121.0594.280715
ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
«28» 07 2015 Թ.
ՊԵՏԱԿԱՆ ԳՐԱՆՑՄԱՆ ԹԻՎ 12115----
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔԱՅԻՆ ԿԱՌԱՎԱՐՄԱՆ ԵՎ ԱՐՏԱԿԱՐԳ ԻՐԱՎԻՃԱԿՆԵՐԻ ՆԱԽԱՐԱՐ ՀՐԱՄԱՆ
18 հունիսի 2015 թվականի N 594-Ն
i
ԱՐՏԱԴՐԱԿԱՆ ՎՏԱՆԳԱՎՈՐ ՕԲՅԵԿՏԻ ՏԵԽՆԻԿԱԿԱՆ ԱՆՎՏԱՆԳՈՒԹՅԱՆ ՎԿԱՅԱԳՐԻՆ ՆԵՐԿԱՅԱՑՎՈՂ ՊԱՀԱՆՋՆԵՐԸ ՍԱՀՄԱՆԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐՏԱԿԱՐԳ ԻՐԱՎԻՃԱԿՆԵՐԻ ՆԱԽԱՐԱՐԻ 2014 ԹՎԱԿԱՆԻ ՄԱՐՏԻ 14-Ի N 198-Ն ՀՐԱՄԱՆՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ
Ղեկավարվելով «Իրավական ակտերի մասին» Հայաստանի Հանրապետության օրենքի 72-րդ հոդվածի 1-ին մասով, «Տեխնիկական անվտանգության ապահովման պետական կարգավորման մասին» Հայաստանի Հանրապետության օրենքի 17-րդ հոդվածի 1-ին մասի ը) կետով`
ՀՐԱՄԱՅՈՒՄ ԵՄ.
1. Սահմանել արտադրական վտանգավոր օբյեկտի տեխնիկական անվտանգության վկայագրին ներկայացվող պահանջները` համաձայն հավելվածի:
i
2. ՈՒժը կորցրած ճանաչել Հայաստանի Հանրապետության արտակարգ իրավիճակների նախարարի 2014 թվականի մարտի 14-ի «Արտադրական վտանգավոր օբյեկտի տեխնիկական անվտանգության վկայագրին ներկայացվող պահանջները սահմանելու մասին» N 198-Ն հրամանը:
3. Հայաստանի Հանրապետության տարածքային կառավարման և արտակարգ իրավիճակների նախարարության աշխատակազմի քարտուղարության պետին` սույն հրամանը սահմանված կարգով ներկայացնել Հայաստանի Հանրապետության արդարադատության նախարարություն` պետական գրանցման:
Հավելված
ՀՀ տարածքային կառավարման և
արտակարգ իրավիճակների նախարարի
2015 թվականի հունիսի 18-ի
N 594-Ն հրամանի
ՊԱՀԱՆՋՆԵՐ ԱՐՏԱԴՐԱԿԱՆ ՎՏԱՆԳԱՎՈՐ ՕԲՅԵԿՏԻ ՏԵԽՆԻԿԱԿԱՆ ԱՆՎՏԱՆԳՈՒԹՅԱՆ ՎԿԱՅԱԳՐԻՆ ՆԵՐԿԱՅԱՑՎՈՂ
I. ԸՆԴՀԱՆՈՒՐ ԴՐՈՒՅԹՆԵՐ
1. Սույն պահանջներով սահմանվում են արտադրական վտանգավոր օբյեկտի տեխնիկական անվտանգության վկայագիր (այսուհետ` Վկայագիր) մշակելուն, վկայագրում ներառվող տեղեկություններին և վկայագրի կազմմանը ներկայացվող այլ պահանջները:
2. Արտադրական վտանգավոր օբյեկտի տեխնիկական անվտանգության վկայագրին ներկայացվող պահանջներում (այսուհետ` Պահանջներ) օգտագործվող հիմնական հասկացություններն ունեն «Տեխնիկական անվտանգության ապահովման պետական կարգավորման մասին» Հայաստանի Հանրապետության օրենքով (այսուհետ` Օրենք) սահմանված հասկացությունների իմաստը:
II. ՎԿԱՅԱԳՐԻՆ ՆԵՐԿԱՅԱՑՎՈՂ ՊԱՀԱՆՋՆԵՐԸ
3. Արտադրական վտանգավոր օբյեկտ շահագործող անձը Օրենքի 19-րդ հոդվածի 1-ին մասի ա) ենթակետի համաձայն պարտավոր է մշակել և հաստատել Վկայագիր:
4. Արտադրական վտանգավոր օբյեկտ շահագործող անձի կողմից մշակված արտադրական վտանգավոր օբյեկտի վկայագիրը պետք է համապատասխանի Պահանջներին:
5. Վկայագրում արտացոլվում և ամփոփվում են տվյալներ արտադրական վտանգավոր օբյեկտում տեխնածին վթարների հավանականության, դրանց բնույթի ու մասշտաբների, աշխատողների, բնակչության և շրջակա միջավայրի վրա վտանգավոր գործոնների հնարավոր ազդեցության, դրանց կանխարգելման և վերացման համար նախատեսված միջոցառումների, ինչպես նաև միջավայրի պաշտպանվածությունն ապահովելու նպատակով արտադրական վտանգավոր օբյեկտը գոտիավորող տարածքների մասին:
6. Վկայագրի էջերը համարակալվում, կարվում և հաստատվում են արտադրական վտանգավոր օբյեկտ շահագործող անձի կողմից:
7. Վկայագիրը ներառում է հետևյալ բաժինները`
1) արտադրական վտանգավոր օբյեկտի բնութագիրը.
2) արտադրական վտանգավոր օբյեկտի տեխնածին վթարների կամ արտադրական պատահարների ռիսկի վերլուծումը և գնահատումը.
3) արտադրական վտանգավոր օբյեկտի տեխնիկական անվտանգության համակարգը:
8. Վկայագիրը մշակելիս, արտադրական վտանգավոր օբյեկտ շահագործող անձը Վկայագրում կարող է ներառել նաև արտադրական վտանգավոր օբյեկտի առանձնահատկություններն ընդգծող լրացուցիչ տեղեկություններ:
9. Արտադրական վտանգավոր օբյեկտի բնութագիրը բաժնում տրվում են հետևյալ տեղեկությունները`
1) արտադրական վտանգավոր օբյեկտի անվանումը, գտնվելու վայրը, կապի միջոցները.
2) արտադրական վտանգավոր օբյեկտի տեսակն ըստ վտանգավորության դասակարգման բնութագրիչների` նշելով Օրենքի 6-րդ հոդվածի 1-ին մասի այն կետը, որին համապատասխան օբյեկտը բնութագրվում է որպես վտանգավոր.
3) տվյալներ բնակլիմայական պայմանների մասին, եթե բնակլիմայական պայմանները կարող են ազդել արտադրական վտանգավոր օբյեկտի տեխնոլոգիական գործընթացին.
4) իրականացվող գործունեության նկարագիրը` նշելով նպատակը, արտադրանքը, տեխնիկատեխնոլոգիական տվյալները (կարող է ներկայացվել բլոկ-սխեմայի տեսքով).
5) արտադրական վտանգավոր օբյեկտում օգտագործվող տեխնիկական միջոցների համառոտ նկարագրությունը:
10. Արտադրական վտանգավոր օբյեկտի տեխնածին վթարների կամ արտադրական պատահարների ռիսկի վերլուծումը և գնահատումը բաժնում տրվում են հետևյալ տեղեկությունները`
1) արտադրական վտանգավոր օբյեկտում հնարավոր տեխնածին վթարների կամ արտադրական պատահարների բացահայտումը, դրանց ընթացքի վրա ազդող գործոնների նկարագրությունը, վթարների մասշտաբները, մարդկանց առողջության և շրջակա միջավայրի վրա ազդեցության ծանրության աստիճանը.
2) նորմատիվ իրավական ակտերով սահմանված, դրա բացակայության դեպքում` գիտականորեն հիմնավորված արտադրական վտանգավոր օբյեկտում հնարավոր տեխնածին վթարների կամ արտադրական պատահարների հավանականության թույլատրելի քանակական ցուցանիշները.
3) հնարավոր տեխնածին վթարների կամ արտադրական պատահարների հավանականության գնահատումը.
4) արտադրական վտանգավոր օբյեկտում հնարավոր ամենավտանգավոր (վատթարագույն) տեխնածին վթարի զարգացման վերլուծությունը.
5) արտադրական վտանգավոր օբյեկտում հնարավոր ամենահաճախ կրկնվող տեխնածին վթարի կամ արտադրական պատահարի հանգամանալի վերլուծությունը:
11. Արտադրական վտանգավոր օբյեկտի տեխնիկական անվտանգության համակարգը բաժնում տրվում են հետևյալ տեղեկությունները`
1) տեխնիկական անվտանգության ծառայության մասին (պատասխանատու անձանց ազգանունները, պաշտոնները, որակավորումը).
2) տեխնիկական կանոնակարգերի, անհրաժեշտ տեխնիկական անվտանգության այլ նորմատիվ փաստաթղթերի պահպանման և օգտագործման վերաբերյալ.
3) արտադրական վտանգավոր օբյեկտում օգտագործվող դիտարկման, ազդարարման, կապի միջոցների և տեխնիկական անվտանգության ապահովման այլ տեխնիկական համակարգերի մասին.
4) արտադրական վտանգավոր օբյեկտի տեխնածին վթարների կամ արտադրական պատահարների ռիսկի նվազեցման նպատակով իրականացված աշխատանքների, այդ թվում` տեխնիկական անվտանգության ծառայության պարբերական զննումների մասին.
5) արտադրական վտանգավոր օբյեկտը գոտիավորող տարածքների մասին:
12. Վկայագիրը ենթակա է տեխնիկական անվտանգության փորձաքննության` օրենքին համապատասխան: