050.0188.270709
ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
«27» 07 2009 Թ.
ՊԵՏԱԿԱՆ ԳՐԱՆՑՄԱՆ ԹԻՎ 05009253
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ
ՈՐՈՇՈՒՄ
30 հունիսի 2009 թվականի թիվ 188-Ն
i
«ՎԱՐԿԱՅԻՆ ԲՅՈՒՐՈՅԻ ԿՈՂՄԻՑ ԱՅԼ ՎԱՐԿԱՅԻՆ ԲՅՈՒՐՈՅԻՆ ԿԱՄ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻՆ ՏՎՅԱԼՆԵՐԻ ԲԱԶԱՅԻ ՓՈԽԱՆՑՄԱՆ ԿԱՄ ՏՐԱՄԱԴՐՄԱՆ ԿԱՐԳԸ ԵՎ ՊԱՅՄԱՆՆԵՐԸ» ԿԱՆՈՆԱԿԱՐԳ 9/02-Ը ՀԱՍՏԱՏԵԼՈՒ ՄԱՍԻՆ
Հիմք ընդունելով «Վարկային տեղեկատվության շրջանառության և վարկային բյուրոների գործունեության մասին» Հայաստանի Հանրապետության օրենքի 22-րդ հոդվածը, 27-րդ հոդվածի 2-րդ մասը և ղեկավարվելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ հոդվածի «ե» կետի դրույթներով` Հայաստանի Հանրապետության կենտրոնական բանկի խորհուրդը որոշում է.
1. Հաստատել «Վարկային բյուրոյի կողմից այլ վարկային բյուրոյին կամ Հայաստանի Հանրապետության կենտրոնական բանկին տվյալների բազայի փոխանցման կամ տրամադրման կարգը և պայմանները» կանոնակարգ 9/02-ը` համաձայն հավելվածի (կցվում է):
2. Սույն որոշումն ուժի մեջ է մտնում պաշտոնական հրապարակմանը հաջորդող տասներորդ օրը:
ՍՏՈՐԱԳՐՎԵԼ Է ՀՀ ԿԵՆՏՐՈՆԱԿԱՆ ԲԱՆԿԻ ՆԱԽԱԳԱՀԻ ԿՈՂՄԻՑ
2009 ԹՎԱԿԱՆԻ ՀՈՒԼԻՍԻ 3-ԻՆ
Հավելված
Հաստատված է
ՀՀ կենտրոնական բանկի խորհրդի
2009 թվականի հունիսի 30-ի
թիվ 188-Ն որոշմամբ
ԿԱՆՈՆԱԿԱՐԳ 9/02 ՎԱՐԿԱՅԻՆ ԲՅՈՒՐՈՅԻ ԿՈՂՄԻՑ ԱՅԼ ՎԱՐԿԱՅԻՆ ԲՅՈՒՐՈՅԻՆ ԿԱՄ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻՆ ՏՎՅԱԼՆԵՐԻ ԲԱԶԱՅԻ ՓՈԽԱՆՑՄԱՆ ԿԱՄ ՏՐԱՄԱԴՐՄԱՆ ԿԱՐԳԸ ԵՎ ՊԱՅՄԱՆՆԵՐԸ
| ԳԼՈՒԽ 1. |
ԸՆԴՀԱՆՈՒՐ ԴՐՈՒՅԹՆԵՐ |
1. Սույն կանոնակարգը սահմանում է վարկային բյուրոյի կողմից այլ վարկային բյուրոյին կամ Հայաստանի Հանրապետության կենտրոնական բանկին (այսուհետ` Կենտրոնական բանկ) տվյալների բազայի փոխանցման կամ տրամադրման կարգը և պայմանները:
| ԳԼՈՒԽ 2. |
ՎԱՐԿԱՅԻՆ ԲՅՈՒՐՈՅԻ ԿՈՂՄԻՑ ՏՎՅԱԼՆԵՐԻ ԲԱԶԱՅԻ ՓՈԽԱՆՑՄԱՆ ԿԱՐԳԸ ԵՎ ՊԱՅՄԱՆՆԵՐԸ |
2. Վարկային բյուրոն տվյալների բազան փոխանցում կամ տրամադրում է միայն «Վարկային տեղեկատվության շրջանառության և վարկային բյուրոների գործունեության մասին» Հայաստանի Հանրապետության օրենքով (այսուհետ` Օրենք) սահմանված կարգով վարկային բյուրոյի լիցենզիա ստացած իրավաբանական անձին կամ Օրենքով սահմանված դեպքերում` Կենտրոնական բանկին:
3. Վարկային բյուրոն իր տվյալների բազան ամբողջությամբ փոխանցում կամ տրամադրում է սույն կանոնակարգի 2-րդ կետում նշված սուբյեկտներին`
1) ՀՀ Կենտրոնական բանկի խորհրդի կողմից լիցենզիան ուժը կորցրած ճանաչելու պահից առնվազն 10 օր առաջ,
2) վարկային բյուրոյի կողմից վարկային բյուրոյի ծառայության մատուցման դադարեցման պահից առնվազն 10 օր առաջ:
4. Սույն կանոնակարգի 3-րդ կետով սահմանված դեպքերում վարկային բյուրոն տվյալների բազան փոխանցելուց կամ տրամադրելուց առաջ պետք է ոչնչացնի իր տվյալների բազայի բոլոր կրկնօրինակները և որևէ տվյալ չպետք է պահպանի իր մոտ: Ընդ որում, տվյալների բազայի փոխանցման կամ տրամադրման ժամանակ վարկային բյուրոն պետք է Կենտրոնական բանկ ներկայացնի նաև սույն կետի պահանջի իրականացման վերաբերյալ հայտարարագիր, որը պետք է պարունակի վարկային բյուրոյի ղեկավարի կողմից ներկայացվող հայտարարագրի արժանահավատության համար պատասխանատվության ստանձնման վերաբերյալ դրույթ: Նշված հայտարարագիրը ստորագրվում է վարկային բյուրոյի ղեկավարի կողմից:
5. Վարկային բյուրոն այլ վարկային բյուրոյին կամ Կենտրոնական բանկին տվյալների բազան փոխանցելիս կամ տրամադրելիս տրամադրում է տվյալների բազան և տեղեկատվություն տվյալների բազայի կառուցվածքի և նկարագրության վերաբերյալ, ինչպես նաև տվյալների բազան կառավարելու իրավասություն ունեցող անձանց մուտքի գաղտնաբառերը: Եթե տվյալների բազայում առկա տեղեկատվությունը կոդավորված է, ապա տրամադրվում է նաև այն ծրագիրը, որը հնարավորություն կտա ապակոդավորել այն:
6. Վարկային բյուրոյի կողմից այլ վարկային բյուրոյին կամ Կենտրոնական բանկին տվյալների բազան փոխանցվում կամ տրամադրվում է նրանց միջև կնքվող պայմանագրով, որն իր մեջ պետք է պարունակի հետևյալ դրույթները.
1) տվյալների բազայի փոխանցման կամ տրամադրման ժամանակ կողմերի կողմից իրականացվող տվյալների բազայի պաշտպանությանն ուղղված գործողություններ (տվյալների բազան ոչնչացումից, տվյալների խեղաթյուրումից և տվյալների բազա չթույլատրված մուտքից պաշտպանություն և այլն),
2) տվյալների բազայում առկա տվյալների գաղտնիության ապահովում:
7. Վարկային բյուրոյի կողմից այլ վարկային բյուրոյին կամ Կենտրոնական բանկին տվյալների բազայի փոխանցման կամ տրամադրման վերաբերյալ կազմվում է ընդունման - հանձնման ակտ, որն իր մեջ պետք է պարունակի սույն կանոնակարգի 6-րդ կետով սահմանված պահանջների պատշաճ կատարումը հավաստող դրույթներ:
8. Վարկային բյուրոն այլ վարկային բյուրոյին տվյալների բազան փոխանցելուց կամ տրամադրելուց առնվազն 5 օր առաջ այդ մասին տեղեկացնում է Կենտրոնական բանկին` նշելով այն անձին, որին փոխանցում է տվյալների բազան` ներկայացնելով սույն կանոնակարգի 6-րդ կետով սահմանված պայմանագրի նախագիծը: Վարկային բյուրոն այլ վարկային բյուրոյին տվյալների բազան փոխանցելուց կամ տրամադրելուց հետո 5 օրվա ընթացքում Կենտրոնական բանկ է ներկայացնում սույն կանոնակարգի 6, 7 կետերով սահմանված փաստաթղթերի պատճենները: