ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
13 մարտի 2025 թվականի N 273-Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2017 ԹՎԱԿԱՆԻ ՀՈԿՏԵՄԲԵՐԻ 26-Ի N 1395-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ
Հիմք ընդունելով «Նորմատիվ իրավական ակտերի մասին» օրենքի 33-րդ և 34-րդ հոդվածները` Հայաստանի Հանրապետության կառավարությունը որոշում է.
1. Հայաստանի Հանրապետության կառավարության 2017 թվականի հոկտեմբերի 26-ի «ԴՆԹ-ի որոշման (ներառյալ` նմուշառման) կարգը և ժամկետները սահմանելու և Հայաստանի Հանրապետության կառավարության 2006 թվականի մարտի 9-ի N 351-Ն որոշման մեջ լրացում կատարելու մասին» N 1395-Ն որոշման մեջ կատարել հետևյալ փոփոխությունները և լրացումները`
1) վերնագրից հանել «ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2006 ԹՎԱԿԱՆԻ ՄԱՐՏԻ 9-Ի N 351-Ն ՈՐՈՇՄԱՆ ՄԵՋ ԼՐԱՑՈՒՄ ԿԱՏԱՐԵԼՈՒ» բառերը.
2) 2-րդ կետն ուժը կորցրած ճանաչել.
3) հավելվածի 2-րդ կետը շարադրել հետևյալ խմբագրությամբ`
«2. Փոխնակ մայրը, փոխնակ մորից ծնված երեխան և փոխնակ մոր միջոցով վերարտադրողականության օժանդակ տեխնոլոգիաներից օգտվող անձինք ենթակա են ԴՆԹ-ի (դեզօքսիռիբոնուկլեինաթթու) թեստավորման` օրենքով սահմանված դեպքերում:».
4) հավելվածը 2-րդ կետից հետո լրացնել հետևյալ բովանդակությամբ 2.1-ին կետով`
«2.1. ԴՆԹ-ի թեստավորում կարող է կատարվել նաև վերարտադրողական օժանդակ տեխնոլոգիաներից օգտվող` կենսաբանական ծնող հանդիսացող անձի ցանկությամբ` կենսաբանական ծնող լինելու փաստը հաստատելու նպատակով: Բուժման արդյունքով հղիությունն արձանագրելուց անմիջապես հետո վերարտադրողական օժանդակ տեխնոլոգիաներով բժշկական օգնություն և սպասարկում տրամադրող բժշկական կազմակերպությունը գրավոր տեղեկատվություն (իրազեկման թերթիկ) է տրամադրում վերարտադրողական օժանդակ տեխնոլոգիաներից օգտվող` կենսաբանական ծնող հանդիսացող անձի ԴՆԹ-ի որոշման (թեստավորման) հնարավորության վերաբերյալ, որի մասին նշում է կատարվում վերջինիս պատմագրում: Իրազեկման թերթիկը պարունակում է հետևյալ տեղեկատվությունը`
1) վերարտադրողական օժանդակ տեխնոլոգիաներով բժշկական օգնություն և սպասարկում տրամադրող բժշկական կազմակերպության անվանումը.
2) նշում այն մասին, որ վերարտադրողական օժանդակ տեխնոլոգիաների կիրառմամբ բժշկական օգնության և սպասարկման տրամադրման արդյունքում արձանագրվել է հղիություն.
3) պտղի կենսաբանական ծնող հանդիսացող անձի կամ անձանց անունը, ազգանունը, հայրանունը.
4) նշում համապատասխան լիցենզիա ունեցող բժշկական կազմակերպությունում ԴՆԹ-ի որոշման (թեստավորման) հնարավորության մասին.
5) բժշկական կազմակերպության տնօրենի անունը, ազգանունը և ստորագրությունը:».
5) հավելվածի 11-րդ կետում «2006 թվականի մարտի 9-ի N 351-Ն» բառերը փոխարինել «2019 թվականի ապրիլի 4-ի N 397-Ն» բառերով:
2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
Հայաստանի Հանրապետության
վարչապետ Ն. Փաշինյան
2025 թ. մարտի 13
Երևան
Պաշտոնական հրապարակման օրը` 13 մարտի 2025 թվական: