040.0839.100901
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«10» սեպտեմբերի 2001 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
10 սեպտեմբերի 2001 թվականի N 839
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԳՈՒՅՔԻ ԿԱՌԱՎԱՐՄԱՆ ՆԱԽԱՐԱՐՈՒԹՅԱՆԸ ԳՈՒՅՔ ՎԱՃԱՌԵԼՈՒ ԹՈՒՅԼՏՎՈՒԹՅՈՒՆ ՏԱԼՈՒ ՄԱՍԻՆ
Հիմք ընդունելով «Պետական գույքի մասնավորեցման (սեփականաշնորհման) մասին» Հայաստանի Հանրապետության օրենքի 3-րդ հոդվածի 3-րդ կետի «ը» ենթակետը` Հայաստանի Հանրապետության կառավարությունը որոշում է.
1. «Նոր Նորք ուսանողական ավան» պետական փակ բաժնետիրական ընկերության գույքի կազմից առանձնացնել մարզահամալիրը և ակումբ-ճաշարանային մասնաշենքը (այսուհետև` գույք) և այն հանձնել Հայաստանի Հանրապետության պետական գույքի կառավարման նախարարության տնօրինությանը:
2. Թույլատրել Հայաստանի Հանրապետության պետական գույքի կառավարման նախարարությանը սույն որոշման 1-ին կետում նշված գույքը վաճառել «Զորախաչ» սահմանափակ պատասխանատվությամբ ընկերությանը` 15000000 դրամով:
3. Սահմանել` որ գնորդը պարտավոր է`
ա) սույն որոշումն ուժի մեջ մտնելուց հետո 30 օրվա ընթացքում «Պետական սեփականություն համարվող հիմնական միջոցների (ֆոնդերի) օտարումից մուտքեր» գանձապետական հաշվին վճարել սույն որոշման 2-րդ կետով սահմանված գումարը.
բ) իր միջոցների հաշվին իրականացնել անշարժ գույքի վաճառքից ծագող իրավունքների պետական գրանցման հետ կապված վճարներն ու տուրքերը:
4. Հայաստանի Հանրապետության պետական գույքի կառավարման նախարարությանը` սույն որոշման 3-րդ կետի «ա» ենթակետով նախատեսված վճարումը կատարելուց հետո 10-օրյա ժամկետում «Զորախաչ» սահմանափակ պատասխանատվությամբ ընկերության հետ կնքել առուվաճառքի պայմանագիր:
5. Հայաստանի Հանրապետության կրթության և գիտության նախարարությանը` սույն որոշման 1-ին կետով նախատեսված աշխատանքներն ավարտելուց հետո մեկամսյա ժամկետում` սահմանված կարգով ապահովել «Նոր Նորք ուսանողական ավան» պետական փակ բաժնետիրական ընկերության կանոնադրական կապիտալում համապատասխան փոփոխության կատարումը:
6. Սույն որոշումն ուժի մեջ է մտնում 2001 թվականի սեպտեմբերի 10-ից: