06.04.2025 -
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՕՐԵՆՔԸ
Ընդունված է 2025 թվականի մարտի 5-ին
«ՆԱԽԱԴՊՐՈՑԱԿԱՆ ԿՐԹՈՒԹՅԱՆ ՄԱՍԻՆ» ՕՐԵՆՔՈՒՄ ԼՐԱՑՈՒՄՆԵՐ ԵՎ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ
i
Հոդված 1. «Նախադպրոցական կրթության մասին» 2005 թվականի նոյեմբերի 15-ի ՀՕ-236-Ն օրենքի (այսուհետ` Օրենք) 3-րդ հոդվածի 1-ին մասում`
1) 2-րդ կետը «ուսումնական բեռնվածության առավելագույն ծավալը» բառերից հետո լրացնել «(զարգացման ոլորտներով պայմանավորված վերջնարդյունքները)» բառերով.
2) 4-րդ կետը շարադրել հետևյալ խմբագրությամբ.
«4) նախադպրոցական այլընտրանքային կրթական ծրագիր` նախադպրոցական կրթության նպատակների իրականացմանն ուղղված, սաների տարիքային առանձնահատկություններին համապատասխան` ուսումնական պարապմունքների, ուսուցման և դաստիարակության կազմակերպման ձևերի բազմազանություն առաջարկող, զարգացման որևէ ոլորտի գերակայմամբ կամ հիմնական ծրագրից առնվազն երկու բաղադրիչով տարբերվող նախադպրոցական կրթական ծրագիր, որն ապահովում է նախադպրոցական պետական կրթական չափորոշչով սահմանված վերջնարդյունքները.».
3) 15-րդ կետի «երաշխավորած» բառը փոխարինել «հաստատած» բառով.
4) լրացնել հետևյալ բովանդակությամբ 15.1-ին կետով.
«15.1) նախադպրոցական ծառայության կրթական ծրագիր` նախադպրոցական հիմնական ծրագրի մեկ կամ մի քանի բաղադրիչների ներառմամբ կազմված կամ հիմնական ծրագրի ծավալի առավելագույնը 2/3-ը ներառող ծրագիր, որը մասնակիորեն ապահովում է նախադպրոցական պետական կրթական չափորոշչով սահմանված վերջնարդյունքները.».
5) 21-րդ կետը «միջոցառումներ» բառից հետո լրացնել «, որոնք հանդիսանում են նախադպրոցական կրթական ծրագրերի և նախադպրոցական ծառայությունների ծրագրերի անբաժանելի մասեր» բառերով.
6) 23-րդ կետը շարադրել հետևյալ խմբագրությամբ.
«23) մանկավարժական աշխատող` դաստիարակության և ուսուցման մեթոդների կիրառման միջոցով սաների կողմից նախադպրոցական կրթական (այդ թվում` լրացուցիչ) ծրագրերի յուրացմանը, համապատասխան գիտելիքի և հմտությունների ձեռքբերմանը, արժեքային համակարգի և դիրքորոշման ձևավորմանը նպաստող, նախադպրոցական կրթության պետական կրթական չափորոշչի պահանջներն ու սաների խնամքն ապահովող նախադպրոցական ուսումնական հաստատության աշխատող.».
7) լրացնել հետևյալ բովանդակությամբ 25-րդ և 26-րդ կետերով.
«25) դաստիարակ` նախադպրոցական ուսումնական հաստատությունում սաների առողջության պահպանման և ամրապնդման, խնամքի, սաների կողմից նախադպրոցական կրթական ծրագրերի յուրացումն ապահովող և այդ գործընթացի համար անմիջականորեն պատասխանատու մանկավարժական աշխատող.
26) մենթոր հաստատություն` կրթության պետական կառավարման լիազորված մարմնի ընտրած նախադպրոցական ուսումնական հաստատություն, որը վերապատրաստումների, խորհրդատվությունների և մշտադիտարկումների իրականացման միջոցով նպաստում է նախադպրոցական կրթության պետական չափորոշչի և նախադպրոցական կրթական հիմնական ծրագրերի ներդրմանը, մանկավարժական աշխատողների մասնագիտական զարգացմանը:»:
i
Հոդված 2. Օրենքի 7-րդ հոդվածում 6-րդ մասի 8-րդ կետի «աշխատակիցների» բառը փոխարինել «աշխատողների» բառով:
i
Հոդված 3. Օրենքի 10-րդ հոդվածում`
1) 1-ին մասը շարադրել հետևյալ խմբագրությամբ.
«1. Նախադպրոցական կրթության պետական կրթական չափորոշիչը ներառում է`
1) նախադպրոցական կրթության ավարտին ակնկալվող կարողունակությունները.
2) նախադպրոցական տարիքի երեխաների զարգացման ոլորտներով սահմանված վերջնարդյունքները` ըստ տարիքային խմբերի.
3) նախադպրոցական կրթական ծրագրերի բովանդակությունը. ուսումնադաստիարակչական հիմնական ուղղությունները և, դրանցով պայմանավորված, կրթական ծրագրի բաղադրիչները.
4) նախադպրոցական ուսումնական հաստատությունում սաներին զարգացնող միջավայրի չափանիշները:».
2) լրացնել հետևյալ բովանդակությամբ 5-րդ մասով.
«5. Նախադպրոցական կրթության պետական կրթական չափորոշչով սահմանված` կրթության բովանդակության հասանելի մակարդակն ապահովվում է կրթության պետական կառավարման լիազորված մարմնի հաստատած նախադպրոցական կրթական ծրագրերի (հիմնական, այլընտրանքային) միջոցով:»:
i
Հոդված 4. Օրենքի 11-րդ հոդվածի 2-րդ մասը շարադրել հետևյալ խմբագրությամբ.
«2. Նախադպրոցական կրթական ծրագրերի բովանդակությունը ներկայացվում է ոլորտային վերջնարդյունքների ապահովմանը միտված զարգացման հետևյալ ուղղություններով.
1) սանի ֆիզիկական զարգացում, առողջ ապրելակերպի վերաբերյալ պատկերացումների և առողջ կենսակերպին միտված սովորությունների ձևավորում.
2) խոսքի և հաղորդակցման, լեզվամտածողության, տրամաբանության, մաթեմատիկական տարրական պատկերացումների զարգացում, գրաճանաչության նախապատրաստում.
3) ճանաչողության զարգացում, փորձարարության և հնարամտության խթանում, խաղային գործունեության խրախուսում.
4) ազգային ինքնության, սեփական և այլոց իրավունքների և պարտականությունների մասին տարրական պատկերացումների ձևավորում.
5) ուսման նկատմամբ վերաբերմունքի ձևավորում.
6) անձնային աճ, հուզակամային ոլորտի զարգացում, համատեղ գործունեության և համագործակցության խթանում, սոցիալականացում.
7) հիգիենիկ և ինքնասպասարկման կարողությունների, անվտանգ կենսագործունեության, կյանքի հմտությունների ձևավորում:»:
i
Հոդված 5. Օրենքի 14-րդ հոդվածի 1-ին մասի 3-րդ կետը շարադրել հետևյալ խմբագրությամբ.
«3) տնօրենը, մեթոդիստը (տնօրենի ուսումնական գծով տեղակալը), մասնաճյուղի ղեկավարը, դաստիարակը, դաստիարակի օգնականը, հոգեբանը, հատուկ մանկավարժը, սոցիալական մանկավարժը, ֆիզկուլտուրայի հրահանգիչը, երաժշտության դաստիարակը, բուժաշխատողը, լրացուցիչ կրթական ծառայության մանկավարժը և այլ մանկավարժական աշխատողներ:»:
i
Հոդված 6. Օրենքի 17-րդ հոդվածում`
1) լրացնել հետևյալ բովանդակությամբ 1.1-ին մասով.
«1.1. Նախադպրոցական ուսումնական հաստատության դաստիարակի պաշտոն զբաղեցնողը պետք է համապատասխանի կրթության պետական կառավարման լիազորված մարմնի սահմանած` նախադպրոցական ուսումնական հաստատությունների մանկավարժական աշխատողների անվանացանկով և պաշտոնների նկարագրով դաստիարակի պաշտոնի համար սահմանված որակավորման պահանջներին կամ ունենա միջին կամ բարձրագույն մանկավարժական կրթություն և հատուկ դասընթացի միջոցով (այսուհետ` մոդուլ) ձեռք բերի նախադպրոցական մանկավարժության, հոգեբանության և ուսումնամեթոդական հմտություններ ապահովող առնվազն 20 կրեդիտ:».
2) լրացնել հետևյալ բովանդակությամբ 5-րդ մասով.
«5. Սույն հոդվածի 1.1-ին մասով սահմանված կրեդիտներ կարող է տալ մանկավարժի որակավորում շնորհող միջին մասնագիտական կամ բարձրագույն ուսումնական հաստատությունը` կրթության պետական կառավարման լիազորված մարմնի երաշխավորած մոդուլով:»:
i
Հոդված 7. Օրենքի 19-րդ հոդվածի 3-րդ մասը «մանկավարժական» բառից հետո լրացնել «կամ գիտամանկավարժական» բառերով:
i
Հոդված 8. Օրենքի 21-րդ հոդվածի 3-րդ մասը շարադրել հետևյալ խմբագրությամբ.
«3. Ոչ պետական նախադպրոցական ուսումնական հաստատություններն իրավաբանական անձի կարգավիճակ ունեցող կազմակերպություններ են:»:
i
Հոդված 9. Օրենքի 23-րդ հոդվածի 1-ին մասի 9-րդ կետը շարադրել հետևյալ խմբագրությամբ.
«9) սահմանում է պետական և համայնքային նախադպրոցական ուսումնական հաստատությունների օրինակելի հաստիքացուցակը, մանկավարժական և վարչատնտեսական աշխատողների վարձատրության խմբերի դասակարգման չափանիշները.»:
i
Հոդված 10. Օրենքի 24-րդ հոդվածի 1-ին մասում`
1) 4-րդ կետը շարադրել հետևյալ խմբագրությամբ.
«4) հաստատում է նախադպրոցական կրթական և նախադպրոցական ծառայությունների ծրագրերը.».
2) 6-րդ կետի «տնօրենների և մանկավարժական աշխատողների» բառերը փոխարինել «տնօրենների, մանկավարժական աշխատողների և դաստիարակի օգնականի» բառերով.
3) 17-րդ կետը շարադրել հետևյալ խմբագրությամբ.
«17) սահմանում է նախադպրոցական կրթական ծրագրերի (այդ թվում` այլընտրանքային, լրացուցիչ և նախադպրոցական ծառայությունների), ուսումնական նյութերի` նախադպրոցական կրթության պետական կրթական չափորոշչին համապատասխանության փորձաքննության կարգը.».
4) 18-րդ կետն ուժը կորցրած ճանաչել.
5) 24-րդ կետի «կարող է սահմանել» բառերը փոխարինել «սահմանում է» բառերով.
6) 25-րդ կետը «սահմանում է» բառերից հետո լրացնել «պետական և» բառերով.
7) լրացնել հետևյալ բովանդակությամբ 26-րդ և 27-րդ կետերով.
«26) հաստատում է մենթոր հաստատությունների ընտրության և մենթորական աշխատանքներ իրականացնողների գործառույթների սահմանման կարգը.
27) հաստատում է նախադպրոցական մանկավարժության, հոգեբանության և ուսումնամեթոդական հմտություններ ապահովող միջին մասնագիտական կամ բարձրագույն ուսումնական հաստատության կողմից իրականացվող մոդուլի երաշխավորման կարգը:»:
Հոդված 11.
1. Սույն օրենքն ուժի մեջ է մտնում պաշտոնական հրապարակման օրվան հաջորդող տասներորդ օրը:
2. Սույն օրենքով նախատեսված ենթաօրենսդրական նորմատիվ իրավական ակտերն ընդունվում են սույն օրենքն ուժի մեջ մտնելուց հետո` 12 ամսվա ընթացքում:
|
Հայաստանի Հանրապետության
Նախագահ |
Վ. Խաչատուրյան |
|
2025 թ. մարտի 26
Երևան
ՀՕ-57-Ն
|
|
Պաշտոնական հրապարակման օրը` 27 մարտի 2025 թվական: