ՀՀ ԴԱՏԱՎՈՐՆԵՐԻ ԸՆԴՀԱՆՈՒՐ ԺՈՂՈՎԻ ՈՒՍՈՒՄՆԱԿԱՆ ՀԱՐՑԵՐ ...

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԴԱՏԱՎՈՐՆԵՐԻ ԸՆԴՀԱՆՈՒՐ ԺՈՂՈՎԻ

ՈՐՈՇՈՒՄ

N 04-Լ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԴԱՏԱՎՈՐՆԵՐԻ ԸՆԴՀԱՆՈՒՐ ԺՈՂՈՎԻ ՈՒՍՈՒՄՆԱԿԱՆ ՀԱՐՑԵՐԻ ՀԱՆՁՆԱԺՈՂՈՎԻ ԳՈՐԾՈՒՆԵՈՒԹՅԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Ղեկավարվելով «Հայաստանի Հանրապետության դատական օրենսգիրք» սահմանադրական օրենքի 74-րդ հոդվածի 5-րդ մասի 3-րդ կետով և 6-րդ մասով` Հայաստանի Հանրապետության դատավորների ընդհանուր ժողովը

ՈՐՈՇՈՒՄ Է

Հաստատել Հայաստանի Հանրապետության դատավորների ընդհանուր ժողովի ուսումնական հարցերի հանձնաժողովի գործունեության կարգը` համաձայն հավելվածի:

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

    ՎՃՌԱԲԵԿ ԴԱՏԱՐԱՆԻ ՆԱԽԱԳԱՀ               Ե. ԽՈՒՆԴԿԱՐՅԱՆ

2018 թ. նոյեմբերի 8

Երևան

Հավելված

Հայաստանի Հանրապետության

դատավորների ընդհանուր ժողովի

2018 թ. նոյեմբերի 8-ի

թիվ 04-Լ որոշման

ԿԱՐԳ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԴԱՏԱՎՈՐՆԵՐԻ ԸՆԴՀԱՆՈՒՐ ԺՈՂՈՎԻ ՈՒՍՈՒՄՆԱԿԱՆ ՀԱՐՑԵՐԻ ՀԱՆՁՆԱԺՈՂՈՎԻ ԳՈՐԾՈՒՆԵՈՒԹՅԱՆ

1. ՀՀ դատավորների ընդհանուր ժողովի ուսումնական հարցերի հանձնաժողովը.

1.1 Հայաստանի Հանրապետության դատավորների ընդհանուր ժողովի ուսումնական հարցերի հանձնաժողովը (այսուհետ` Հանձնաժողով) կազմված է նախագահից և վեց անդամից: Հանձնաժողովի նախագահն ընտրվում և փոփոխվում է «Հայաստանի Հանրապետության դատական օրենսգիրք» սահմանադրական օրենքի 78-րդ հոդվածի 1-ին մասով նախատեսված կարգով:

1.2 Հանձնաժողովի` «Հայաստանի Հանրապետության դատական օրենսգիրք» սահմանադրական օրենքով վերապահված լիազորությունների իրականացմանն օժանդակում է և Հանձնաժողովի նյութատեխնիկական ապահովումն իրականացնում է Դատական դեպարտամենտը:

1.3 Հանձնաժողովը կարող է ունենալ կլոր կնիք, որի վրա պատկերված է Հայաստանի Հանրապետության զինանշանը, շուրջը հայերեն լեզվով գրված է «Հայաստանի Հանրապետության դատավորների ընդհանուր ժողովի ուսումնական հարցերի հանձնաժողով» բառերը:

2. Հանձնաժողովի գործունեության ուղղությունները

2.1. «Հայաստանի Հանրապետության դատական օրենսգիրք» սահմանադրական օրենքի 78-րդ հոդվածի 3-րդ մասի 1-ին կետի համաձայն` Հանձնաժողովը քննարկում, նախապատրաստում, ապա հաստատում է ՀՀ դատավորների վերապատրաստման կարգը:

2.2. «Հայաստանի Հանրապետության դատական օրենսգիրք» սահմանադրական օրենքի 78-րդ հոդվածի 3-րդ մասի 2-րդ կետի և 104-րդ հոդվածի 3-րդ մասի համաձայն` Հանձնաժողովը քննարկում, ապա` Բարձրագույն դատական խորհրդին է ներկայացնում որակավորման գրավոր քննության աշխատանքների ստուգման և գնահատման նպատակով գնահատման հանձնաժողովի կազմում ընդգրկվող 10 դատավորի ըստ համապատասխան թեկնածության վերաբերյալ առաջարկություն` մասնագիտացումների:

2.3. «Հայաստանի Հանրապետության դատական օրենսգիրք» սահմանադրական օրենքի 104-րդ հոդվածի 9-րդ մասի համաձայն` Հանձնաժողովը որակավորման գրավոր քննության աշխատանքների ստուգման և գնահատման նպատակով ձևավորված գնահատման հանձնաժողովի համապատասխան անդամի լիազորությունները դադարեցնելու առաջարկով դիմում է Բարձրագույն դատական խորհրդին, եթե գնահատման հանձնաժողովի անդամի անաչառությունն անկողմնակալ դիտորդի մոտ կարող է հարուցել ողջամիտ կասկած:

2.4. «Հայաստանի Հանրապետության դատական օրենսգիրք» սահմանադրական օրենքի 78-րդ հոդվածի 3-րդ մասի 3-րդ կետի համաձայն` Հանձնաժողովը քննարկում, նախապատրաստում, ապա` Արդարադատության ակադեմիա է ներկայացնում «Արդարադատության ակադեմիայի մասին» ՀՀ օրենքի 19-րդ հոդվածի 4-րդ, 5-րդ և 6-րդ մասերով նախատեսված առարկայական կուրսերի կամ թեմաների վերաբերյալ առաջարկություններ:

2.5. «Արդարադատության ակադեմիայի մասին» ՀՀ օրենքի 8-րդ հոդվածի 2-րդ մասի համաձայն` Հանձնաժողովը կարող է անհրաժեշտության դեպքում Արդարադատության ակադեմիայի կառավարման խորհրդի արտահերթ նիստ հրավիրելու պահանջով դիմել Արդարադատության ակադեմիայի կառավարման խորհրդին:

2.6. Հանձնաժողովը քննարկում, նախապատրաստում, ապա` Արդարադատության ակադեմիա է ներկայացնում «Արդարադատության ակադեմիայի մասին» ՀՀ օրենքի 19-րդ հոդվածի 9-րդ մասով նախատեսված լրացուցիչ վերապատրաստման առարկայական կուրսերի կամ թեմաների վերաբերյալ առաջարկություններ, ինչպես նաև Արդարադատության ակադեմիայի ռեկտորին է ներկայացնում լրացուցիչ վերապատրաստման ունկնդիրների ցուցակը կամ թիրախային խումբը:

2.7. «Հայաստանի Հանրապետության դատական օրենսգիրք» սահմանադրական օրենքի 78-րդ հոդվածի 3-րդ մասի 4-րդ կետի համաձայն` Հանձնաժողովը քննարկում, նախապատրաստում, ապա` «Արդարադատության ակադեմիայի մասին» ՀՀ օրենքի 20-րդ հոդվածի 2-րդ մասի համաձայն յուրաքանչյուր տարի մինչև դեկտեմբերի 1-ը Արդարադատության ակադեմիա է ներկայացնում հաջորդ տարվա ընթացքում վերապատրաստման ենթակա անձանց ցուցակը` համապատասխան առարկայական կուրսերի ընտրության նշումով:

2.8. Հանձնաժողովը` «Արդարադատության ակադեմիայի մասին» ՀՀ օրենքի 20-րդ հոդվածի 7-րդ մասի համաձայն` ապահովում է ՀՀ դատավորների և դատավորների թեկնածուների ցուցակում ընդգրկված անձանց ծանուցումը` ուսումնական դասընթացներին ներկայանալու վերաբերյալ:

2.9. Հանձնաժողովը` «Արդարադատության ակադեմիայի մասին» ՀՀ օրենքի 21-րդ հոդվածի 6-րդ մասի համաձայն` Արդարադատության ակադեմիայի վերապատրաստման ծրագրերի առարկայական կուրսերի շրջանակում կարող է սահմանել դատավորների, դատավորների թեկնածուների ցուցակում ընդգրկված անձանց առանձին խմբերի համար պարտադիր առարկայական կուրսեր:

2.10. Հանձնաժողովը քննարկում, ապա` սահմանում է «Հայաստանի Հանրապետության դատական օրենսգիրք» սահմանադրական օրենքի 78-րդ հոդվածի 3-րդ մասի 5-րդ կետով նախատեսված` դատավորների, դատավորների թեկնածուների հավակնորդների և դատավորների թեկնածուների ուսումնառության ժամաքանակը:

2.11. «Հայաստանի Հանրապետության դատական օրենսգիրք» սահմանադրական օրենքի 78-րդ հոդվածի 3-րդ մասի 6-րդ կետի և «Արդարադատության ակադեմիայի մասին» ՀՀ օրենքի 24-րդ հոդվածի 1-ին մասի համաձայն` մասնագիտական պատրաստման դասընթացները սկսելուց հետո` երկշաբաթյա ժամկետում Հանձնաժողովը քննարկում, նախապատրաստում, ապա Արդարադատության ակադեմիա է ներկայացնում այդ տարվա ունկնդիրների փորձաշրջանի կազմակերպման համար համապատասխան դատարանների և փորձաշրջանի ղեկավարների անունները և պաշտոնները` հիմք ընդունելով այդ ուսումնական տարվա ունկնդիրների մասնագիտացումները:

2.12. «Արդարադատության ակադեմիայի մասին» ՀՀ օրենքի 24-րդ հոդվածի 1-ին մասի 1.1. կետի համաձայն` «Հայաստանի Հանրապետության դատական օրենսգիրք» սահմանադրական օրենքի 106-րդ հոդվածի 1-ին մասով և 123-րդ հոդվածի 6-րդ մասի 3-րդ կետով սահմանված անձանց փորձաշրջանի ղեկավարների վերաբերյալ տեղեկությունները Հանձնաժողովն Արդարադատության ակադեմիա է ներկայացնում համապատասխան ցուցակի հաստատման պահից տասնօրյա ժամկետում:

2.13. «Արդարադատության ակադեմիայի մասին» ՀՀ օրենքի 24-րդ հոդվածի 2-րդ մասի համաձայն` Հանձնաժողովը ռեկտորի խնդրանքով կարող է նշանակել փորձաշրջանի այլ ղեկավար:

2.14. Հանձնաժողովը քննարկում, նախապատրաստում, ապա`

«Արդարադատության ակադեմիայի մասին» ՀՀ օրենքի 26-րդ հոդվածի 1-ին մասի համաձայն` Արդարադատության ակադեմիա է ներկայացնում դատավորների թեկնածուների հավակնորդների ցուցակում ընդգրկված անձանց մասնագիտական պատրաստման ընթացքում դասավանդվող առարկայական կուրսի արդյունքները գնահատելու համար Հանձնաժողովի կողմից իրենց համաձայնությամբ նշանակված, հինգ դատավորից բաղկացած գնահատման հանձնաժողովի կազմը:

2.15. Հանձնաժողովը քննարկում, նախապատրաստում, ապա` «Արդարադատության ակադեմիայի մասին» ՀՀ օրենքի 26-րդ հոդվածի 6-րդ մասի համաձայն` Արդարադատության ակադեմիա է ներկայացնում դատավորների թեկնածուների հավակնորդների ցուցակում ընդգրկված անձանց մասնագիտական պատրաստման քննությունների արդյունքների հետ կապված բողոքները քննելու և լուծելու համար Հանձնաժողովի կողմից իրենց համաձայնությամբ նշանակված, երկու դատավորից բաղկացած բողոքարկման հանձնաժողովի կազմը:

2.16. Հանձնաժողովը քննարկում է դատավորների կողմից «Հայաստանի Հանրապետության դատական օրենսգիրք» սահմանադրական օրենքի 59-րդ հոդվածով նախատեսված` այլ կրթական ծրագրերին մասնակցելու հետ կապված հարցեր` այդ թվում`

ա) դատավորի դիմումի առկայության դեպքում տալիս է «Հայաստանի Հանրապետության դատական օրենսգիրք» սահմանադրական օրենքի 59-րդ հոդվածի 1-ին մասով նախատեսված կրթական ծրագրերի, համաժողովների և իրավաբանների մասնագիտական այլ հավաքների մասնակցելու թույլտվություն: Համաձայնություն ստացած դատավորը համապատասխան ծրագրի, համաժողովի և մասնագիտական այլ հավաքի ավարտից հետո` տասնօրյա ժամկետում, Հանձնաժողովին հաշվետվություն է ներկայացնում դրա ընթացքում քննարկված հարցերի, ներկայացված զեկույցների, ուսումնասիրված փորձի և այլնի վերաբերյալ:

բ) համապատասխան հայտի առկայության դեպքում քննարկում է ներպետական և միջազգային կառույցների կողմից կազմակերպվող կրթական վերապատրաստման ծրագրերին, համաժողովներին և իրավաբանների մասնագիտական այլ հավաքներին ՀՀ դատավորների մասնակցության նպատակահարմարության հարցը:

գ) համապատասխան հայտի առկայության դեպքում ապահովում է ներպետական և միջազգային կառույցների կողմից կազմակերպվող կրթական վերապատրաստման ծրագրերին, համաժողովներին և իրավաբանների մասնագիտական այլ հավաքներին դատավորների մասնակցությունը:

դ) անհրաժեշտությունից ելնելով` դիմում է համապատասխան ներպետական և միջազգային կառույցներին` դատավորների վերապատրաստման նպատակով կրթական վերապատրաստման ծրագրերի, համաժողովների և իրավաբանների մասնագիտական այլ հավաքների կազմակերպման և անցկացման նպատակով:

ե) անհրաժեշտությունից ելնելով` դիմում է համապատասխան ներպետական և միջազգային կառույցներին` դատավորների վերապատրաստման կամ որոշակի բնագավառում դատավորների գիտելիքների խորացման համար անհրաժեշտ ուսումնական նյութերի, գիտագործնական վերլուծությունների, մեկնաբանությունների, թարգմանությունների և այլ նյութերի պատրաստման և հրատարակման նպատակով:

3. Հանձնաժողովի նիստերը

3.1. Հանձնաժողովի նիստերը հրավիրվում են Հանձնաժողովի նախագահի կամ Հանձնաժողովի անդամների նախաձեռնությամբ: Հանձնաժողովի նիստերը նախագահում է Հանձնաժողովի նախագահը: Հանձնաժողովի նախագահի բացակայության դեպքում Հանձնաժողովի ընթացիկ գործունեության ղեկավարումն իրականացնում է Հանձնաժողովի անդամների ձայների մեծամասնությամբ ընտրված Հանձնաժողովի նախագահի ժամանակավոր պաշտոնակատարը:

3.2. Հանձնաժողովի նիստի ժամանակը, վայրը որոշում է Հանձնաժողովի նախագահը:

3.3. Հանձնաժողովի նիստի օրակարգը որոշվում է Հանձնաժողովի նախագահի և անդամների կողմից:

3.4. Նիստերն անց են կացվում աշխատանքային օրերին և ժամերին: Բացառիկ դեպքերում, ելնելով հարցի հրատապությունից, նիստ կարող է հրավիրվել ոչ աշխատանքային օրերին և ժամերին:

3.5. Հանձնաժողովն իրավազոր է քվեարկությամբ որոշումներ ընդունել, եթե ներկա է Հանձնաժողովի առնվազն հինգ անդամ:

3.6. Հանձնաժողովի նիստերն արձանագրվում են: Նիստերի արձանագրությունը ստորագրում է Հանձնաժողովի նախագահը և նիստը քարտուղարը:

4. Ծանուցումը

4.1. Նիստի վայրի և ժամանակի մասին Հանձնաժողովի անդամները բանավոր (այդ թվում հեռախոսակապի միջոցով) ծանուցվում են: Ծանուցումից հետո սովորական փոստային առաքման միջոցով, առձեռն կամ էլեկտրոնային եղանակով Հանձնաժողովի անդամներին ուղարկվում է նիստի օրակարգը և անհրաժեշտ փաստաթղթերը:

5. Հանձնաժողովի որոշումները

5.1. Հանձնաժողովի որոշումն ընդունվում է բաց քվեարկությամբ: Որոշումն ընդունված է համարվում, եթե դրա օգտին քվեարկել է նիստին ներկա անդամների մեծամասնությունը: Հանձնաժողովի անդամն իրավունք չունի ձեռնպահ մնալ քվեարկությունից:

5.2. Հանձնաժողովի որոշումները, որպես կանոն, ընդունվում են Հանձնաժողովի առկա նիստում կազմակերպվող քվեարկությամբ:

5.3. Անհրաժեշտության դեպքում Հանձնաժողովի որոշումները կարող են ընդունվել նաև հեռակա քվեարկությամբ նիստ իրականացնելու միջոցով: Այս դեպքում քվեարկությունն իրականացվում է բանավոր (այդ թվում` հեռախոսակապի միջոցով): Հեռակա քվեարկությամբ նիստ իրականացնելու վերաբերյալ առաջարկ կարող է ներկայացնել Հանձնաժողովի նախագահը կամ անդամը: Հեռակա քվեարկությամբ նիստ չի իրականացվում և Հանձնաժողովի առկա նիստ է հրավիրվում, եթե հեռակա քվեարկությամբ նիստ իրականացնելու դեմ առարկում է Հանձնաժողովի նախագահը կամ անդամը: Հեռակա քվեարկությամբ նիստ իրականացնելու դեպքում կազմվում է արձանագրություն, որը ստորագրում են Հանձնաժողովի նախագահը և նիստը քարտուղարը:

5.4. Նիստին մասնակցելը Հանձնաժողովի յուրաքանչյուր ծանուցված անդամի պարտականությունն է: Բացակայություն թույլատրվում է միայն հարգելի պատճառով: Հանձնաժողովի յուրաքանչյուր անդամ պարտավոր է բացակայության մասին նախօրոք հայտնել Հանձնաժողովի նախագահին:

5.5. Հանձնաժողովի որոշումները ձևակերպվում են առանձին ակտի ձևով, որը ստորագրվում և կնքվում է Հանձնաժողովի նախագահի կողմից:

6. Գործունեության կարգի փոփոխումը (լրացումը)

6.1. Սույն Կարգը կարող է փոփոխվել (լրացվել) ՀՀ դատավորների ընդհանուր ժողովի կողմից: