ՓՈՔՐ ԵՎ ՄԻՋԻՆ ՁԵՌՆԱՐԿԱՏԻՐՈՒԹՅԱՆԸ ՊԵՏԱԿԱՆ ԱՋԱԿՑՈՒԹՅ ...

040.2172.280103

«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ

«28» հունվարի 2003 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

19 դեկտեմբերի 2002 թվականի N 2172-Ն

ՓՈՔՐ ԵՎ ՄԻՋԻՆ ՁԵՌՆԱՐԿԱՏԻՐՈՒԹՅԱՆԸ ՊԵՏԱԿԱՆ ԱՋԱԿՑՈՒԹՅԱՆ 2003 ԹՎԱԿԱՆԻ ԾՐԱԳԻՐԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Փոքր և միջին ձեռնարկատիրության պետական աջակցության մասին» Հայաստանի Հանրապետության օրենքի 4-րդ հոդվածի պահանջները` Հայաստանի Հանրապետության կառավարությունը որոշում է.

1. Հաստատել փոքր և միջին ձեռնարկատիրությանը պետական աջակցության 2003 թվականի ծրագիրը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ

2003 ԹՎԱԿԱՆԻ ՀՈՒՆՎԱՐԻ 14-ԻՆ

Հավելված

Հայաստանի Հանրապետության

կառավարության 2002 թվականի

դեկտեմբերի 19-ի N 2172-Ն որոշման

ԾՐԱԳԻՐ ՓՈՔՐ ԵՎ ՄԻՋԻՆ ՁԵՌՆԱՐԿԱՏԻՐՈՒԹՅԱՆԸ ՊԵՏԱԿԱՆ ԱՋԱԿՑՈՒԹՅԱՆ 2003 ԹՎԱԿԱՆԻ

I. ԾՐԱԳՐԻ ՄՇԱԿՄԱՆ ՀԻՄՔԵՐԸ

Փոքր և միջին ձեռնարկատիրությանը պետական աջակցության 2003 թվականի ծրագրի (այսուհետ` ծրագիր) մշակման և իրականացման հիմքը 2000 թվականի դեկտեմբերի 5-ի «Փոքր և միջին ձեռնարկատիրության պետական աջակցության մասին» Հայաստանի Հանրապետության օրենքն է:

Ծրագրի մշակման համար հիմք են հանդիսացել նաև`

ա) 2000 թվականի հունիսին Հայաստանի Հանրապետության Ազգային ժողովի կողմից ընդունված Հայաստանի Հանրապետության կառավարության գործունեության ծրագիրը,

բ) Հայաստանում փոքր և միջին ձեռնարկատիրության զարգացման քաղաքականության և ռազմավարության հիմնադրույթները (Հայաստանի Հանրապետության կառավարության 2000 թվականի օգոստոսի 3-ի նիստի N 32 արձանագրության 3-րդ կետ),

գ) Հայաստանի Հանրապետության կառավարության 2001 թվականի դեկտեմբերի 27-ի N 1281 որոշմամբ հաստատված Հայաստանում փոքր և միջին ձեռնարկատիրության զարգացման 2002 թվականի պետական ծրագիրը,

դ) 2002 թվականի հոկտեմբերի 2-ին Հայաստանի Հանրապետության Նախագահի մոտ կայացած խորհրդակցության ՀՆԱ-22 արձանագրությունը:

II. ԾՐԱԳՐԻ ՆՊԱՏԱԿՆԵՐԸ ԵՎ ԽՆԴԻՐՆԵՐԸ

Ծրագրի նպատակները և խնդիրներն են`

ա) փոքր և միջին ձեռնարկատիրության (այսուհետ` ՓՄՁ) սուբյեկտների աջակցության համապատասխան ենթակառուցվածքների ստեղծում և ամրապնդում,

բ) ՓՄՁ-ի սուբյեկտների ֆինանսական և ներդրումային հնարավորությունների ընդլայնում,

գ) ՓՄՁ-ի սուբյեկտների արտահանման հնարավորությունների ընդլայնում,

դ) ՓՄՁ-ի սուբյեկտներում նորարարությունների և ժամանակակից տեխնոլոգիաների ներդրմանն աջակցություն,

ե) ՓՄՁ-ի սուբյեկտների` գործարար տեղեկատվության, խորհրդատվության, ուսուցման ծառայություններից օգտվելու հնարավորությունների ընդլայնում,

զ) ՓՄՁ-ի սուբյեկտների վիճակագրության վարման կատարելագործում:

III. ԾՐԱԳՐԱՅԻՆ ՄԻՋՈՑԱՌՈՒՄՆԵՐԻ ՀԱՄԱԿԱՐԳԸ

2003 թվականի համար նախատեսված ծրագրային միջոցառումների համակարգն ընդգրկում է ՓՄՁ-ի ոլորտի զարգացման և պետական աջակցության հետևյալ հիմնական ուղղությունները`

1.»ՀԱՅԱՍՏԱՆԻ ՓՈՔՐ ԵՎ ՄԻՋԻՆ ՁԵՌՆԱՐԿԱՏԻՐՈՒԹՅԱՆ ԶԱՐԳԱՑՄԱՆ ԱԶԳԱՅԻՆ ԿԵՆՏՐՈՆ» ՀԻՄՆԱԴՐԱՄԻ ԳՈՐԾՈՒՆԵՈՒԹՅԱՆ ԸՆԴԼԱՅՆՈՒՄ, ԴՐԱ ՄԱՐԶԱՅԻՆ 3 ՄԱՍՆԱՃՅՈՒՂԻ ՍՏԵՂԾՈՒՄ

«Հայաստանի փոքր և միջին ձեռնարկատիրության զարգացման ազգային կենտրոն» հիմնադրամը (Հայաստանի ՓՄՁ ԶԱԿ) իր գործունեությունը ծավալել է ՓՄՁ-ի զարգացման պետական քաղաքականության ու ոլորտի զարգացման ծրագրերի իրականացման ուղղությամբ: Այն իրականացնում է նաև Հայաստանի Հանրապետությունում ՓՄՁ-ի ոլորտի զարգացման ծրագրերի համակարգման գործառույթը:

Հայաստանի ՓՄՁ ԶԱԿ-ը, իրականացնելով ոլորտի զարգացման պետական ծրագիրը, աշխատանքներ է կատարել տեղեկատվական ու խորհրդատվական ծառայությունների դաշտի ընդլայնման, ինչպես նաև ՓՄՁ-ի ոլորտի կադրերի մասնագիտական ուսուցման ու վերապատրաստման համար:

Հայաստանի ՓՄՁ ԶԱԿ-ը նշված ծրագրերն իրականացնում է դոնոր կազմակերպությունների հետ համատեղ` համաֆինանսավորման սկզբունքով:

Ներկայումս Հայաստանի ՓՄՁ ԶԱԿ-ը միջազգային և օտարերկրյա դոնոր կազմակերպությունների հետ (մասնավորապես` Ամերիկայի Միացյալ Նահանգների միջազգային զարգացման գործակալություն, Համաշխարհային բանկ, Գերմանիայի տեխնիկական համագործակցության կազմակերպություն և այլն) վարում է բանակցություններ 2003 թվականին և հետագայում համատեղ (համաֆինանսավորման սկզբունքով) ծրագրերի իրականացման շուրջ:

Հայաստանի Հանրապետության տարածաշրջանային քաղաքականության իրականացման, մասնավորապես, Հայաստանի Հանրապետության մարզերում ՓՄՁ-ի սուբյեկտներին տեղեկատվական, խորհրդատվական ծառայությունների մատուցման, ինչպես նաև ուսուցողական ծրագրերի մշակման ու իրականացման, այդ թվում` ՓՄՁ-ի ոլորտի կադրերի մասնագիտական ուսուցման ու վերապատրաստման դասընթացների կազմակերպման նպատակով Հայաստանի Հանրապետության մարզերում (առավելապես, հեռավոր և սահմանամերձ) կստեղծվի Հայաստանի ՓՄՁ ԶԱԿ-ի երեք մասնաճյուղ: Այդ մասնաճյուղերի գործունեությունը կնպատակաուղղվի ՓՄՁ-ի զարգացման տարածաշրջանային և մարզային ու համայնքային ծրագրերի իրականացմանը` հաշվի առնելով Հայաստանի Հանրապետության տարածքային զարգացման գերակայությունները, առանձին բնակավայրերի առանձնահատկությունները և ներուժը:

2. ՓՄՁ-Ի ՍՈՒԲՅԵԿՏՆԵՐՈՒՄ ՆՈՐԱՐԱՐՈՒԹՅՈՒՆՆԵՐԻ ԵՎ ԺԱՄԱՆԱԿԱԿԻՑ ՏԵԽՆՈԼՈԳԻԱՆԵՐԻ ՆԵՐԴՐՄԱՆՆ ՈՒ ՄՏԱՎՈՐ ՍԵՓԱԿԱՆՈՒԹՅԱՆ ՊԱՇՏՊԱՆՈՒԹՅԱՆՆ ԱՋԱԿՑՈՒԹՅՈՒՆԸ

ՓՄՁ-ի սուբյեկտների զարգացմանը նպաստող առավել արդյունավետ միջոցներից է նորարարությունների և ժամանակակից տեխնոլոգիաների ներդրումը, որը հնարավորություն է ընձեռում ընդլայնելու և ավելացնելու արտադրվող արտադրանքի տեսականին, բարձրացնելու դրանց որակը և կրճատելու արտադրական ծախքերը: Դա իր հերթին հնարավորություն կտա բարձրացնելու ՓՄՁ-ի սուբյեկտների կողմից արտադրվող ապրանքների մրցունակությունը ներքին և արտաքին շուկաներում:

ՓՄՁ-ի սուբյեկտներում նորարարությունների և ժամանակակից տեխնոլոգիաների ներդրման խրախուսման, մտավոր սեփականության պաշտպանությանն աջակցության գործում հատկապես կարևորվում է պետության աջակցությունը, և այդ նպատակով 2003 թվականին կիրականացվեն հետևյալ միջոցառումները`

ա) նորարարությունների, ժամանակակից տեխնոլոգիաների և դրանցում ներդրումներն ապահովող ծրագրերի տեղեկատվական բազայի ստեղծում,

բ) ՓՄՁ-ի սուբյեկտներում նորարարությունների ներդրմանն աջակցություն,

գ) ՓՄՁ-ի սուբյեկտների կողմից արտոնագրերի ձեռքբերման և դրանց հեղինակային իրավունքների պաշտպանությանն աջակցություն,

դ) ժամանակակից տեխնոլոգիաների և նորարարական ծրագրերի մասին տեղեկատվության տրամադրում,

ե) նորարարական ծրագրերի և ժամանակակից տեխնոլոգիաների ներդրման վերաբերյալ խորհրդատվության տրամադրում, ինչպես նաև ուսուցողական ծրագրերի և դասընթացների կազմակերպում,

զ) աջակցություն ցուցահանդեսներում և տոնավաճառներում ՓՄՁ-ի սուբյեկտների կողմից առաջարկվող նորարարությունները ներկայացնելուն` օգտագործելով նաև ինտերնետ կապի հնարավորությունները:

3. ՓՄՁ-Ի ՍՈՒԲՅԵԿՏՆԵՐԻՆ ՖԻՆԱՆՍԱԿԱՆ ԵՎ ՆԵՐԴՐՈՒՄԱՅԻՆ ԱՋԱԿՑՈՒԹՅՈՒՆԸ

Հայաստանի ՓՄՁ ԶԱԿ-ի գործունեության ընդլայնման արդյունքում այն կսկսի իրականացնել «Փոքր և միջին ձեռնարկատիրության պետական աջակցության մասին» Հայաստանի Հանրապետության օրենքով նախատեսված` ՓՄՁ-ի սուբյեկտներին ֆինանսական ու ներդրումային աջակցության և ՓՄՁ-ի սուբյեկտներին վարկային երաշխիքներ տրամադրելու գործառույթը:

Հայաստանի ՓՄՁ ԶԱԿ-ը ՓՄՁ-ի սուբյեկտների ֆինանսավորման (վարկավորման) հետ կապված հիմնախնդիրները հաղթահարելու, նրանց ֆինանսական ու ներդրումային աջակցություն ցուցաբերելու նպատակով 2003 թվականին կիրականացնի ՓՄՁ-ի սուբյեկտներին վարկային երաշխիքների տրամադրման սխեմաների և մեխանիզմների մշակումը և կիրառումը, ինչը հաջողությամբ կիրառվում է ինչպես զարգացած, այնպես էլ անցումային տնտեսություն ունեցող երկրներում: Հայաստանի ՓՄՁ ԶԱԿ-ը ծրագրային այս միջոցառման իրականացման համար փորձագիտական աջակցություն կստանա Ամերիկայի Միացյալ Նահանգների միջազգային զարգացման գործակալության կողմից:

Նախատեսվում է ՓՄՁ-ի սուբյեկտներին վարկային երաշխիքները տրամադրել Հայաստանի ՓՄՁ ԶԱԿ-ի միջոցով, որը պայմանագրային հիմունքներով կհամագործակցի ՓՄՁ-ի սուբյեկտների վարկավորման ծրագրեր իրականացնող բանկերի հետ:

Վարկային երաշխիքներ կտրամադրվեն ՓՄՁ-ի այն սուբյեկտներին, որոնք գործում են Հայաստանի Հանրապետության տնտեսության գերակա ճյուղերում (ոլորտներում), ինչպես նաև հիմք ունենալով Հայաստանի Հանրապետության կառավարության տարածաշրջանային քաղաքականության գերակայությունները:

4. ՓՄՁ-Ի ՍՈՒԲՅԵԿՏՆԵՐՈՒՄ ՈՐԱԿԻ ԵՎ ՇՐՋԱԿԱ ՄԻՋԱՎԱՅՐԻ ԿԱՌԱՎԱՐՄԱՆ ՄԻՋԱԶԳԱՅԻՆ ՍՏԱՆԴԱՐՏՆԵՐԻ (ԻՍՕ 9000 ՇԱՐՔԻ ԵՎ ԻՍՕ 14000 ՇԱՐՔԻ) ՆԵՐԴՐՈՒՄԸ

Շուկայական տնտեսավարման պայմաններում, հատկապես ՓՄՁ-ի սուբյեկտների համար, ձեռնարկատիրական արդյունավետ գործունեություն ծավալելու հիմնական գրավականը թողարկվող արտադրանքի, մատուցվող ծառայությունների համապատասխանեցումն է միջազգային ստանդարտներին: Մասնավորապես, ներքին շուկայում ամրապնդվելու և արտաքին շուկաներ մուտք գործելու կարևոր նախապայման է որակի կառավարման (ԻՍՕ 9000 շարքի) միջազգային ստանդարտների ներդրումը:

Տնտեսավարող սուբյեկտներում որակի կառավարման համակարգերի ներդրումն էականորեն բարելավում է դրանց կառավարման արդյունավետությունը, ավելի մատչելի է դարձնում տեղեկատվությամբ ապահովումը և, վերջապես, բարձրացնում նշված սուբյեկտների մրցունակությունն ու հեղինակությունը:

Վերջին տարիներին կարևոր նշանակություն է տրվում տնտեսության կայուն զարգացման, շրջակա միջավայրի պահպանության հարցերին: Հետևաբար, տնտեսավարող սուբյեկտները, այդ թվում` ՓՄՁ-ի սուբյեկտները պետք է ձգտեն իրենց գործունեությունը համապատասխանեցնել շրջակա միջավայրի պաշտպանության (ԻՍՕ 14000 շարքի) միջազգային ստանդարտների պահանջներին:

Ներկայումս ՓՄՁ-ի սուբյեկտները որակի կառավարման համակարգերի ներդրման հետ կապված տեխնիկական ու ֆինանսական աջակցության կարիք ունեն:

Ելնելով նշված նկատառումներից և Հայաստանի Հանրապետության տնտեսական զարգացման գերակայություններից` 2003 թվականի ընթացքում ծրագրի շրջանակներում կցուցաբերվի աջակցություն ՓՄՁ-ի սուբյեկտներում որակի կառավարման (ԻՍՕ 9000 շարքի) և շրջակա միջավայրի պաշտպանության (ԻՍՕ 14000 շարքի) միջազգային ստանդարտների ներդրմանը, ինչպես նաև կկազմակերպվեն ԻՍՕ 9000 շարքի և ԻՍՕ 14000 շարքի միջազգային ստանդարտների ներդրման գործընթացներին նվիրված սեմինարներ, կհրատարակվեն համապատասխան տեղեկատվական նյութեր:

5. ՓՄՁ-Ի ՍՈՒԲՅԵԿՏՆԵՐԻՆ ԳՈՐԾԱՐԱՐ ՏԵՂԵԿԱՏՎՈՒԹՅԱՆ ԵՎ ԽՈՐՀՐԴԱՏՎՈՒԹՅԱՆ ՏՐԱՄԱԴՐՈՒՄԸ

ՓՄՁ-ի սուբյեկտներին տեղեկատվությամբ ապահովումը դրանց արդյունավետ գործունեության հիմնական երաշխիքներից է: ՓՄՁ-ի սուբյեկտներին անհրաժեշտ է ունենալ օպերատիվ տեղեկատվություն ընդհանուր տնտեսական վիճակի (կոնյունկտուրայի), արտաքին և ներքին շուկաներում, իրավաօրենսդրական դաշտում կատարվող փոփոխությունների, գիտատեխնիկական առաջընթացի ու բարձր տեխնոլոգիաների կիրառման, պետական գնումների իրականացման ընթացքի և ձեռնարկատիրության ոլորտին առնչվող այլ գործընթացների մասին: Նման տեղեկատվությունը հիմնականում տարածվում է զանգվածային լրատվության միջոցներով, որը միշտ չէ, որ ամբողջական է, և չի բավարարում գործարարների պահանջները:

Ծրագիրը նախատեսում է տեղեկատվական ու վերլուծական նյութերի և պարբերականի հրատարակում (դրանք կտեղադրվեն նաև Հայաստանի ՓՄՁ ԶԱԿ-ի ինտերնետային էջում)` ինչը համապարփակ գործարար տեղեկատվությամբ կապահովի Հայաստանի գործարար համայնքին (ՓՄՁ-ի սուբյեկտներ, բիզնեսին աջակցող կառույցներ և ՓՄՁ-ի շահերը ներկայացնող այլ կառույցներ):

ՓՄՁ-ի սուբյեկտների արդյունավետ գործունեության հիմնական երաշխիքներից և կարևոր նախադրյալներից է նաև ՓՄՁ-ի սուբյեկտներին խորհրդատվությամբ ապահովումը, որը հիմնականում իրականացվում է հասարակական ու առևտրային կազմակերպությունների կողմից: Դրանք հիմնականում մատչելի չեն ՓՄՁ-ի սուբյեկտներին, և ծրագրով նախատեսվում է շարունակել պետական աջակցությունը խորհրդատվական ծառայությունների մատուցման մատչելիության ապահովման գործում: Խորհրդատվությունը կիրականացվի շուկայավարման ծառայությունների մատուցման, ներքին և արտաքին շուկաներում ապրանքների ու ծառայությունների իրացման ուղղություններով: Կիրականացվեն նաև մաքսային բրոքերի ինստիտուտի ձևավորման ու զարգացման միջոցառումներ, մասնավորապես, հեռավոր և սահմանամերձ շրջաններում:

6. ՈՒՍՈՒՑՈՒՄԸ ԵՎ ՓՄՁ-Ի ՈԼՈՐՏԻ ԿԱԴՐԵՐԻ ՄԱՍՆԱԳԻՏԱԿԱՆ ՎԵՐԱՊԱՏՐԱՍՏՈՒՄԸ

Որպես տեխնիկական բնույթի առաջնահերթ հիմնախնդիր կարելի է առանձնացնել գործարարների համապատասխան գիտելիքների, ֆինանսական, հաշվապահական հաշվետվությունները գրագետ կազմելու և գործարար ծրագրեր մշակելու ունակությունների պակասը, ինչպես նաև Հայաստանի Հանրապետության օրենսդրությանը թերի տիրապետելը և այլն:

ՈՒսուցողական և ՓՄՁ-ի ոլորտի կադրերի մասնագիտական վերապատրաստման ծառայություններն ունեն իրենց դրական ազդեցությունը, սակայն հաճախ իրականացվում են կարճաժամկետ ծրագրերի շրջանակներում, համակարգված չեն, ինչը էապես նվազեցնում է դրանց արդյունավետությունը:

2003 թվականին ուսուցողական և ՓՄՁ-ի ոլորտի կադրերի մասնագիտական վերապատրաստման դասընթացները կկազմակերպվեն ՓՄՁ-ի սուբյեկտների կառավարման հիմնահարցերի, շուկայավարման հիմունքների, հաշվապահական հաշվետվությունների, ընկերությունների ֆինանսավորման և ֆինանսական կառավարման հնարավորությունների, ինչպես նաև ՓՄՁ-ի ոլորտի կադրերի մասնագիտական վերապատրաստման և այլ ուսուցման թեմաներով:

7. ՓՄՁ-Ի ՈԼՈՐՏԻ ԱՄՓՈՓ ՎԻՃԱԿԱԳՐՈՒԹՅԱՆ ՎԱՐՈՒՄԸ

Համաձայն Հայաստանում ՓՄՁ-ի զարգացման 2002 թվականի պետական ծրագրի` Հայաստանի Հանրապետության ազգային վիճակագրական ծառայության կողմից իրականացվել են ՓՄՁ-ի սուբյեկտների վիճակագրության վարման նախապատրաստման, ինչպես նաև այդ գործընթացի շարունակականությունն ապահովող աշխատանքներ:

Հայաստանի Հանրապետության ազգային վիճակագրական ծառայության կողմից 2002 թվականին պատրաստվել են Հայաստանում տնտեսական գործունեության որոշ ոլորտների (ճյուղերի) կտրվածքով` ըստ տնտեսավարող սուբյեկտների աշխատողների թվի, վիճակագրական-տեղեկատվական նյութեր, որոնցում տնտեսավարող սուբյեկտները դասակարգված են` համաձայն «Փոքր և միջին ձեռնարկատիրության պետական աջակցության մասին» Հայաստանի Հանրապետության օրենքի:

Սակայն նշված վիճակագրական տեղեկատվությունը հնարավորություն չի տալիս լիարժեք պատկերացում կազմելու Հայաստանի Հանրապետությունում ՓՄՁ-ի ոլորտի վերաբերյալ, քանի որ այն չի ընդգրկում երկրի տնտեսության բոլոր ոլորտները (ճյուղերը) և չի ներկայացնում ՓՄՁ-ի ոլորտն ամբողջությամբ: Անհրաժեշտ է կազմել տարեկան հաշվետվություն ՓՄՁ-ի ոլորտի մասին:

IV. ԾՐԱԳՐԻ ԻՐԱԿԱՆԱՑՄԱՆ ՍԿԶԲՈՒՆՔՆԵՐԸ

1. Ծրագիրն իրականացվում է Հայաստանի ՓՄՁ ԶԱԿ-ի և սույն ծրագրով նախատեսված` ՓՄՁ-ի ոլորտին աջակցող այլ կառույցների միջոցով:

2. Համաձայն «Փոքր և միջին ձեռնարկատիրության պետական աջակցության մասին» Հայաստանի Հանրապետության օրենքի` ՓՄՁ-ի զարգացման տարեկան պետական ծրագրերի ֆինանսավորումը, որն արտացոլվում է Հայաստանի Հանրապետության պետական բյուջեում` առանձին տողով, կատարվում է Հայաստանի Հանրապետության պետական բյուջեի միջոցների հաշվին:

3. Ծրագրի իրականացման միջոցառումների ցանկը` համաձայն հավելվածի, մշակում է Հայաստանի Հանրապետության առևտրի և տնտեսական զարգացման նախարարությունը:

4. Միջազգային դոնոր կազմակերպությունների հետ համաձայնությունների շրջանակներում 2003 թվականին կիրականացվեն ՓՄՁ-ի ոլորտի զարգացման համատեղ ծրագրեր (համաֆինանսավորման սկզբունքով)` Հայաստանի Հանրապետության օրենսդրությամբ սահմանված կարգով:

5. Ծրագրով նախատեսված միջոցառումներն իրականացվում են մրցութային կարգով ընտրված` բիզնեսին աջակցող և ծառայություններ մատուցող կազմակերպությունների կողմից:

Հավելված

փոքր և միջին ձեռնարկատիրությանը

պետական աջակցության 2003 թվականի

ծրագրի

ՑԱՆԿ

ՓՈՔՐ ԵՎ ՄԻՋԻՆ ՁԵՌՆԱՐԿԱՏԻՐՈՒԹՅԱՆԸ ՊԵՏԱԿԱՆ ԱՋԱԿՑՈՒԹՅԱՆ 2003 ԹՎԱԿԱՆԻ ԾՐԱԳՐԻ ԻՐԱԿԱՆԱՑՄԱՆ ՄԻՋՈՑԱՌՈՒՄՆԵՐԻ

    NN         Միջոցառումը                       Կատարողը       Կատարման

    ը/կ                                                         ժամկետը

    1.  «Հայաստանի փոքր և  միջին                Հայաստանի       2003

        ձեռնարկատիրության զարգացման ազգային     ՓՄՁ ԶԱԿ         թվականի

        կենտրոն» հիմնադրամի գործունեության                      առաջին

        ընդլայնում, դրա մարզային 3 մասնաճյուղի                  կիսամյակ

        ստեղծում                     

    2.  ՓՄՁ-ի սուբյեկտներում նորարարությունների Հայաստանի       2003

        և  ժամանակակից տեխնոլոգիաների ներդրմանն ՓՄՁ ԶԱԿ         թվական

        ու մտավոր սեփականության պաշտպանությանն  

        աջակցություն                                            

    3.  ՓՄՁ-ի սուբյեկտներին ֆինանսական և        Հայաստանի       2003

        ներդրումային աջակցության նպատակով ՓՄՁ-ի Հանրապետության  թվական

        սուբյեկտներին վարկային երաշխիքների      առևտրի  և  

        տրամադրման սխեմաների և  մեխանիզմների    տնտեսական

        մշակում, ՓՄՁ-ի սուբյեկտներին վարկային   զարգացման

        երաշխիքների տրամադրման փորձնական ծրագրի նախարարություն,

        իրականացում                             Հայաստանի ՓՄՁ

                                                ԶԱԿ, Հայաստանի

                                                Հանրապետության    

                                                շահագրգիռ         

                                                նախարարու-        

                                                թյուններ          

    4. Փոքր և  միջին ձեռնարկություններում որակի Հայաստանի       2003

       և  շրջակա միջավայրի կառավարման           ՓՄՁ ԶԱԿ         թվական

միջազգային ստանդարտների (ԻՍՕ 9000 շարքի

և ԻՍՕ 14000 շարքի) ներդրմանն

աջակցություն

    5. ՓՄՁ-ի սուբյեկտներին տեղեկատվական,        Հայաստանի       2003

       խորհրդատվական և  շուկայավարման           ՓՄՁ ԶԱԿ         թվական

ծառայությունների մատուցում, ներքին և

արտաքին շուկաներում ապրանքների և

ծառայությունների իրացմանն ու պետական

գնումներին մասնակցությանն աջակցություն,

տեղեկատվական ու վերլուծական նյութերի և

պարբերականի հրատարակում

    6. ՈՒսուցողական և  ՓՄՁ-ի կադրերի            Հայաստանի       2003

       մասնագիտական վերապատրաստման դասընթացների ՓՄՁ ԶԱԿ         թվական

կազմակերպում ինչպես ՓՄՁ-ի սուբյեկտների,

այնպես էլ ուսուցողական ծառայություններ

մատուցող կազմակերպությունների համար

    7. ՓՄՁ-ի ոլորտի ամփոփ վիճակագրության վարում Հայաստանի       2003

                                                Հանրապետության  թվական

                                                ազգային

                                                վիճակագրական

                                                ծառայության

                                                համաձայնությամբ

    8. Միջազգային դոնոր կազմակերպությունների    Հայաստանի       2003

       հետ ՓՄՁ-ի զարգացման համատեղ ծրագրերի     Հանրապետության  թվական

       մշակում և  իրականացում                   առևտրի  և  

                                                տնտեսական

                                                զարգացման

                                                նախարարություն,

                                                Հայաստանի ՓՄՁ

                                                ԶԱԿ, Հայաստանի

                                                Հանրապետության    

                                                շահագրգիռ         

                                                նախարարու-        

                                                թյուններ