ՌԱԶՄԱՏՐԱՆՍՊՈՐՏԱՅԻՆ ՊԱՐՏԱԿԱՆՈՒԹՅՈՒՆ ՈՒՆԵՑՈՂ ՄԱՐՄԻՆՆ ...

05.01.2024 -

040.1186.160910

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

9 սեպտեմբերի 2010 թվականի N 1186-Ն

ՌԱԶՄԱՏՐԱՆՍՊՈՐՏԱՅԻՆ ՊԱՐՏԱԿԱՆՈՒԹՅՈՒՆ ՈՒՆԵՑՈՂ ՄԱՐՄԻՆՆԵՐԻՆ ՊԱՏԿԱՆՈՂ ՏՐԱՆՍՊՈՐՏԱՅԻՆ ՄԻՋՈՑՆԵՐԻ ՆԵՐԳՐԱՎՄԱՆ ԺԱՄԱՆԱԿԱՀԱՏՎԱԾՈՒՄ ՏՐԱՆՍՊՈՐՏԱՅԻՆ ՄԻՋՈՑՆԵՐԻ ՕԳՏԱԳՈՐԾՄԱՆ, ՏՐԱՆՍՊՈՐՏԱՅԻՆ ՄԻՋՈՑՆԵՐԻՆ ՀԱՍՑՎԱԾ ՆՅՈՒԹԱԿԱՆ ՎՆԱՍԻ, ԻՍԿ ԽԱՂԱՂ ԺԱՄԱՆԱԿ ՆԱԵՎ ԲԱՑ ԹՈՂՆՎԱԾ ՕԳՈՒՏԻ ՀԱՄԱՐԺԵՔ ՓՈԽՀԱՏՈՒՑՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

Ղեկավարվելով «Պաշտպանության մասին» Հայաստանի Հանրապետության օրենքի 28-րդ հոդվածի 4-րդ մասով` Հայաստանի Հանրապետության կառավարությունը որոշում է.

1. Հաստատել ռազմատրանսպորտային պարտականություն ունեցող մարմիններին պատկանող տրանսպորտային միջոցների ներգրավման ժամանակահատվածում տրանսպորտային միջոցների օգտագործման, տրանսպորտային միջոցներին հասցված նյութական վնասի, իսկ խաղաղ ժամանակ նաև բաց թողնված օգուտի համարժեք փոխհատուցման կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

(նախաբանը փոփ. 16.09.2021 թիվ 1509-Ն որոշում)

ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ

2010 ԹՎԱԿԱՆԻ ՍԵՊՏԵՄԲԵՐԻ 16-ԻՆ

Հավելված

ՀՀ կառավարության

2010 թվականի սեպտեմբերի 9-ի

N 1186-Ն որոշման

ԿԱՐԳ

ՌԱԶՄԱՏՐԱՆՍՊՈՐՏԱՅԻՆ ՊԱՐՏԱԿԱՆՈՒԹՅՈՒՆ ՈՒՆԵՑՈՂ ՄԱՐՄԻՆՆԵՐԻՆ ՊԱՏԿԱՆՈՂ ՏՐԱՆՍՊՈՐՏԱՅԻՆ ՄԻՋՈՑՆԵՐԻ ՆԵՐԳՐԱՎՄԱՆ ԺԱՄԱՆԱԿԱՀԱՏՎԱԾՈՒՄ ՏՐԱՆՍՊՈՐՏԱՅԻՆ ՄԻՋՈՑՆԵՐԻ ՕԳՏԱԳՈՐԾՄԱՆ, ՏՐԱՆՍՊՈՐՏԱՅԻՆ ՄԻՋՈՑՆԵՐԻՆ ՀԱՍՑՎԱԾ ՆՅՈՒԹԱԿԱՆ ՎՆԱՍԻ, ԻՍԿ ԽԱՂԱՂ ԺԱՄԱՆԱԿ ՆԱԵՎ ԲԱՑ ԹՈՂՆՎԱԾ ՕԳՈՒՏԻ ՀԱՄԱՐԺԵՔ ՓՈԽՀԱՏՈՒՑՄԱՆ

1. Սույն կարգով կարգավորվում են ռազմատրանսպորտային պարտականություն ունեցող մարմիններին պատկանող տրանսպորտային միջոցների ներգրավման ժամանակահատվածում տրանսպորտային միջոցների օգտագործման, տրանսպորտային միջոցներին հասցված նյութական վնասի, իսկ խաղաղ ժամանակ նաև բաց թողնված օգուտի համարժեք փոխհատուցում տալու հետ կապված հարաբերությունները:

2. Ռազմատրանսպորտային պարտականություն ունեցող մարմիններին պատկանող տրանսպորտային միջոցների ներգրավման ժամանակահատվածում տրանսպորտային միջոցների օգտագործման, տրանսպորտային միջոցներին հասցված նյութական վնասի, իսկ խաղաղ ժամանակ նաև բաց թողնված օգուտի համարժեք փոխհատուցումն իրականացվում է Հայաստանի Հանրապետության պաշտպանության նախարարության կողմից` Հայաստանի Հանրապետության պետական բյուջեով այդ նպատակների համար նախատեսված միջոցների հաշվին:

3. Եթե Հայաստանի Հանրապետության տվյալ տարվա պետական բյուջեի մասին Հայաստանի Հանրապետության օրենքով ռազմատրանսպորտային պարտականություն ունեցող մարմիններին պատկանող տրանսպորտային միջոցների օգտագործման, տրանսպորտային միջոցներին հասցված նյութական վնասի, իսկ խաղաղ ժամանակ նաև բաց թողնված օգուտի համարժեք փոխհատուցման համար ֆինանսական միջոցներ նախատեսված չեն, ապա այդ փոխհատուցումն իրականացվում է եռամսյակային կտրվածքով` տվյալ եռամսյակում ներգրավված տրանսպորտային միջոցների օգտագործման, տրանսպորտային միջոցներին հասցված նյութական վնասի, իսկ խաղաղ ժամանակ նաև բաց թողնված օգուտի վերաբերյալ սույն կարգի 9-րդ կետի համաձայն կազմված արձանագրությունների հիման վրա Հայաստանի Հանրապետության պաշտպանության նախարարության կողմից մշակված և սահմանված կարգով Հայաստանի Հանրապետության կառավարության քննարկմանը ներկայացված` Հայաստանի Հանրապետության պետական բյուջեով նախատեսված Հայաստանի Հանրապետության կառավարության պահուստային ֆոնդից գումար հատկացնելու մասին Հայաստանի Հանրապետության կառավարության որոշման հիման վրա:

4. Խաղաղ ժամանակ տրանսպորտային միջոցը ներգրավելիս` ռազմատրանսպորտային պարտականություն ունեցող մարմնին (բացառությամբ պետական մարմինների) տրանսպորտային միջոցի օգտագործման յուրաքանչյուր լրիվ օրվա դիմաց տրվում է համարժեք փոխհատուցում` համապատասխան տրանսպորտային միջոցի վարձակալության ուղղությամբ (առանց վարորդի և վառելիքաքսուքային նյութերի ծախսի ներառման) ձևավորված շուկայական միջին արժեքով:

(4-րդ կետը փոփ. 04.01.2024 թիվ 10-Ն որոշում)

5. Խաղաղ ժամանակ տրանսպորտային միջոցի ներգրավման ժամանակահատվածում տրանսպորտային միջոցին հասցված նյութական վնասի դեպքում տրվում է համարժեք փոխհատուցում, կամ հասցված վնասը վերականգնվում է Հայաստանի Հանրապետության պաշտպանության նախարարության ուժերով, և տրանսպորտային միջոցը ռազմատրանսպորտային պարտականություն ունեցող մարմին վերադարձվում է տեխնիկապես սարքին ու շահագործման համար պիտանի վիճակում` տրանսպորտային միջոցը ներգրավելիս կազմված տրանսպորտային միջոցի տեխնիկական վիճակի ակտին համապատասխան: Ռազմատրանսպորտային պարտականություն ունեցող պետական մարմիններին պատկանող տրանսպորտային միջոցներին հասցված նյութական վնասի դեպքում փոխհատուցում չի տրվում, իսկ հասցված վնասը վերականգնվում է Հայաստանի Հանրապետության պաշտպանության նախարարության ուժերով:

6. Սույն կարգի 5-րդ կետում նշված նյութական վնասի չափը որոշվում է Հայաստանի Հանրապետության քաղաքացիական օրենսգրքի 17-րդ հոդվածի պահանջներին համապատասխան` տրանսպորտային միջոցին հասցված նյութական վնասի կամ տեխնիկական անսարքությունների վերացման ուղղությամբ ձևավորված շուկայական միջին արժեքով:

(6-րդ կետը փոփ. 04.01.2024 թիվ 10-Ն որոշում)

6.1. Սույն կարգի 4-րդ և 5-րդ կետերի համաձայն համարժեք փոխհատուցման չափը որոշվում է Հայաստանի Հանրապետության տարածքային կառավարման և ենթակառուցվածքների նախարարության պետական գույքի կառավարման կոմիտեի «Գույքի գնահատման և աճուրդի կենտրոն» պետական ոչ առևտրային կազմակերպության (այսուհետ` կենտրոն) կողմից, որի նպատակով Հայաստանի Հանրապետության պաշտպանության նախարարությունը կենտրոն է ներկայացնում տրանսպորտային միջոցը ներգրավելիս կազմված տրանսպորտային միջոցի տեխնիկական վիճակի ակտի և սույն կարգի 9-րդ կետով նախատեսված արձանագրության պատճենները:

(6.1-ին կետը լրաց. 04.01.2024 թիվ 10-Ն որոշում)

7. Խաղաղ ժամանակ տրանսպորտային միջոցի ներգրավման ժամանակահատվածում ռազմատրանսպորտային պարտականություն ունեցող մարմնին (բացառությամբ պետական մարմինների) փոխհատուցվում է նաև բաց թողնված օգուտը` այն չստացված եկամուտները, որոնք նշված մարմինը կստանար քաղաքացիական շրջանառության սովորական պայմաններում տրանսպորտային միջոցն օգտագործելու դեպքում: Այդ նպատակով ռազմատրանսպորտային պարտականություն ունեցող մարմինը Հայաստանի Հանրապետության պաշտպանության նախարարություն է ներկայացնում բաց թողնված օգուտը հիմնավորող համապատասխան փաստաթղթեր:

8. Խաղաղ ժամանակ սույն կարգով նախատեսված տրանսպորտային միջոցների օգտագործման, տրանսպորտային միջոցներին հասցված նյութական վնասի, իսկ խաղաղ ժամանակ նաև բաց թողնված օգուտը համարժեք փոխհատուցվում է բանկային փոխանցմամբ:

9. Ներգրավված տրանսպորտային միջոցը ռազմատրանսպորտային պարտականություն ունեցող մարմնին վերադարձնելու օրը կազմվում է արձանագրություն` երկու օրինակից, որում նշվում են տրանսպորտային միջոցի օգտագործման ժամանակահատվածը, տրանսպորտային միջոցին նյութական վնաս հասցված լինելու դեպքում` վնաս հասցված տրանսպորտային միջոցի մասերի, սարքավորումների կամ հանգույցների ցանկը և վնասվածքների բնույթը, հասցված նյութական վնասի դիմաց համարժեք փոխհատուցում տալու կամ հասցված վնասը Հայաստանի Հանրապետության պաշտպանության նախարարության ուժերով և միջոցներով վերականգնելու հնարավորությունը, ինչպես նաև բաց թողնված օգուտը հիմնավորող փաստաթղթեր ներկայացված լինելու դեպքում` այդ փաստաթղթերում առկա տեղեկատվությունը: Կազմված արձանագրության երկու օրինակներն ստորագրվում են Հայաստանի Հանրապետության պաշտպանության նախարարության իրավասու պաշտոնատար անձի և ռազմատրանսպորտային պարտականություն ունեցող մարմնի ներկայացուցչի կողմից:

(9-րդ կետը փոփ. 04.01.2024 թիվ 10-Ն որոշում)

10. Սույն կարգի պահանջների համաձայն տրանսպորտային միջոցի օգտագործման և տրանսպորտային միջոցին հասցված նյութական վնասի, ինչպես նաև բաց թողնված օգուտի փոխհատուցումն իրականացվում է ներգրաված տրանսպորտային միջոցը ռազմատրանսպորտային պարտականություն ունեցող մարմնին վերադարձնելու օրվանից հետո ոչ ուշ, քան 90 օրացուցային օրվա ընթացքում` հաշվի առնելով սույն կարգի 3-րդ կետի պահանջները: Փոխհատուցման պայմանների և չափի հետ համաձայն չլինելու դեպքում` ռազմատրանսպորտային պարտականություն ունեցող մարմինը կարող է դիմել դատարան:

(10-րդ կետը փոփ. 04.01.2024 թիվ 10-Ն որոշում)

11. Ռազմական դրության ժամանակ ռազմատրանսպորտային պարտականություն ունեցող մարմիններին պատկանող տրանսպորտային միջոցների ներգրավման ժամանակահատվածում տրանսպորտային միջոցների օգտագործման և տրանսպորտային միջոցներին հասցված նյութական վնասի համարժեք փոխհատուցումն իրականացվում է Հայաստանի Հանրապետության կառավարության 2007 թվականի օգոստոսի 9-ի N 905-Ն և 2007 թվականի հուլիսի 19-ի N 832-Ն որոշումներով սահմանված կարգով: