ՀՀ-ՈՒՄ ՇԵՆՔԵՐԻ ԵՎ ՇԻՆՈՒԹՅՈՒՆՆԵՐԻ ԸՆԹԱՑԻԿ ՆՈՐՈԳՄԱՆ, ...

(ուժը կորցրել է 22.05.06 թիվ 73-Ն հրաման)

117.0053.141102

ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ

                                      «14»         11           2002 Թ.

                                        ՊԵՏԱԿԱՆ ԳՐԱՆՑՄԱՆ ԹԻՎ 11702298

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔԱՂԱՔԱՇԻՆՈՒԹՅԱՆ ՆԱԽԱՐԱՐ ՀՐԱՄԱՆ

22 օգոստոսի 2002 թվականի N 53

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՇԵՆՔԵՐԻ ԵՎ ՇԻՆՈՒԹՅՈՒՆՆԵՐԻ ԸՆԹԱՑԻԿ ՆՈՐՈԳՄԱՆ, ՆԵՐՔԻՆ ՀԱՐԴԱՐՄԱՆ ԵՎ ԲԱՐԵԿԱՐԳՄԱՆ ԱՇԽԱՏԱՆՔՆԵՐԻ ԲՆՈՐՈՇՄԱՆ, ԴԱՍԱԿԱՐԳՄԱՆ ԵՎ ԴՐԱՆՑ ԻՐԱԿԱՆԱՑՄԱՆ ԿԱՐԳԻ ՄԱՍԻՆ

Ի կատարումն Հայաստանի Հանրապետության կառավարության 2002թ. փետրվարի 2-ի «Հայաստանի Հանրապետությունում շինարարության թույլտվության և քանդման թույլտվության կարգը հաստատելու մասին» 91 որոշման 2-րդ կետի հանձնարարականի`

ՀՐԱՄԱՅՈՒՄ ԵՄ`

1. Հաստատել «Հայաստանի Հանրապետությունում շենքերի և շինությունների ընթացիկ նորոգման, ներքին հարդարման և բարեկարգման աշխատանքների բնորոշման, դասակարգման և դրանց իրականացման կարգ»-ը:

2. Սույն կարգը սահմանված կարգով ներկայացնել ՀՀ արդարադատության նախարարության գրանցմանը:

3. Սույն հրամանի կատարման հսկողությունը դնել նախարարի տեղակալ Ռ. Ալավերդյանի վրա:

Հաստատված է

Հայաստանի Հանրապետության

քաղաքաշինության նախարարության

2002 թվականի օգոստոսի 22-ի

N 53 հրամանով

ԿԱՐԳ

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՇԵՆՔԵՐԻ ԵՎ ՇԻՆՈՒԹՅՈՒՆՆԵՐԻ ԸՆԹԱՑԻԿ ՆՈՐՈԳՄԱՆ, ՆԵՐՔԻՆ ՀԱՐԴԱՐՄԱՆ ԵՎ ԲԱՐԵԿԱՐԳՄԱՆ ԱՇԽԱՏԱՆՔՆԵՐԻ ԲՆՈՐՈՇՄԱՆ, ԴԱՍԱԿԱՐԳՄԱՆ ԵՎ ԴՐԱՆՑ ԻՐԱԿԱՆԱՑՄԱՆ

1. Սույնով սահմանվում է շինարարության թույլտվություն չպահանջող ընթացիկ նորոգման, ներքին հարդարման և բարեկարգման աշխատանքների բնորոշումը, դասակարգումը և դրանց իրականացման ընթացակարգերը:

2. Ընթացիկ նորոգման աշխատանքներն (տես` հավելված 1) ապահովում են շենքերի, շինությունների, ինժեներական սարքավորումների, ինչպես նաև դրանց առանձին մասերի սիստեմատիկ պահպանումն ու շահագործման որակը և ներառում են վնասվածքների և անսարքությունների վերացման պրոֆիլակտիկ միջոցառումներ:

3. Ընթացիկ նորոգման աշխատանքների կազմակերպման համար կարող է կատարվել շենքերի և շինությունների ուսումնասիրություն, կազմվել թերությունների ակտ, աշխատանքների ցանկ, և, անհրաժեշտության դեպքում` նախահաշիվ:

4. Շենքերի և շինությունների ներքին հարդարման աշխատանքներն (տես` հավելված 2) ապահովում են ՀՀ օրենսդրությամբ սահմանված դեպքերում շինարարական աշխատանքները ոչ լրիվ կազմով իրականացնելիս` նոր կառուցված շենքերի ներքին հարդարումը, ինչպես նաև գոյություն ունեցող շենքերի ներքին հարդարման լրիվ վերափոխումը կամ վերականգնումը:

5. Ներքին հարդարման աշխատանքների կազմակերպման համար կարող է կատարվել շենքերի և շինությունների ուսումնասիրություն, չափումներ, կազմվել աշխատանքների ցանկ, և, անհրաժեշտության դեպքում` նախահաշիվ:

6. Ճարտարապետահատակագծային և (կամ) նախագծային առաջադրանքով ինտերյերի մշակման պայման նախատեսվելու դեպքում ներքին հարդարման աշխատանքները ներառվում են գեղարվեստակոնստրուկտորական նախագծային փաստաթղթերի կազմում:

7. Շինարարության թույլտվություն չպահանջող բարեկարգման աշխատանքներն (տես` հավելված 3) ապահովում են տարածքների կանաչապատումը, ծառատնկումը, ինչպես նաև բարեկարգման տարրերի վերականգնումը, նորոգումը, փոխումը, փոխարինումը:

8. Բարեկարգման աշխատանքների կազմակերպման համար կարող է կատարվել տարածքների չափագրում, կազմվել անհրաժեշտ աշխատանքների ցանկ, իսկ վերականգնման, նորոգման, փոխարինման աշխատանքների դեպքում` թերությունների ակտ:

9. Շենքերի արտաքին տեսքը փոփոխող ընթացիկ նորոգման և ընդհանուր օգտագործման տարածքներում բարեկարգման` սույն կարգին կից հավելվածներում աստղանիշով նշված աշխատանքների համար կարող է կազմվել էսքիզային նախագիծ և համաձայնեցվել համայնքի ղեկավարի (Երևանում` Երևանի քաղաքապետի) հետ:

10. Ընթացիկ նորոգման, ներքին հարդարման և բարեկարգման աշխատանքներն իրականացվում են ՀՀ օրենսդրությամբ սահմանված կարգով:

Հավելված 1

ՑԱՆԿ

ՇԻՆԱՐԱՐՈՒԹՅԱՆ ԹՈՒՅԼՏՎՈՒԹՅՈՒՆ ՉՊԱՀԱՆՋՎՈՂ ՇԵՆՔԵՐԻ ԵՎ ԿԱՌՈՒՑՎԱԾՔՆԵՐԻ ԸՆԹԱՑԻԿ ՆՈՐՈԳՄԱՆ ԱՇԽԱՏԱՆՔՆԵՐԻ

ա. ՇԵՆՔԵՐ

I. Հիմքեր

1. Նկուղային հարկերի շրջափակող արտաքին պարիսպների առանձին քարերի (աղյուսների) փոխում, փոխարինում:

2. Շենքերի նկուղների ներսից հիմնապատերի առանձին թուլացած քարերի (աղյուսների) ամրացում:

3. Հավաքովի և միաձույլ բետոնե հիմնապատերի անհարթույթների և խոռոչների հարդարում:

4. Երեսապատման և հիմնապատերի նորոգում նկուղային հարկերի կողմից (քարերի վերաշարում ընդհանուր մակերեսի 2%-ից ոչ ավելի):

5. Նկուղների կողմից հիմնապատերի սվաղի նորոգում:

II. Պատեր և սյուներ

1. Պոկված կամ թուլացած առանձին քարերի (աղյուսների) ամրացում և նորերի տեղադրում շաղախների օգնությամբ:

2. Քարե (աղյուսե) պատերի նեղ ճեղքերի շաղախալցում:

3. Երկաթբետոնե պատերի և սյուների ամրանների պաշտպանիչ շերտերի վերականգնում:

4. Խոշորաբլոկային և խոշորապանելային պատերի ուղղահայաց և հորիզոնական ծայրակցատեղերի մաքրում և շաղախապատում օդահոսքերից ու խոնավությունից ներքին տարածքները ու մետաղական ամրացումները մեկուսացնելու նպատակով:

5. Քարե ցոկոլների նորոգում:

6. Քարե (աղյուսե) և բետոնե սյուների անկյունների և պաշտպանիչ անկյունների տեղադրում:

7. Կլոր կամ քառակող գերաններից ու տախտակներից կառուցված պատերի խծուծվածքների փոխում, ճեղքերի և արանքների փակում կանեփաթելի խուրձերով:

8. Փայտյա կոնստրուկցիաների մետաղական ձգանների փոխում կամ նորերի տեղադրում:

III. Միջնորմեր

1. Թուլացած միջնորմերի ամրացում:

2. Բոլոր տեսակի միջնորմերի հնացած կոնստրուկցիաների նորոգում, փոխում:

3. Միջնորմերի վերնամասերում և դրանց պատերի հետ միացման տեղերում նստվածքից առաջացած ճեղքերի փակում:

4. Փայտյա ցանցավոր միջնորմերի առանձին ջարդված ցանցերի փոխարինում:

5. Փայտե մաքուր միջնորմերի միակցում (վերահավաքում):

6. Միջնորմերի ապակեպատված հատվածներում ջարդված ապակիների փոխարինում:

IV. Կտուրներ և ծածկեր

1. Ծպեղագերանների սարքերի ուժեղացում տախտակի կտորներով, կամ այլ լրացուցիչ ամրակապերով:

2. Կտուրների փայտե կոնստրուկցիաների կցանումների, ծայրակցվածների և այլ միացումների թուլացած տեղերում լրացուցիչ հեղյուսներ և երկաթակապեր դնելով:

3. Ծածկերի փայտե ֆերմաների փոքր նորոգում (հեղյուսների ձգում):

4. Երկաթբետոնե կոնստրուկցիաների (ֆերմաներ, հեծաններ, ծածկասալեր) մերկացած ամրանների պաշտպանիչ շերտերի վերականգնում:

5. Ապակեպատ ձեռնաելուստների շրջանակների բացման և փակման հարմարանքների նորոգում:

6. Փայտե կոնստրուկցիաների հակասեպտիկ և հակահրդեհային ծածկապատումներ:

7. Ձեղնահարկային լուսամուտների նորոգում:

8. Կտուր տանող ելքերի վերականգնում կամ նորոգում:

9. Մետաղական կտուրների սանդերքների ու թիթեղաթերթերի պռունկների ամրացում, դրանց գագաթների ու տակամասերի ծածկումով:

10. Մետաղական ծածկի վրա կարկատանների տեղադրում:

11. Կտուրների մասնակի (կտուրի ընդհանուր մակերեսի մինչև 10%-ը) փոխում:

12. Մետաղական ծածկերի առանձին մասերի նորոգում (մինչև 10%-ը ընդհանուր մակերեսից փոխելով նորով):

13. Կղմինդրե և այլ հատասալիկներից հավաքվող ծածկերի նորոգում, առանձին կղմինդրերի ու սալիկների փոխմամբ:

14. Գլանափաթեթավոր նյութերից ծածկի (փափուկ կտուր) մասնակի նորոգում:

15. Նավդանների, ջրհորդանների, ջրաթափերի նորոգում, առանձին պոկված թիթեղների ամրացում:

16. Ծխնելույզների, ծխաօդափոխիչ բլոկների և կտուրներից վեր բարձրացող այլ մասերի թիթեղապատվածքի նորոգում կամ փոխում, ինչպես նաև ծխաօդափոխիչ հորանների և կոյուղային կանգնակների գլխանոցների նորոգում:

17. Ձեղնասանդուղքների նորոգում և վերականգնում:

18. Թիթեղյա կտուրների պարբերաբար ներկապատում:

19. Գլանափաթեթավոր նյութերից ծածկերի (փափուկ կտուրների) պարբերաբար նավթաբիտումային մածուկապատում:

20. Ներքին ջրատարների ձագարափոսերի և վրադիրների նորոգում:

21. Ապակեպատ ձեղնաելուստների շրջանակների բացման և փակման սարքավորումների փոխում, փոխարինում:

22. Տանիքների մաշված էլեմենտների մասնակի կամ լրիվ փոխում:

V. Միջհարկային ծածկեր և հատակներ

1. Ծածկի երկաթբետոնե կոնստրուկցիաների (հեծաններ, հենագերաններ, սալեր), պաշտպանիչ շերտի վերականգնում:

2. Ցրտահարման ենթակա մետաղական հեծանների լրացուցիչ ջերմամեկուսացում:

3. Ցեմենտային, բետոնե և ասֆալտապատ հատակների փոսերի լցում:

4. Հատակների ու դրանց հիմնատակերի նորոգում:

5. Կերամիկական, ցեմենտե, մարմարե և այլ սալիկավոր հատակների վնասված սալիկների փոխում, փոխարինում և պոկվածների տեղադրում:

6. Տախտակե հատակների խտացում, փոխում, փոխարինում:

7. Լինոլեումային և գորգատիպ սինթետիկ փաթեթանյութային հատակների պոկված տեղերի սոսնձում, փոխում:

8. Մանրատախտակից հատակների նորոգում` առանձին մանրատախտակների փոխարինմամբ:

9. Պոկված շրիշակների ամրացում կամ փոխում:

10. Ցեմենտե շրիշակների նորոգում:

11. Ձեղնահարկային ծածկերի լրացուցիչ ջերմամեկուսացում:

VI. Լուսամուտներ, դռներ ու դարպասներ

1. Դռների ու դարպասների ծռված փեղկերի ուղղում և դրանց ամրացում փայտե շերտաձողիկների կամ մետաղական անկյունակների միջոցով:

2. Փեղկերի ամրացում` դրանց առանձին տախտակների փոփոխմամբ:

3. Նոր օդանցքների տեղադրում:

4. Կոտրված ապակիների փոխում, փոխարինում, ակոսատների ծածկում:

5. Լուսամուտների և դռների շրջանակների ու պատերի միջև եղած արանքների խծուծում (լցնում) կանեփաթելի խուրձերով, շաղախներով փայտաշեն և քարաշեն կառույցներում:

6. Լուսամուտագոգերի տակերի արանքների փակում:

7. Լուսամուտների և դռների փչացած պարագաների փոխում, նորի տեղադրում:

8. Մուտքի դռների և դարպասների ջերմամեկուսացում:

9. Արտաքին դռների զսպանակների և զսպիչների տեղադրում, ներքին դռների փոխում, փոխարինում:

10. * Արտաքին լուսամուտների և արտաքին դռների փոխում, փոխարինում:

VII. Սանդուղքներ և սանդղամուտքեր

1. Բետոնե և քարե սանդուղքների, աստիճանների, թեքանների և հարթակների խոռերի և փոսերի լցնում:

2. Փայտաշեն սանդուղքների ու հարթակների առանձին մաշված տախտակների փոխարինում:

3. Սանդուղքաբաժնի բռնաձողերի և ճաղասարքերի ամրացում, առանձին մասերում բռնաձողերի և այլ մասերի փոխարինում:

VIII. Ներքին հարդարում

1. Պատերի և առաստաղների սվաղների նորոգում:

2. Պատերի երեսապատման նորոգում, փոխում, փոխարինում:

3. Զետեղարանների և առանձին կոնստրուկցիաների ներկում:

4. Ներքին հարդարանքների փոխում, փոխարինում:

IX. Ճակատապատեր

1. Շենքերի ընկնելու սպառնացող երեսապատման պոկվող ու թուլացած սալիկների, քարերի, ծեփածո և քարատաշ ճարտարապետական դետալների, բազրիքների, քիվերի և այլ մասերի ամրացում:

2. * Երեսապատումների նորոգում, փոխում, փոխարինում:

3. Շենքերի արտաքին սվաղի առանձին մասերի նորոգում:

4. Շենքերի նավդանների, ջրհորդանների, ջրափների, ջրաընդունիչ ձագարների, քիվերի և այլ ելուստների թիթեղածածկերի նորոգում և պահպանում:

5. * Շենքերի ճակատապատերի ներկում:

6. Կայուն բաղադրությամբ ներկված կամ երեսապատված ճակատապատերի մաքրում, լվացում փոշուց ու մրից:

7. Քիվերի և այլ դեկորատիվ էլեմենտների լրիվ վերականգնում:

8. Ծեփածո էլեմենտների վերականգնում:

9. Ճակատապատերի մաքրում:

X. Վառարաններ

1. Վառարանների մանր նորոգումներ` նրա սարքավորումների մասնակի փոխմամբ, լվացքների հեռացում և արտաքին հարդարում:

2. Վառարանների մեջ փլվածքների վերականգնում:

3. Ծխնելույզների և ծխանցքների նորոգում:

4. Ծխնելույզների ներկում:

XI. Ջեռուցում

1. Ջեռուցման խողովակաշարերի և սարքերի լվացում և կարգավորում:

2. Ջեռուցիչ սարքերի և խողովակաշարերի առանձին հատվածների անսարքությունների նորոգում:

3. Ընդարձակիչ բաքերի ջերմամեկուսացում:

4. Խողովակաշարերի և սարքերի ներկում:

XII. Օդափոխություն

1. Օդատարների մասնակի փոխում:

2. Օդատարներում ներծծումների վերացում:

3. Օդափոխիչների, օդատարների, կալորիֆերների, էլեկտրաշարժիչների, հենասարքերի, հորանների, ճաղերի և այլ սարքերի նորոգում, փոխում:

4. Օդատարների և օդափոխիչ սարքավորումների ներկում:

5. Էլեկտրաշարժիչների նորոգում:

XIII. Ջրամատակարարում և կոյուղի

1. Ջրատար և կոյուղու խողովակների ու սարքերի հոսքերի և կաթոցների վերացում:

2. Ջրատար և կոյուղու խողովակաշարերի ամրացում և մասամբ նորոգում:

3. Ցրտահարվող մասերում խողովակաշարերի ջերմամեկուսացում:

4. Կոյուղու խողովակների և սարքերի մաքրում:

5. Խողովակաշարերի հատվածների նորոգում:

6. Առանձին սարքերի փոխում (զուգարանակոնքեր, կողիկներ, լվացարաններ, կոնքեր, ցայտաղբյուրներ, ծորակներ և այլն):

XIV. Տաք ջրամատակարարում և կապ

1. Ջերմափոխանակիչների և գալարախողովակների մաքրում նստվածքներից ու աղտոտումից:

2. Պոմպային և մոտորային կայանների մանր նորոգում:

3. Ջրածորակների փոխում, խողովակաշարերի ջերմամեկուսացում և այլ փոքրածավալ աշխատանքներ «ջեռուցում» և «ջրամատակարարում և կոյուղի» բաժիններում թվարկված աշխատանքներին համապատասխան:

4. Խողովակաշարերի մասերի փոխում:

XV. Էլեկտրալուսավորում և կապ

1. Ներքին կախված էլեկտրասալերի ձգում և լրացուցիչ ամրակապերի դնում` տեղակայված պիտույքակազմերի փոխարինմամբ (անջատիչներ, կոթոռներ, վարդակներ):

2. Էլեկտրահաղորդալարերի առանձին հատվածների և էլեկտրասարքերի փոխում:

3. Պատերի, միջնորմերի, միջհարկային ծածկերի նորոգման ժամանակ էլեկտրասնուցիչ ցանցի ապամոնտաժում և վերականգնում:

4. Խմբային բաշխիչ և ապահովիչ վահանակների մանր նորոգում:

բ. ԿԱՌՈՒՑՎԱԾՔՆԵՐ

XVI. Ջրմուղ-կոյուղու կառուցվածքներ

ա) Ցանցեր, խողովակաշարեր և արմատուրա

1. Առանձին լայնակների կարանախցում:

2. Պողպատյա խողովակների առանձին ծայրակցատեղերի եռակցում կամ զոդում:

3. Արտահոսքի վերացման նպատակով առանձին տեղերի խցանում կցորդիչներ, խամուտներ, բանդաժներ տեղադրելով, կամ առանձին խողովակների փոխարինում:

4. Առանձին խողովակների փոխում, փոխարինում (պահպանելով խողովակների տրամագիծը):

5. Խցակների լցում, հեղյուսների ձգում և ձևավոր մասերի ու ամրանաձողերի առանձին խցակների փոխում:

6. Ձևավոր մասերի կցորդային միացումներում ու ամրանաձողերում միջադիրների և հեղյուսների փոխում, փոխարինում:

7. Ջրածորանների ամրակապերի նորոգում:

8. Ջրաբաշխիչ աշտարակների նորոգում:

բ) Հորեր

1. Հորերի պատերի առանձին ճեղքերի վերացում:

2. Առանձին ընկնող աղյուսների խցում:

3. Առանձին երթային բռնակների փոխում:

4. Աստիճանների նորոգում:

5. Վաքերի սվաղների նորոգում, վերականգնում:

6. Անցքերի նորոգում:

7. Մտոցների քանդված մասերի նորոգում:

գ) Ջրաբաշխման և հիդրոտեխնիկական կառուցվածքներ

գ. 1) Պատվարներ, ամբարտակներ, ջրընկեցքներ, ջրանցքներ

1. Բետոնե ջրթողիչների և ամբարտակի ճեղքերի վերալցում:

2. Ափեր ամրացնող ծածկույթի և շեղությունների ամրանների վնասվածքների վերացում (ընդհանուր մակերեսի մինչև 2%-ի չափով):

3. Փայտե կոնստրուկցիաների առանձին էլեմենտների փոխում:

4. Մետաղական կոնստրուկցիաների հիմքային մասերի ամրացում և դրանց ներկում:

5. Երկաթբետոնե կոնստրուկցիաների վերջրյա մասերի պաշտպանիչ շերտերի վերականգնում:

6. Հողե կառուցվածքների ողողված շեղությունների լցում:

գ. 2) Ջրային հորատանցքներ

1. Վերին ջրընդունիչ բաքի մաշված մասերի փոխարինում:

2. Ջրամուղ և օդամուղ խողովակների հիմնանցքերի խորացում կամ փոքրացում:

3. Ջրամուղ և օդամուղ խողովակների փոխում:

դ) Մաքրման կառուցվածքներ

1. Սվաղի առանձին հատվածների վերանորոգում ճեղքերի փոխմամբ և երկաթայնացմամբ (սվաղված ընդհանուր մակերեսի մինչև 10%-ի սահմաններում):

2. Մանր ճեղքերի հարդարում:

3. Մտոցների և աստիճանների նորոգում և ներկում:

4. Առանձին բռնակների օգտագործում:

5. Ֆիլտրերի փողրակների կողերի երկրաչափական ձևերի վերականգնում:

6. Օդատարների նորոգում:

7. Առանձին տեղերում մեկուսացումների նորոգում:

8. Երկհարկ տիղմազտիչներրի փողրակների նորոգում, փայտե փողրակների առանձին տախտակների փոխում:

9. Կենսաբանական զտիչների շարվածքի առանձին մասերի նորոգում:

10. Տիղմահարթակների շրջափակող թմբիկների, վաքերի և փայտե միջնորմերի նորոգում:

11. Կառուցվածքների խողովակաշարերի, ջրացամաքիչ ցանցի մաքրում, լվացում, նորոգում:

12. Խողովակաշարերի և մետաղական բաքերի նորոգում:

13. Երկաթբետոնե կոնստրուկցիաների պաշտպանիչ շերտերի վերականգնում:

14. Խողովակաշարերի նորոգում առանձին խողովակների փոխմամբ:

15. Հիդրոմեկուսացման նորոգում:

16. Երկաթայնացման և սվաղի նորոգում, վերականգնում:

17. Կառուցվածքների պատերի տորկրետացում:

XVII. Ջերմամատակարարում

ա) Մղանցքներ և խցեր

1. Առանձին անցաբռնակների փոխում, փոխարինում:

2. Աստիճանների նորոգում:

3. Մտոցների կարգավորում և փոխում:

4. Մղանցքներ և խցերի հիդրոմեկուսացման փոխում:

բ) Խողովակաշարեր և ամրանաձող

1. Առանձին խողովակների ծայրակցատեղերի եռակցում կամ զոդում:

2. Առանձին խողովակների փոխում:

3. Խողովակաշարերի ջերմամեկուսացման և ջրամեկուսացման նորոգում, վերականգնում, փոխում:

4. Խցակների լցում, ամրանաձողի առանձին մասերի փոխում, հեղյուսների ձգում:

5. Կցամիացումների հեղյուսների և ներդիրների փոխում:

6. Ձևավոր մասերի, փականների, խտացուցիչների նորոգում, փոխում:

7. Շարժական և անշարժ հենարանների փոխում:

XVIII. Երկաթուղիներ, այդ թվում` մերձատար և ներգործարանային

ա) Հողային պաստառ

1. Թեքությունների մաքրում և բարեկարգում:

2. Դիտահորերի, կանալների, խրամառուների, վաքերի արագահոսների մաքրում և կարգավորում:

3. Ջրացամաքիչների մաքրում գարնանային ջրհոսքերից հետո:

4. Չիմապատվածքների, սալարկների, ճեղանների մաքրում և մանր նորոգում:

5. Լիցքի ֆիլտրող մասի մաքրում և մանր շտկում:

6. Հողային պաստառի լայնացում ոչ բավարար լայնություն ունեցող տեղերում մինչև սահմանված չափերը:

7. Հողային պաստառի վերականգնում սարքերի, ողողուտների, փլուզումների և ճահճուտների տեղերում:

բ) Երկաթուղիների վերին կառուցվածքներ

1. Նստած, թեքված և շեղված տեղերի ուղղում:

2. Փայտակոճերի մտցնում գծերի տակ:

3. Ռելսերի ուղղում:

4. Ամրացումների փոխում:

5. Ռելսերի ծայրանքների կարգաբեկում:

6. Բացվածքների ձգում:

7. Փայտակոճերի նորոգում:

8. Փայտակոճերի ցրում:

9. Բալաստային պրիզմաների կարգաբեկում:

10. Գծային ամրակապերի մաքրում և յուղում:

11. Առանձին փայտակոճերի փոխարինում:

12. Ճաքած ռելսերի փոխարինում:

13. Անցատեղերի առանձին էլեմենտների փոխարինում:

14. ՈՒղեցուցանիշների, ուղեփակոցների և կարճասյուների ներկում:

15. Սլաքային անցատեղերի նորոգում առանձին էլեմենտների փոխմամբ:

գ) Արհեստական կառուցվածքներ (կամուրջներ, թունելներ, խողովակներ)

1. Հեղյուսների ձգում և փոխում:

2. Գլանանիվների կարգաբեկում:

3. Վնասված հատային էլեմենտների փոխում:

4. Հենարանների ճաքերի փակում:

5. Հենարանների արտաքին մասերի տորկրետացում կամ ցեմենտացում:

6. Առանձին պոկված կամ տեղաշարժված քարերի տեղերի ցեմենտում:

XIX. Ավտոմոբիլային ճանապարհներ

1. Նստվածքների ուղղում հարթեցումով և պնդացումով:

2. Խրամուռների ու ջրատար կանալների մաքրում:

3. Ճանապարհային ծածկի առանձին տեղերի հարթեցում, ճեղքերի փակում:

4. Առանձին եզրաքարերի ուղղում:

5. Ճանապարհային նշանների նորոգում:

6. Արհեստական շինությունների նորոգում երկաթուղային կառույցների համար ընդունված ծավալներով:

7. Ճանապարհային ծածկի առանձին սալերի ուղղում և փոխում:

8. Ճանապարհների ծածկի փոսային նորոգում:

9. Խողովակների էլեմենտների փոխում:

XX. Էլեկտրական ցանցեր և կապ

1. Կախված հաղորդալարերի վերաձգում:

2. Հաղորդալարերի կտրված տեղերի վերացում:

3. Առանձին մեկուսիչների փոխարինում:

4. Կողմնական ընձյուղների վրա լրացուցիչ ոլորքների տեղադրում:

5. Երկաթբետոնե և բետոնե կողմնական ընձյուղների ճաքերի և այլ վնասվածքների վերացում:

6. Առանձին հենասյուների ուղղում:

7. Առանձին ընձյուղների ուղղում և փոխում:

Հավելված 2

ՑԱՆԿ

ՇԻՆԱՐԱՐՈՒԹՅԱՆ ԹՈՒՅԼՏՎՈՒԹՅՈՒՆ ՉՊԱՀԱՆՋՎՈՂ ՆԵՐՔԻՆ ՀԱՐԴԱՐՄԱՆ ԱՇԽԱՏԱՆՔՆԵՐԻ

1. Պատերի և առաստաղների սվաղում, ինչպես նաև գիպսե սալիկներով երեսապատում:

2. Պատերի և առաստաղների ներկում:

3. Պատերի պաստառապատում:

4. Սանհանգույցների պատերի կերամիկական սալիկներով երեսապատում:

5. Սանհանգույցներում կախովի առաստաղների պատրաստում:

6. Հատակների ցեմենտապատում և ծածկույթի (մանրատախտակ փայտյա, լինոլեում, կերամիկական, մարմարե, ցեմենտե և այլ սալիկներ) պատրաստում:

7. Ներքին դռների, լուսամուտների և լուսամուտագոգերի ներկում:

8. Ջրի, կոյուղու, ջեռուցման խողովակաշարերի և ջեռուցման սարքերի ներկում:

9. Անհատական բնակելի տների և բնակարանների ներքին հարդարման աշխատանքները` լրիվ կազմով:

Ծանոթություն.

Ներքին հարդարման աշխատանքներն իրականացվում են սույն կարգի 4-րդ և 6-րդ կետերի պահանջներին համապատասխան:

Հավելված 3

ՑԱՆԿ

ՇԻՆԱՐԱՐՈՒԹՅԱՆ ԹՈՒՅԼՏՎՈՒԹՅՈՒՆ ՉՊԱՀԱՆՋՎՈՂ ԲԱՐԵԿԱՐԳՄԱՆ ԱՇԽԱՏԱՆՔՆԵՐԻ

1. Շենքերի ու շինությունների հարակից բակային տարածքների կանաչապատում:

2. * Մայթերի և շենքերի շրջափակող սալահատակների փոխում, փոխարինում:

3. * Մայթերի առանձին եզրաքարերի ուղղում, վերաշարում, փոխում, փոխարինում:

4. * Մայթերն ու շենքերը շրջափակող տարածքների ասֆալտապատում և նորոգում, բացառելով հատակագծային նիշերի փոփոխությունները:

5. * Փոքր ճարտարապետական ձևեր և բակային կառուցվածքների (ծածկարան, ճոճանակ, ցայտաղբյուր, խաղահրապարակ, նստարաններ, աղբարկղ և այլն) տեղադրում:

6. Փոքր ճարտարապետական ձևեր և բակային կառուցվածքների (ծածկարան, ճոճանակ, ցայտաղբյուր, խաղահրապարակ, նստարաններ, աղբարկղ և այլն) նորոգում, առանձին մասերի փոխարինում:

7. * Թեթև կոնստրուկցիաներով (մետաղյա խողովակ, ցանց և ճաղեր) ցանկապատում և դրանց փոխում, փոխարինում:

8. Անհատական բնակելի տների փակ ներբակային տարածքների լրիվ բարեկարգում (կանաչապատում, ծառատնկում, մայթեր, ծառուղիներ, ծածկարան, ճոճանակ, խաղահրապարակ, նստարաններ և այլն):