ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԸ ԿԱՐԳԱՎՈՐՈՂ ՀԱՆՁՆԱԺՈՂՈՎ
ՈՐՈՇՈՒՄ
30 ապրիլի 2008 թվականի N 220
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԸ ԿԱՐԳԱՎՈՐՈՂ ՀԱՆՁՆԱԺՈՂՈՎԻ 2007 ԹՎԱԿԱՆԻ ՀՈՒԼԻՍԻ 6-Ի N 298-Ն ՈՐՈՇՄԱՆ ՊԱՇՏՈՆԱԿԱՆ ՊԱՐԶԱԲԱՆՄԱՆ ՄԱՍԻՆ
Հիմք ընդունելով «Իրավական ակտերի մասին» Հայաստանի Հանրապետության օրենքի 87-րդ հոդվածի 2-րդ մասի գ) կետը` Հայաստանի Հանրապետության հանրային ծառայությունները կարգավորող հանձնաժողովը որոշում է.
1. Պաշտոնապես պարզաբանել, որ`
1) Հայաստանի Հանրապետության հանրային ծառայությունները կարգավորող հանձնաժողովի 2007 թվականի հուլիսի 6-ի «Էլեկտրական էներգիայի մատակարարման (Մատակարար-Սպառող (բնակիչ)) պայմանագրի օրինակելի ձևը հաստատելու մասին» N 298-Ն որոշման (այսուհետ` Որոշում) 2-րդ կետով սահմանված` բնակիչների հետ կնքված էլեկտրական էներգիայի մատակարարման պայմանագրերի (այսուհետ` պայմանագիր) Որոշման 1-ին կետով հաստատված պայմանագրերի օրինակելի ձևերին համապատասխանեցման պարտականությունը «Հայաստանի էլեկտրական ցանցեր» փակ բաժնետիրական ընկերության պարտականությունն է, որը պայմանագրերի վերակնքումն իրականացնում է իր համապատասխան ներկայացուցիչների` բնակիչներին այցելության միջոցով, ինչը չի սահմանափակում բնակիչների իրավունքը` իրենց ցանկության դեպքում այցելելու «Հայաստանի էլեկտրական ցանցեր» փակ բաժնետիրական ընկերության իրենց սպասարկող ստորաբաժանումներ` պայմանագրերի վերակնքման նպատակով.
2) «Հայաստանի էլեկտրական ցանցեր» փակ բաժնետիրական ընկերության կողմից պայմանագրերի վերակնքման համար հիմք են հանդիսանում սպառողների հետ նախկինում կնքված պայմանագրերը, և լրացուցիչ փաստաթղթեր չեն պահանջվում.
3) էլեկտրամատակարարվող տարածքի սեփականատիրոջ փոփոխության դեպքում սահմանված կարգով կնքվում են նոր պայմանագրեր: