(ուժը կորցրել է 18.06.15 թիվ 596-Ն հրաման)
i
326.0038.040509
ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
«04» 05 2009 Թ.
ՊԵՏԱԿԱՆ ԳՐԱՆՑՄԱՆ ԹԻՎ 32609182
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐՏԱԿԱՐԳ ԻՐԱՎԻՃԱԿՆԵՐԻ ՆԱԽԱՐԱՐ ՀՐԱՄԱՆ
17 ապրիլի 2009 թվականի N 38-Ն
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐՏԱԿԱՐԳ ԻՐԱՎԻՃԱԿՆԵՐԻ ՆԱԽԱՐԱՐԻՆ ԿԻՑ ԿՈԼԵԳԻԱՅԻ ԱՇԽԱՏԱԿԱՐԳԸ ՀԱՍՏԱՏԵԼՈՒ ՄԱՍԻՆ
Համաձայն Հայաստանի Հանրապետության կառավարության 2008 թվականի մայիսի 15-ի N 531-Ն որոշմամբ հաստատված N 1 հավելվածի 8.1 կետի, 13-րդ կետի 4-րդ և 18-րդ ենթակետերի`
ՀՐԱՄԱՅՈՒՄ ԵՄ`
Հաստատել Հայաստանի Հանրապետության արտակարգ իրավիճակների նախարարին կից կոլեգիայի աշխատակարգը` համաձայն հավելվածի:
Հավելված
ՀՀ արտակարգ իրավիճակների
նախարարի
2009 թ. ապրիլի 17-ի
N 38-Ն հրամանի
ԱՇԽԱՏԱԿԱՐԳ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐՏԱԿԱՐԳ ԻՐԱՎԻՃԱԿՆԵՐԻ ՆԱԽԱՐԱՐԻՆ ԿԻՑ ԿՈԼԵԳԻԱՅԻ
1. ԸՆԴՀԱՆՈՒՐ ԴՐՈՒՅԹՆԵՐ
1. Հայաստանի Հանրապետության արտակարգ իրավիճակների նախարարին կից կոլեգիան (այսուհետ` կոլեգիա) խորհրդակցական մարմին է:
2. ԿՈԼԵԳԻԱՅԻ ԱՇԽԱՏԱՆՔՆԵՐԻ ԿԱԶՄԱԿԵՐՊՈՒՄԸ
2. Կոլեգիայի նախագահը Հայաստանի Հանրապետության արտակարգ իրավիճակների նախարարն է (այսուհետ` կոլեգիայի նախագահ):
3. Կոլեգիայի կազմը հաստատում է Հայաստանի Հանրապետության արտակարգ իրավիճակների նախարարը:
4. Կոլեգիայի կազմում կարող են ընդգրկվել Հայաստանի Հանրապետության արտակարգ իրավիճակների (այսուհետ` ԱԻ) նախարարի տեղակալները, ԱԻ նախարարության աշխատակազմի ղեկավարը, ԱԻ նախարարության կառուցվածքային և առանձնացված ստորաբաժանումների ղեկավարները, ինչպես նաև իրենց համաձայնությամբ արտակարգ իրավիճակների ոլորտում գործող քաղաքացիական հասարակության ինստիտուտների ներկայացուցիչներ, հեղինակություն վայելող ճանաչված գործիչներ, հասարակական կազմակերպությունների ներկայացուցիչներ և այլ անձինք:
5. Կոլեգիան իր աշխատանքները կազմակերպում է նիստերի միջոցով, որոնք գումարվում են առնվազն ամիսը մեկ անգամ: Անհրաժեշտության դեպքում արտահերթ նիստ կարող է գումարվել Կոլեգիայի նախագահի կամ անդամների պարզ մեծամասնության նախաձեռնությամբ:
6. Կոլեգիայի նիստն իրավազոր է, եթե դրան մասնակցում է կոլեգիայի անդամների կեսից ավելին:
7. Կոլեգիայի նիստերը վարում է կոլեգիայի նախագահը:
8. Կոլեգիայի նախագահը, անձնական նախաձեռնությամբ կամ կոլեգիայի անդամների մեկ երրորդի առաջարկությամբ, կոլեգիայի նիստերին կարող է հրավիրել Հայաստանի Հանրապետության նախարարությունների, գերատեսչությունների, պետական կառավարման տարածքային ու տեղական ինքնակառավարման մարմինների, հիմնարկների և կազմակերպությունների, զանգվածային լրատվամիջոցների, ինչպես նաև այլ շահագրգիռ մարմինների ներկայացուցիչներ:
9. Կոլեգիայի նիստերի լուսաբանման նպատակով կոլեգիայի նիստերին կարող են մասնակցել նաև ԱԻ նախարարության աշխատակազմի տեղեկատվության և հասարակայնության հետ կապերի բաժնի համապատասխան աշխատակիցները:
3. ԿՈԼԵԳԻԱՅԻ ՆԻՍՏԵՐԻ ԱՆՑԿԱՑՈՒՄԸ
10. Կոլեգիայի նիստերն անց են կացվում կոլեգիայի նախագահի կողմից հաստատված օրակարգով: Կոլեգիայի նախագահը որոշում է կոլեգիայի նիստի անցկացման վայրը, օրը և ժամը: Կոլեգիայի յուրաքանչյուր անդամ կոլեգիայի նիստի օրակարգում ընդգրկելու համար կարող է նիստից առնվազն 3 օր առաջ հարց ներկայացնել կոլեգիայի քարտուղարին:
11. Կոլեգիայի օրակարգում նշվում են`
1) կոլեգիայի նիստի անցկացման վայրը, տարեթիվը, ամսաթիվը և ժամը,
2) քննարկման ենթակա հարցերը և զեկուցողի անունը, ազգանունը:
12. Կոլեգիայի նիստերի օրակարգը և քննարկվելիք հարցերին վերաբերող այլ անհրաժեշտ փաստաթղթերը կոլեգիայի անդամներին են փոխանցվում նիստից առնվազն 2 աշխատանքային օր առաջ:
13. Կոլեգիայի աշխատանքային գործունեության կազմակերպչական-տեխնիկական ապահովումն իրականացնում է կոլեգիայի քարտուղարը:
4. ԿՈԼԵԳԻԱՅԻ ՆՊԱՏԱԿԸ, ՔՆՆԱՐԿՎՈՂ ՀԱՐՑԵՐԻ ԵՎ ԿԱՅԱՑՎՈՂ ՈՐՈՇՈՒՄՆԵՐԻ ՇՐՋԱՆԱԿԸ
14. Կոլեգիայի նպատակն է.
1) օժանդակել նախարարության գործունեության պլանավորման, քաղաքական որոշումների կայացման, միջոցառումների ծրագրերի մշակման գործընթացներին,
2) նպաստել ռազմավարական ծրագրերի իրականացմանը, գնահատմանը և այդ գործընթացներում քաղաքացիական հասարակության մասնակցությանը,
3) մշակել և ներկայացնել նախարարության կառավարման արդյունավետության բարձրացմանն ուղղված առաջարկություններ:
15. Կոլեգիայում քննարկվող հարցերի շրջանակն ընդգրկում է`
1) նախարարության համակարգի բարեփոխումների, ընդհանուր քաղաքականության ուղղությունների, ինչպես նաև առաջնահերթությունների վերաբերյալ առաջարկություններ ներկայացնելը,
2) Հայաստանի Հանրապետության կառավարության գործունեության ծրագրի, ազգային ռազմավարական ծրագրերի (կայուն զարգացման ծրագիր, հակակոռուպցիոն, միջնաժամկետ ծախսերի և այլն) հիման վրա նախարարության գործունեության տարեկան ծրագրի ձևավորումը և գերակա ուղղությունների վերաբերյալ առաջարկություններ ներկայացնելը,
3) Հայաստանի Հանրապետության, ազգային ռազմավարական, կայուն զարգացման, հակակոռուպցիոն, միջնաժամկետ ծախսերի և այլ ծրագրերի, նախարարության համապատասխան ոլորտների զարգացման ռազմավարությունների վերաբերյալ առաջարկություններ ներկայացնելը,
4) նախարարության տարեկան բյուջետային ծրագրերի պլանավորումը,
5) նախարարության քաղաքականության, ծրագրերի, ոլորտում իրականացվող բարեփոխումների և դրանց գործնական ազդեցության գնահատման և մոնիտորինգի ցուցանիշների վերաբերյալ առաջարկություններ ներկայացնելը,
6) նախարարության համակարգի կազմակերպությունների կողմից մատուցվող հանրային ծառայությունների մատուցման որակի և մատչելիության գնահատումը,
7) նախարարության համակարգում և համակարգից դուրս տեղեկատվության տրամադրման (հաղորդակցային) ռազմավարության քննարկումը,
8) Կոլեգիայի նախագահի նախաձեռնությամբ ռազմավարական և քաղաքականությանն առնչվող այլ հարցեր:
16. Կոլեգիան բաց քվեարկությամբ, ձայների պարզ մեծամասնությամբ կարող է ընդունել խորհրդատվական բնույթի որոշումներ:
17. Կոլեգիայում անցկացվող քննարկումների կամ կոլեգիայի որոշումների հիման վրա կոլեգիայի նախագահը կարող է ընդունել որոշումներ:
5. ԿՈԼԵԳԻԱՅԻ ՆԻՍՏԻ ԱՐՁԱՆԱԳՐՄԱՆ ԵՎ ԿՈԼԵԳԻԱՅԻ ԳՈՐԾԱՎԱՐՈՒԹՅԱՆ ԿԱՐԳԸ
18. Կոլեգիայի նիստերն արձանագրվում են:
19. Արձանագրությունը կազմում է կոլեգիայի քարտուղարը
20. Կոլեգիայի նիստը կարող է տեսագրվել կամ ձայնագրվել, որի վերաբերյալ համապատասխան նշում է կատարվում կոլեգիայի արձանագրության մեջ:
21. Նիստի արձանագրության մեջ նշվում է`
1) նիստի անցկացման տարեթիվը, ամսաթիվը և վայրը, նիստը սկսելու և ավարտելու ժամերը,
2) նիստի օրակարգը,
3) նիստին մասնակցող, հրավիրված անձանց և զանգվածային լրատվության միջոցների ներկայացուցիչների անունները,
4) քննարկվող հարցերի, զեկուցումների և ելույթների հիմնական դրույթները,
5) կայացված որոշումները, դրանց տարածման և (կամ) հրապարակման ձևերը:
22. Նիստի արձանագրությանը կցվում են քննարկված հարցերին վերաբերող նյութեր, այդ թվում` քննարկման ներկայացված իրավական և այլ փաստաթղթերի (հայեցակարգեր, ռազմավարություններ, հաշվետվություններ և այլն) նախագծերը, գրավոր զեկույցների և ելույթների տեքստերը:
23. Կոլեգիայի նիստի արձանագրությունը ստորագրվում է կոլեգիայի նախագահի և քարտուղարի կողմից 3 աշխատանքային օրվա ընթացքում:
24. Կոլեգիայի նիստերի արձանագրությունները պահվում են նախարարության աշխատակազմում:
6. ԿՈԼԵԳԻԱՅԻ ՆԱԽԱԳԱՀԻ ԵՎ ԱՆԴԱՄՆԵՐԻ ԼԻԱԶՈՐՈՒԹՅՈՒՆՆԵՐԸ
25. Կոլեգիայի նախագահը`
1) նախագահում է կոլեգիայի նիստերը,
2) հաստատում է կոլեգիայի օրակարգը և ստորագրում կոլեգիայի նիստերի արձանագրությունները,
3) լսում է կոլեգիայի կողմից կայացված որոշումների կատարման ընթացքի մասին հաշվետվությունները և տալիս ցուցումներ ու հանձնարարականներ,
4) կայացնում է որոշումներ քննարկված քաղաքականության ծրագրերի իրականացման համար ֆինանսական, նյութական, տեղեկատվական, մարդկային և այլ ռեսուրսների բաշխման վերաբերյալ,
5) որոշում է կոլեգիայի նիստերին հրավիրվող անձանց կազմը,
6) իրականացնում է սույն աշխատակարգով սահմանված այլ լիազորություններ:
26. Կոլեգիայի անդամն իրավունք ունի`
1) ներկայացնել հարցեր` կոլեգիայի օրակարգում ընդգրկելու համար,
2) Կոլեգիայի նիստերի ընթացքում քննարկվող հարցերի շուրջ ներկայացնել բանավոր կամ գրավոր կարծիք,
3) մասնակցել որոշումների կայացման համար քվեարկությանը:
27. Կոլեգիայի անդամը պարտավոր է մասնակցել կոլեգիայի նիստերին:
7. ԿՈԼԵԳԻԱՅԻ ԱՆԴԱՄԻ ԼԻԱԶՈՐՈՒԹՅՈՒՆՆԵՐԻ ԴԱԴԱՐԵՑՈՒՄԸ
28. Կոլեգիայի անդամի լիազորությունները դադարեցվում են`
1) իր դիմումի համաձայն,
2) անհարգելի պատճառով 3 անգամ անընդմեջ կոլեգիայի նիստերին չներկայանալու դեպքում:
8. ԿՈԼԵԳԻԱՅՈՒՄ ՔՆՆԱՐԿՎԱԾ ՀԱՐՑԵՐԻ ՎԵՐԱԲԵՐՅԱԼ ՏԵՂԵԿԱՏՎՈՒԹՅԱՆ ՏԱՐԱԾՈՒՄԸ ԵՎ ՀՐԱՊԱՐԱԿՈՒՄԸ
29. Կոլեգիայի նիստերի արձանագրությունները կամ արձանագրության քաղվածքները տրամադրում են կոլեգիայի բոլոր անդամներին, իսկ ընդունված որոշումները տեղադրվում են նախարարության ինտերնետային կայքում:
30. Կոլեգիայի նիստերի արձանագրությունների կամ արձանագրության քաղվածքների, տրամադրումը կոլեգիայի անդամներին ապահովում է կոլեգիայի քարտուղարը: