040.1178.031114
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
30 հոկտեմբերի 2014 թվականի N 1178-Ն
i
ԱՐՏԱԿԱՐԳ ԻՐԱՎԻՃԱԿՆԵՐՈՒՄ ԱԶԳԱՅԻՆ ԳՐԱԴԱՐԱՆԱՅԻՆ ՀԱՎԱՔԱԾՈՒԻ ՏԱՐԱՀԱՆՄԱՆ ԵՎ ՊԱՇՏՊԱՆՈՒԹՅԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ
Համաձայն «Գրադարանների և գրադարանային գործի մասին» Հայաստանի Հանրապետության օրենքի 10-րդ հոդվածի 7-րդ մասի և 12-րդ հոդվածի 1-ին մասի 3-րդ կետի` Հայաստանի Հանրապետության կառավարությունը որոշում է.
1. Սահմանել արտակարգ իրավիճակներում ազգային գրադարանային հավաքածուի տարահանման և պաշտպանության կարգը` համաձայն հավելվածի:
2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2014 ԹՎԱԿԱՆԻ ՆՈՅԵՄԲԵՐԻ 3-ԻՆ
Հավելված
ՀՀ կառավարության
2014 թվականի հոկտեմբերի 30-ի
N 1178-Ն որոշման
ԿԱՐԳ
ԱՐՏԱԿԱՐԳ ԻՐԱՎԻՃԱԿՆԵՐՈՒՄ ԱԶԳԱՅԻՆ ԳՐԱԴԱՐԱՆԱՅԻՆ ՀԱՎԱՔԱԾՈՒԻ ՏԱՐԱՀԱՆՄԱՆ ԵՎ ՊԱՇՏՊԱՆՈՒԹՅԱՆ
I. ԸՆԴՀԱՆՈՒՐ ԴՐՈՒՅԹՆԵՐ
1. Սույն կարգով կարգավորվում են Հայաստանի Հանրապետության տարածքում արտակարգ իրավիճակներում ազգային գրադարանային հավաքածուի (այսուհետ` հավաքածու) տարահանման ու պաշտպանության միջոցառումների կազմակերպման և իրականացման հետ կապված հարաբերությունները:
2. Սույն կարգում օգտագործված են հետևյալ հիմնական հասկացությունները`
1) տիրապետող կազմակերպություն` հավաքածուի կազմում ընդգրկված արժեքները տիրապետող կազմակերպություն.
2) անվտանգ տարածք` վտանգավոր տարածքից դուրս գտնվող` հավաքածուի տեղաբաշխման և պահպանման համար նախապատրաստված տարածք.
3) պահպանման կազմակերպություն` Հայաստանի Հանրապետության տարածքում գտնվող` սահմանված կարգով ընտրված կազմակերպություն (կազմակերպություններ), որտեղ ապահովված են հավաքածուի պահպանության համար անհրաժեշտ` սույն կարգի 26-րդ կետի աղյուսակում ներկայացված բոլոր տեխնիկատնտեսական պայմանները.
4) լիազոր մարմին` մշակույթի բնագավառում Հայաստանի Հանրապետության կառավարության քաղաքականությունը մշակող և իրականացնող գործադիր իշխանության հանրապետական մարմին.
5) տարահանում` արտակարգ իրավիճակներում վտանգավոր տարածքից հավաքածուի կազմակերպված դուրսբերում և հավաքածուի պահպանման համար նախապատրաստված անվտանգ տարածքում ժամանակավոր տեղաբաշխում.
6) տարահանման երթուղի` տարահանվող հավաքածուն տիրապետող կազմակերպությունից մինչև պահպանման կազմակերպությունը և պահպանման կազմակերպությունից մինչև տիրապետող կազմակերպությունը միացնող ճանապարհ (ճանապարհահատված).
7) համապատասխան մասնագետ` տիրապետող կազմակերպության հավաքածուի փաթեթավորման և տարահանման համար պատասխանատու աշխատող.
8) փաթեթավորում` հավաքածուի մեկուսացումն արտակարգ իրավիճակներում առաջացած ֆիզիկական վնասակար ազդեցություններից.
9) վտանգավոր տարածք` հավաքածու ներառող որոշակի տարածք կամ օբյեկտ, որտեղ տեխնածին և տարերային աղետների (հրդեհ, խոշոր վթար, ուժգին փոթորիկ, երկրաշարժ, հեղեղում, սողանք) հետևանքով առաջացել կամ կարող են առաջանալ հավաքածուի վրա բացասաբար ազդող գործոններ.
10) մասնակի տարահանում` Հայաստանի Հանրապետության կառավարության 2013 թվականի նոյեմբերի 7-ի N 1230-Ա որոշմամբ հաստատված Ազգային գրադարանային հավաքածուի գրացուցակում ընդգրկված գրավոր հուշարձանների և փորձաքննությամբ արժևորված փաստաթղթերի տարահանում.
11) ընդհանուր տարահանում` հավաքածուի տարահանումն ամբողջությամբ:
3. Հավաքածուի տարահանումը և պաշտպանությունն անվտանգության ապահովման, արտակարգ իրավիճակներում դրանց դիմակայելու պատրաստության միջոցառումների գործընթացներ են, որոնք նախապես պլանավորվում են` հաշվի առնելով արտակարգ իրավիճակների տեսակը, չափերը, տարածվածությունը և հավաքածուի նկատմամբ դրանց վնասակար ազդեցության բնույթը: Տիրապետող կազմակերպությունում տարահանման նախապատրաստման և կատարման աշխատանքներն իրականացնում են տիրապետող կազմակերպության համապատասխան մասնագետները` կազմակերպության քաղաքացիական պաշտպանության պլանի կամ ժամանակացույցի հիման վրա: Հավաքածուի տարահանման միջոցառումների պլանավորման և իրականացման պատասխանատուն տիրապետող կազմակերպության ղեկավարը` քաղաքացիական պաշտպանության պետն է:
4. Ելնելով արտակարգ իրավիճակների հնարավոր ծավալի, սպառնալիքի տարածքային չափերից` հավաքածուի տարահանումը կարող է լինել մասնակի կամ ընդհանուր`
1) մասնակի տարահանման է ենթակա առավել արժեքավոր հավաքածուն` Հայաստանի Հանրապետության օրենսդրությամբ սահմանված գրավոր հուշարձանները և արժևորված փաստաթղթերը.
2) ընդհանուր տարահանման է ենթակա հավաքածուն ամբողջությամբ:
5. Անվտանգ տարածքները և դրանցում գտնվող պահպանման կազմակերպությունները նախապես ընտրվում են Հայաստանի Հանրապետության արտակարգ իրավիճակների նախարարության կողմից` համաձայնեցնելով լիազոր մարմնի հետ, և հաստատվում են Հայաստանի Հանրապետության կառավարության որոշմամբ:
6. Լիազոր մարմինը նախապես համապատասխան պայմանագրեր է կնքում ընտրված պահպանման կազմակերպությունների ղեկավարների հետ: Պայմանագրերի նախագծերը լիազոր մարմնի կողմից նախապես` աշխատանքային կարգով, հնարավոր սեղմ ժամկետում համաձայնեցվում են Հայաստանի Հանրապետության ֆինանսների նախարարության հետ:
7. Ելնելով տիրապետող կազմակերպության քաղաքացիական պաշտպանության պլանից կամ ժամանակացույցից` տիրապետող կազմակերպությունը պետք է ձեռնարկի միջոցներ ու կազմի պլաններ` արտակարգ իրավիճակներին դիմակայելու պատրաստվածության և դրանց պատճառած հետևանքների վերացման համար:
8. Արտակարգ իրավիճակներին դիմակայելու պատրաստվածության պլանավորման ժամանակ կիրառվում է փուլային մոտեցում`
1) ռիսկերի գնահատում` տիրապետող կազմակերպության և հավաքածուի համար վտանգավոր գործոնների հայտնաբերում.
2) կանխարգելիչ միջոցառումներ` միջոցառումների իրականացում, որոնք հնարավորինս կբացառեն կամ կնվազեցնեն վտանգը.
3) պատրաստվածություն` տիրապետող կազմակերպության քաղաքացիական պաշտպանության պլանի կամ ժամանակացույցի շրջանակներում տարահանման նախապատրաստման, արձագանքման ու վերականգնման գործողությունների մշակում.
4) արձագանքում` գործողություններ և դրանց իրականացման եղանակներ, որոնք անհրաժեշտ է կատարել արտակարգ իրավիճակների ժամանակ.
5) վերականգնման աշխատանքներ` արտակարգ իրավիճակների հետևանքով տիրապետող կազմակերպությունում առաջացած վթարների վերացում և վնասված հավաքածուի վերականգնում:
9. Հավաքածուի տարահանման գործընթացի փուլերն են`
1) տարահանվող հավաքածուի փաթեթավորում և տեղափոխում.
2) տարահանված հավաքածուի ընդունում և պահպանման ապահովում` անվտանգ տարածքում գտնվող պահպանման կազմակերպությունում.
3) պահպանման կազմակերպությունից տարահանված հավաքածուն տիրապետող կազմակերպությանը վերադարձնելը:
II. ՏԱՐԱՀԱՆՎՈՂ ՀԱՎԱՔԱԾՈՒԻ ՓԱԹԵԹԱՎՈՐՈՒՄԸ ԵՎ ՏԵՂԱՓՈԽՈՒՄԸ
10. Լիազոր մարմինը հավաքածուի տարահանման գործընթացն սկսում է իրականացնել Հայաստանի Հանրապետության վարչապետի որոշման հիման վրա:
11. Լիազոր մարմնի ղեկավարը կամ նրա հանձնարարությամբ` ոլորտը համակարգող լիազոր մարմնի ղեկավարի տեղակալը, տիրապետող կազմակերպությունների ղեկավարների մասնակցությամբ, անցկացնում է խորհրդակցություն, իրազեկում է ստեղծված իրավիճակի մասին և ճշգրտում հավաքածուի տարահանման պլանը:
12. Տարահանվող հավաքածուի փաթեթավորման համար անհրաժեշտ արկղերը, նյութերը և ծառայությունները ձեռք են բերվում Հայաստանի Հանրապետության պետական բյուջեի միջոցների հաշվին:
13. Փաթեթավորմամբ պետք է ապահովվի հավաքածուի մեկուսացումը մթնոլորտային ազդեցություններից ու միկրոօրգանիզմներից և պաշտպանվի մեխանիկական վնասվածքներից, որի համար նախատեսվում է պատրաստել հատուկ արկղ:
14. Տարահանվող հավաքածուն փաթեթավորող և տարահանող պատասխանատու աշխատողների խմբի միջոցով տեղավորվում է փաթեթավորման արկղերում: Փաթեթավորման յուրաքանչյուր արկղում դրվում է նաև տվյալ տիրապետող կազմակերպության ղեկավարի կողմից ստորագրված և հաստատված հավաքածուի ցանկը:
15. Փաթեթավորման յուրաքանչյուր արկղ փակվում է իր կափարիչի վրա դրված փականքներով, որից հետո արկղերը կնքվում են տիրապետող կազմակերպության կնիքով, և մեկ աշխատանքային օրում կազմվում են արկղերի հանձնման-ընդունման ակտերը` երեք օրինակից: Արկղերի վրա դրվում են համապատասխան համարանիշեր, որոնք ունենում են երեք գույն` կարմիր` առավել արժեքավոր հավաքածուի համար, կապույտ` արժեքավոր հավաքածուի համար, կանաչ` մնացած հավաքածուների համար:
16. Տարահանվող հավաքածուի ուղեկցման համար Հայաստանի Հանրապետության կառավարությանն առընթեր Հայաստանի Հանրապետության ոստիկանության պետի հրամանով առանձնացվում են Հայաստանի Հանրապետության կառավարությանն առընթեր Հայաստանի Հանրապետության ոստիկանության վերակարգեր:
17. Տարահանվող հավաքածուի համար պահանջվող լրացուցիչ տրանսպորտային միջոցները հատկացվում են, և վառելիքաքսուքային նյութերով ապահովումն իրականացվում է Հայաստանի Հանրապետության օրենսդրությամբ սահմանված կարգով:
18. Տարահանման ենթակա հավաքածուի բարձման և բեռնաթափման աշխատանքներն իր կազմակերպությունում կազմակերպում է տիրապետող կազմակերպության ղեկավարը:
19. Տիրապետող կազմակերպության ղեկավարը տրանսպորտային միջոցին կցում է պատասխանատու մեկ աշխատող, ում տրամադրում է հավաքածուի հանձնման-ընդունման ակտերի երեք օրինակը` պահպանման կազմակերպությունում հավաքածուի հանձնում-ընդունումը ձևակերպելու համար:
20. Տրանսպորտային միջոցին կցված պատասխանատու աշխատողը, համաձայն տարահանման երթուղու, հավաքածուն տրանսպորտային միջոցով տեղափոխում է անվտանգ տարածքում գտնվող պահպանման կազմակերպություն:
III. ՏԱՐԱՀԱՆՎԱԾ ՀԱՎԱՔԱԾՈՒԻ ԸՆԴՈՒՆՈՒՄԸ ԵՎ ՊԱՀՊԱՆՄԱՆ ԱՊԱՀՈՎՈՒՄԸ` ԱՆՎՏԱՆԳ ՏԱՐԱԾՔՈՒՄ ԳՏՆՎՈՂ ՊԱՀՊԱՆՄԱՆ ԿԱԶՄԱԿԵՐՊՈՒԹՅՈՒՆՈՒՄ
21. Պահպանման կազմակերպության ղեկավարը և նրա կողմից նշանակված պատասխանատու աշխատողներն ընդունում են բերված հավաքածուն` համաձայն տիրապետող կազմակերպության պատասխանատու աշխատողի կողմից ներկայացված ցուցակի:
22. Տիրապետող կազմակերպության պատասխանատու աշխատողը պահպանման կազմակերպության ղեկավարի հետ միասին կատարում է հավաքածուի հանձնման-ընդունման աշխատանքները: Տարահանված հավաքածուի հանձնման-ընդունման ակտերը` երեք օրինակից, ստորագրում են պահպանման կազմակերպության ղեկավարը և տիրապետող կազմակերպության պատասխանատու աշխատողը: Տարահանված հավաքածուի հանձնման-ընդունման ակտի մեկ օրինակը մնում է պահպանման կազմակերպությունում:
23. Տարահանված հավաքածուի արկղերն ստանալիս` պահպանման կազմակերպության ղեկավարն ստուգում է դրանց փականքների վրայի կնիքների անվնասությունը և անձեռնմխելիությունը: Դրանք վնասված լինելու դեպքում պահպանման կազմակերպության ղեկավարը հանձնման-ընդունման ակտում կատարում է համապատասխան նշում:
24. Տարահանված հավաքածուի տեղափոխումն իրականացրած տիրապետող կազմակերպության պատասխանատու աշխատողն իր ղեկավարին է ներկայացնում պահպանման հանձնված հավաքածուի հանձնման-ընդունման ակտի մյուս երկու օրինակները. դրանցից մեկը մնում է տիրապետող կազմակերպությունում, իսկ մյուս օրինակը տիրապետող կազմակերպության ղեկավարը ներկայացնում է լիազոր մարմին:
25. Պահպանման կազմակերպության ղեկավարը կազմակերպում է հավաքածուի տեղավորումը` դրանց պահպանության համար նախատեսված անվտանգ տարածքներում:
26. Պահպանման կազմակերպության ղեկավարն իր պատասխանատու աշխատողների միջոցով մշտապես հետևում է պահեստարաններում հավաքածուի համար անհրաժեշտ պայմանների պահպանմանը, որոնք ներկայացված են աղյուսակում.
Աղյուսակ
._______________________________________________________.
|Նյութը (նյութերի խումբը) |Ջերմաստիճանը|Խոնավությունը|
| |(oC) |(%) |
|____________________________|____________|_____________|
| 1 | 2 | 3 |
|____________________________|____________|_____________|
|Մետաղներ | +18 - +20 | մինչև 50 |
|____________________________|____________|_____________|
|Ապակի, էմալ, կերամիկա | +12 - +20 | 55-65 |
|____________________________|____________|_____________|
|Կիսաթանկարժեք քարեր | +15 - +18 | 50-55 |
|____________________________|____________|_____________|
|Փայտ | +15 - +18 | 50-60 |
|____________________________|____________|_____________|
|Գործվածք | +15 - +18 | 55-65 |
|____________________________|____________|_____________|
|Կաշի, մագաղաթ, մորթի | +16 - +18 | 50-60 |
|____________________________|____________|_____________|
|Ոսկոր, կոտոշ, կրիայի պատյան | +14 - +15 | 55-60 |
|____________________________|____________|_____________|
|Թուղթ | +17 - +19 | 50-55 |
|____________________________|____________|_____________|
|Յուղանկար | +12 - +18 | 60-70 |
|____________________________|____________|_____________|
|Սև-սպիտակ լուսանկարչություն| +12 | 40-50 |
|____________________________|____________|_____________|
|Գունավոր լուսանկարչություն | +5 | 40-50 |
._______________________________________________________.
27. Հայաստանի Հանրապետության կառավարությանն առընթեր Հայաստանի Հանրապետության ոստիկանությունը` լիազոր մարմնի միջնորդությամբ, կազմակերպում է պահպանման կազմակերպությունների ուժեղացված հսկում:
IV. ՀԱՎԱՔԱԾՈՒՆ ՊԱՀՊԱՆՄԱՆ ԿԱԶՄԱԿԵՐՊՈՒԹՅՈՒՆԻՑ ՏԻՐԱՊԵՏՈՂ ԿԱԶՄԱԿԵՐՊՈՒԹՅՈՒՆ ՎԵՐԱԴԱՐՁՆԵԼՈՒ ԳՈՐԾԸՆԹԱՑԸ
28. Արտակարգ իրավիճակների սպառնալիքի վերացման դեպքում, երբ հավաքածուին այլևս վտանգ չի սպառնում, հավաքածուն վերադարձվում է այն տիրապետող կազմակերպություն, որտեղից տարահանվել է:
29. Հավաքածուն տիրապետող կազմակերպություն վերադարձնելու մասին որոշումն ընդունում է Հայաստանի Հանրապետության վարչապետը:
30. Պահպանման կազմակերպության ղեկավարը և տիրապետող կազմակերպության պատասխանատու աշխատողը տեղում կազմում են հավաքածուի վերադարձման մասին հանձնման-ընդունման ակտ` երեք օրինակից, որն ստորագրում են պահպանման կազմակերպության ղեկավարը և տիրապետող կազմակերպության ղեկավարը: Անհրաժեշտության դեպքում ակտում կատարվում է նշում արկղերի վրայի կնիքների վիճակի մասին: Ակտի մեկ օրինակը մնում է պահպանման կազմակերպության ղեկավարի մոտ, երկրորդ օրինակը ներկայացվում է տիրապետող կազմակերպության ղեկավարին, իսկ երրորդ օրինակն ուղարկվում է լիազոր մարմին:
31. Տիրապետող կազմակերպության ղեկավարը հավաքածուով բեռնված տրանսպորտային միջոցի ժամանումից հետո կազմակերպում է արկղերի բեռնաթափումը, բացում է դրանք, համեմատում կազմված ակտի հետ և տեղադրում համապատասխան տեղերում: