111.0173.180405
ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
«18» 04 2005 Թ.
ՊԵՏԱԿԱՆ ԳՐԱՆՑՄԱՆ ԹԻՎ 11105161
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՄՇԱԿՈՒՅԹԻ ԵՎ ԵՐԻՏԱՍԱՐԴՈՒԹՅԱՆ ՀԱՐՑԵՐԻ ՆԱԽԱՐԱՐ ՀՐԱՄԱՆ
28 մարտի 2005 թվականի N 173-Ն
i
«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՄՇԱԿՈՒՅԹԻ ԵՎ ԵՐԻՏԱՍԱՐԴՈՒԹՅԱՆ ՀԱՐՑԵՐԻ ՆԱԽԱՐԱՐՈՒԹՅԱՆ ԱՇԽԱՏԱԿԱԶՄՈՒՄ ՎԱՐՉԱԿԱՆ ՎԱՐՈՒՅԹԻ ՎԵՐԱԲԵՐՅԱԼ ԳՈՐԾԵՐԻ, ԴՐԱՆՑ ՀԱՇՎԱՌՄԱՆ ԳՐԱՆՑԱՄԱՏՅԱՆՆԵՐԻ ԵՎ ՎԱՐՉԱԿԱՆ ԱԿՏԵՐԻ ՀԱՇՎԱՌՄԱՆ ԳՐԱՆՑԱՄԱՏՅԱՆՆԵՐԻ ՎԱՐՄԱՆ ԿԱՐԳԸ» ՀԱՍՏԱՏԵԼՈՒ ՄԱՍԻՆ
Համաձայն «Վարչարարության հիմունքների և վարչական վարույթի մասին» Հայաստանի Հանրապետության օրենքի 28-րդ հոդվածի 2-րդ մասի և Հայաստանի Հանրապետության կառավարության 2004թ. հունիսի 25-ի «Վարչական վարույթի վերաբերյալ գործերի, դրանց հաշվառման գրանցամատյանների և վարչական ակտերի հաշվառման գրանցամատյանների վարման կարգն ու պայմանները սահմանող օրինակելի կարգը հաստատելու մասին» N 975-Ն որոշման 2-րդ կետի`
ՀՐԱՄԱՅՈՒՄ ԵՄ`
1. Հաստատել «Հայաստանի Հանրապետության մշակույթի և երիտասարդության հարցերի նախարարության աշխատակազմում վարչական վարույթի վերաբերյալ գործերի, դրանց հաշվառման գրանցամատյանների և վարչական ակտերի հաշվառման գրանցամատյանների վարման կարգը»` համաձայն հավելվածի:
2. Կառուցվածքային և առանձնացված ստորաբաժանումների ղեկավարներին` ապահովել «Հայաստանի Հանրապետության մշակույթի և երիտասարդության հարցերի նախարարության աշխատակազմում վարչական վարույթի վերաբերյալ գործերի, դրանց հաշվառման գրանցամատյանների և վարչական ակտերի հաշվառման գրանցամատյանների վարման կարգի» կատարումը:
3. «Հայաստանի Հանրապետության մշակույթի և երիտասարդության հարցերի նախարարության աշխատակազմում վարչական վարույթի վերաբերյալ գործերի, դրանց հաշվառման գրանցամատյանների և վարչական ակտերի հաշվառման գրանցամատյանների վարման կարգի» հսկողությունը դնել նախարարության աշխատակազմի ղեկավար Գ. Մանասյանի վրա:
Հավելված
ՀՀ մշակույթի և երիտասարդության
հարցերի նախարարի
2005 թ. մարտի 28-ի
N 173-Ն հրամանի
ԿԱՐԳ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՄՇԱԿՈՒՅԹԻ ԵՎ ԵՐԻՏԱՍԱՐԴՈՒԹՅԱՆ ՀԱՐՑԵՐԻ ՆԱԽԱՐԱՐՈՒԹՅԱՆ ԱՇԽԱՏԱԿԱԶՄՈՒՄ ՎԱՐՉԱԿԱՆ ՎԱՐՈՒՅԹԻ ՎԵՐԱԲԵՐՅԱԼ ԳՈՐԾԵՐԻ, ԴՐԱՆՑ ՀԱՇՎԱՌՄԱՆ ԳՐԱՆՑԱՄԱՏՅԱՆՆԵՐԻ ԵՎ ՎԱՐՉԱԿԱՆ ԱԿՏԵՐԻ ՀԱՇՎԱՌՄԱՆ ԳՐԱՆՑԱՄԱՏՅԱՆՆԵՐԻ ՎԱՐՄԱՆ
I. ԸՆԴՀԱՆՈՒՐ ԴՐՈՒՅԹՆԵՐ
1. Սույն կարգով սահմանվում է Հայաստանի Հանրապետության մշակույթի և երիտասարդության հարցերի նախարարության (այսուհետ` նախարարություն) աշխատակազմում վարչական վարույթի վերաբերյալ գործերի, դրանց հաշվառման գրանցամատյանների և վարչական ակտերի հաշվառման գրանցամատյանների վարման կարգը (այսուհետ` կարգ):
2. Սույն կարգը նպատակ ունի ապահովել վարչական վարույթի վերաբերյալ գործերի կանոնավոր վարումը և ֆիզիկական ու իրավաբանական անձանց համար դրանցում առկա տեղեկությունների, փաստաթղթերի և այլ նյութերի մասին արագ ու հեշտ իրազեկման հնարավորության ստեղծումը:
3. Նախարարության աշխատակազմում կարգի կազմակերպման և վարման համար պատասխանատու է համապատասխան ստորաբաժանման ղեկավարը:
4. Սույն կարգի գործողությունը տարածվում է նախարարության իրականացրած վարչական վարույթի վերաբերյալ գործերի վրա:
Սույն կարգը տարածվում է «Վարչարարության հիմունքների և վարչական վարույթի մասին» Հայաստանի Հանրապետության օրենքով (այսուհետ` օրենք) սահմանված կարգով անձանց դիմումների կամ նրանց բողոքի (այսուհետ` դիմում) հիման վրա, ինչպես նաև նախարարության նախաձեռնությամբ վարչական վարույթ հարուցած վարչական մարմինների վրա, եթե դիմումի կամ նախաձեռնության նպատակը գրավոր վարչական ակտ ընդունելն է:
5. Վարչական վարույթին առնչվող` սույն կարգում օգտագործվող տերմինները կամ հասկացություններն ունեն նույն նշանակությունը, ինչ նշանակությամբ դրանք օգտագործվում են օրենքում:
II. ՎԱՐՉԱԿԱՆ ՎԱՐՈՒՅԹԻ ՎԵՐԱԲԵՐՅԱԼ ԳՈՐԾԵՐԻ ՎԱՐՄԱՆ ԿԱՐԳԸ
6. Նախարարության աշխատակազմում վարչական վարույթի վերաբերյալ գործերը (այսուհետ` գործեր) կազմվում և վարվում են նախարարության աշխատակազմի կառուցվածքային և առանձնացված ստորաբաժանումների կողմից` անձանց դիմումի հիման վրա կամ նախարարության նախաձեռնությամբ` օրենքի 30-րդ հոդվածի համաձայն վարչական վարույթ հարուցվելու պահից:
7. Եթե նախարարությունը, օրենքի 33-րդ հոդվածի համաձայն, դիմումը վերահասցեագրում է իրավասու վարչական մարմին կամ վերադարձնում է դիմողին, ապա տվյալ դիմումի առնչությամբ գործ չի կազմվում, իսկ դիմումի և նրան կից փաստաթղթի պատճենները նախապես հանվում են, առանձնացվում վարչական վարույթ հարուցած գործերից և պահվում են առանձին` նախարարության սահմանած կարգով:
Եթե օրենքի 33-րդ հոդվածի համաձայն` վերահասցեագրված կամ վերադարձված դիմումը որևէ հիմքով (սխալ վերահասցեագրման կամ վերադարձման, կամ այլ պատճառով) ենթակա է նախարարության քննարկմանը, ապա դրա վերաբերյալ վարչական վարույթ հարուցելու պահից ևս կազմվում է գործ` սույն կարգին համապատասխան:
8. Նախարարությունը գործերը կազմում և վարում է առանձին- առանձին` հետևյալ խմբերով.
ա) անձի դիմումի հիման վրա հարուցված վարույթներով գործեր.
բ) նախարարության նախաձեռնությամբ հարուցված վարույթներով գործեր:
Հարուցված յուրաքանչյուր վարչական վարույթով կազմվում է առանձին գործ, որում ժամանակագրական կարգով ներառվում են տվյալ վարույթի հետ կապված անձի դիմումը և մյուս բոլոր փաստաթղթերը (ծանուցումներ, միջնորդություններ և այլն), տեղեկությունները, գործով ձեռք բերված ապացույցները` ներառյալ մյուս իրեղեն նյութերը, տվյալ գործով վարչական մարմին կամ նրա վերադաս վարչական մարմին բերված բողոքը, դատարան ներկայացված հայցը և դատարան բերված բողոքը, այդ կապակցությամբ կայացված վարչական կամ դատական ակտերը, հարկադիր կատարման դեպքում` նաև դրան առնչվող փաստաթղթերը, ինչպես նաև վարույթի ընթացքում ընդունված վարչական ակտը:
Եթե վարչական վարույթի գործով բողոք է ներկայացվել նախարարություն, ապա բողոքի վերաբերյալ նախարարության ընդունած վարչական ակտի, իսկ դրա դեմ դատարան հայց ներկայացնելու, այնուհետև դատարան բողոք բերելու դեպքում` համապատասխան դատական ակտի (ակտերի) պատճենները, որոնք առկա են նախարարությունում, վերջինս պատշաճ ձևով ուղարկում է այն վարչական մարմին, որի հարուցած վարույթով ընդունվել կամ կայացվել են հետագա վարչական կամ դատական ակտերը:
Վարչական վարույթի վերաբերյալ գործում պահվում են դրան առնչվող փաստաթղթերի բնօրինակները, իսկ օրենքով նախատեսված դեպքերում` դրանց պատճենները: Իրեղեն ապացույցները գործին են կցվում որևէ եղանակով փաթեթավորված կամ ամրակայված վիճակում` կնքված նախարարության կնիքով:
9. Վարչական վարույթի վերաբերյալ գործերը համարակալվում են, որն իրականացվում է աճող թվերով, յուրաքանչյուր տարվա կտրվածքով` տվյալ տարվա հունվարի 1-ից մինչև դեկտեմբերի 31-ն ընկած ժամանակահատվածում հարուցված վարույթներով գործերի ընդգրկմամբ:
10. Գործերը համարակալվում են, և դրանց վարման գործառույթները նախարարությունում իրականացվում են կենտրոնացված և միասնական համարակալման համակարգի կիրառմամբ:
Դրա անհնարինության դեպքում, մասնավորապես, եթե տարբեր հարցերի կամ ոլորտների վերաբերյալ վարչական ակտերը և դրանցից յուրաքանչյուրի հետ կապված վարչական վարույթներով գործերը հարուցում են նախարարության աշխատակազմի կառուցվածքային և առանձնացված ստորաբաժանումներ, ապա այդ ստորաբաժանումներից յուրաքանչյուրի գծով համապատասխան գործերի համարակալումը և դրանց վարման հետ կապված գործողությունները կարող են իրականացվել առանձնացված կարգով և, ըստ գործերի խմբերի` ենթախմբերի բաժանելով:
Նախարարությունը, որոշակի համակարգված կարգավորում ապահովելու նպատակով, ըստ առանձին ոլորտների վարչական վարույթների վերաբերյալ խմբակային գործերը (անձանց դիմումի հիման վրա կամ նախարարության նախաձեռնությամբ) ենթախմբերի բաժանելու դեպքում` ինչպես ըստ ենթախմբերի, այնպես էլ ըստ կառուցվածքային և առանձնացված ստորաբաժանումների, կարող է սահմանել գործերի համարակալման թվային կամ այբբենական պայմանանշանների կամ դրանց զուգորդությունները:
11. Վարչական վարույթի վերաբերյալ գործի շապիկի (կազմի) վրա գրվում են`
ա) նախարարության լրիվ անվանումը.
բ) վարչական վարույթի իրականացման գործառույթներ իրականացնող կառուցվածքային կամ առանձնացված ստորաբաժանման լրիվ անվանումը.
գ) տարին, որի ընթացքում վարչական վարույթը հարուցվել է.
դ) գործի հերթական համարը` արաբական թվերով:
Եթե նախատեսված է պայմանանշան (պայմանանշանների զուգորդություն), ապա հերթական համարի սկզբում` գծիկով անջատմամբ, նշվում է այդ պայմանանշանը (պայմանանշանների զուգորդություն):
Գործի հերթական համարից առաջ պետք է լինի հետևյալ գրառումը «Վարչական վարույթ. գործ N -».
ե) այն վարչական ակտի հակիրճ անվանումը, որը նախատեսվում է ընդունել վարչական վարույթի արդյունքում.
զ) նշում այն մասին, թե ում նախաձեռնությամբ է վարույթը հարուցվել (օրինակ` «Անձի դիմումի հիման վրա», «Անձի բողոքի հիման վրա», իսկ եթե վարչական մարմինն է վարույթ հարուցել, ապա` «Նախաձեռնության հիման վրա»):
Գործի շապիկի (կազմի) ներքևի աջ անկյունում նշվում են տվյալ վարույթի իրականացման համար պատասխանատու պաշտոնատար անձի անունը, հայրանունը և ազգանունը` պաշտոնի նշումով: Բացի պաշտոնատար անձի մասին տեղեկություններից, պետք է տեղ հատկացվի նաև վարույթն սկսելու և ավարտելու տարեթիվը, ամիսը ու ամսաթիվը նշելու համար:
Վարույթն սկսելու տարեթիվը, ամիսը ու ամսաթիվը նշվում են օրենքի 30-րդ հոդվածի 2-րդ և 3-րդ մասերով սահմանված ժամկետներին համապատասխան:
Վարույթն ավարտելու տարեթիվը, ամիսը ու ամսաթիվը նշվում են ըստ այն տարեթվի, ամսվա և ամսաթվի, երբ վարչական վարույթի վերաբերյալ տվյալ գործով ըստ էության որոշում է ընդունվել կամ վարույթը կարճվել է (օրենքի 50-րդ և 58-րդ հոդվածներ):
12. Տվյալ վարչական գործով դատարան հայց ներկայացնելու (օրենքի 70-րդ հոդված) կապակցությամբ գործը համապատասխան դատական մարմին փոխանցելու դեպքում նախարարությունը հանում է դրանում առկա բոլոր փաստաթղթերի պատճենները և սույն կարգին համապատասխան` կազմում այդ գործի կրկնօրինակը, որի շապիկի վրա` վերին աջ անկյունում, նշվում է` «Բողոքարկվել է»:
Գործի կրկնօրինակի մեջ պահվում են նաև բողոքարկման կամ հայցային վարույթի ընթացքում նախարարություն ուղարկված կամ վերջինիս կողմից ձեռք բերված փաստաթղթերը:
13. Եթե նախարարությունում բողոքարկման վարույթի կամ դատական վարույթների (երբ բողոքի վերաբերյալ նախարարության որոշման դեմ հայց է ներկայացվել դատարան, ինչպես նաև վերջինիս վճիռը կամ որոշումը դատական կարգով բողոքարկվել է) ավարտից հետո տվյալ վարույթին առնչվող գործն ամբողջությամբ օրենքով սահմանված կարգով վերադարձվում է նախարարություն, ապա հիմնական գործն ու դրա կրկնօրինակը պահվում են միասին:
14. Բողոքարկված գործերն առանձնացվում են չբողոքարկված գործերից և պահվում առանձին, նաև` բողոքարկման վարույթն ավարտելուց հետո:
15. Գործի վարույթն ավարտելուց հետո (սույն կարգի 11-րդ կետի վերջին պարբերություն) նախարարությունը կազմում է գործում առկա փաստաթղթերի անվանական ցանկը` նշելով դրանցից յուրաքանչյուրի էջերի թիվը:
Ցանկում պետք է նշվեն նաև գործում առկա իրեղեն ապացույցների անվանումները, դրանց քանակը: Ցանկերի վերջին էջի վրա ստորագրում է վարչական վարույթի իրականացման համար պատասխանատու պաշտոնատար անձը` նշելով իր անունը, հայրանունը և ազգանունը, ցանկը կազմելու տարեթիվը, ամիսն ու ամսաթիվը:
16. Եթե գործերը համարակալվել են պայմանանշանների (պայմանանշանների զուգորդությունների) կիրառմամբ, ապա նման գործերը նույնպես պահվում են առանձին` ըստ պայմանանշանների (պայմանանշանների զուգորդությունների):
17. Վարչական վարույթի վերաբերյալ գործերը հերթական տարվա ավարտից հետո, ելնելով նպատակահարմարությունից կամ նախարարությունում սահմանված կարգից, կարող են կենտրոնացված կարգով պահվել նրա որևէ ստորաբաժանումում կամ առանձին` այն ստորաբաժանումում, որն իրականացնում է դրանց հետ կապված գործառույթներ:
18. Ավարտված գործերը կարվում են և կնքվում նախարարության կնիքով:
Կարված մասում պետք է լինի գործերի վարման համար պատասխանատու անձի ստորագրությունը, պետք է նշվեն տարեթիվը, ամիսը ու ամսաթիվը:
19. Ֆիզիկական և իրավաբանական անձինք գործերի նյութերին, փաստաթղթերին ծանոթանում, դրանցից քաղվածքներ կամ պատճեններ, այդ թվում` լուսապատճեններ կատարում են օրենքով սահմանված կարգով:
III. ՎԱՐՉԱԿԱՆ ՎԱՐՈՒՅԹԻ ՎԵՐԱԲԵՐՅԱԼ ԳՈՐԾԵՐԻ ՀԱՇՎԱՌՄԱՆ ԳՐԱՆՑԱՄԱՏՅԱՆՆԵՐԻ ՎԱՐՄԱՆ ԿԱՐԳԸ
21. Նախարարությունում կազմվում և վարվում է վարչական վարույթի վերաբերյալ գործերի հաշվառման գրանցամատյան:
Հաշվի առնելով սույն կարգի 8-10-րդ կետերի պահանջները` նախարարությունը կարող է վարել առանձին գրանցամատյանները` ըստ Հայաստանի Հանրապետության օրենսդրությամբ իրեն վերապահված իրավասությունների կամ վարույթներն իրականացնող կառուցվածքային և առանձնացված ստորաբաժանումների:
22. Բացի սույն կարգի 21-րդ կետով նախատեսված դեպքերից, նախարարությունը առանձին գրանցամատյան է վարում դիմումի հիման վրա և առանձին` իր նախաձեռնությամբ հարուցված վարչական վարույթի վերաբերյալ գործերի հաշվառման համար:
23. Վարչական վարույթի վերաբերյալ գործերի հաշվառման գրանցամատյանը (գրանցամատյանները) կազմվում և լրացվում է յուրաքանչյուր տարվա համար առանձին:
24. Գրանցամատյանի շապիկի (կազմի) վրա գրվում են նախարարության լրիվ անվանումը, համապատասխան գրանցամատյանը կազմող և լրացնող կառուցվածքային կամ առանձնացված ստորաբաժանման լրիվ անվանումը, տարեթիվը, որի ընթացքում հարուցված գործերի մասին տեղեկությունները գրանցվում են տվյալ գրանցամատյանում, գործերի ընդհանուր թիվը: Եթե գրանցամատյանը կազմված է ըստ գործերի խմբերի և ենթախմբերի, ապա գրվում է նաև խմբի և ենթախմբի պայմանանիշը (դրանց զուգորդությունը):
Գրանցամատյանի շապիկի (կազմի) կենտրոնական մասում պետք է լինի հետևյալ գրառումը` «Գրանցամատյան վարչական վարույթի վերաբերյալ գործերի հաշվառման»:
25. Գրանցամատյանը կազմվում է, և դրա մեջ տեղեկությունները գրանցվում են` համաձայն N 1 ձևում ներկայացված` վարչական վարույթի վերաբերյալ գործերի հաշվառման գրանցամատյանների կազմման սխեմայի:
Դիմումի հիման վրա և նախարարության նախաձեռնությամբ հարուցված վարույթներով գործերը հաշվառվում են առանձին` հետևյալ կարգով.
գործերի հաշվառման համար սահմանել երեք աղյուսակ` հետևյալ սխեմայով.
ա) N 1 աղյուսակում նշել նախարարությունում ստացված դիմումի հիման վրա կամ նախարարության նախաձեռնությամբ հարուցված վարույթով գործին ընթացք տալու մասին տեղեկությունները.
բ) N 2 աղյուսակում նշել տվյալ գործով բերված բողոքը նախարարությունում քննարկելու և դրա վերաբերյալ ըստ էության որոշում ընդունելու մասին տեղեկությունները.
գ) N 3 աղյուսակում նշել տվյալ գործով դատարան ներկայացված հայցի, դատարան բերված բողոքի քննարկման և դրանց վերաբերյալ ըստ էության որոշում կայացնելու մասին տեղեկությունները:
26. N 1 աղյուսակում լրացվում են հետևյալ տեղեկությունները.
ա) հաշվառվող գործի հերթական համարը, որը պետք է համընկնի տվյալ գործի շապիկի (կազմի) վրա նշված համարակալմանը.
բ) նախարարությունում անձի դիմումն ստանալու տարեթիվը, ամիսը և ամսաթիվը:
Եթե վարչական վարույթը հարուցվել է նախարարության նախաձեռնությամբ, ապա նշվում են նախաձեռնության տարեթիվը, ամիսը և ամսաթիվը.
գ) դիմողի անունը, հայրանունը, ազգանունը (անվանումը), հասցեն (գտնվելու վայրը):
Նախարարության նախաձեռնությամբ վարչական վարույթ հարուցելու դեպքում նշվում են այն անձի մասին տեղեկությունները, որի նկատմամբ նախարարությունը նախատեսում է ընդունել համապատասխան վարչական ակտը.
դ) դիմումի հիման վրա հայցվող պահանջի համառոտ շարադրանքը, իսկ եթե նախարարության նախաձեռնությամբ է վարույթ հարուցվել, ապա` դրանով հետապնդվող նպատակի համառոտ շարադրանքը.
ե) դիմումի քննարկման կամ նախարարության նախաձեռնության արդյունքում նախարարության ընդունած վարչական ակտի համարը, դրա ընդունման տարեթիվը, ամիսն ու ամսաթիվը, այդ ակտով ընդունված որոշման համառոտ շարադրանքը.
զ) վարչական ակտի մասին դիմողին (դրա հասցեատիրոջը) իրազեկելու եղանակի (առձեռն, փաստով և այլն) և իրազեկման տարեթվի, ամսվա, ամսաթվի վերաբերյալ տեղեկությունները:
27. N 2 աղյուսակը լրացվում է միայն այն դեպքում, երբ տվյալ գործով բողոք է բերվել և այն, օրենքին համապատասխան, քննարկել, ըստ էության որոշում է ընդունել նախարարությունը:
28. N 2 աղյուսակը պետք է լինի N 1 աղյուսակի շարունակությունը և բովանդակի հետևյալ տեղեկությունները.
ա) բողոք բերելու տարեթիվը, ամիսը և ամսաթիվը.
բ) բողոք բերողի անունը, հայրանունը, ազգանունը (անվանումը), հասցեն (գտնվելու վայրը).
գ) բողոքի համառոտ շարադրանքը.
դ) բողոքը քննարկած և դրա վերաբերյալ ըստ էության որոշում ընդունած վարչական մարմնի անվանումը.
ե) բողոքի վերաբերյալ ընդունված վարչական ակտի համարը, ընդունման տարեթիվը, ամիսը, ամսաթիվը, այդ ակտով ընդունված որոշման համառոտ շարադրանքը.
զ) բողոքի վերաբերյալ ընդունված վարչական ակտի մասին բողոք բերողին իրազեկելու եղանակների (առձեռն, փոստով և այլն), տարեթվի, ամսվա, ամսաթվի վերաբերյալ տեղեկությունները:
29. N 3 աղյուսակը լրացվում է միայն այն դեպքում, երբ տվյալ գործով հայց, իսկ հետագայում նաև բողոք է ներկայացվել դատարան: Այն պետք է կազմի N 2 աղյուսակի շարունակությունը, իսկ եթե բողոքը վարչական կարգով չի բերվել, ապա` N 1 աղյուսակի շարունակությունը: Ընդ որում` պետք է հաշվի առնել այն հանգամանքը, որ վարչական վարույթի վերաբերյալ գործը կարող է քննվել դատական մի քանի ատյանում: Այդ պատճառով նպատակահարմար է N 3 աղյուսակը բաժանել երեք հավասար մասերի, յուրաքանչյուրում նշելով`
ա) տվյալ դատարան հայց ներկայացնելու կամ բողոք բերելու տարեթիվը, ամիսը և ամսաթիվը, հայցով կամ բողոքով ներկայացված պահանջի համառոտ շարադրանքը.
բ) հայցը ներկայացնողի կամ բողոքը բերողի անունը, հայրանունը, ազգանունը (անվանումը), նրա դատավարական կարգավիճակը.
գ) հայցի կամ բողոքի վերաբերյալ ընդունված դատական ակտի տարեթիվը, ամիսը, ամսաթիվը և այդ ակտի համառոտ շարադրանքը:
Այն դեպքում, երբ օրենքով սահմանված հիմքերով և կարգով գործին մասնակցող անձանց կամ օրենքով իրավասու այլ անձանց կամ կազմակերպությունների դիմումի հիման վրա գործի վերանայման դատական վարույթ է հարուցվում, ապա N 3 աղյուսակը լրացվում է նոր սյունակներով և, կախված նրանից, թե որ ատյանի դատարանն է վերանայել գործը, համապատասխան սյունակում նշվում են դիմումի հիման վրա գործի վերանայման, այդ թվում` դիմումի առնչությամբ կայացված դատական ակտի բողոքարկման ընթացքի մասին տեղեկությունները:
30. Հաշվառվող յուրաքանչյուր գործի մասին ամբողջական ու ամփոփ տեղեկություններ ունենալու և դրանցից օգտվելը հեշտացնելու նպատակով` վարչական վարույթի վերաբերյալ գործերի հաշվառման գրանցամատյանների յուրաքանչյուր էջ կարող է պարունակել NN 1, 2 և 3 աղյուսակները, այդ էջերից ամեն մեկում կարող են գրանցվել մի գործի վերաբերյալ տեղեկությունները` N 1 աղյուսակը` պարտադիր, բողոքի դեպքում` նաև N 2 աղյուսակը, իսկ դատարան հայց ներկայացնելու կամ բողոք բերելու դեպքում` նաև N 3 աղյուսակը լրացնելով:
Գրանցամատյանում գործերի մասին տեղեկությունները լրացվում են տվյալ գործերով վարչական վարույթ հարուցելու օրվանից և վարչական վարույթի ընթացքին զուգընթաց` ամբողջացված:
31. Գործերի հաշվառման գրանցամատյանը տեղեկություններ է պարունակում տվյալ տարվա ընթացքում հարուցված բոլոր վարչական գործերի մասին, որի վերջին էջի վրա նախարարության պատասխանատու պաշտոնատար անձը նշում է` «Գրանցամատյանը լրացված է», և ստորագրում` նշելով ստորագրման տարեթիվը, ամիսն ու ամսաթիվը: Գրանցամատյանը կարվում է և կնքվում նախարարության կնիքով:
32. Համապատասխան պաշտոնատար անձը գրանցամատյանում ուղղումներ կատարելու դեպքում տվյալ էջի աջ անկյունում` ուղղման զուգահեռ մասում, նշում է, որ ուղղումները կատարել է ինքը և ստորագրում է:
IV. ՎԱՐՉԱԿԱՆ ԱԿՏԵՐԻ ՀԱՇՎԱՌՄԱՆ ԳՐԱՆՑԱՄԱՏՅԱՆՆԵՐԻ ՎԱՐՄԱՆ ԿԱՐԳԸ
33. Նախարարությունը վարում է նաև վարչական վարույթով ընդունված վարչական ակտերի հաշվառման գրանցամատյան (այսուհետ` ակտերի հաշվառման գրանցամատյան):
Ակտերի հաշվառման գրանցամատյանը նպատակահարմար է վարել` ելնելով այն հանգամանքից, թե նախարարությունը ինչ սկզբունքներով է վարում վարչական վարույթի վերաբերյալ գործերը (խմբավորված, ենթախմբերի բաժանված համապատասխան պայմանանշանների, դրանց զուգորդությունների օգտագործմամբ, կենտրոնացված միասնական համակարգի կիրառմամբ և այլն):
Վարչական ակտերը, ըստ այդմ, կարող են հաշվառվել մեկից ավելի գրանցամատյաններում կամ մեկ միասնական գրանցամատյանում (ակտերի հաշվառման գրանցամատյանների կազմման օրինակելի սխեման ներկայացվում է N 2 ձևում):
34. Ակտերի հաշվառման գրանցամատյանի շապիկի (կազմի) վրա գրվում են նախարարության լրիվ անվանումը, վարույթի հետ կապված գործառույթներն իրականացնող կառուցվածքային և առանձնացված ստորաբաժանման անվանումը, տարեթիվը, որի ընթացքում ընդունված ակտերը հաշվառվել են տվյալ գրանցամատյանում և հաշվառված ակտերի ընդհանուր թիվը:
Գրանցամատյանի շապիկի (կազմի) կենտրոնական մասում պետք է լինի հետևյալ գրառումը` «Գրանցամատյան վարչական վարույթի վերաբերյալ գործերով ընդունված վարչական ակտերի հաշվառման»:
35. Ակտերի հաշվառման գրանցամատյանում լրացվում են նախարարության կողմից տվյալ տարվա ընթացքում ընդունված վարչական ակտերի վերաբերյալ տեղեկություններ, այդ թվում` եթե դրանք փոխկապակցված են կամ միմյանց լրացնում են, կամ առնչվում են որևէ ակտի հարկադիր ապահովմանը:
Հաշվառման ենթակա են նախարարության ընդունած` սույն կարգի 4-րդ կետի 2-րդ պարբերությամբ նախատեսված բոլոր վարչական ակտերը: Դրանք են`
ա) անձի դիմումի հիման վրա կամ նախարարության նախաձեռնությամբ հարուցված վարչական վարույթի արդյունքում ընդունված ակտը, այդ թվում` օրենքի 50-րդ հոդվածի համաձայն վարույթը կարճելու մասին ակտը, ինչպես նաև օրենքի 13-րդ գլխի դրույթներին համապատասխան վնասի հատուցման վերաբերյալ նախարարության ընդունած ակտը.
բ) վարչական ակտի բողոքարկման հիման վրա` օրենքի 73-րդ հոդվածի համաձայն դրա վերաբերյալ նախարարության ընդունած վարչական ակտը, եթե օրենքի համաձայն տվյալ բողոքի հիման վրա վարույթը նախարարությունն է իրականացրել` ներառյալ բողոքն առանց քննության թողնելու մասին որոշումը.
գ) օրենքով սահմանված կարգով դատարան հայց ներկայացնելու կամ հետագայում նաև դատարան բողոք բերելու դեպքում դատական ակտի հիման վրա նախարարության ընդունած նոր վարչական ակտը, ինչպես նաև օրենքի 76-րդ հոդվածի «գ» և «դ» կետերի համաձայն դատարանի կողմից նախարարության գործողությունը ոչ իրավաչափ ճանաչելու կամ վիճարկվող գործողություն կատարելու պարտականություն դնելու մասին որոշման հիման վրա նախարարության ընդունած նոր վարչական ակտերը.
դ) վարչական ակտի կատարման ապահովման նպատակով օրենքի 84-րդ հոդվածի համաձայն հարկադրանքի միջոցներ կիրառելու մասին պարտավոր անձին գրավոր նախազգուշացումը.
ե) օրենքի 85-րդ հոդվածի համաձայն նախարարության իրավասության սահմաններում հարկադրանքի միջոց նշանակելու մասին ակտը:
Ելնելով նպատակահարմարությունից` նախարարությունը կարող է հաշվառել նաև վարչական վարույթին առնչվող մյուս փաստաթղթերը (օրինակ` վարույթը կասեցնելու, փորձագետ հրավիրելու, զննում կատարելու, վարույթի ժամկետը երկարաձգելու, բացարկի վերաբերյալ ակտեր և այլն):
36. Ակտերի հաշվառման գրանցամատյանում հաշվառվող ակտի վերաբերյալ նշվում են հետևյալ տեղեկությունները.
ա) վարչական վարույթ հարուցելու հիմքը` անձի դիմումը (բողոքը) կամ նախարարության նախաձեռնությունը.
բ) հաշվառվող ակտի անվանումը (որոշում, հրաման, կարգադրություն և այլն), ընդունման տարեթիվը, ամիսը, ամսաթիվը և համարը.
գ) վարչական ակտի հասցեատիրոջ անունը, հայրանունը, ազգանունը (անվանումը), հասցեն (գտնվելու վայրը):
Եթե վարչական ակտն ուղղված է որոշակի անհատական չափանիշներով առանձնացված անձանց խմբի (օրենքի 53-րդ հոդվածի 1-ին մասի երկրորդ պարբերություն), ապա նշվում է միայն առանձնացված խմբի անվանումը.
դ) վարչական ակտի եզրափակիչ մասի (օրենքի 55-րդ հոդվածի 4-րդ մասի «զ» կետ) շարադրանքը.
ե) վարչական ակտին կից ներդիրների, հավելվածների կամ այլ լրացուցիչ փաստաթղթերի անվանումները, մեծաթիվ լինելու դեպքում` նշում դրանց քանակի մասին.
զ) վարչական ակտի ընդունմանը մասնակցած այլ վարչական մարմինների անվանումները, եթե այդ վարչական ակտն ընդունվել է օրենքի 52-րդ հոդվածին համապատասխան, ինչպես նաև վարչական ակտի ընդունման համար անհրաժեշտ` այլ վարչական մարմիններից ստացված թույլտվությունները կամ համաձայնությունները, մեծաթիվ լինելու դեպքում` նշում դրանց քանակի մասին.
է) վարչական ակտի էջերի և ակտի բաղկացուցիչ մասը կազմող մյուս փաստաթղթերի էջերի ընդհանուր թիվը:
37. Անհրաժեշտությունից ելնելով` նախարարությունը կարող է ակտի հաշվառման գրանցամատյաններում ներառել այդ ակտերին վերաբերող նաև այլ տեղեկություններ:
38. Ակտերի հաշվառման գրանցամատյանում ուղղումներ կատարելու դեպքում` համապատասխան պաշտոնատար անձը տվյալ էջի աջ անկյունում` ուղղմանը զուգահեռ մասում նշում է, որ ուղղումները կատարել է ինքը և ստորագրում է:
V. ԵԶՐԱՓԱԿԻՉ ԴՐՈՒՅԹՆԵՐ
39. Նախարարությունը յուրաքանչյուր տարվա ավարտից հետո` մինչև դրան հաջորդող տարվա մարտ ամիսն ստուգում է վարչական վարույթի վերաբերյալ գործերի, դրանց հաշվառման գրանցամատյանների և ակտերի հաշվառման գրանցամատյանների վարման սահմանված կարգի պահպանման վիճակը, ուսումնասիրում և վերլուծում է այդ գործում առկա թերությունների և բացթողումների պատճառները, միջոցառումներ է իրականացնում դրանց վերացման, ինչպես նաև այդ գործի համար պատասխանատու աշխատողների աշխատանքների բարելավման ուղղությամբ:
40. Վարչական վարույթի վերաբերյալ գործերը, դրանց հաշվառման և ակտերի հաշվառման գրանցամատյանները պահպանվում են նախարարությունում` սահմանված գործավարության կանոններին համապատասխան և օրենքով սահմանված կարգով ենթակա են արխիվ հանձնման:
Ձև 1
ՍԽԵՄԱ
ՎԱՐՉԱԿԱՆ ՎԱՐՈՒՅԹԻ ՎԵՐԱԲԵՐՅԱԼ ՀԱՇՎԱՌՄԱՆ ԳՐԱՆՑԱՄԱՏՅԱՆՆԵՐԻ ԿԱԶՄՄԱՆ
Աղյուսակ 1
Տեղեկություններ գործը նախարարությունում քննարկելու ընթացքի մասին
._________________________________________________________________________.
|NN |Դիմումն |Դիմողի (ակտի|Դիմումի հիման|Վարույթի |Նշում վարչական |
|ը/կ|ստանալու |հասցեատիրոջ)|վրա (նախարա- |արդյունքում |ակտի մասին |
| |(նախարա- |անունը, |րության |ընդունված |դիմողին |
| |րության |հայրանունը, |նախաձեռնու- |վարչական ակտի|(վարչական ակտի |
| |նախաձեռնու- |ազգանունը |թյամբ) |տարեթիվը, |հասցեատիրոջը) |
| |թյունը |(անվանումը) |հայցվող |ամիսը, |իրազեկելու |
| |դրսևորելու) | |(ներկայացվող)|ամսաթիվը, |եղանակի |
| |տարեթիվը, | |պահանջի |համարը և |(փոստով, առձեռն|
| |ամիսը, | |համառոտ |դրանով |և այլն), |
| |ամսաթիվը | |շարադրանքը |ընդունված |տարեթվի, ամսվա,|
| | | | |որոշման |ամսաթվի մասին |
| | | | |համառոտ | |
| | | | |շարադրանքը | |
|___|____________|____________|_____________|_____________|_______________|
| 1 | 2 | 3 | 4 | 5 | 6 |
|___|____________|____________|_____________|_____________|_______________|
| | | | | | |
._________________________________________________________________________.
Աղյուսակ 2
Տեղեկություններ բողոքը նախարարությունում քննարկելու ընթացքի մասին
._________________________________________________________________________.
|Բողոքը |Բողոքը |Բողոքի |Բողոքը |Բողոքի |Նշում բողոք |
|բերելու |բերողի |համառոտ |քննարկող |վերաբերյալ |բերողին |
|տարեթիվը,|անունը, |շարադրանքը|և դրա |ակտի |վարչական |
|ամիսը, |հայրանունը,| |վերաբերյալ |ընդունման |ակտի մասին |
|ամսաթիվը |ազգանունը | |ըստ էության|տարեթիվը, |իրազեկելու |
| |(անվանումը)| |որոշում |ամիսը, |եղանակի |
| |նրա | |ընդունող |ամսաթիվը, |(փոստով, |
| |կարգավիճակը| |վարչական |համարը և |առձեռն և |
| |(դիմող, | |մարմնի |այդ ակտով |այլն), |
| |երրորդ անձ)| |անվանումը |ընդունված |տարեթվի, ամսվա,|
| | | | |որոշման |ամսաթվի մասին |
| | | | |համառոտ | |
| | | | |շարադրանքը | |
|_________|___________|__________|___________|____________|_______________|
| 7 | 8 | 9 | 10 | 11 | 12 |
|_________|___________|__________|___________|____________|_______________|
| | | | | | |
._________________________________________________________________________.
Աղյուսակ 3
Տեղեկություններ հայցը (բողոքը) դատարանում քննարկելու ընթացքի մասին
._________________________________________________________________________.
| Հայցի քննությունը դատարանում | Բողոքի քննությունը գործը վերստին |
| | քննող դատարանում |
|_____________________________________|___________________________________|
|Հայցը |Հայցը |Հայցի |Գործը |Բողոքը |Բողոքի |
|ներկայացնելու|ներկայացնողի|վերաբերյալ|վարույթ |բերողի |վերաբերյալ |
|տարեթիվը, |անունը, |կայացված |ընդունելու|անունը, |կայացված |
|ամիսը, |հայրանունը, |դատական |տարեթիվը, |հայրանունը,|դատական ակտի|
|ամսաթիվը և |ազգանունը |ակտի |ամիսը, |ազգանունը |տարեթիվը, |
|հայցի համառոտ|(անվանումը) |տարեթիվը, |ամսաթիվը |(անվանումը)|ամիսը, |
|շարադրանքը | |ամիսը, |և համառոտ|նրա դատական|ամսաթիվը |
| | |ամսաթիվը |շարադրանքը|կարգավիճակը|և համառոտ |
| | |և համառոտ| | |շարադրանքը |
| | |շարադրանքը| | | |
|_____________|____________|__________|__________|___________|____________|
| 13 | 14 | 15 | 16 | 17 | 18 |
|_____________|____________|__________|__________|___________|____________|
| | | | | | |
._________________________________________________________________________.
_____________________________________.
Բողոքի քննությունը վճռաբեկ |
դատարանում |
_____________________________________|
Բողոքը |Բողոքը |Բողոքի |
վարույթ |բերողի |վերաբերյալ |
ընդունելու|անունը, |կայացված |
տարեթիվը, |հայրանունը, |որոշման |
ամիսը, |ազգանունը |տարեթիվը, |
ամսաթիվը |(անվանումը),|ամիսը, |
և բողոքի |նրա |ամսաթիվը |
համառոտ |դատավարական |և համառոտ |
շարադրանքը|կարգավիճակը |շարադրանքը |
___________|____________|____________|
19 | 20 | 21 |
___________|____________|____________|
| | |
_____________________________________.
ՍԽԵՄԱ
ՎԱՐՉԱԿԱՆ ԱԿՏԵՐԻ ՀԱՇՎԱՌՄԱՆ ԳՐԱՆՑԱՄԱՏՅԱՆՆԵՐԻ ԿԱԶՄՄԱՆ
._________________________________________________________________________.
|NN |Վարչական |Վարչական |Վարչական ակտի|Վարչական ակտի |Վարչական ակտին |
|ը/կ|վարույթ |ակտի |հասցեատիրոջ |եզրափակիչ |կից |
| |հարուցելու |անվանումը |անունը, |մասի (օրենքի |ներդրումների, |
| |հիմքը` անձի|(որոշում, |հայրանունը, |55-րդ հոդվածի |հավելվածների, |
| |դիմումը |հրաման, |ազգանունը |4-րդ մասի |այլ փաստաթղթերի |
| |(բողոքը) |կարգադրու- |(անվանումը), |«զ» կետ) |անվանումները |
| |կամ |թյուն և |նրա հասցեն |համառոտ |(դրանց ընդհանուր|
| |նախարա- |այլն), |(գտնվելու |շարադրանքը |թիվը) |
| |րության |ընդունման |վայրը), | | |
| |նախաձեռնու-|տարեթիվը |խմբային | | |
| |թյունը |և համարը |չափանիշներով | | |
| | | |առանձնացվող | | |
| | | |հասցեատերերի | | |
| | | |դեպքում` խմբի| | |
| | | |անվանումը | | |
|___|___________|___________|_____________|______________|________________|
| 1 | 2 | 3 | 4 | 5 | 6 |
|___|___________|___________|_____________|______________|________________|
| | | | | | |
._________________________________________________________________________.
_________________________________________________________.
Վարչական ակտի |Վարչական ակտի |Վարչական ակտի` ներառյալ|
ընդունմանը |ընդունման համար |ներդիրների էջերի և |
մասնակցած այլ |անհրաժեշտ այլ |ակտերի բաղկացուցիչ մասը|
վարչական մարմնի|վարչական ակտերի |կազմող հավելվածների, |
(մարմինների) |(թույլտվություն,|այլ փաստաթղթերի էջերի |
անվանումը |համաձայնություն |ընդհանուր թիվը |
(անվանումները) |և այլն) |(օրենքի 55-րդ հոդվածի |
(օրենքի 52-րդ |անվանումները |3-րդ մաս) |
հոդված) |(դրանց ընդհանուր| |
|թիվը) | |
________________|________________|_______________________|
7 | 8 | 9 |
________________|________________|_______________________|
| | |
_________________________________________________________.
Սխեմայի 1-ին սյունակում նշվում են վարչական ակտերի հերթական համարները /1,2,3..../:
Սխեմայի 9-րդ սյունակում էջերի թվերը պետք է գրվեն գծիկով անջատմամբ, օրինակ` «3-7», որտեղ «3»-ը ցույց կտա վարչական ակտի` ներառյալ ներդիրների էջերի թիվը, իսկ «7»-ը` այդ վարչական ակտին կից հավելվածների և այլ փաստաթղթերի էջերի ընդհանուր թիվը: