ՀՀ ԱՌԱՋԻՆ ԱՏՅԱՆԻ ԴԱՏԱՐԱՆՆԵՐԻ ԴԱՏԱՎՈՐՆԵՐԻ ՆՍՏԱՎԱՅՐԵ ...

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՈՒՐԴ

ՈՐՈՇՈՒՄ

ԲԴԽ-23-Ո-47

2018 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆՆԵՐԻ ԴԱՏԱՎՈՐՆԵՐԻ ՆՍՏԱՎԱՅՐԵՐԸ, ՆՍՏԱՎԱՅՐԵՐԻ ՍՊԱՍԱՐԿՄԱՆ ՏԱՐԱԾՔՆԵՐԸ ՓՈՓՈԽԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ

Ղեկավարվելով «Հայաստանի Հանրապետության դատական օրենսգիրք» սահմանադրական օրենքի 22-րդ հոդվածի 2-րդ մասով, 26-րդ հոդվածի 3-րդ մասով, 32-րդ հոդվածի 2-րդ մասի 4-րդ կետով և 94-րդ հոդվածի 1-ին մասով` Հայաստանի Հանրապետության բարձրագույն դատական խորհուրդը

ՈՐՈՇՈՒՄ է

1. Սահմանել Հայաստանի Հանրապետության առաջին ատյանի դատարանների դատավորների նստավայրերը, նստավայրերի սպասարկման տարածքները փոփոխելու կարգը` համաձայն հավելվածի:

2. Սույն որոշումն ուժի մեջ է մտնում հրապարակմանը հաջորդող օրվանից:

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԲԱՐՁՐԱԳՈՒՅՆ ԴԱՏԱԿԱՆ

    ԽՈՐՀՐԴԻ ՆԱԽԱԳԱՀ                        Գ. ՀԱՐՈՒԹՅՈՒՆՅԱՆ

2018թ. հուլիսի 9

ք. Երևան

Հավելված

Հայաստանի Հանրապետության

բարձրագույն դատական խորհրդի

2018թ. հուլիսի 9-ի թիվ

ԲԴԽ-23-Ո-47 որոշման

ԿԱՐԳ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆՆԵՐԻ ԴԱՏԱՎՈՐՆԵՐԻ ՆՍՏԱՎԱՅՐԵՐԸ, ՆՍՏԱՎԱՅՐԵՐԻ ՍՊԱՍԱՐԿՄԱՆ ՏԱՐԱԾՔՆԵՐԸ ՓՈՓՈԽԵԼՈՒ

Հայաստանի Հանրապետության բարձրագույն դատական խորհուրդն (այսուհետ` Խորհուրդ) արձանագրում է, որ «Հայաստանի Հանրապետության դատական օրենսգիրք» սահմանադրական օրենքով (այսուհետ` Օրենսգիրք) սահմանված իրավական նորմերի կենսագործման նպատակով որոշում կայացնելիս առաջնորդվում է բնակչության համար արդարադատությունն առավել մատչելի դարձնելու, դատավորների թվաքանակից ելնելով` դատական տարածքների օպտիմալացման, դատավորների միջև դատական գործերի բաշխման և վերաբաշխման գործընթացում սուբյեկտիվ գործոնի, այդ թվում` դատարանի նախագահի միջամտության բացառման, ինչպես նաև բացառիկ դեպքերում Խորհրդի կողմից օրենքով սահմանված կարգով միջամտության երաշխավորման չափանիշներով:

I. ԸՆԴՀԱՆՈՒՐ ԴՐՈՒՅԹՆԵՐ

1.1. Հիմք ընդունելով այն, որ Օրենսգրքի 22-րդ հոդվածի համաձայն` առաջին ատյանի ընդհանուր իրավասության դատարանի դատական տարածքը համապատասխանաբար Երևան քաղաքի, մարզի կամ մարզերի տարածքն է, առաջին ատյանի ընդհանուր իրավասության դատարանն ունի կենտրոնական և այլ նստավայրեր, իսկ Օրենսգրքի 26-րդ հոդվածի համաձայն` մասնագիտացված դատարանների դատական տարածքը Հայաստանի Հանրապետության տարածքն է, մասնագիտացված դատարանների կենտրոնական նստավայրերը գտնվում են Երևան քաղաքում, մասնագիտացված դատարանները կարող են նստավայրեր ունենալ մարզերում` Խորհուրդն ուսումնասիրում է համապատասխան առաջին ատյանի դատարանի նախագահի առաջարկությունը և կայացնում է որոշում դատարանի նստավայրերը և նստավայրի սպասարկման տարածքները փոփոխելու մասին` ղեկավարվելով սույն կարգով:

(1.1-ին կետը փոփ. 30.01.2023 ԲԴԽ-13-Ո-44 որոշում)

II. ԱՌԱՋԻՆ ԱՏՅԱՆԻ ԴԱՏԱՐԱՆՆԵՐԻ ԴԱՏԱՎՈՐՆԵՐԻ ՆՍՏԱՎԱՅՐԵՐԸ, ՆՍՏԱՎԱՅՐԵՐԻ ՍՊԱՍԱՐԿՄԱՆ ՏԱՐԱԾՔՆԵՐԸ ՓՈՓՈԽԵԼՈՒ ՎԵՐԱԲԵՐՅԱԼ ԽՈՐՀՐԴԻՆ ԱՌԱՋԱՐԿՈՒԹՅՈՒՆՆԵՐ ԵՎ ԴԻՄՈՒՄՆԵՐ ՆԵՐԿԱՅԱՑՆԵԼՈՒ ԿԱՐԳԸ

2.1. Առաջին ատյանի դատարաններում նստավայրերի և (կամ) սպասարկման տարածքների, իսկ Երևան քաղաքի առաջին ատյանի ընդհանուր իրավասության քրեական դատարանի և Երևան քաղաքի առաջին ատյանի ընդհանուր իրավասության քաղաքացիական դատարանի դեպքում` դատարանի նստավայրերի փոփոխության վերաբերյալ առաջարկությունները` համապատասխան դատարանի նախագահի կողմից համապատասխան գրությամբ ներկայացվում են Խորհրդին:

Դատարանի նախագահի կողմից ներկայացված առաջարկություններին կցվում են նստավայրերի և (կամ) նստավայրերի սպասարկման տարածքների փոփոխություն կատարելու, մասնավորապես` դատարանի նոր նստավայր սահմանելու, Խորհրդի կողմից սահմանված նստավայրը վերացնելու, նստավայրի սպասարկման տարածքում նոր հասցեներ ներառելու կամ հանելու վերաբերյալ անհրաժեշտ հիմնավորումներ:

(2.1-ին կետը փոփ. 30.01.2023 ԲԴԽ-13-Ո-44 որոշում)

2.2. Առաջին ատյանի դատարանում նշանակված, այլ դատարանից տեղափոխված, Խորհրդի որոշմամբ մեկ այլ առաջին ատյանի դատարանից գործուղված դատավորի նստավայրը Խորհրդի կողմից որոշվում է դատարանի նախագահի առաջարկության հիման վրա` հիմք ընդունելով դատավորի մասնագիտացումը, համապատասխան առաջին ատյանի դատարանի համար սահմանված նստավայրերում թափուր տեղերի առկայությունը, ինչպես նաև նստավայրերի սպասարկման տարածքների փաստացի ծանրաբեռնվածությունը:

2.3. Առաջին ատյանի դատարանում նշանակված, մեկ այլ դատարանից տեղափոխված, Խորհրդի որոշմամբ գործուղված դատավորն իրավունք ունի բացառիկ հիմքերի առկայության դեպքում տվյալ դատարանի մեկ այլ նստավայր տեղափոխվելու մասին պատճառաբանված դիմում ներկայացնել Խորհրդին:

Խորհրդին հասցեագրված դատավորի դիմումը պետք է տեղեկություններ բովանդակի տվյալ դատարանի այլ նստավայր տեղափոխվելու վերաբերյալ բացառիկ հիմքերի, մասնավորապես` պաշտոնավարմանը խոչընդոտող ընտանեկան, անձնական բնույթի հանգամանքների առկայության մասին` հնարավորության դեպքում կցելով նաև վերոհիշյալ հանգամանքները հավաստող համապատասխան փաստաթղթեր: Դիմումին պետք է կցվի նաև դատավորի այլ նստավայր տեղափոխվելու հարցի վերաբերյալ համապատասխան դատարանի նախագահի եզրակացությունը:

2.4. Առաջին ատյանի դատարանի երկու տարբեր նստավայրերի` նույն մասնագիտացում ունեցող դատավորներն իրավունք ունեն դիմելու Խորհրդին` խնդրելով կատարել իրենց նստավայրերի փոխանակում:

Դիմում ներկայացնող դատավորները պետք է պատճառաբանեն իրենց դիմումը: Դիմումում պետք է շարադրվեն համապատասխան դատավորների նստավայրերի փոխանակման հիմնավոր պատճառները: Դիմումին պետք է կցվի նաև դատավորների նստավայրերի փոխանակման հարցի վերաբերյալ համապատասխան դատարանի նախագահի եզրակացությունը:

2.5. Բացառիկ դեպքերում Խորհուրդը, ելնելով արդարադատության մատչելիությունն ապահովելու, դատական տարածքների օպտիմալացման հրատապ անհրաժեշտությունից, կարող է քննարկել առաջին ատյանի դատարանի նախագահի կողմից դատավորի նստավայրի փոփոխության վերաբերյալ ներկայացված առաջարկությունը նաև դատավորի անհամաձայնության (համաձայնության բացակայության) դեպքում:

Սույն կետով նախատեսված դեպքերում դատարանի նախագահը Խորհրդին ներկայացված առաջարկությամբ պետք է հիմնավորի դատավորի անհամաձայնության (համաձայնության բացակայության) պայմաններում վերջինիս նստավայրի հրատապ փոփոխություն կատարելու անհրաժեշտությունը:

III. ԽՈՐՀՐԴԻՆ ՆԵՐԿԱՅԱՑՎԱԾ ԱՌԱՋԱՐԿՈՒԹՅՈՒՆՆԵՐԻ ԵՎ ԴԻՄՈՒՄՆԵՐԻ ՔՆՆԱՐԿՈՒՄԸ

3.1. Սույն կարգի 2-րդ բաժնով սահմանված առաջարկությունները և դիմումները Խորհրդի նիստի օրակարգում ընդգրկվում, քննարկվում և դրանց վերաբերյալ Խորհուրդը որոշումներ է կայացնում իր աշխատակարգով և սույն որոշմամբ սահմանված կարգով:

3.2. Խորհրդի նախագահի հանձնարարությամբ Դատական դեպարտամենտը սույն կարգի 2-րդ բաժնով նախատեսված առաջարկությունների և դիմումների վերաբերյալ անհրաժեշտ տեղեկատվություն և նյութեր է տրամադրում Խորհրդին:

3.3. Սույն կարգի 2.3-րդ և 2.4-րդ կետերով նախատեսված դատարանի նախագահի եզրակացությունը խորհրդատվական բնույթ է կրում:

3.4. Սույն կարգի 2.3-րդ, 2.4-րդ և 2.5-րդ կետերով նախատեսված դիմումները և առաջարկությունները քննարկելիս Խորհուրդն անհրաժեշտության դեպքում դատավորին (դատավորներին) և դատարանի նախագահին հրավիրում է զրույցի:

(3.4-րդ կետը փոփ. 21.08.2019 ԲԴԽ-58-Ո-130 որոշում)