(ուժը կորցրել է 08.11.12 թիվ 1414-Ն որոշում)
i
040.0669.170504
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«17» մայիսի 2004 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
6 մայիսի 2004 թվականի N 669-Ն
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԸՆԴԵՐՔԻ ՄԱՍԻՆ ԵՐԿՐԱԲԱՆԱԿԱՆ ԵՎ ԱՅԼ ՏԵՂԵԿԱՏՎՈՒԹՅԱՆ ՊԱՀՊԱՆՈՒԹՅԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ
Հայաստանի Հանրապետության ընդերքի մասին օրենսգրքի 26-րդ հոդվածի կիրարկումն ապահովելու նպատակով Հայաստանի Հանրապետության կառավարությունը որոշում է.
1. Սահմանել Հայաստանի Հանրապետության ընդերքի մասին երկրաբանական և այլ տեղեկատվության պահպանության կարգը` համաձայն հավելվածի:
i
2. Սահմանել, որ սույն որոշման 1-ին կետով սահմանված կարգով նախատեսված լիազորված մարմնի լիազորություններն իրականացնում է Հայաստանի Հանրապետության էներգետիկայի և բնական պաշարների նախարարությունը:
(2-րդ կետը փոփ. 29.01.10 թիվ 65-Ն որոշում)
3. Հայաստանի Հանրապետության էներգետիկայի և բնական պաշարների նախարարին`
i
ա) եռամսյա ժամկետում, համաձայնեցնելով Հայաստանի Հանրապետության ֆինանսների նախարարի հետ, հաստատել «Հանրապետական երկրաբանական ֆոնդ» պետական ոչ առևտրային կազմակերպության կողմից տրամադրվող ծառայությունների գները.
բ) վեցամսյա ժամկետում կատարել «Հանրապետական երկրաբանական ֆոնդ» պետական ոչ առևտրային կազմակերպությունում առկա տեղեկատվական նյութերի գույքագրում:
(3-րդ կետը փոփ. 29.01.10 թիվ 65-Ն որոշում)
4. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2004 ԹՎԱԿԱՆԻ ՄԱՅԻՍԻ 13-ԻՆ
Հավելված
ՀՀ կառավարության
2004 թվականի մայիսի 6-ի
N 669-Ն որոշման
ԿԱՐԳ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԸՆԴԵՐՔԻ ՄԱՍԻՆ ԵՐԿՐԱԲԱՆԱԿԱՆ ԵՎ ԱՅԼ ՏԵՂԵԿԱՏՎՈՒԹՅԱՆ ՊԱՀՊԱՆՈՒԹՅԱՆ
1. Սույն կարգով կանոնակարգվում է պետական միջոցների և ընդերքօգտագործողների ներդրումների հաշվին ընդերքի երկրաբանական ուսումնասիրության արդյունքում ստացված տեղեկատվության պահպանությունը:
2. Լիազորված մարմին ներկայացվելու և մշտական պահպանման ենթակա են հետևյալ փաստաթղթերը`
ա) ընդերքի երկրաբանական ուսումնասիրություններ կատարող իրավաբանական և ֆիզիկական անձանց երկրաբանական հաշվետվությունները,
բ) ընդերքի մասին երկրաբանական և այլ տեղեկատվությանը վերաբերող առաջնային փաստաթղթերը,
գ) օգտակար հանածոների պաշարների վերաբերյալ պետական փորձաքննության եզրակացությունները,
դ) ընդերքօգտագործողների կողմից երկրաբանական հանույթի (քարտեզագրման) նյութերը և դրանց բացատրագրերը, որոնք լիազորված մարմին են ներկայացվում 2 օրինակից:
i
3. Ընդերքի երկրաբանական ուսումնասիրության աշխատանքների իրականացման արդյունքում ստացված տեղեկատվությունը, այդ թվում` սկզբնական երկրաբանական, երկրաֆիզիկական և այլ փաստագրությունը, դրանց ամփոփման և վերլուծության մասին տվյալները, ինչպես նաև լեռնային ապարների նմուշները, հորատահանուկը (կեռնը), շերտային հեղուկը, պահպանվում է`
ա) լիազորված մարմնի կողմից` պետական միջոցների հաշվին աշխատանքների իրականացման դեպքում,
բ) ընդերքօգտագործողի կողմից` ընդերքօգտագործողների ներդրումների հաշվին աշխատանքների իրականացման դեպքում, որոնք հանձնվում են լիազորված մարմնին և ի պահ են տրվում ընդերքօգտագործողին` լիազորված մարմնի և ընդերքօգտագործողի միջև կնքված ընդերքօգտագործման մասին պայմանագրով սահմանված ժամկետով և պայմաններով:
(3-րդ կետը փոփ. 05.05.11 թիվ 563-Ն որոշում)
4. Լիազորված մարմինը սույն կարգի 2-րդ կետում նշված փաստաթղթերի հանձնման դեպքում տալիս է դրանց ընդունման մասին տեղեկանք:
(4-րդ կետը փոփ. 05.05.11 թիվ 563-Ն որոշում)
5. Ընդերքօգտագործողների կողմից լիազորված մարմին պահպանման համար ներկայացվում են երկրաբանական ուսումնասիրության աշխատանքների արդյունքների մասին հաշվետվությունների` համակարգչային ձևավորմամբ կազմված 2 օրինակը և դրանց մագնիսական կրիչները:
6. (6-րդ կետն ուժը կորցրել է 05.05.11 թիվ 563-Ն որոշում)
i
7. Ընդերքի մասին երկրաբանական և այլ տեղեկատվական նյութերը պահվում են այդ նպատակի համար հարմարեցված գրապահոցներում:
8. Գրապահոցներում պետք է պահպանվի օդի ջերմաստիճանի և խոնավության հետևյալ ռեժիմը`
օդի թույլատրելի ջերմաստիճանը` (+16)-(+18)oC` +/-2oC շեղումով,
օդի հարաբերական խոնավությունը` 60-62 տոկոս` +/-5oC շեղումով:
Գրապահոցի յուրաքանչյուր սենյակում օդի ջերմաստիճանի և հարաբերական խոնավության չափման համար պետք է տեղադրված լինեն ջերմաչափ և խոնավաչափ, որոնց ցուցմունքները յուրաքանչյուր օր գրի են առնվում մատյանում:
9. Գրապահոցներում պետք է ապահովվի օդափոխությունը: Այնտեղ, որտեղ օդափոխությունը կատարվում է պատուհանների կամ օդանցքների միջոցով, պետք է վերջիններս ծածկվեն թանզիֆով կամ մանրանցք ցանցիկներով: Փոշոտված ֆոնդային նյութերը պետք է մաքրել փոշեծծիչով:
Ֆոնդային նյութերում բորբոսի հայտնաբերման դեպքում պետք է նյութերը չորացնել և մշակել ֆորմալինի 2 տոկոսանոց լուծույթով:
10. Պահպանության ենթակա մաշված և հնացած նյութերը պետք է վերականգնել: Չի թույլատրվում վերականգնման ենթակա նյութերից օգտվել` մինչև դրանց վերականգնումը:
11. Գրապահոցներում նյութերը պահպանվում են դարակների (ստելաժներ) վրա, ստանդարտ թղթապանակների մեջ: Դարակները պետք է գտնվեն պատից 0.7 մետր հեռավորության վրա, իսկ ներքևի դարակները` հատակից 0.15 մետր բարձրության վրա: Դարակների միջև եղած հեռավորությունը պետք է 0.7 մետրից ոչ պակաս լինի, իսկ անցումների լայնությունը` 1.0 մետրից:
12. Պահպանման համար հատկացված գրապահոցները պետք է համապատասխանեն հակահրդեհային անվտանգության պահանջներին և ունենան`
վստահելի փականներ ունեցող մետաղյա կամ փայտյա ամուր դռներ,
պատուհաններից կողմնակի անձանց հնարավոր ներթափանցումը կանխելու համար պետք է դրանք պատել մետաղյա պաշտպանիչ ցանցով,
մուտքի դռների, իսկ անհրաժեշտության դեպքում նաև պատուհանների ուղեկապում պետք է տեղադրված լինեն պահպանական ազդանշանակրեր:
13. Պետական և ծառայողական գաղտնիքի շարքը դասվող տեղեկությունները պահպանվում են «Պետական և ծառայողական գաղտնիքի մասին» Հայաստանի Հանրապետության օրենքով սահմանված կարգով:
14. Ընդերքօգտագործողների կողմից լիազորված մարմին պահպանման ներկայացված ընդերքի մասին երկրաբանական և այլ տեղեկատվական նյութերի գույքագրումը կատարվում է ոչ պակաս, քան 5 տարին մեկ անգամ: