՆՁՆԵԼՈ ...

100.0010.130612

ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ

                                      «13»        06            2012 Թ.

                                        ՊԵՏԱԿԱՆ ԳՐԱՆՑՄԱՆ ԹԻՎ 10012241

            ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌՈՂՋԱՊԱՀՈՒԹՅԱՆ ՆԱԽԱՐԱՐ

                                 ՀՐԱՄԱՆ

                      15 մայիսի 2012 թվականի N 10-Ն

           ԴՈՆՈՐԻ ԿՈՂՄԻՑ ԱՐՅՈՒՆ ԿԱՄ ԱՐՅԱՆ ԲԱՂԱԴՐԱՄԱՍ ՀԱՆՁՆԵԼՈՒ

                   ՀԱՃԱԽԱԿԱՆՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Մարդու արյան և դրա բաղադրամասերի դոնորության և փոխներարկումային բժշկական օգնության մասին» Հայաստանի Հանրապետության 2011 թվականի նոյեմբերի 15-ի ՀՕ-275-Ն օրենքի 7-րդ հոդվածի 1-ին մասի 5-րդ կետը,

ՀՐԱՄԱՅՈՒՄ ԵՄ`

1. Հաստատել դոնորի կողմից արյուն կամ արյան բաղադրամաս հանձնելու հաճախականությունը` համաձայն հավելվածի:

2. Հայաստանի Հանրապետության առողջապահության նախարարության աշխատակազմի իրավաբանական վարչության պետ Ի. Աբգարյանին` սույն հրամանը սահմանված կարգով ներկայացնել Հայաստանի Հանրապետության արդարադատության նախարարություն` պետական իրավական փորձաքննության և պետական գրանցման:

Հավելված

ՀՀ առողջապահության նախարարի

2012 թվականի մայիսի 15-ի

N 10-Ն հրամանի

ԴՈՆՈՐԻ ԿՈՂՄԻՑ ԱՐՅՈՒՆ ԿԱՄ ԱՐՅԱՆ ԲԱՂԱԴՐԱՄԱՍ ՀԱՆՁՆԵԼՈՒ ՀԱՃԱԽԱԿԱՆՈՒԹՅՈՒՆԸ

1. ԴՈՆՈՐԻ ԿՈՂՄԻՑ ԱՐՅՈՒՆ ՀԱՆՁՆԵԼՈՒ ՀԱՃԱԽԱԿԱՆՈՒԹՅՈՒՆԸ

1. Դոնորի կողմից արյուն (այսուհետ` ամբողջական արյուն) հանձնելու միջև ընկած դեպքերի ժամանակահատվածը սահմանվում է առնվազն 2 ամիս: Դոնորի կողմից ամբողջական արյուն հանձնելու առավելագույն թույլատրելի քանակը տղամարդկանց համար տարեկան հինգ, կանանց համար` չորս անգամ է:

2. Դոնորի կողմից ամբողջական արյուն հանձնելու երկու հաջորդական դեպքերի միջև ընկած ժամանակահատվածում դոնորի հեմոգլոբինի պարունակության իջեցումը չպետք է գերազանցի 20 գրամ/լիտր:

3. Ամբողջական արյուն հանձնելու և 1 միավոր էրիթրոցիտների հավաքման միջև ընկած ժամանակահատվածը սահմանվում է առնվազն 2 ամիս:

4. Ամբողջական արյուն հանձնելու և մեկ պլազմաֆերեզի միջև ընդմիջումը սահմանվում է առնվազն մեկ ամիս:

5. Ամբողջական արյուն հանձնելու և մեկ թրոմբոցիտաֆերեզի միջև ընդմիջումը սահմանվում է առնվազն մեկ ամիս:

2. ԴՈՆՈՐԻ ԿՈՂՄԻՑ ԱՐՅԱՆ ԲԱՂԱԴՐԱՄԱՍ ՀԱՆՁՆԵԼՈՒ ՀԱՃԱԽԱԿԱՆՈՒԹՅՈՒՆԸ

6. Դոնորի կողմից որպես արյան բաղադրամասեր հանձնվում են արյան պլազման և տրոմբոցիտները:

7. Դոնորի կողմից արյան պլազմայի միանվագ հանձնման դեպքում` առավելագույն ծավալը չի գերազանցում 750 միլիլիտր (ներառյալ` հակամակարդիչ լուծույթը), իսկ առավելագույն տարեկան ծավալը չպետք է գերազանցի 25 լիտր` ներառյալ հակամակարդիչ լուծույթը, իսկ տարեկան պլազմաֆերեզի թիվը չպետք է գերազանցի 33-ը:

8. Դոնորի կողմից պլազմայի հանձնման միջև ընկած ժամանակահատվածը սահմանվում է առնվազն 14 օր: Եթե պլազմաֆերեզի գործընթացի ընդմիջումը կազմում է 2 ամիս և ավելի, ապա դոնորը դիտվում է որպես առաջնակի:

9. Դոնորի կողմից տրոմբոցիտների հանձնման միջև ընկած ժամանակահատվածը սահմանվում է առնվազն 14 օր: Տարվա ընթացքում տրոմբոցիտների հանձնումը իրականացվում է ոչ ավելի, քան 24 անգամ:

10. Որոշ դեպքերում (ոսկրածուծի փոխպատվաստում, ռեցիպիենտի հազվադեպ խումբ, այլ դոնորներին անհամատեղելիության դեպքում կյանքի ցուցումով ռեցիպիենտին փոխներարկում) հիվանդի հարազատներից թույլատրվում է կատարել տրոմբոցիտաֆերեզ յուրաքանչյուր 3-րդ օրը: Այս դեպքերում յուրաքանչյուր անգամ հավաքված թրոմբոցիտար զանգվածի ծավալը չպետք է գերազանցի 150 միլիլիտր:

11. Երկշաբաթյա ընդմիջումով 15 անգամ տրոմբոցիտաֆերեզ իրականացնելուց հետո անհրաժեշտ է տալ 3 ամիս ընդմիջում: