ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԸ ԿԱՐԳԱՎՈՐՈՂ ՀԱՆՁՆԱԺՈՂՈՎ
ՈՐՈՇՈՒՄ
4 հուլիսի 2018 թվականի N 268-Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԸ ԿԱՐԳԱՎՈՐՈՂ ՀԱՆՁՆԱԺՈՂՈՎԻ 2005 ԹՎԱԿԱՆԻ ՀՈՒԼԻՍԻ 26-Ի N 103-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ
i
Հիմք ընդունելով «Նորմատիվ իրավական ակտերի մասին» Հայաստանի Հանրապետության օրենքի 33-րդ և 34-րդ հոդվածները` Հայաստանի Հանրապետության հանրային ծառայությունները կարգավորող հանձնաժողովը որոշում է.
i
1. Հայաստանի Հանրապետության հանրային ծառայությունները կարգավորող հանձնաժողովի 2005 թվականի հուլիսի 26-ի «Էներգետիկայի բնագավառում լիցենզավորված անձանց ֆինանսական հաշվետվության ձևերը և դրանց ներկայացման կարգը հաստատելու և մի շարք որոշումներ ուժը կորցրած ճանաչելու մասին» N 103-Ն որոշման 1-ին կետի «ա» ենթակետով հաստատված N 1 հավելվածը շարադրել նոր խմբագրությամբ` համաձայն հավելվածի:
2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:
Հավելված
Հայաստանի Հանրապետության
հանրային ծառայությունները
կարգավորող հանձնաժողովի
2018 թվականի հուլիսի 4-ի
N 268-Ն որոշման
«Հավելված N 1
Հաստատված է
Հայաստանի Հանրապետության
հանրային ծառայությունները
կարգավորող հանձնաժողովի
2005 թվականի հուլիսի 26-ի
N 103-Ն որոշմամբ
ԿԱՐԳ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԷՆԵՐԳԵՏԻԿԱՅԻ ԲՆԱԳԱՎԱՌՈՒՄ ԼԻՑԵՆԶԱՎՈՐՎԱԾ ԱՆՁԱՆՑ ԿՈՂՄԻՑ ՖԻՆԱՆՍԱԿԱՆ ՀԱՇՎԵՏՎՈՒԹՅՈՒՆՆԵՐԻ ՆԵՐԿԱՅԱՑՄԱՆ
1. Սույն կարգը սահմանում է էներգետիկայի բնագավառում լիցենզավորված անձի (այսուհետ` լիցենզավորված անձ) կողմից Հայաստանի Հանրապետության հանրային ծառայությունները կարգավորող հանձնաժողով (այսուհետ` հանձնաժողով) ֆինանսական հաշվետվությունների (այսուհետ` հաշվետվություններ) ներկայացման ընթացակարգը:
2. Լիցենզավորված անձը հաշվետվությունները հանձնաժողով է ներկայացնում առձեռն, փոստային կամ էլեկտրոնային եղանակով` հանձնաժողովի կողմից սահմանված կարգով և ժամկետներում:
3. Առձեռն եղանակով ներկայացման դեպքում հաշվետվությունների ներկայացման օր է համարվում հանձնաժողովում հաշվետվությունների և ուղեկցող գրության փաստացի մուտքագրման օրը, փոստային եղանակով ներկայացման դեպքում` հաշվետվությունների և ուղեկցող գրության փոստային բաժանմունքում ընդունվելու օրվա օրացուցային կնիքի արտատիպում նշված օրը, իսկ էլեկտրոնային եղանակով ներկայացման դեպքում` հանձնաժողովի առցանց դիմումների և հաշվետվությունների ընդունման էլեկտրոնային համակարգի կողմից ինքնաշխատ եղանակով հաշվետվություններ ներկայացրած անձին հաշվետվությունների ստացումը և գրանցումը հավաստող համապատասխան էլեկտրոնային ծանուցման մեջ նշված օրը կամ փաստաթղթերի էլեկտրոնային շարժի համակարգով (Mulberry)` էլեկտրոնային ստորագրությամբ վավերացված հաշվետվությունների ուղարկման օրը:
4. Հանձնաժողով ներկայացված հաշվետվություններում սահմանված ձևերին անհամապատասխանությունների, անճշտությունների կամ բացթողումների առկայության դեպքում լիցենզավորված անձը հանձնաժողովի կողմից տեղեկացվում է այդ մասին և օրենքով սահմանված կարգով իրազեկվելու օրվան հաջորդող հինգ աշխատանքային օրվա ընթացքում հանձնաժողով է ներկայացնում ճշգրտված հաշվետվություններ կամ հաշվետվություններին առնչվող լրացուցիչ պարզաբանումներ:
5. Հանձնաժողով ներկայացված հաշվետվություններում լիցենզավորված անձի կողմից սխալների ինքնուրույն հայտնաբերման դեպքում վերջինս կարող է ներկայացնել ճշգրտված հաշվետվություններ: Սույն կարգի կիրառության իմաստով` հաշվետու ժամանակաշրջանի ավարտից հետո ներկայացված մեկից ավելի հաշվետվություններից առաջինը համարվում է հաշվետու ժամանակաշրջանի համար ներկայացված, իսկ մյուսները` ճշգրտված հաշվետվություններ:
6. Հանձնաժողովի առցանց դիմումների և հաշվետվությունների հանձնման համակարգում գրանցվելու և այդ համակարգով էլեկտրոնային եղանակով հաշվետվություններ ներկայացնելու համար անհրաժեշտ է առձեռն կամ փոստային կապի միջոցով հանձնաժողով ներկայացնել հետևյալ փաստաթղթերը (տեղեկատվությունը)`
1) կազմակերպության ղեկավարի նույնականացման քարտի կամ անձնագրի և սոցիալական քարտի պատճենները,
2) Լիցենզավորված անձի կողմից օրենսդրությամբ սահմանված կարգով տրված լիազորագիր կամ հրաման` լիցենզիա ունեցող անձի անունից էլեկտրոնային հաշվետվություններ և տեղեկություններ ներկայացնելու իրավասու անձ լինելու վերաբերյալ, ինչպես նաև այդ անձի (անձանց) նույնականացման քարտի պատճենը,
3) Լիցենզավորված անձի էլեկտրոնային փոստի հասցեն:
7. Լիցենզավորված անձը սույն կարգի 6-րդ կետով նախատեսված փաստաթղթերը (տեղեկատվությունը) հանձնաժողով է ներկայացնում մեկ անգամ: Փաստաթղթերում (տեղեկատվությունում) հետագա փոփոխություններ տեղի ունենալու դեպքում լիցենզավորված անձը դրանք հանձնաժողով է ներկայացնում փոփոխությունները կատարելուց հետո 3 աշխատանքային օրվա ընթացքում:
8. Առցանց դիմումների և հաշվետվությունների հանձնման համակարգում հանձնաժողովի կողմից լիցենզավորված անձի և սույն կարգի 6-րդ կետով ներկայացման ենթակա փաստաթղթերի (տեղեկատվության) հետագա փոփոխությունների գրանցումը կատարվում է դրանք (կամ դրանց փոփոխումը հավաստող փաստաթղթերը) հանձնաժողով մուտքագրվելուց հետո 5 աշխատանքային օրվա ընթացքում:
9. Հաշվետվություններն առցանց դիմումների և հաշվետվությունների հանձնման համակարգով ներկայացնելու համար լիցենզավորված անձը մուտք է գործում հանձնաժողովի պաշտոնական ինտերնետային կայքի առցանց դիմումների և հաշվետվությունների հանձնման էլեկտրոնային համակարգ, նույնականացման քարտի միջոցով մուտք է գործում էլեկտրոնային հաշվետվություններին վերաբերող բաժնի լիցենզիա ունեցող անձի համապատասխան դարան, ընտրում համապատասխան հաշվետվության ձևը, բեռնում այն, լրացնում, էլեկտրոնային թվային ստորագրությամբ ստորագրում, կցում և ուղարկում հանձնաժողով` առցանց դիմումների և հաշվետվությունների հանձնման էլեկտրոնային համակարգի միջոցով: Հաշվետվությունները ներկայացվում են Մայքրոսոֆթ Էքսել (Microsoft Excel) ձևաչափով, իսկ հաշվետվություններում գրանցումները կատարվում են Յունիկոդ (Unicod) ձևաչափով: Առցանց դիմումների և հաշվետվությունների հանձնման էլեկտրոնային համակարգի միջոցով այլ տեղեկատվություններ ներկայացնելու համար կիրառելի են Մայքրոսոֆթ Էքսել (Microsoft Excel), Մայքրոսոֆթ Վորդ (Microsoft Word) և Փի Դի Էֆ (PDF) ձևաչափերը:
10. Հաշվետվությունները պատշաճ լրացնելու և ուղարկելու դեպքում առցանց դիմումների և հաշվետվությունների հանձնման էլեկտրոնային համակարգի միջոցով լիցենզավորված անձի կողմից տրամադրված էլեկտրոնային փոստին ուղարկվում է հաշվետվության ստացումը և գրանցումը հավաստող համապատասխան ծանուցում:»: