(ուժը կորցրել է 30.08.12 թիվ 1092-Ն որոշում)
i
040.1396.131103
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«13» նոյեմբերի 2003 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
14 օգոստոսի 2003 թվականի N 1396-Ն
i
ՍԱՀՄԱՆԱՓԱԿ ՊԱՏԱՍԽԱՆԱՏՎՈՒԹՅԱՄԲ ԸՆԿԵՐՈՒԹՅԱՆ ԿԱՆՈՆԱԴՐԱԿԱՆ ԿԱՊԻՏԱԼՈՒՄ ԲԱԺՆԵՄԱՍԵՐԻ ՆԿԱՏՄԱՄԲ ՍԵՓԱԿԱՆՈՒԹՅԱՆ ԵՎ ԳՐԱՎԻ ԻՐԱՎՈՒՆՔՆԵՐԻ ԳՐԱՆՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ
«Սահմանափակ պատասխանատվությամբ ընկերությունների մասին» Հայաստանի Հանրապետության օրենքի պահանջներին համապատասխան` Հայաստանի Հանրապետության կառավարությունը որոշում է.
1. Հաստատել`
ա) սահմանափակ պատասխանատվությամբ ընկերության կանոնադրական կապիտալում բաժնեմասերի նկատմամբ սեփականության և գրավի իրավունքների գրանցման կարգը` համաձայն N 1 հավելվածի.
բ) սահմանափակ պատասխանատվությամբ ընկերության կանոնադրական կապիտալում բաժնեմասերի նկատմամբ սեփականության իրավունքի վկայագրի ձևը` համաձայն N 2 հավելվածի.
գ) սահմանափակ պատասխանատվությամբ ընկերության կանոնադրական կապիտալում բաժնեմասերի նկատմամբ գրավի իրավունքի վկայագրի ձևը` համաձայն N 3 հավելվածի:
i
2. ՈՒժը կորցրած ճանաչել Հայաստանի Հանրապետության կառավարության 2002 թվականի մարտի 2-ի «Սահմանափակ պատասխանատվությամբ ընկերության մասնակիցների գրանցամատյանի վարումը կանոնակարգելու մասին» N 194 որոշումը:
3. Սույն որոշումն ուժի մեջ է մտնում պաշտոնական հրապարակման օրվան հաջորդող 30-րդ օրը:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2003 ԹՎԱԿԱՆԻ ՍԵՊՏԵՄԲԵՐԻ 4-ԻՆ
Հավելված N 1
ՀՀ կառավարության
2003 թվականի օգոստոսի 14-ի
N 1396-Ն որոշման
ԿԱՐԳ
ՍԱՀՄԱՆԱՓԱԿ ՊԱՏԱՍԽԱՆԱՏՎՈՒԹՅԱՄԲ ԸՆԿԵՐՈՒԹՅԱՆ ԿԱՆՈՆԱԴՐԱԿԱՆ ԿԱՊԻՏԱԼՈՒՄ ԲԱԺՆԵՄԱՍԵՐԻ ՆԿԱՏՄԱՄԲ ՍԵՓԱԿԱՆՈՒԹՅԱՆ ԵՎ ԳՐԱՎԻ ԻՐԱՎՈՒՆՔՆԵՐԻ ԳՐԱՆՑՄԱՆ
i
1. Սույն կարգով սահմանվում են սահմանափակ պատասխանատվությամբ ընկերության (այսուհետ` ընկերություն) կանոնադրական կապիտալում բաժնեմասերի (դրանց մասերի) նկատմամբ մասնակիցների և այլ անձանց սեփականության ու գրավի իրավունքների գրանցման, գրանցամատյանի վարման, դրա մեջ փոփոխությունների կատարման, փոփոխությունների կատարումը մերժելու հիմքերն ու կարգը:
Սույն կարգի դրույթները չեն կանոնակարգում ընկերություն հանդիսացող բանկերի և վարկային կազմակերպությունների մասնակիցների գրանցամատյանի վարման, դրա մեջ փոփոխությունների կատարման, փոփոխությունների կատարումը մերժելու հետ կապված հարաբերությունները:
Ընկերության մասնակիցների գրանցամատյանի վարումը իրականացվում է էլեկտրոնային եղանակով, նպատակ ունի ընկերության կանոնադրական կապիտալի բաժնեմասերի նկատմամբ ընկերության մասնակիցների սեփականության իրավունքի լրիվ ու հավաստի հաշվառում կատարելու և ներառում է`
ա) ընկերության մասնակիցների գրանցամատյանի, դրա մեջ ընկերության մասնակցի անձնական հաշվի (տող գրանցամատյանում) բացումը.
բ) ընկերության, ընկերության մասնակցի մասին ընկերության մասնակիցների գրանցամատյանում առկա տեղեկությունների ցանկացած փոփոխության և (կամ) լրացման կատարումը.
գ) ընկերության մասնակիցների գրանցամատյանում ընկերության մասնակցի անձնական հաշվի փակումը.
դ) ընկերության մասնակիցների գրանցամատյանի (այդ թվում` դրանում ընկերության բոլոր մասնակիցների անձնական հաշիվների) փակումը:
Ընկերության մասնակիցների գրանցամատյանը միասնական է, որը ներառում է սույն կարգի 13-րդ կետում նշված տեղեկություններն ընկերության և նրա կանոնադրական կապիտալի բաժնեմասերի սեփականատերերի, գրավառուների մասին:
Ընկերության մասնակցի (գրավառուի) մասին տեղեկությունները գրառվում են ընկերության մասնակիցների գրանցամատյանի տող կազմող անձնական հաշվում, որն ունի հերթական համար (տվյալ ընկերության մասնակիցների գրանցամատյանում չկրկնվող քառանիշ թիվ) և ներառում է սույն կարգի 13-րդ կետում նշված տեղեկությունները:
(1-ին կետը փոփ. 04.08.11 թիվ 1122-Ն որոշում)
i
2. Ընկերության մասնակիցների գրանցամատյանի վարումը, դրա մեջ փոփոխությունների կատարումը կամ փոփոխությունների կատարման մերժումն իրականացվում են պետական ռեգիստրի տարածքային բաժնի կողմից:
Ընկերության վերակազմակերպմամբ (բացառությամբ վերակազմավորման) պայմանավորված` ընկերության մասնակիցները կամ նրանց բաժնեմասերը (դրանց փոփոխությունները) ընկերության մասնակիցների գրանցամատյանում գրանցվում են պետական ռեգիստրի կենտրոնական մարմնի կողմից` սույն կարգին համապատասխան:
(2-րդ կետը փոփ. 04.08.11 թիվ 1122-Ն որոշում)
i
3. Պետական ռեգիստրի տարածքային բաժնի կողմից ընկերության մասնակիցների գրանցամատյանում պարունակվող տեղեկությունները` կատարված փոփոխությունների հաշվառմամբ, թարմացվում են օրական առնվազն մեկ անգամ:
(3-րդ կետը փոփ. 04.08.11 թիվ 1122-Ն որոշում)
i
4. Անձը համարվում է ընկերության մասնակից իրավաբանական անձանց պետական գրանցումն իրականացնող մարմնի կողմից ընկերության մասնակիցների գրանցամատյանում նրա` որպես այդպիսին գրանցվելու պահից:
Անձը համարվում է ընկերության մասնակիցների գրանցամատյանում գրանցված` դրա մեջ սույն կարգի 13-րդ կետում նշված տեղեկությունների գրառման պահից:
Ընկերության մասնակիցների գրանցամատյանում կատարված գրանցումը հավաստվում է համապատասխան վկայագրով (այսուհետ` վկայագիր): Սահմանափակ պատասխանատվությամբ ընկերությունների մասնակիցների գրանցամատյանում սահմանված կարգով գրանցված մասնակցի կողմից ընկերության կանոնադրական կապիտալում բաժնեմասերի նկատմամբ սեփականության իրավունքի վկայագիր ստանալու համար ներկայացվում են`
ա) դիմում,
բ) «Պետական տուրքի մասին» Հայաստանի Հանրապետության օրենքով սահմանված չափով պետական տուրքի վճարման անդորրագիրը:
(4-րդ կետը փոփ. 17.02.11 թիվ 118-Ն որոշում)
i
4.1. Դիմումատուն սույն կարգի 4-րդ կետով սահմանված վկայագիրը կարող է ստանալ նաև նույն կետում նշված դիմումն էլեկտրոնային եղանակով ներկայացնելու դեպքում: Էլեկտրոնային եղանակով դիմումը ներկայացնելիս` դիմումատուն ընտրում է իր մասնակցությամբ կազմակերպությունը, համապատասխան դաշտում լրացնում անձնագրի, սոցիալական քարտի (սոցիալական քարտ չունենալու դեպքում` համապատասխան տեղեկանքի) տվյալները, իր էլեկտրոնային ստորագրության տվյալները, հավաստում է վճարումը համակարգում գործող վճարման հնարավորություններից որևէ մեկով, որից հետո համակարգը ձևավորում է վկայագիրը` պետական ռեգիստրի էլեկտրոնային կնիքով: Դիմումատուն կարող է դիմումը համակարգով ներկայացնել նաև առանց էլեկտրոնային ստորագրության, որի դեպքում դիմողն իր անձնագրով պետք է այցելի պետական ռեգիստրի համապատասխան գրասենյակ` անձի նույնականացման և վկայագիրն ստանալու համար:
(4.1-րդ կետը լրաց. 04.08.11 թիվ 1122-Ն որոշում)
5. Ընկերության մասնակիցների գրանցամատյանում առկա տեղեկությունները պետական ռեգիստրի կողմից չեն կարող փոփոխվել` բացառությամբ սույն կարգում նշված դեպքերի:
6. Գրանցամատյանում ընկերության մասնակիցների մասին առաջին գրանցումը կատարվում է ընկերության գրանցման պահին:
i
7. Ընկերության մասնակիցների գրանցամատյանում առաջին գրանցումը կատարելու նպատակով ընկերության պետական գրանցման համար անհրաժեշտ փաստաթղթերի հետ միաժամանակ ներկայացվում են`
ա) տեղեկություններ մասնակիցների մասին, ֆիզիկական անձի համար` անունը, ազգանունը, բնակության կամ հաշվառման վայրը, անձնագրային տվյալները, սոցիալական քարտի համարը, իսկ սոցիալական քարտի բացակայության դեպքում` սոցիալական քարտի բացակայության վերաբերյալ լիազորված մարմնի կողմից տրված տեղեկանքի համարը` կցելով տեղեկանքի պատճենը, իրավաբանական անձի համար` լրիվ ֆիրմային անվանումը, գտնվելու վայրը, գրանցման համարը, վկայականի համարը, քաղաքային, գյուղական կամ թաղային համայնքների համար` համայնքի անվանումը, Հայաստանի Հանրապետության համար` բաժնեմասի կառավարման լիազորություն ունեցող պետական կամ տարածքային կառավարման լիազորված մարմնի անվանումը.
բ) տեղեկություններ ընկերության յուրաքանչյուր մասնակցի բաժնեմասի չափի մասին.
գ) ընկերության բոլոր մասնակիցների անձնագրերի (գրանցման վկայականների) պատճենները:
Սույն կետում նշված տեղեկությունները ներկայացվում են ընկերության բոլոր մասնակիցների ստորագրությամբ: Եթե ընկերության պետական գրանցման համար ներկայացված փաստաթղթերը, այդ թվում` հիմնադրման մասին պայմանագիրը, պարունակում են սույն կետում նշված տեղեկությունները, ապա լրացուցիչ փաստաթղթեր չեն ներկայացվում:
(7-րդ կետը փոփ. 17.02.11 թիվ 118-Ն որոշում)
i
8. Ընկերության մասնակիցների գրանցամատյանում փոփոխությունների գրանցում կատարվում է, եթե ընկերության մասնակցի, նրա հաշվառման կամ բնակության վայրի, անձնագրային տվյալների, բաժնեմասի անվանական արժեքի կամ չափի փոփոխություն է կատարվել, բաժնեմասը կամ դրա մասը գրավ է դրվել: Ընկերության ֆիրմային անվանման, կանոնադրական կապիտալի, պետական գրանցման տվյալների փոփոխություններով կամ ընկերության գործունեության դադարմամբ պայմանավորված` ընկերության մասնակիցների գրանցամատյանում գրանցումները կատարվում են փոփոխությունների գրանցման հետ միաժամանակ` հիմք ընդունելով պետական գրանցման համար ներկայացված փաստաթղթերը:
(8-րդ կետը փոփ. 17.02.11 թիվ 118-Ն որոշում)
i
9. Ընկերության մասնակիցների գրանցամատյանում փոփոխություններ գրանցելու համար ներկայացվում են`
ա) բաժնեմասի (բաժնեմասերի) կամ դրա (դրանց) մասերի օտարման դեպքում` դիմում,
բաժնեմասի կամ դրա մասի օտարման հիմքը (պայմանագիր, դատարանի վճիռ և այլն),
գործարքի կողմ հանդիսացող մասնակիցների վկայագրերը (բաժնեմասը կամ դրա մասը ձեռք բերող կողմ հանդիսացող մասնակիցը վկայագիրը ներկայացնում է միայն այն դեպքում, երբ նա սույն կարգի համաձայն ձեռք է բերել վկայագիր),
պետական գրանցման վկայականի (եթե տվյալ կողմն իրավաբանական անձ է) համարը կամ անձնագրի (եթե տվյալ կողմը ֆիզիկական անձ է) պատճենը.
բ) «Սահմանափակ պատասխանատվությամբ ընկերությունների մասին» Հայաստանի Հանրապետության օրենքի 20-րդ հոդվածի 4-րդ մասի երրորդ պարբերությամբ նախատեսված դեպքում`
դիմում,
դատարանի վճիռը կամ կատարողական թերթիկը,
մասնակցի (մասնակիցների) վկայագիրը (վկայագրերը).
գ) ընկերությունից մասնակցի դուրս գալու դեպքում`
եթե դիմում է ընկերությունը`
դիմում` տրված ընկերության կողմից,
ընկերության անվանմամբ` դուրս գալու մասին մասնակցի դիմումի պատճենը,
դուրս եկող մասնակցի վկայագիրը (վկայագիրը ներկայացվում է միայն այն դեպքում, երբ մասնակիցը սույն կարգի համաձայն ձեռք է բերել վկայագիր).
եթե դիմում է դուրս եկող մասնակիցը`
դիմում` տրված դուրս եկող մասնակցի կողմից,
գրավոր հավաստում` ընկերությունից դուրս գալու մասին մասնակցի դիմումն ընկերության կողմից ստանալու վերաբերյալ,
դուրս եկող մասնակցի վկայագիրը (վկայագիրը ներկայացվում է միայն այն դեպքում, երբ մասնակիցը սույն կարգի համաձայն ձեռք է բերել վկայագիր).
դ) բաժնեմասի (դրա մասի) գրավի դեպքում`
բաժնեմասի սեփականատիրոջ դիմումը,
գրավի պայմանագիրը,
«Պետական տուրքի մասին» Հայաստանի Հանրապետության օրենքով սահմանված չափով վճարված պետական տուրքի վճարման անդորրագիրը,
բաժնեմասի նկատմամբ սեփականության իրավունքի վկայագիրը,
գրավառուի մասին տեղեկություններ, ֆիզիկական անձի համար` անունը, ազգանունը, բնակության վայրը, անձնագրային տվյալները, իրավաբանական անձի համար` լրիվ ֆիրմային անվանումը, գտնվելու վայրը, գրանցման համարը, վկայականի համարը, քաղաքային, գյուղական կամ թաղային համայնքների համար` համայնքի անվանումը, Հայաստանի Հանրապետության համար` բաժնեմասի կառավարման լիազորություն ունեցող պետական կամ տարածքային կառավարման լիազորված մարմնի անվանումը,
գրավառուի պետական գրանցման վկայականի համարը (անձնագրի պատճենը),
բաժնեմասի (դրա մասի) հաջորդող գրավի դեպքում` գրավառուի գրավոր համաձայնությունը,
բաժնեմասի (դրա մասի) գրավի պայմանագիրը,
բաժնեմասի սեփականատիրոջ դիմումը,
«Պետական տուրքի մասին» Հայաստանի Հանրապետության օրենքով սահմանված չափով վճարված պետական տուրքի վճարման անդորրագիրը,
ե) բաժնեմասի կամ դրա մասի գրավի դադարման դեպքում`
գրավատուի դիմումը,
գրավի իրավունքի վկայագիրը և բաժնեմասի նկատմամբ սեփականության իրավունքի վկայագիրը,
գրավառուի գրավոր հավաստումը գրավի դադարման մասին:
զ) բաժնեմասերի նկատմամբ սեփականության կամ գրավի իրավունքների վկայագրերի (կորստյան կամ գործածության համար ոչ պիտանի լինելու դեպքում) փոխարեն նորը տալու դեպքում ներկայացվում են`
ա. դիմումը,
բ. պետական գրանցման վկայականի համարը կամ անձնագրի պատճենը,
գ. սույն կարգի 14-րդ կետի երկրորդ պարբերությամբ սահմանված փաստաթղթերը,
դ. «Պետական տուրքի մասին» Հայաստանի Հանրապետության օրենքով սահմանված չափով պետական տուրքի վճարման անդորրագիրը.
է) բաժնեմասերի նկատմամբ սեփականության կամ գրավի վկայագրերի ոչնչացման և մարման կարգը հաստատում է արդարադատության նախարարը.
ը) ընկերության մասնակցի տվյալի փոփոխության դեպքում ներկայացվում են`
ա. դիմում,
բ. մասնակցի վկայագիրը (եթե մասնակիցը սույն կարգի համաձայն ձեռք է բերել այն),
գ. պետական գրանցման վկայականի համարը կամ անձնագրի պատճենը,
դ. «Պետական տուրքի մասին» Հայաստանի Հանրապետության օրենքով սահմանված չափով պետական տուրքի վճարման անդորրագիրը:
Եթե մասնակիցն օտարերկրյա քաղաքացի կամ իրավաբանական անձ է, ապա փոփոխության համար հիմք հանդիսացող փաստաթղթերը ներկայացվում են վավերացված և հայերեն թարգմանված:
(9-րդ կետը փոփ. 17.02.11 թիվ 118-Ն, 04.08.11 թիվ 1122-Ն որոշումներ)
10. Ընկերության մասնակիցների ժառանգներին կամ իրավահաջորդներին, բաժնեմասի փոխանցմամբ պայմանավորված, գրանցում կատարելու համար անհրաժեշտ է ներկայացնել ժառանգ կամ իրավահաջորդ հանդիսանալու մասին համապատասխան փաստաթուղթ, ինչպես նաև ընկերության բոլոր մասնակիցների գրավոր համաձայնությունը կամ ընկերության տնօրենի հավաստումն ընկերության մասնակիցների համաձայնության մասին, եթե ընկերության կանոնադրությամբ նախատեսված է, որ նման գործարքը հնարավոր է միայն ընկերության մասնակիցների համաձայնությամբ:
11. Ընկերության մասնակիցների գրանցամատյանում, օտարերկրյա իրավաբանական անձի կողմից բաժնեմասի ձեռքբերմամբ պայմանավորված, փոփոխության գրանցում կատարելու համար, բացի սույն կարգով նախատեսված փաստաթղթերից, ներկայացվում է նաև քաղվածք տվյալ երկրի առևտրային գրանցամատյանից կամ օտարերկրյա ներդրողի իրավական կարգավիճակը հաստատող այլ համազոր փաստաթուղթ` վավերացված և հայերեն թարգմանված:
i
12. Ընկերության մասնակցի բաժնեմասի փոխանցմամբ (օտարմամբ) պայմանավորված` գրանցում կատարելու համար` սույն կարգի 9-րդ կետում նշված փաստաթղթերի հետ միասին անհրաժեշտ է ներկայացնել նաև ընկերության տնօրենի գրավոր հավաստումը (որը կարող է ստորագրված և կնքված լինել ընկերության կնիքով, եթե այն կնիք ունի) ընկերության մասնակիցների նախապատվության իրավունքի (դրա առկայության դեպքում) իրականացման` օրենքով և ընկերության կանոնադրությամբ սահմանված կարգը պահպանելու մասին: Եթե ընկերության մասնակցի բաժնեմասը փոխանցվում է նոտարական կարգով վավերացված պայմանագրով, ապա սույն կետում նշված հավաստումը չի ներկայացվում:
Սույն կարգի 9-րդ կետի «ա» ենթակետով սահմանված դեպքերում ներկայացվում է նաև գրավառուի գրավոր համաձայնությունը (դիմողի գրավոր հավաստումը գրավառուի գրավոր համաձայնության առկայության մասին), եթե բաժնեմասը գրավ է դրված, և այդ իրավունքը գրանցվել է սույն կարգի համաձայն:
(12-րդ կետը փոփ. 17.02.11 թիվ 140-Ն որոշում)
13. Ընկերության մասնակիցների գրանցամատյանում գրառվում են հետևյալ տեղեկությունները`
ա) ընկերության մասին`
ընկերության լրիվ ֆիրմային անվանումը,
ընկերության պետական գրանցման տվյալները (գրանցման ու վկայականի համարները, գրանցման օրը),
ընկերության կանոնադրական կապիտալի չափը.
բ) մասնակցի (գրավառուի) մասին`
ֆիզիկական անձի համար` անունը, ազգանունը, բնակության վայրը, անձնագրային տվյալները, իրավաբանական անձի համար` լրիվ ֆիրմային անվանումը, գտնվելու վայրը, գրանցման համարը, վկայականի համարը, քաղաքային, գյուղական կամ թաղային համայնքների համար` համայնքի անվանումը, Հայաստանի Հանրապետության համար` բաժնեմասի կառավարման լիազորություն ունեցող պետական կամ տարածքային կառավարման լիազորված մարմնի անվանումը,
մասնակցի բաժնեմասի չափը (արտահայտված` տոկոսներով կամ մասերով` ընկերության կանոնադրական կապիտալի նկատմամբ),
մասնակցին, գրավառուին տրված վկայագրի (վկայագրերի) համարը (համարները).
գ) գրառման կատարման տարեթիվը, ամիսը, ամսաթիվը.
դ) այլ տեղեկություններ:
i
14. Անհրաժեշտ բոլոր փաստաթղթերը պետական ռեգիստր ներկայացվելու օրվան հաջորդող 5 օրվա ընթացքում պետական ռեգիստրի տարածքային բաժինը պետք է կատարի գրանցում: Սույն կարգի 9-րդ կետի «դ» և «ե» ենթակետերով նախատեսված գրանցումների կատարման դեպքում համապատասխան գրառում է կատարվում բաժնեմասի նկատմամբ սեփականության իրավունքի վկայագրի վրա:
Սույն կարգով սահմանված դեպքերում պետական ռեգիստր ներկայացվում է վկայգրի բնօրինակը, իսկ դրա կորստի դեպքում` իրավաբանական անձանց մասին տեղեկություններ հրապարակող մամուլի միջոցում տրված հայտարարությունը վկայագրի կորստի հետևանքով այն անվավեր ճանաչելու մասին:
Մինչև իրավաբանական անձանց մասին տեղեկություններ հրապարակող մամուլի միջոցի հիմնադրումը` հայտարարությունը տրվում է առնվազն 2500 օրինակ տպաքանակ ունեցող մամուլի միջոցով:
(14-րդ կետը փոփ. 17.02.11 թիվ 118-Ն, 04.08.11 թիվ 1122-Ն որոշումներ)
15. Վկայագիրը, որպես ընկերության մասնակիցների գրանցամատյանում կատարված գրանցումը հավաստող փաստաթուղթ, ենթակա է հատուկ հաշվառման:
16. Գրանցումը կարող է մերժվել, եթե ներկայացված փաստաթղթերը թերի են, կամ, եթե դրանցում պարունակվում են տեղեկություններ, որոնք հակասում են օրենքի կամ ընկերության կանոնադրության պահանջներին:
17. Գրանցումը մերժվելու դեպքում մերժման համար հիմք հանդիսացող փաստաթղթերը չեն վերադարձվում:
18. Գրանցման մերժումը պետք է լինի պատճառաբանված և պարունակի հղում օրենքի, սույն կարգի կամ ընկերության կանոնադրության այն կոնկրետ նորմերին, որոնց պահանջները խախտվել են:
i
19. Գրանցման մերժման մասին տրվում է համապատասխան տեղեկանք, որն ստորագրվում է պետական ռեգիստրի տարածքային բաժնի իրավասու աշխատողի էլեկտրոնային ստորագրությամբ և վավերացվում էլեկտրոնային կնիքով:
(19-րդ կետը փոփ. 04.08.11 թիվ 1122-Ն որոշում)
20. Գրանցումը մերժելը, ինչպես նաև գրանցումից խուսափելը կարող են բողոքարկվել դատական կարգով:
Հավելված N 2
i
ՀՀ կառավարության
2003 թվականի օգոստոսի 14-ի
N 1396-Ն որոշման
Ձև
ՎԿԱՅԱԳԻՐ
_______________________________________________________________________
(անվանումը)
ՍԱՀՄԱՆԱՓԱԿ ՊԱՏԱՍԽԱՆԱՏՎՈՒԹՅԱՆ ԸՆԿԵՐՈՒԹՅԱՆ ԿԱՆՈՆԱԴՐԱԿԱՆ ԿԱՊԻՏԱԼՈՒՄ ԲԱԺՆԵՄԱՍԵՐԻ ՆԿԱՏՄԱՄԲ ՍԵՓԱԿԱՆՈՒԹՅԱՆ ԻՐԱՎՈՒՆՔԻ
N 000000
Ընկերության պետական գրանցման համարը __________________________________
Գտնվելու վայրը _______________________________________________________
Կանոնադրական կապիտալի չափը` _____________________________________ դրամ
Ընկերության մասնակից _________________________________________________
_______________________________________________________________________
_______________________________________________________________________
(իրավաբանական անձանց համար` պետական գրանցման տվյալները, ֆիզիկական
անձանց համար` անձնագրային տվյալները, սոցիալական քարտի համարը)
Բաժնեմասի չափը _______________________________________________________
(տոկոսներով կամ մասերով)
Անձնական հաշվի համարը _________________________________________________
Գրանցման տարեթիվը, ամիսը, ամսաթիվը ____________________________________
Պետական ռեգիստրի ________________ տարածքային բաժնի պետ
___________________ ____________________
(ստորագրությունը) (անունը, ազգանունը)
Կ.Տ. _____ __________ 201 թ.
Հավելված N 3
ՀՀ կառավարության
2003 թվականի օգոստոսի 14-ի
N 1396-Ն որոշման
Ձև
ՎԿԱՅԱԳԻՐ
_______________________________________________________________________
(լրիվ ֆիրմային անվանումը)
ՍԱՀՄԱՆԱՓԱԿ ՊԱՏԱՍԽԱՆԱՏՎՈՒԹՅԱՆ ԸՆԿԵՐՈՒԹՅԱՆ ԿԱՆՈՆԱԴՐԱԿԱՆ ԿԱՊԻՏԱԼՈՒՄ ԲԱԺՆԵՄԱՍԵՐԻ ՆԿԱՏՄԱՄԲ ԳՐԱՎԻ ԻՐԱՎՈՒՆՔԻ
N 000000
Ընկերության պետական գրանցման համարը __________________________________
Գտնվելու վայրը _______________________________________________________
Կանոնադրական կապիտալի չափը` _____________________________________ դրամ
Ընկերության մասնակից (գրավատու) ______________________________________
_______________________________________________________________________
(իրավաբանական անձանց համար` պետական գրանցման տվյալները, ֆիզիկական
անձանց համար` անձնագրային տվյալները, սոցիալական քարտի համարը)
Գրավառու ______________________________________________________________
_______________________________________________________________________
(իրավաբանական անձանց համար` պետական գրանցման տվյալները,
ֆիզիկական անձանց համար` անձնագրային տվյալները)
Բաժնեմասի չափը ________________________________________________________
(տոկոսներով կամ մասերով)
Անձնական հաշվի համարը _________________________________________________
Գրանցման տարեթիվը, ամիսը, ամսաթիվը ____________________________________
Պետական ռեգիստրի ________________ տարածքային բաժնի պետ
___________________ ____________________
(ստորագրությունը) (անունը, ազգանունը)
Կ.Տ. _____ __________ 201 թ.
(3-րդ հավելվածը փոփ. 17.02.11 թիվ 118-Ն որոշում)